бездомни лица – Kurir.mk

Скопјанец пронајден починат во Центар за бездомни лица

Ивона Петрова — Wed, 12 Jul 2023 14:21:02 +0000

На 11.07.2023 во 20.28 часот во СВР Скопје било пријавено дека во Центар за бездомни лица „Чичино село“ бил пронајден починат З.С.(63) од Скопје, згрижен во Центарот, информира МВР. Лекар од Итна медицинска помош констатирал смрт без видливи траги на насилство. По наредба на Јавен обвинител телото на починатиот било дадено за обдукција, а увид на местото извршила екипа од СВР Скопје.

Расте бројот на бездомни лица во Битола, меѓу нив и шестмесечно бебе

Тале Кристо — Wed, 02 Feb 2022 19:05:04 +0000

Бројот на бездомници во Битола се зголемува, велат од Црвениот крст Битола. Меѓу нив има и шестмесечно бебе, јавува локалната Тера телевизија. -Изминатите години имаше од 5 до 10 бездомници, но годинава бројката е 16, за жал со тенденција за зголемување. Сите се згрижени, имаме 4 малолетни деца, од кои едно е шестмесечно бебе, изјави д-р Лилјана Ристевска, Претседател на Црвен Крст Битола. Напорите на Црвен крст и Општина Битола се секој кој има потреба да биде згрижен. -Никој особено во овие временски услови не смее да биде на улица, без топол оброк и згрижен како што налагаат едни човечки услови, вели таа. На бездомните лица им обезбедуваат целосно сместување и исхрана, како и грижа од волонтерските медицински тимови кои се грижат за нивното здравје.

Град Скопје продолжува со акцијата за обезбедување оброци на граѓани од социјално ранливи категории

Ивона Петрова — Sat, 29 Jan 2022 14:02:54 +0000

Овој викенд продолжува акцијата со која се обезбедуваат оброци на граѓаните од социјално ранливите категории, од страна на Град Скопје во соработка со здружението Љубезност и Ретвитни оброк. Денес на акцијата присуствуваше Филип Јаневски, советник во Совет на Град Скопје, кој заедно со волонтерите на РеТвитни оброк и здружението Љубезност поделија оброци на бездомните лица. Средствата во висина од 32 илјади евра кои што поранешниот градоначалник ги предвидел за угостителски услуги, сега градоначалничката Арсовска ги пренамени за помош на граѓаните од социјално ранливи категории.

Попишани бездомните лица сместени во државните објекти, има околу 350 лица

Ивона Петрова — Thu, 25 Mar 2021 10:38:22 +0000

Пописот на бездомните лица е целосно завршен. Попишани се сите кои се сместени во објектите за коишто Министерството за труд и социјална политика создаде услови заедно со Државниот завод за статистика. Првичната бројка е околу 350 лица, она што беше и таргетот и од нашите сознанија, почнувајќи од Визбегово, Чичино Село, значи е завршен тој процес на попис. Сега останува големиот дел на пописот што стартува од 1 април, истакна денеска министерката за труд и социјална политика Јагода Шахпаска. При денешната посета на новиот Дневен центар за деца и млади со интелектуална попреченост при ЈУ Завод за рехабилитација на деца и млади, населба Топанско поле, министерката порача дека пописот е безбедна и елементарна статистичка операција. – Доколку се почитуваат протоколите, а секако попишувачите имаат специјални обуки покрај обуката на начинот како треба да прават попишување на граѓаните, посебни обуки за тоа како треба себеси да се заштитат со заштитната опрема, со носење на маски, со носење на визери, носење на ракавици, на тој начин се штитат и себеси, меѓутоа секако ги штитат и лицата во домаќинствата каде што треба да се обавува пописот, обазложи министерката за труд и социјална политика. Иво услови на пандемија, потенцираше, ние како граѓани функционираме.

Светски ден на бездомништвото, облека и хигиенски артикли за бездомниците во пунктот во Момин Поток

Ивона Петрова — Thu, 10 Oct 2019 07:00:19 +0000

Пакети со облека и хигиенски артикли денеска ќе им бидат доделени на бездомниците во пунктот на Црвениот крст на Град Скопје во Момин Поток во рамки на одбележувањето на 10 Октомври – Светскиот ден на бездомништвото. Од Црвениот крст информираат дека ќе бидат доделени и благодарници на компании кои го поддржуваат работењето на пунктот во делот на обезбедување на храна во изминатиот период. Пунктот за бездомници функционира повеќе од 10 години и нуди повеќе услуги за лицата кои немаат свој дом и има за цел да овозможи тие да ги остварат основните човекови права и да се реинтегрираат во општеството. Во базата на Црвениот крст регистрирани се повеќе од 150 бездомни лица. Работењето на пунктот за бездомници финансиски е поддржано од Градот Скопје и повеќе компании и граѓани.

Зголемен бројот на бездомни лица кои бараат помош во пунктот во Момин Поток

Ивана Ефремовски — Wed, 10 Oct 2018 09:43:35 +0000

Околу 180 бездомни лица од Скопје веќе 10 години имаат можност да ги користат услугите на пунктот за бездомни лица во Момин Поток. Двапати неделно тие добиваат совети и поддршка од психлог, социјален работник, здравствени услуги, лекови, облека, а одржуваат и лична хигиена. - Се работи за категорија граѓани кои од различни причини го завршуваат животот на улиците на главниот град. Пунктот функционира 10 години со цел овие лица да ги интегрира во општеството да не ги направи зависни од овој пункт. Затоа добиваат совети, психолошка поддршка, односно се прави се дека тие треба да го вратат животот во свои раце, рече Сузана Тунева Пауновска, секретар на Црвен крст на град Скопје. Таа рече дека наредната година ќе се направат обиди за надградба на пунктот со изградба на трпезарија и посебна просторија за индивидуална поддршка на лицата, бидејќи, како што рече, евалуациите покажале оти таа дава добар успех и дека на таков начин 10 од овие лица веќе се вработиле и се вратиле во нормалниот тек на живеење. Според неа, загрижува фактот дека се зголемува бројот на бездомни лица, но, како што рече, не се знае дали е тоа заради реално зголемување на бројката или, пак, тие биле скриени и досега не ги користеле услугите на пунктот. - Пред две недели бројот на лица кои на дневна основа го посетуваа пунктот изнесуваше од 48 до 55, а во последните две недели е зголемен бројот на 65 лица, истакна Тунева Пауновска. Најчести причини поради кои овие лица станале бездомници е банкрот на одредени сопствени бизниси, нерешени семејни односи, алкохолизам, психички проблеми, депресии и разни нервни растројства. Секретарот на Црвениот крст на град Скопје најави дека ќе се прават напори во иднина пунктот да работи 24 часа во текот на целата година, бидејќи, како што рече, само со секојдневни контакти со овие лица може да се работи на нивна ресоцијализација и на нивна повторна интеграција во општеството. Таа потенцира и дека услугите на овој пункт ги користат две категории бездомни лица, првата која бездомништвото го сфаќа како филозофија на живот со користење на услугите на институциите и граѓанските организации, а втората која што има потреба од социјално домување. Денеска е Светскиот ден на бездомништво и во рамки на одбележувањето во пунктот Момин Поток за бездомниците беше обезбеден ручек, донација од приватно лице, како и помош во чевли за 70 бездомни лица кои редовно ги користат неговите услуги. Пунктот е финансиски поддржан и од градот Скопје и повеќе компании и граѓани. (МИА)