без плата – Kurir.mk

МАКЕДОНСКИ ПОШТИ БЕЗ ПЛАТА – над 2.000 вработени останаа без пари, директорот „моли“ да не организираат штрајк!

Дарко Андоновски — Wed, 21 Sep 2022 09:37:47 +0000

Македонски пошти се без плати, ова за КУРИР го сведочи вработен во институцијата кој вели дека директорот ги оставил втора недела без плати. „Законскиот рок за земање на платите во Македонски пошти е до 15-ти во месецот, но еве втора недела по ред плата се уште немаме“, вели нашиот извор. Тој додава дека Синдикатот на Македонски пошти бил на состанок со директорот Васко Стефанов, а тој на истиот ги молел да нема штрајк или протест на вработените и дека плата ќе имало до крајот на месецот, за август, а на почеток на октомври (што е речиси следната недела) вработените ќе добијат плата за месец септември. Претседателот на Синдикатот на Македонска пошта, Боро Велигденов во изјава за КУРИР вели дека имале средба со Управниот одбор и директорот, но од таму не дале одговор кога ќе имаат плата вработените. -Средба со Управниот одбор на Македонски пошти имавме, но од таму не ни посочија конкретен одговор кога ќе има плата за вработените. Од нас бараа да бидеме трпеливи, посочија и дека не се сигурни дали неделава ќе обезбедат пари за плати за вработените. Од таму ни дадоа уверение дека ќе биде се во ред, вели тој. Велигденов додава дека следниот чекор за нив како синдикално здружение се стапување во штрајк. - Согласно законските регулативи, Законот за работни односи и Законот за поштенски услуги ќе ги преземеме сите мерки за заштита на вработените, доколку не се реши овој проблем ќе бидеме приморени да стапиме во штрајк или протест. Ние стапивме во штрајк и пред четири месеци, но многу е тешко да се организира на ниво на цела Македонија каде имаме 15 подружници. Нормално нема да останеме неми на овој проблем, но повеќе детали за финансиската состојба на претпријатието можете да добиете од Управниот одбор, вели Велигденов. Тој вели и дека ова е прв пат Македонска пошта да остане без плата од самото постоење. -Ние сме свесни дека има влијание и коронакризата и финансиската криза во земјава, но ние сме државна компанија која е давател на услуги на граѓаните и не може вработените да немаат плати, вели во изјава за КУРИР претседателот на Синдикатот на Македонски пошти. Во пошта во моментов има над 2.000 вработени, што значи дека сите тие на ниво на целата земја чекаат задоцнета плата која не се знае ниту дали и кога ќе ја земат. Инаку вработените во месец април бараа линеарно покачување на платите, а тогаш организираа и штрајк со неработење и блокирање на институцијата.

Чекајќи државна помош не зеле плата – околу 7.000 граѓани во февруари останале без приход

Магдалена Андонова — Fri, 02 Apr 2021 11:17:45 +0000

На 6.888 вработени не им е исплатена плата во февруари додека се чека финансиската поддршка за исплата на плати како дел од петтиот антикризен пакет заглавен во Собранието. Тоа се 10,7 проценти од вкупно доставените 63.948 МПИ пресметки доставени до Управата за јавни приходи. Оттаму апелираат поскоро Собранието да ги донесе законските решенија со кои ќе се овозможи практична примена на антикризниот пакет, а дотогаш најавија дека ќе има период на толеранција само за оние компании кои немале средства за исплата на плата, а ја чекале финансиската помош од државата. – Ќе блокираме онаму каде има основ да се блокира. Онаму каде одредени компании ја чекале финансиската поддршка и очекувале дека навреме ќе ја добијат, а немале средства да исплатат плата, на нив им се доставени опомени. Телефонски ќе бидат исконтактирани за да се најде соодветно решение како би можеле да ги изменаџираат своите долгови се до моментот на носење на финансиската поддршка. Онаму каде се утврдени злоупотреби и сме виделе дека и наназад не се исплаќале плати, ќе постапуваме согласно надлежностите за присилна наплата, истакна директорката на УЈП Сања Лукаревска на денешната прес-конференција во Владата. Според последните податоци на УЈП од април, вкупно 133 работодавачи не исплатиле плата од минатите антикризни пакети иако им била одобрена државна помош за исплата на плати. Од нив, 110 работодавачи не исплатиле плата за 1 месец, 18 работодавачи за два месеца и 5 работодавачи не исплатиле плата за три месеца. Против нив, како што информира Лукаревска, се преземени сите мерки, а во соработка со Државниот инспекторат за труд извршени се и контроли. Контроли се започнати и кај дел од компаниите каде е злоупотребена државната помош за исплата на плати за декември. За мерките кои се спроведоа преку УЈП како поддршка за стопанството досега се исплатени 135 милиони 344 илјади 918 евра. Обврската за враќање на примената финансиска поддршка е околу 20 милиони евра или 14,5 проценти од вкупната исплатена финансиска поддршка. (МИА)

Вработени од Психијатриската болница од Демир Хисар оставени без плата, власта и Филипче молчат

Магдалена Андонова — Tue, 23 Feb 2021 15:34:41 +0000

Неажурноста на владата на СДСМ продолжува и понатаму. Вчера се појави информација каде власта и министерот за здравство, Венко Филипче веќе неколку месеци оставиле 37 вработени во Психијатриската болница во Демир Хисар без плата. Поради сето тоа од вчера вработените од болницата најавија штрајк. Станува збор за болничари, хигиеничари и возачи на кои не им се продолжени договорите за работа и два месеци се оставени без плата. Имено тие велат дека во период на пандемија се соочуваат со сите ризици, ги извршуваат најтешките работни задачи и работат со лица позитивни на КОВИД-19, а се оставени без плата и без решен работен статус. -Работиме во ковид пандемија, во такви услови, без ништо, без решен статус. Ние бараме да ни се реши статусот на неопределено работно време, ни никако не ни го решаваат. Скоро два месеци немаме земено плата, изјави хигиеничар во психијатриска болница Демир Хисар. Персоналот од болницата најави дека нема да се вратат на работат додека не им се реши овој проблем кој веќе неколку години се соочуваат. Сето ова уште докажа дека власта не само што не е способна да се справи со целата пандемија и без никаков срам ги остава без надоместок лицата кои се во првата борбена линија со вирусот.

