билал касами – Kurir.mk

Касами: Ако во училиштата се пее македонската химна, ќе мора да се пее и албанската!

Ивана Ефремовски — Fri, 27 Oct 2023 08:28:50 +0000

Градоначалникот на општина Тетово, Билал Касами истакна дека, ако се пее македонската химна во училиштата, мора да се почитува албанското мнозинство и да се пее и албанската химна, објави ТВ 21. -Тоа е политичко прашање. Како градоначалник можам да кажам дека ќе ги почитуваме законите и Уставот, но во исто време мора да ја почитуваме и различноста. Во овој случај, ако се донесе законска одлука за интонирање на државната химна, сигурно дека ќе мора да се почитува и мнозинството граѓани, кои се од албанска етничка припадност, ќе мора да се пее и албанската химна, рече Касами. Во некои скопски општини, за почеток во Аеродром, а потоа во Гази Баба и други, секој прв понеделник во месецот, наставата започнува со интонирање на државната химна на Македонија.

МВР бара поведување на прекршочна постапка против Ганиу и Касами и општините Чаир и Тетово

Ивона Петрова — Tue, 15 Aug 2023 15:00:49 +0000

Министерството за внатрешни работи, поточно Одделот за криминалистичка полиција, Сектор за општ и насилен криминал, во координација со Секторите за внатрешни работи Скопје и Тетово денеска до надлежните Основни судови поднесе барања за поведување на прекршочна постапка против правните лица Општина Чаир и Општина Тетово и одговорните лица во овие правни лица, градоначалниците на овие општини В.Г. и Б.К. -Имено, за време на официјалната посета на косовската делегација на нашата држава, предводена од претседателот на Владата на Република Косово, г.Албин Курти, при организираниот пречек на 11.08.2023 на ул.„Ферид Мурати“ во Скопје и на Градскиот плоштад во Тетово, не е постапено согласно Законот за употреба на грбот, знамето и химната на Република Северна Македонија. Односно за време на манифестациите организирани по тој повод не е интонирана државната химна и не е поставено државното знаме на Република Северна Македонија, со што е сторен прекршок по чл.30 од истиот закон, информира МВР. МВР продолжува со потрага по лицето кое на една од манифестациите вееше знаме на голема Албанија и по негово пронаоѓање против него ќе биде поднесена соодветна кривична пријава.

Касами подготвен да соработува со Меџити – Адеми: Има многу политички актери, но фактор е само Али Ахмети

Ристе Здравков — Fri, 21 Jul 2023 17:15:03 +0000

Претседателот на Движење Беса, Биљал Касами очекува Изет Меџити да го формира новото политичко движење со кое Беса е подготвена да соработува. Касами вели дека конечно треба да се направи промена на албанската политичка сцена. „Не само што сме отворени, туку продолжуваме интензивно да работиме со сите опозициски сили. Имаме добра комуникација со Изет Меџити и сметам дека во моментот кога ќе го формализира неговото движење ние ќе ја формализираме и соработката. Дозволете ми да упатам повик и до сите други структури, другите партии и поединци кои не се задоволни од другите партии, да се придружат на ова движење бидејќи дојде време кај Албанците да има ротација во власта и конечно Албанците да направат промена и да бидат достоинствено застапени во државните институции. Тоа што беше направено кај Македонците во 2016 година, мислам дека дојде време тоа да се случи и кај Албанците“, вели Биљал Касами. Зборувајќи за обединувањето на албанската опозиција, потпретседателот на ДУИ, Арбр Адеми во Summer Click рече дека во Македонија има политички актери но единствен фактор е Али Ахмети. „Кога сме кај постоечките опозициски партии, Беса и Алтернатива, јас би рекол дека има многу политички актери на политичката сцена во РСМ но Али Ахмети е еден и единствен фактор. Ова се процеси низ кои помина ДУИ. Станува збор за не така краток период туку период од 22 години“, посочи Арбр Адеми. Изет Меџити најави дека на 13 август ќе формира нова партија. Во овој субјект нема да учествуваат и други членови од огнената група, како Муса Џафери, Блерим Беџети и Невзат Бејта кои одлучија да останат во ДУИ, со стремеж дека се уште има простор за внатрепартиска дебата за нивните незадоволства.

Чија претседателка пречекува тетовскиот градоначалник?

