блиндиран мерцедес – Kurir.mk

Заев ја излажа јавноста дека не се возел со „Мерцедесот“

Катерина Бојаџиева — Thu, 24 May 2018 11:07:39 +0000

Премиерот Зоран Заев уште еднаш ја излажа јавноста дека не се возел со „Мерцедесот“. Во медиумите имаше ексклузивни снимки, кои докажуваат дека не бил сам, туку друштво му правела и Радмила Шекеринска. Иако жестоко говореа против набавката на „Мерцедесот“, без срам премиерот си ги погази сопствените ветувања и го користеше ова возило. Зоран Заев и на вчерашниот дуел со лидерот на ВМРО-ДПМНЕ Христијан Мицкоски повторно ја излажа јавноста дека не го користел блиндираниот Мерцедес С600. Пред фактите и Боговите молчат, а факт е дека Заев откако стана премиер беше снимен како се вози со Мерцедесот потценувајќи ја интелегенцијата и паметењето на граѓаните. Често кога ќе има посета на некој висок функционер од странство тој се превезува со ова возило за кое често од истиот премиер слушавме дека е непотребно, а сега гледаме дека се користи без исклучок. Пример за користење на ова возило за високи гости е гостувањето на Генералниот секретар на НАТО Столтнбрг во Република Македонија, а подоцна и не многу одамна и при посетата на Тереза Меј премиерка на Велика Британија. Се поставува едноставо прашање „доколку нема потреба од ова возило во државата, зошто премерот го користи, а го користи и за странски делегации, кога гостуваат во нашата држава?“. По вчерашната изјава на Заев за мерцедесот, денеска на својот Фејсбук се огласи и новинарот Миленко Неделковски.

Бошњаковски: Блиндираниот Мерцедес нема да се продава додека е предмет на судски процес

Ивона Петрова — Wed, 23 May 2018 10:49:01 +0000

Постапката за продажба на блиндираниот мерцедес е стопирана, како што веќе беше соопштено, бидејќи судскиот процес е во тек и до негово завршување и добивање допис дека тој повеќе не е предмет на судски процес ќе излеземе со нови информации, изјави портпаролот Миле Бошњаковски одговарајќи на новинарско прашање дали возилото ќе остане за потребите на Владата зашто се користи за превоз на високи странски функционери. Портпаролот смета тоа не е единственото возило во МВР со безбедносни стандарди за заштита на високи делегации кои престојуваат во Македонија но, рече, не може да го потврди тоа. Во врска со подготовките за формирање Оперативно-техничка агенција, која треба да почне да работи во ноември, Бошњаковски одговори дека процесот е во Собранието и пред два дена е објавен огласот за именување директор. - Во моментов Собранието донесе одлука да се објави јавен оглас за именување директор на оваа агенција и тоа е постапка во Собранието, рече владиниот портпарол. Владата на вчерашната 69-та седница донела одлука за давање согласност за трајна пренамена на земјоделското во градежно земјиште за изработка на проектот за инфраструктура за изградба на главен доводен цевковод во полошкиот регион кој ќе покрие повеќе општини. Бошњаковски денеска на прес-конференцијата соопшти дека вчера е донесена и одлука за вработувања на неопределено време во основните и средните училишта, формирана е работна група за решавање на проблемот со линданот во АД Охис и дека е усвоена информација за формирање работна група што ќе подготви документација за спроведување тендерска постапка за избор на универзален снабдувач со електрична енергија. МИА

Сведоците продолжуваат да ја потврдуваат легалноста на набавката на блиндираниот „Мерцедес“

