биткоини – Kurir.mk

Волстрит џурнал: Владата на САД има пет милијарди долари во биткоини

Катерина Бојаџиева — Tue, 17 Oct 2023 09:11:12 +0000

Американската влада стана еден од најголемите иматели на криптовалутата откако заплени околу 200.000 биткоини вредни милијарди долари, објави Волстрит џурнал, повикувајќи се на анализа на јавните записи на крипто фирмата 21.co. Хардверските паричници контролирани од Министерството за правда, Службата за внатрешни приходи и други владини агенции содржат 194.188 биткоини, во вредност од 5,3 милијарди долари, според 21.co, кој тврди дека ова се „проценки за имотот на американската влада врз основа на јавно достапни информации“. Анализата на крипто-фирмата ги следеше движењата на биткоин до и од сметки на американската влада поврзани со трите најголеми заплени на криптовалути од 2020 година. Забележителен пример е интервенцијата во кибер нападот врз Битфинекс во јануари 2022 година, која траеше речиси шест години и резултираше со тоа што Министерството за правда обезбеди 94.643 биткоини. Слично на тоа, 51.326 биткоини беа добиени при запленувањето на Џејмс Жонг во март 2022 година. Озлогласеното затворање на онлајн пазарот за дрога Silk Road во ноември 2020 година и овозможи на владата да заплени 69.369 биткоини. Средствата, наводно, се чуваат главно офлајн во шифрирани уреди за складирање што ги чуваат Министерството за правда и Службата за внатрешни приходи. Од време на време, Вашингтон продава дел од запленетите биткоини преку аукциски систем заснован на судски налози за ликвидација. Најзначајната продажба се случи во 2014 година, кога милијардерот Тим Дрејпер купи 30.000 токени од владините аукции. Меѓутоа, во последниве години, владата претпочиташе да продава конфискувани крипто средства преку размена. Една таква продажба се случи на почетокот на оваа година, кога 9.118 биткоини беа продадени на Coinbase, наведува Волстри џурнал.

Повеќе од 50% од сите трансакции со биткоин на берзите се лажни

Ристе Здравков — Mon, 29 Aug 2022 09:12:52 +0000

Новата истрага на 157 берзи за криптовалути заклучи дека околу 51% од дневната трговска активност забележана за биткоин е најверојатно лажна. Ова го објави Форбс во својата последна анализа, пренесува Investor. Според Форбс, дневниот обем на биткоини во индустријата достигна 128 милијарди долари во јуни 2022 година, што е за 51% помалку од нивниот вкупен волумен што самите го пријавија од бројни извори, за кои веруваат дека ќе биде околу 262 милијарди долари. Најголем број сомнителни трансакции се забележани на берзите Binance, MEXC Global и Bybit. Овие компании можат да се пофалат со високи количини на тргување, но работат со мал или никаков регулаторен надзор, што го нарушува нивниот кредибилитет. Помалку регулираните берзи во истражувањето се одговорни за околу 89 милијарди долари од реалниот волумен, и покрај фактот што тие тврдат дека се одговорни за 217 милијарди долари. Пазарот на криптовалути е сè уште релативно млад и нестабилен, со повеќе од 20.000 поединечни токени во оптек, но биткоинот останува водечка дигитална валута, со 40% од глобалната пазарна капитализација од 1 трилион долари. Сепак, недостатокот на транспарентност во тргувањето и недостатокот на соодветен надзор на крипто берзите се две од најчестите критики упатени кон биткоинот и пазарот воопшто.

САД:Запленети 94.000 биткоини украдени во 2016 година, со денешна вредност од 3,6 милијарди долари

Тале Кристо — Wed, 09 Feb 2022 07:47:58 +0000

Тим 24 сре, 09.02.2022 | 8:06 am 0 Коментари Министерството за правда на САД соопшти дека запленило повеќе од 94.000 биткоини украдени во 2016 година, кои денес вредат 3,6 милијарди долари. Биткоини биле украдени за време на хакирањето на менувачницата „Битфинекс“ (Bitfinex) во 2016 година. Во акцијата беа уапсени две лица, Илја Лихтенштајн и неговата сопруга Хедер Морган – двајцата наводно „испрале“ 119.754 украдени биткоини откако хакер упаднал во системите на „Битфинекс“. Денешните апсења, кои претставуваат најголема финансиска заплена досега, покажуваат дека криптовалутите не се безбедно засолниште за криминалците, истакна заменик-државната обвинителка Лиза Монако. Двојката може да биде осудена на затворска казна од 20 години затвор.