Ристе Здравков — Thu, 27 Apr 2023 08:30:05 +0000

Косовската претседателка Вјоса Османи пристигна во официјална посета на Македонија, во чии рамки, покрај вчерашните средби со државниот врв во Скопје, денеска треба да го посети и градот Тетово. Во пресрет на нејзината денешна посета на Тетово, градот под Шара уште во текот на вчерашниот ден осамна со повеќе билборди со ликот на Османи и краток текст „Добре дојде претседателке“, сето тоа под грбот на Општина Тетово. Ваквиот потег на локалната самоуправа наметнува неколку дилеми на кои граѓаните бараат одговор, почнувајќи од тоа чија претседателка е Османи, на што се трошат парите на тетовските даночни обврзници и дали еднаков третман имаат и другите функционери што го посетуваат Тетово, почнувајќи од македонскиот претседател Стево Пендаровски. Имено, билбордот со текст „Добре дојде претседателке“ не прецизира чија претседателка е Вјоса Османи, дали на тетовци или, пак, на соседна држава чие име воопшто не се споменува на билбордот. Во време кога постојано се наметнува албанската етничка агенда во земјава, пораката на билбордот може да добие и поинаква големодржавна конотација, особено по изјавите од типот дека „Тетово е главниот албански град во Македонија“. Целиот текст прочитајте го ТУКА

Касами: Укинувањето на 20% може да стане услов за поддршка на уставните измени

Ристе Здравков — Tue, 11 Apr 2023 19:01:02 +0000

Укинувањето на формулацијата „20%„ од Уставот кое се однесува на Албанците, од барање може да стане услов – изјави во Клик Плус, претседателот на Движење Беса, Билал Касами. Касами вели дека доколку како опозиција ги подржат уставните измени за внесување на Бугарите во Устав, треба да има и поддршка за укинување на 20%, пренесува TV21.mk. Оценуваме дека нашите аргументи за укинувањето на 20% се исто толку силни како и аргументите за внесувањето на бугарската заедница. Така да ако има такво разбирање од нас како опозиција да ги поддржиме уставните измени со внесувањето на бугарската заедница во Уставот, очекуваме од друга страна иста таква поддршка и од албанските партии и од македонските партии што евентуално ќе се дефинира 20%, што е понижувачки за Албанците, треба да се избрише од Уставот и да се замени со албански јазик.“, рече Касами. За отстранување на 20% и воспоставување на албанскиот јазик како службен, неодамна беше ангажирана и Oгнената група. Инаку, и Торбешите испратија и официјално барање до Владата за и тие да бидат составен дел од преамбулата. За ова во последно време зборуваа сите албански политички партии и сите се изјаснија дека се за укинување на 20% иако од ДУИ, велат дека предност има внесувањето на Бугарите во Устав бидејќи ако има многу други барања, македонската опозиција ќе добие алиби за да не даде поддршка. „Секако дека ќе дојде моментот кога ќе се избришат тие 20% бидејќи сега веќе имаме доволно зрело време за точна формулација на Албанскиот јазик. Дали сега е вистинското време, тоа ќе треба да го оценат лидерите на политичките партии или ќе им создадеме алиби плус на опозицијата за да не ги поддржува уставните измени. Ние, само дел од владејачката коалиција, ги немаме бројките за уставните измени без поддршка од пратениците од опозицијата.“, вели Османи.

Касами: Оваа Влада нема капацитет да го реализира Коридор 8

Ивона Петрова — Wed, 05 Apr 2023 12:15:19 +0000

Градоначалникот на Тетово Биљал Касами денеска изјави дека актуелната Влада нема капацитет да ги реализира најавените автопатски делници од Коридор 8, затоа што власта, вели, има многу проекти за тетовскиот регион кои останале само најава. За вчерашното неприсуство на свеченоста за Коридор 8 не одговори дали Општината имала покана, но рече дека нема да присуствуваат на „свадбите без зет и невеста“ на Владата. - Нема да присуствуваме на никакви промоции на свадби без зетот и снаата, затоа што знаеме дека оваа влада е позната по тоа што прави такви свадби. Досега само во тетовскиот регион има промовирано три проекти кои нигде не се. Прво фабриката за електрични возила која пред изборите беше промовирана, никој не знае дали кога ќе почне да се стави камен темелник. Исто така, од самиот поранешен премиер во Тетово во изборна кампања беше промовирана инвестиција од 150 милиони евра. Исто од Еколог во делот на инвестиција на резиденцијални објекти, болница и такви работи, самиот премиер Заев го промовираше. Поранешниот министер за екологија промовираше инвестиција за Попова Шапка од над 150 000 000 евра, отиде министерот отиде инвестицијата, истакна Биљал Касами. Тој рече дека ваквите најави од централната власт се заради нивната неуспешност. - За нас како Движење Беса е еден од од најважните коридори, Коридорот 8, затоа што како што беше како што е веќе завршен Коридор 10 што го поврзува југот со северот исто така толку важен е и Коридорот 8 за исток-запад, но оваа Влада нема капацитет тоа да го реализира, а се ова што се прави веќе медиумите вие објавувате секојдневно дека целта е корумпирачка и дека не е целта да се реализира таквиот капитален проект, истакна Касами. Тетовскиот градоначалник рече дека со централната власт Општина Тетово нема никаква соработка во областа на образованието, со полицијата, урбанизмот и културата и за тоа трпат граѓаните.

