боб дилан – Kurir.mk

Отфрлена тужбата за сексуален напад против Боб Дилан

Тале Кристо — Fri, 29 Jul 2022 12:56:57 +0000

Жената која го тужеше американскиот пејач Боб Дилан тврдејќи дека сексуално ја нападнал пред речиси 60 години, ја повлече тужбата, според адвокатот на познатиот музичар. – Случајот е затворен. Среќни сме што тужителот се откажа од „симулацијата на правда“… Скандалозно беше што воопшто имаше таков случај, изјави денеска адвокатот Орин Снајдер. Пред овонеделното сослушување во њујоршкиот Суд, адвокатот на Дилан рече дека има мејлови кои покажуваат „недоследности“ во тужбата и додаде дека жената отстранила докази кои би ја дискредитирале. Жената чиј идентитет јавно е претставен со иницијалите Ј.Ц., поднела тужба во август минатата година, тврдејќи дека Дилан сексуално ја злоставувал во период од шест недели меѓу април и мај 1965 година. Се тврдеше и дека пејачот, наводно, „го злоупотребил својот статус на музичар“ за да ѝ обезбеди алкохол и дрога на тужителката. Таа тогаш имала 12 години. Добитникот на Нобеловата награда за литература за 2016 година, Боб Дилан (81), се смета и за еден од најголемите музичари и кантавтори на 20. век.

Боб Дилан обвинет за силување на малолетничка! Ужасот од минатото исплива во јавноста: Ја снабдувал со алкохол и дрога и ја злоставувал

Магдалена Андонова — Tue, 17 Aug 2021 07:08:36 +0000

Боб Дилан е обвинет во Њујорк, од жена која тврди дека тој сексуално ја нападнал пред речиси 60 години, кога таа имала 12 години. Во тужбата поднесена кон крајот на минатата седмица од тужителката Џ.Ц. се вели дека Дилан го злоставувал девојчето во период од шест седмици, меѓу април и мај 1965 година. Се тврди и дека Дилан „го искористи својот статус како познат музичар за да ја снабди Џ.Ц. со алкохол и дрога и постојано ја напаѓал сексуално“. Боб Дилан, кој наполни 80 години во мај, е обвинет и за физичка закана кон девојчето. Според наводите во обвинението, наводната злоупотреба се случила во станот што Дилан го поседува во познатиот њујоршки хотел „Челзи“. Адвокатот на Дилан, Роберт Цимерман, во изјава за „Ју-ес-еј тудеј“, изјави дека „обвинението старо 56 години е невистинито и енергично ќе биде побиено на суд“. Дилан се смета за еден од најголемите текстописци на сите времиња. Меѓу неговите најзначајни дела се „Blowin’ In The Wind“, „The Times They Are Changin“ и „Like a Rolling Stone“. Тој ја доби и Нобеловата награда за литература за 2016 година, за „создавање нови поетски изрази“ во рамките на големата традиција на американска песна. (МИА)

Боб Дилан ја продаде целата своја колекција песни

Ивона Петрова — Tue, 08 Dec 2020 08:39:10 +0000

Боб Дилан, познат како фолк-рок трубадур, чии песни станаа симбол на антивоените протести и движењето за човекови права од 60-те години на минатиот век, и кој се смета за еден од најголемите музички текстописци во Америка, го продаде сиот свој каталог на песни на компанијата „Universal Music Group“. Како што синоќа соопшти компанијата, со договорот таа ги откупи правата на повеќе од 600 песни на Дилан, „од културниот темелник „Blowin’ in the Wind“од 1962 година, до овогодишниот еп „Murder Most Foul“. Сите овие песни сега се во сопственост на медискиот гигант. – Не е претерување ако се каже дека овој огромен труд го љубат и обожуваат милијарди луѓе низ целиот свет.Не се сомневам дека и по многу децении, па и векови, словото и музиката на Боб Дилан ќе продолжи да се пее и свири, и да се цени, насекаде, изјави Лучијан Грејнч, претседател и главен менаџер на „Universal Music Group“. Според овој „пресвртен договор“, компанијата нема право да ја открива сумата што му е исплатена на Дилан, но извор запознат со договорот открива дека се работи за „девет цифрена бројка во вредност од повеќе од 200 милиони американски долари“, јави Ен-би-си. Дилан е првиот рок музичар во светот кој има добиено Нобелова награда за литература. Негов портпарол синоќа изјави дека музичарот нема да коментира и да дава изјави за договорот. Исплатата за првото музичко издание на Дилан во 1962 година вредела само 100 долари.

Боб Дилан издава нов албум, прв по осум години

Ивона Петрова — Fri, 08 May 2020 10:39:44 +0000

Американскиот музичар Боб Дилан ќе издаде нов студиски албум, негов 39-ти по ред. „Rough and Rowdy Ways“ излегува на 19 јуни, соопшти Дилан на Твитер. Според списанието „Ролинг стоун“, албумот ќе содржи 10 песни. Три од нив веќе беа претставени, а тоа се 17-минутната „Murder Most Foul“ – за убиството на Џон Кенеди, натаму – „I Contain Multitudes“ и „False Prophet“. „Rough and Rowdy Ways“ ќе биде првиот авторски албум на Дилан по осумгодишна пауза, по „Tempest“ од 2012 година. Во меѓувреме, тој објави уште три албума – „Shadows in the Nigh“ (2015), „Fallen Angels“ (2016) и „Triplicate“ (2017), но тие се состојат од преработки на песни од други автори. Со својата 50-годишна кариера, Боб Дилан е сметан за една од највпечатливите фигури во рок-музиката. Според „Ролинг стоун“, тој е вториот најзначаен изведувач во историјата, по „Битлс”. Дилан во 2008 година ја доби Пулицеровата награда, а 2016., и Нобеловата награда за литература – „за создавање трајни поетски обележја во големата американска музичка традиција“, како што истакнаа тогаш организаторите.

Скорсезе ќе режира филм за турнејата на Боб Дилан во 1975 година

Ивона Петрова — Fri, 11 Jan 2019 12:37:17 +0000

Она што неколку години се сметаше само за гласина, дека Мартин Скорсезе ќе режира документарен филм за славната турнеја на Боб Дилан во 1975 година, сега е и официјално потврдено. Се работи за турнејата „Rolling Thunder Revue”. Документарецот под наслов „Rolling Thunder Revue: A Bob Dylan Story by Martin Scorsese” ќе биде прикажан оваа година на Нетфликс, но датумот на премиерата не е прецизиран. Соработката со самиот Дилан, е исто така потврдена, наведува „Варајети“. Филмот на најсликовит начин ќе ги прикаже концертите, еуфоријата и целата таа атмосфера во 1975 година. МИА