Бислимовски: Во делови на Скопје има зголемена потрошувачка на струја зашто луѓе копаат биткоини

Магдалена Андонова — Wed, 10 Nov 2021 09:49:35 +0000

Во одредени делови на Скопје има зголемена потрошувачка на електрична енергија, но има и појави на кражба на електрична енергија, а неретко тоа се прави за т.н. копање биткоини, вели за „Утрински брифинг“ Марко Бислимовски, претседателот на регулаторната Комисија за енергетика.

- Луѓето сами ги менуваат осигурувачите, со што може да се предизвика пожар затоа што се овозможува поголема моќност без да се има услови за тоа. Кражба на електрична енергија е кривично дело, а инаку може да се зголеми потрошувачката, но тоа треба да се пријави во ЕВН и да се променат легално осигурувачите и евентуално кабелот, објаснува Бислимовски.

Владата прогласи електроенергетска криза во период од 30 дена. Комисијата за енергетика има свој претставник во владината комисија, но Комисијата за енергетика за кризата нема надлежност за управување со кризата туку подоцна може да одлучува во рамките на своите надлежности во врска со цената на енергијата.

- Електроенергетската криза е прогласена за ЕСМ и МЕПСО да можат да повлечат средства од Буџетот и да ја поправат својата финансиска состојба. Рестрикции имало и порано. Но сега има слободен пазар на електрична енергија од различни снабдувачи. Снабдувачот мора од добавувачот од странство предвреме да ја плати струјата. Ако има рестрикции, добавувачите нема да можат да ја продадат струјата не по своја вина. Ако ја продадат на друго место, ќе имаме дополнителни проблеми. Мислам дека рестрикциите не се решение, вели Бислимовски.

Eлектромобилите „Тесла“ ќе може да се плаќаат и со биткоини

Тале Кристо — Wed, 24 Mar 2021 11:09:19 +0000

Извршниот директор на американскиот производител на електрични автомобили „Тесла“, Илон Маск, денеска објави дека електромобилите на компанијата ќе може да бидат плаќани и со криптовалутата биткоин. -Ќе можете да плаќате во ’Тесла‘ со биткоини. Можноста за плаќање во биткоини ќе биде достапна и вон САД кон крајот на оваа 2021 година, напиша претприемачот на својата Твитер-страница. Тој исто така, претходно поддржуваше и други слични дигитални валути, како што е „доџкоинот“ (dogecoin). „Тесла“ на 8 февруари објави дека вложила 1,5 милијарда долари во биткоин и оти во блиска иднина ќе им овозможи на корисниците да ги исплаќаат возилата и во оваа криптовалута. -Една од најголемите компании во светот инвестираше во биткоин, што значи дека сите инвеститори во ’Тесла‘ (или барем само еден фонд во (индексот) Ес-енд-пи-500) се вклучени во тоа, рече тогаш Маск.

Запленети 60 милиони долари во биткоини, сопственикот не ја дава лозинката

Ивана Ефремовски — Fri, 05 Feb 2021 11:02:58 +0000

Германските обвинители од измамник конфискувале биткоини во вредност од повеќе од 50 милиони евра (60 милиони долари), но проблемот е во тоа што тие не можат да ги отклучат парите затоа што тој одбива да им ја даде лозинката. Човекот беше осуден на затворска казна и оттогаш ја издржа, одржувајќи го својот молк во текот на целиот период, додека полицијата прави постојани неуспешни обиди да го пробие кодот за пристап до повеќе од 1.700 биткоини, изјави денеска обвинител во баварскиот град Кемптен. -Го прашавме, но не сака да ја каже, изјави за Ројтерс обвинителот Себастијан Мурер, пренесува Јаху фајненс. – Можеби не ја ни знае, дополни Мурер. Биткоинот се чува на софтвер познат како дигитален паричник кој е обезбеден преку криптирање. Лозинката се користи како клуч за декрипција за да го отворите паричникот и да пристапите до биткоинот. Кога лозинката е изгубена, корисникот не може да го отвори паричникот. Измамникот е осуден на повеќе од две години затвор за прикриено инсталирање на софтвер на други компјутери за да ја искористи нивната моќ да „рудари“ или да произведува биткоини. Кога отиде зад решетки, неговата залиха биткоини имаше само дел од сегашната вредност. Цената на биткоинот се зголеми во текот на изминатата година, достигнувајќи рекордно високо ниво од 42.000 долари во јануари. Денеска се тргуваше по 37.577 долари, според веб-страницата за криптовалути и блокчејн „Коиндеск“. (МИА)