Николоски: Илјадници работници може да останат без плата заради неспособноста на Заев и старо-новата крими коалиција

Тале Кристо — Wed, 28 Oct 2020 09:52:19 +0000

Заради неспособноста и мрзеливоста на Владата на Заев доведена е во опасност поддршката за плати за Октомври за работниците погодени од короната, реагира потпретседателот на ВМРО-ДПМНЕ Александар Николоски. Законот сеуште не е стигнат во собрание, а треба да важи од 1ви ноември! За ова реагирав уште минатата недела, еве денес потврда и реакција од Комората на сметководители. Илјадници работници може да останат без плата заради неспособноста и мрзеливоста на Заев и старо-новата крими коалиција на лагата СДСМ/ДУИ, пишува во својата објава Николоски.

Уметниците со месеци не земале плата- актерката Жугиќ со прашање до колегите: Ќе излеземе ли на 1 септември на протест? (ФОТО)

Дарко Андоновски — Wed, 26 Aug 2020 19:24:39 +0000

Актерката Јелена Жугиќ преку статус на Фејсбук денеска пишува дека колегите уметници немаат земено плата веќе со месеци. -Колеги културњаци, плата??? Ќе искачаме на први септември пред Министерство за култура или ќе чекаме ноември?, прашува Жугиќ преку статус на Фејсбук. Инаку додека уметниците во оваа земја се на удар на оваа власт, во Собранието мнозинството предводено од СДСМ вчера изгласа дури пет потпретседатели на истото кои ќе добиваат дополнителни приходи и до 20 илјади денари месечно плус останати трошоци.

Вработените во Универзална сала неколку месеци не земале плата

Тале Кристо — Sat, 25 Apr 2020 18:18:01 +0000

Вработените во Универзална сала немаат земено плата веќе неколку месеци. Како што вели Тања Стефанова, вработена во Универзална сала, односно штотуку пензионирана, станува збор за вкупно 23 вработени плус четворица нововработени кои немаат земено плата за месец февруари, како и за месец март. Проблемот настанал поради тоа што огласот бил објавен на 28.12.2019 година, а четворицата нововработени почнале со работа на први февруари 2020 година. Иако овие четворица биле примени тие немале одобрение од министерството за финансии со што преметките за плати за сите вработени, заедно со тие четворица, не може да поминат и нивната исплата е закочена. Откако вработените се пожалиле кај директорот Филип Аврамчев тој им се заканувал дека немало да земат плата и им порачал да се снајдат. Како што велат вработените, меѓу тие 23 вработени има и хронични болни и брачен пар, но дека ставот на директорот бил оти тоа не го интересира тоа. Ваквата состојба, Тања ја пријавила во трудова инспекција на 2 април и тврди дека на 10 април директорот добил решение дека во рок од 15 дена треба да ги исплати платите. Тања реагирала и до Град Сопје, односно испратила допис и до градоначланикот Петре Шилегов и до Советот на Град Скопје, меѓутоа од таму нема реакција. По сите овие работи директорот не остапува од тоа да ги одјави четворицата нововработени затоа што проблемот бил до нив и дека поради тоа што се под јавна администрација пари има, но поради оваа состојба не можат да легнат на сметките на ниту еден друг вработен.

Вработените во ЕуроБрик цели 6 месеци без плата?

Дарко Андоновски — Thu, 02 Apr 2020 10:51:13 +0000

Поранешната фабрика Киро Ќучук или сегашна ЕуроБрик, според информаци на порталот Велес365 веќе 6 месеци немаат земено плата. Тие стапиле во комуникација со дел од вработените во оваа фабрика, каде што тие им се пожалиле за нивната состојба. Според информациите од нив, тие 6 месеци одат на работа, без потпишан договор за работен однос, а за нивните работни ангажмани во фирмата како што велат тие, дел зимаат пари на рака. Без притоа да им бидат платени придонеси за здравствено и пензинско осигурување. За сите овие нерегуларности дел од вработените пријавиле и кај надлежните органи, при што следела и вондредна инспекција од страна на трудовиот инспекторат, УЈП, како и од министерството за екологија, заради загадувањето од страна на фабриката. Дел од вработените исто така на социјалните мрежи се огласија за нивната состојба. Во прилог го објавуваме и едно од решенијата на министерството за труд и социјална политика, каде што се гледа дека се утврдува прекршување на работничките права, заради не исплата на плата за месец 10 и 11 2019 година, како и регрес за 2019 година. За овој случај денес реагираше и политичката партија левица. Како што велат од таму, тие веќе пријавиле во државниот инспекторат за труд. Ние, како политички субјект, ваквиот случај го пријавивме до Државниот Инспекторат за Труд, по што очекуваме надлежните институции во најбрз можен рок да ја испитаат целава ситуација и соодветно да постапат. Исто така, правниот тим на Левица стои на располагање на овие работници во рамки на своите можности и капацитети, се вели во соопштението од Левица.