Биг Бен – Kurir.mk

По 5-годишна пауза: Биг Бен од утре во 11 часот повторно ќе работи

Катерина Бојаџиева — Sat, 12 Nov 2022 13:08:28 +0000

Биг Бен, светски познатото ѕвоно на кулата во Лондон, утре повторно ќе ѕвони по петгодишна пауза. Големиот часовник над британскиот Парламент ќе продолжи со секојдневната работа по петгодишната реставрација на механизмот, кој има повеќе од 1.000 подвижни делови. Биг Бен последен пат редовно ѕвонеше во 2017 година. По една недела тестирање, утре во 11:00 часот треба да почне автоматски да работи.

БРИТАНИЈА НА НОЗЕ ПО СКАНДАЛОТ – покрената истрага поради тоа што Биг Бен не ѕвонеше за време на едноминутното национално молчење

Дарко Андоновски — Mon, 19 Sep 2022 06:44:12 +0000

Портпаролот на британскиот Парламент синоќа изјави дека е покрената истрага поради тоа што Биг Бен не ѕвонеше, како што било планирано – на почетокот и крајот на едноминутното национално молчење во чест на починатата кралица Елизабета Втора. – Ова го истражуваме како итна работа, но убедени сме дека тоа нема да влијае на биењето на камбаните утре за време на државната погребна поворка, изјави синоќа претставникот на властите. Велика Британија со едноминутно молчење точно во 20 часот по британско време ѝ оддаде почит на кралицата, но Биг Бен не ѕвонеше на почетокот и на крајот од молкот, како што беше планирано. Откако заврши молкот, луѓето ракоплескаа. Најголемата саат-кула во светот со камбанарија, лондонскиот Биг Бен, ќе игра важна улога утре, кога е планирано да ѕвони во интервали од една минута за време на погребот на кралицата додека државната погребна поворка тргнува од Вестминстерската опатија.

По четири години: Биг Бен ќе се огласи за Нова година

Ристе Здравков — Wed, 22 Dec 2021 08:32:47 +0000

Познатата лондонска камбанарија Биг Бен ќе се огласи за Нова година, неколку месеци пред крајот на реставрацијата која започна пред четири години, соопшти денеска британскиот парламент. Познатото ѕвоно од 13,7 тони ќе се огласи на полноќ на 31 декември со традиционалните 12 отчукувања кои ќе го означат крајот на 2021 година и почетокот на 2022 година. Ова ќе биде последен пат Биг Бен да ѕвони со привремен механизам, соопшти парламентот, додавајќи дека од пролет, оригиналниот механизам, кој датира од викторијанската ера, повторно ќе биде ставен во функција. Часовникот на камбанаријата сместена во кулата Елизабета на едното крило на Вестминстерската палата, почна да работи во 1859 година и оттогаш ѕвони речиси непрекинато на секои 15 минути.

Обновениот Биг Бен ќе се огласи за Нова година и Брегзит

Тале Кристо — Mon, 21 Dec 2020 11:59:02 +0000

Биг Бен, како што популарно го нарекуваат големото ѕвоно во кулата на Елизабета во британскиот Парламент, кое во моментов се реновира, ќе се огласи по повод Новата година, кога ќе го означи излегувањето на Велика Британија од Европската унија. Вечерта на 31 декември, ѕвоното на полноќ вообичаено ќе отчука 12 пати, но и во 23:00 часот по лондонско време (полноќ по средноевропско време), за да се провери механизмот, кога и воедно завршува преодниот период по Брегзит, кој се случи на 31 јануари, соопшти британскиот Парламент. Велика Британија во тој период продолжи да ги применува европските правила, а во исто време преговара за своите идни трговски врски со ЕУ. Преговорите сè уште не се завршени, неколку дена пред предвидениот рок. Кулата Елизабета, завршена во 1859 година, е во фаза на обнова која почна во 2017 година, така што Британците не го слушаат ѕвоното освен во ретки прилики, како што беше последниот пат на 11 ноември, кога беше одбележана годишнината од крајот на Првата светска војна во 1918 година. И покрај упорните напори на поддржувачите на Брегзит, Биг Бен не заѕвони на 31 јануари, кога Велика Британија ја напушти ЕУ. Парламентарните служби соопштија дека познатото ѕвоно тешко 13,7 тони ќе заѕвони 12 пати на полноќ за да го означи почетокот на Новата година. Со цел да се провери механизмот, ѕвоното ќе ѕвони со прекини на 29 и 30 декември, потоа во предвиденото време на 31 декември, а и во 23:00 часот, кога земјата ќе ја напушти ЕУ. Оваа година, поради пандемијата на новиот коронавирус, откажан е огнометот на бреговите на Темза, во центарот на Лондон, кој секоја година го следат околу 100.000 луѓе. Националната прослава за Брегзит е закажана за 2022 година.