Ивона Петрова — Wed, 21 Mar 2018 13:23:39 +0000

Со задоцнување од половина час во Кривичниот суд денеска се сослушуваат 5 сведоци за предметот на СЈО „Тенк“ во кој обвинети се поранешниот премиер Никола Груевски, поранешната министерка за внатрешни работи Гордана Јанкулоска и поранешниот помошник министер во МВР Ѓоко Поповски. Судијката Добрила Кацарска не сметаше дека судењето треба да се одложи, иако адвокатката на Јанкулоска, Сања Алексиќ, доставила писмена молба до судот со која таа бараше одложување поради смрт на близок член во семејството. Јанкулоска остана без бранител, а судењето продолжи. Ова е своевиден преседан во судската пракса, да продолжи рочиште без адвокат на обвинетите кој уредно побарал одложување на рочиштето. Во текот на денешното рочиште беа сослушани двајца сведоци вработени во фирмата Мак аутостар кои во 2012 година работеле во фирмата кога е и набавено блиндираното возило. Пред судот двајцата сведоци изјавиле дека немале ниту пред, ниту за време на јавната набавка никакви контакти со тројцата обвинети. Сведокот Марко Јовановски, кој бил раководител на секторот продажба во фирмата Мак аутостар изјавил дека имал контакти исклучиво со некои лица вработени во МВР и тоа откако завршила постапката, односно јавната набавка. Овие лица биле упатени на обуки за користење на блиндираното возило. И во досегашната судска постапка за случајот на СЈО именуван како Тенк беа сослушувани сведоци на СЈО кои ја потврдија легалноста на постапката за набавка на возилото „Мерцедес“, модел „С-600 гард“. Од досегашниот тек на постапката јавноста можеше да заклучи дека се работи за набавка во која се испочитувани сите законски процедури и дека истата за возило од ваков тип е неопходно за нормалното функционирање на една држава. Прв кој се возеше во Мерцедесот беше генералниот секретар на Обединетите Нации, Бан Ки Мун, а втор кој го користел е емирот од Катар, кој беше во посета на Македонија. Возилото е користено и за превоз на високите челници на ЕУ, кои ја посетувале нашата држава. На претходните рочишта беше кажано дека и во минатото се случувало возилата кои се користеле често да се расипат, па гостите останувале на патот, чекајќи ново возило да дојде по нив околку има на располагање или пак продолжувале по патот со возило кое не ги исполнува безбедносните стандарди. Судијата Кацарска, во текот на целата постапка денес беше крајно нетрпелива кон одбраната на обвинетите. Таа упати опомена на записник кон адвокатот Боро Тасевски, затоа што рекол дека сведокот не го разбрал прашањето. Во текот на одговарањето на прашањето, кога сведокот говореше, Тасевски реагираше бидејќи сведокот одговарал сосема на друго прашање. Сведокот Сашо Николовски, вработен во МВР во Секторот за јавни набавки не успеа да го даде потребниот одговор, а адвокатот беше казнет од страна на судијката Кацарска. Судот продолжи со постојната пракса за пренатрупување на предметите против поранешните функционери на ВМРО-ДПМНЕ во мал временски период. Имено Кацарска ги закажа следните рочишта за 10, 11, 18, 20, 23 и 25 април.

Другите две блиндирани возила на МВР биле многу стари, се чекало и до два месеци за делови

Ивона Петрова — Mon, 12 Mar 2018 18:15:18 +0000

Сведокот на Влатко Ѓошевски началник на возниот парк на МВР задолжен за одржување и менаџирање на возилата на Министерството на денешното рочиште изјави дека другите две блиндирани возила кои ги поседува МВР се многу стари и во многу ситуации се чекало од 30 до 60 дена за испорака на делови. Немало делови на лагер бидејќи се работи за многу стари возила и за тие се чекало да се произведат во фабриката, и чинеле многу скапо. Тој исто така кажа дека фабриката се обврзувала за старите возила да произведува резерни делови најдолго до 20 години, а истите биле прозиведени околу 1996-та. Посочи дека се случувало често на конкретни задачи да се појави дефект. Гаранцијата која производителот ја дава за ваков тип на возила е три до пет години. Во Германија на пример од овие причини сите блиндирани возила владата ги продава по истекот на 4 до 5 години. Сведокот посочи дека како служба често имале потешкотии заради недостаток на вакви возила. Ова особено се случувало во ситуации кога во посета на Македонија доаѓало повеќе од едно ВИП лице. Многу често знаејќи за недостатокот на вакви возила самите гости во Република Македонија носеле од надвор блиндирани возила што секако е многу непријатно за угледот на државата.