Касами до Ковачевски: Граѓаните бараат предвремени избори бидејќи оваа влада не произлегува од легитимитетот добиен од последните парламентарни избори

Ивана Ефремовски — Mon, 26 Dec 2022 13:55:18 +0000

Лидерот на Беса, Билал Касами реагираше на изјавата на премиерот Димитар Ковачевски кој рече дека „процеси што се од стратешко значење не можат да бидат предмет на уценување“, во одговор, пак, на вчерашната изјава на Касами дека Беса ќе ги поддржи измените на Уставот, под услов власта да се согласи на одржување предвремени парламентрани избори следната пролет. Касами, како што вели, разбира дека премиерот Ковачевски е во незавидна ситуација и немајќи политички капацитет и легитимитет да ја води Владата, тој ги толкува различно политичките позиции на Движењето БЕСА. -Барањето за предвремени парламентарни избори е барање на мнозинството граѓани бидејќи оваа влада не произлегува од легитимитетот добиен од последните парламентарни избори, затоа премиерот не треба да меша тези за уставни измени и предвремени избори, стои во реакцијата. Додека кога зборуваме за уставните измени, се додава во соопштението, Беса уште еднаш го потврдува својот став дека бара да се отстрани терминот „20 проценти“ и да се замени со терминот „албански јазик“, се наведува во реакцијата на Касами. -Почитуван премиере, секој што е против јазикот на еден народ, особено во околностите на Северна Македонија, нужно е против европските вредности и Европската Унија, стои во реакцијата на Касами. Во однос на ставот на Беса за уставните измени, Ковачевски повтори дека не функционира под притисоци и уцени, нагласувајќи дека изборите ќе бидат во 2024 година и тоа е веќе апсолвирано прашање и оти не е фер кон граѓаните вакви клучни прашања да бидат предмет на дневна политика, да бидат предмет на борба за некакви ситни поени. Ова, посочи тој, не е последната одлука до зачленување на Македонија во ЕУ, додавајќи дека уште тешки одлуки ќе има на тој пат, кој појасни дека е неповратен процес и единствено може да биде закочуван од страна на оние коишто се противат на членството на Македонија во ЕУ. (МИА)

Касами: Власта не може да зборува за дигитализација во образованието, а нема обезбедено 35.000 книги во основните училишта во Тетово

Тале Кристо — Mon, 26 Sep 2022 19:39:48 +0000

На учениците од основните училишта во Тетово им фалат 35.000 книги, вели градоначалникот на Општина Тетово Билал Касами во вечерашното гостување во емисијата Анализа на ТВ 24. Касами потенцираше дека не може власта да зборува за дигитализација се додека не им обезбеди книги на учениците, односно како што рече тој децата немаат книги за учење што им следуваат согласно законот, а не пак да им обезбедат компјутери или смарт таблети. Значи додека ние не обезбедуваме книги кои сега се учебни помагала кои се закон се обврзани, ние не можеме да зборуваме за дигитализација, вели Касами. Значи се додека децата немаат книга, не можеме да кажуваме дека ќе им обезбедиме компјутери или смарт таблети. Значи прво тоа што е по закон задолжително да се обезбеди, па потоа да одиме понатаму. Ние како општина сме спремни да најдеме начин како тие книги да ги обезбедиме, но за жал поради тоа што во многу делови на децентрализација општините имаат пренесени надлежности, а не изворни надлежности. Ние работиме тоа што ќе ни каже Министерството за образование, објасни Касами.

Касами за ТВ 24: Ако Владата обезбедува струја за домаќинствата, треба и за училиштата

Ивана Ефремовски — Mon, 26 Sep 2022 19:22:59 +0000

Билал Касами, градоначалник на Тетово, од движењето Беса во емисијата 24 анализа вели дека не се работи за затворање на училиштата, додека нема слух од владата ќе најдат начин тие да функционираат. -Да има оптимални услови децата да учат. Се работи за барање за реогранизација на школската година, два месеци да се продолжи зимскиот реаспуст, а во јуни да се продолжи учебната година до крај на јуни и со настава да се почне на 15 август. На тој начин ќе се штеди и греење и ќе имаат услови за учење. Во моментот во Тетово на учениците им недостасуваат 35.000 книги и додека не обезбедуваме книги, не може да зборуваме за дигитализација и сме подготвени да ги набавиме. Како општина сме подготвени сами да ги обезбедиме книгите. Ако владата обезбедува струја за домаќинствата, треба и за училиштата, рече Касами.

За Касами е прифатлив секој предлог кој доаѓа од ЕУ и Париз

Ивана Ефремовски — Wed, 06 Jul 2022 17:23:36 +0000

Претседателот на БЕСА и градоначалник на Тетово, Билал Касами денеска порача дека треба да имаме повеќе доверба во предлозите што ни доаѓаат од ЕУ. -Прифатлив е секој предлог кој доаѓа од ЕУ и Париз. Повик до сите граѓани дека ако веруваме во европските вредности тогаш треба да ги прифатиме предлозите кои доаѓаат од нив, да го решиме проблемот и кога ќе бидеме дел од ЕУ ќе имаме повеќе можности согласно тие стандарди за човековите права, рече Касами.