Настан од висок безбедносен ризик: МВР задолжено за обезбедување на одбележувањето на раѓањето на Гоце Делчев

Ивона Петрова — Tue, 24 Jan 2023 16:40:36 +0000

Владата, на денешната седница донесе заклучоци во врска со одбележувањето на 4-ти февруари, денот на раѓањето на Гоце Делчев. Задолжено е Министерството за внатрешни работи да ги преземе сите мерки за обезбедување на реализацијата на настанот, согласно со препораките од надлежните служби соопштени на вчерашната седница на Советот за безбедност. Делегацијата, којашто во име на Владата ќе присуствува во црквата Свети Спас во Скопје и ќе положи цвеќе на гробот на Гоце Делчев ќе биде составена од претседателот на Владата, Димитар Ковачевски, првиот заменик на претседателот на Владата и министер за политички систем и односи меѓу заедниците, Артан Груби, министерот за внатрешни работи, Оливер Спасовски, министерката за одбрана, Славјанка Петровска и министерката за култура, Бисера Костадиновска Стојчевска. За потсетување, на вчерашната седница на Советот за безбедност во фокус беа и настаните со Бугарија. Претседателот Стево Пендаровски по седницата изјави дека според достапните анализи и сознанија на надлежните органи, структури во соседна Бугарија се веќе мобилизирани, и логистички и финансиски, за да го поддржат организираното доаѓање во Скопје на повеќе лица на 4 февруари, кога се одбележува денот на раѓањето на Гоце Делчев. -Според сите проценки тоа ќе биде настан од висок безбедносен ризик и надлежните органи не смеат и нема да бидат само неми набљудувачи на тоа што ќе се случува, изјави Пендаровски.

безбедносен ризик – Kurir.mk

Настан од висок безбедносен ризик: МВР задолжено за обезбедување на одбележувањето на раѓањето на Гоце Делчев