СЈО го дава, но Заев не се откажува од „Мерцедесот“

Ивона Петрова — Wed, 07 Mar 2018 08:53:57 +0000

Владата на Република Македонија на вечерашната седница донесе одлука со која се става во мирување процесот на продавање на возилото „Мерцедес”, кој е дел од политички монтираниот случај на СЈО „Тенк“. Заев од опозиција не пропушташе прилика да каже дека кога СДСМ ќе дојде на власт „Мерцедесот“ ќе го продаде, за сега година дена потоа некако тешко да му оди одвојувањето од блиндираниот автомобил, па очигледно сака уште малку да се повози во возилото. Официјалното образложение на Владата за ставање во мирување на постапката за продажба било затоа што возилото е дел од судска постапка и може да послужи во истрагата. Ова како образложение паѓа во вода, ако се има во предвид дека СЈО, кое ја води истрагата и е застапник на обвинението рече дека возилото може да се продаде. Сепак и покрај одобрението од СЈО, Заев одлучи да не го продава. Од опозиција Заев најавуваше продажба на Мерцедесот и купување на амбулантни возила со парите од продажбата. -Да ви најавам дека тенкот, Мерцедесот на Груевски од 600.000 евра ќе го вратиме и со парите ќе купиме амбулантни возила за клиниките, рече Заев на митингот на СДСМ во Скопје во октомври минатата година. Лакрдијата која Заев ја приреди со продавам - не продавам наиде на потсмев помеѓу членовите на СДСМ на социјалните мрежи.

Објавен огласот за продажба на блиндираниот „Мерцедес“

Ивона Петрова — Wed, 28 Feb 2018 11:55:25 +0000

Од денеска, па во наредните десет дена, сите заинтересирани домашни и странски правни и физички лица можат да поднесат пријава до Службата за општи и заеднички работи на Владата (СОЗР) за учество на јавното наддавање за блиндираниот „Мерцедес-Бенз С 600“. Почетната цена на наддавањето изнесува 14.372.208 денари и е одредена врз основа на направената проценка од стрна на Министерството за правда и Бирото за судски вештачења, а огласот е објавен во денешните изданија на весниците „Нова Македонија“, „Слободен печат„ и „Коха“. - Сериозноста на понудата заинтересираните ја гарантираат со доставување на банкарска гаранција во износ од два процента од проценетата вредност на возилото, односно 287.444 денари, прецизира директорот на СОЗР, Пеце Мирчевски, на денешната прес конференција во Владата. Тој посочи дека дополнителен услов за физичките лица е да бидат деловно способни, да не им е изречена правосилна пресуда за учество во злосторничка организација, корупција, измама или перење пари и да ги имаат платено сите даноци и придонеси кон државата. Правните лица, пак, треба да достават и тековна состојба, како и потврда дека не им е изречена казна за привремена или трајна забрана за вршење на дејност. - Заинтересираните лица ќе можат да го разгледаат возилото на 7 март во периодот од 10 до 15 часот на адресата Бул. „Гоце Делчев“ бб во гаражата на објектот на МРТВ. По истекот на рокот за доставување на понуди на 12 март Комисијата ќе има рок од три дена за евалуација на понудите, а јавното наддавање ќе се изврши на 16 март во 10 часот по пат на електронска аукција на интернет страницата на Министерството за финасии. Понудувачот кој ќе достави најповолна понуда во рок од 15 дена од добивањето на известувањето за избор ќе треба да ја уплати сумата преку сметка во банка во Македонија по што ќе се склучи договор за купопродажба во рок од пет работни денови по извршената уплата. Доколку купувачот не ја плати целосната сума договорот нема да се случи, а банкарската гаранција ќе биде активирана, рече Мирчески. Нагласи дека сите давачки кои ќе произлезат околу преносот на возилото и јавните давачки утврдени со закон ќе паднат на товар на купувачот. Дополнителни информмации заинтересираните може да се побараат на електрнската адреса [email protected]. Прашан со што ќе се превезуваат високите делегации кои ќе доаѓаат во земјава по продажбата на „мерцедесот“, Мирчески рече дека за безбедноста на странските делегации е задолжено МВР и додаде дека земјава располага со уште две блиндирани возила кои се во употреба и може да се користат за таа намена. МИА