боби милевски – Kurir.mk

Милевски: Задоволен сум од новиот лик на Македонија, сакаме да се доближиме до големите

Бошко Тасиќ — Wed, 13 Sep 2023 03:53:30 +0000

Селекторот на македонската фудбалска репрезентација, Благоја Милевски не го криеше задоволството по победата на гостувањето кај Малта од 2-0 со кои се вративме во игра за второто место кое води на Европско првенство. По ремито со Италија во Скопје, македонските фудбалери остварија победа на гостувањето кај Малта каде со голови на Елмас и Манев славевме со 2-0. „Честитки за фудбалерите за одиграното, најважен е пристапот и со ваков пристап можеме многу и во иднина. Имаме нова енергија, задоволен сум од новиот лик на Македонија и горд сум на момците, кои уште еднаш се ставија комплетно во функција на тимот. Сакаме да се доближиме до големите, одигравме рутински, а пред неколку дена имавме исцрпувачки меч со Италија на тежок терен. Некои фудбалери прижија и вонсериски напори и јас им честитам“, рече Милевски. Македонија има уште три тешки натпревари до крајот, играме прво кај Украина, потоа со Италија во гости, а на крајот ја пречекуваме Англија. „Во фудбалот сѐ е можно и сите опции се можни. Моментно задоволни сме од оваа позиција, сѐ уште сме конкурентни во убедливо најсилната група во историјата. Мислам дека градиме конкурентна селекција која со години ќе биде наш адут, радува фактот што имаме млада селекција и со право може да сме горди на сите нив“, додаде Милевски.

Милевски: Имаме одлична основа, задоволен сум од желбата, ентузијазмот и енергијата

Бошко Тасиќ — Tue, 28 Mar 2023 04:02:31 +0000

Македонската фудбалска репрезентација избори победа над Фарски Острови (1-0) на дуелот кој се одигра во Скопје и на тој начин овој „прозорец“ го заврши со два триумфи со оглед на тоа што претходно славевме над Малта (2-1). Бојан Миовски беше човек на одлука на и тоа со погодокот во 81 минута. Селекторот Благоја Милевски е задоволен од прикажаното, залагањето на играчите, односно смета дека ова е добра подлога за тоа што не очекува во месец јуни (пресметки со Украина и Англија). -Најважно на овој меч ми беше да го видам менталниот и психолошкиот момент, да бидам сигурен дали одиме во таа насока како што сум го замислил тимот. Кога ќе подвлечеме црта, задоволен сум од пристапот, желбата, ентузијазмот и енергијата. Во овој момент ми е тоа најважно како одлична основа и подлога за тоа што ни следи во јуни, -истакна Милевски кој не сака да прави споредби на оваа со селекцијата пред една година. – Не можеме да извлекуваме некои паралели на она што било пред една година. И моменталната ситуација која ја имаат голем дел на фудбалери, не наликува на ситуацијата која ја имаа пред една година. Не можеме да споредуваме, но по она што го видов на овие два натпревари, сигурен сум дека реализацијата ќе дојде. Без разлика дали е Малта, Фарски Острови или она што ни следува во јуни, пристапот и подготовката мора да ни биде иста, без разлика дали е квалификациски и пријателски. Таа енергија што ја имаме мора да ја сочуваме и да продолжиме да се подготвуваме, а сите што добиваат шанса имаат потенцијал и ни треба малку трпение со нив, но секоја шанса ја искористуваат. Тоа е плус за мене зашто знам дека имам повеќе опции и на клупа и задоволен сум од тоа што располагаме, -порача нашиот предводник.

Милевски: Денеска нема аутсајдери, но ние нашиот квалитет ќе го покажеме на терен

Ристе Здравков — Wed, 15 Mar 2023 10:21:28 +0000

На прес-конференција, селекторот на нашата фудбалска репрезентација Благоја Милевски го објави списокот на повикани фудбалери за престојниот старт во квалификациите за Евро 2024 против селекијата на Малта. На списокот има проверени фудбалери, но и неколку нови имиња. За очекувањата од превиот меч во квалификациите Милевски истакна: „Што се однесува до репрезентацијата на Малта се знае дека аутсајдери не постојат во денесен фудбал. Ние нашиот квалитет мора да го покажеме на терен. Ме радува што се очекува од нас победа и ќе напраиме се што е во наша можност со успех да ги стартуваме овие квалификации. Факт е дека одреден број на играчи, особено оние кои ни се носители, немаат голема мунутажа, а да не зборуваме за натпреварувачка форма. Изборот е тој, играчите се тие, немаме голем избор. Костадинов, Серафимов и Дориев поради повреди, Тодоровски поради црвен картон со Бугарија отпаднаа. Николов и Спировски поради лоша форма не се тука, но не значи дека се избришани. Давор Здравковски со своите настапи заслужи повик. Се наогаме во многу тешка група. Се знае квалитетот на Италија, Англија, Украина, но и Малта е одлична репрезентација. Го победија Израел и одиграс нерешено со Грција. Но Македонија има квалитет да се носи и со поквалитетни селекции“, изјави селекторот Милевски. Собирот на репрезентацијата е в недела на 19 март.

Милевски: Им честитам на играчите за пристапот и желбата за успех

Бошко Тасиќ — Sun, 12 Jun 2022 18:58:21 +0000

Селекторот на фудбалската репрезентација на Македонија Боби Милевски им порача на фудбалерите дека од нив зависи кој ќе се избори за место во репрезентацијата преку своите клубови за во иднина според натпреварувачката форма, а сите го задоволиле од повиканите за 17-те заеднички денови во овој период. „Жалам и јас и фудбалерите што загубивме еден таков меч со Грузија, зашто ги одигравме тие 50-60 минути, можеби според мене и најдобрите, но загубивме како што загубивме. Ќе видиме што ќе се случува во септември. Јас на овием момци можам само да им се заблагодарам, покажаа пристап кој е за секоја пофалба, зашто за овој тим нема разлика со кој игра и кон сите има максимален респект, ама на терен нема кон никој. И им честитам за пристапот и желбата за успех. Им благодарам на сите кои беа дел од овој камп што одвоија 17 дена од одморот кој им припаѓа за да се стават во функција на репрезентацијата и им благодарам за се што покажаа“, рече Милевски. Осум фудбалери дебитираа за Македонија во овој јунски циклус – Давид Бабунски (Бугарија), Дејан Илиев, Тодор Тодоровски, Никола Серафимов (Гибралтар на гости) и Енис Фазлагиќ, Валон Етеми, Томче Гроздановски и Бојан Димовски (Гигралтар денеска) „Сите што беа дел од овој камп покажаа дека имаат потенцијал и квалитет да бидат конкурентни, а сега од нив зависи колку ќе се наметнат во своите клубови за да бидат дел од овој тим. Мене сите ме направија задоволен од пристапот и од односот кон дресот“, додаде Милевски.

Милевски и Барди пред дуелот со Гибралтар: Секој пораз боли, но мора да мислиме на целта

Ивона Петрова — Sat, 11 Jun 2022 12:21:52 +0000

Македонската фудбалска репрезентација денеска го одржа завршниот тренинг пред неделниот натпревар против Гибралтар во Скопје, во кој избраниците на селекторот Благоја Милевски по поразот од Грузија (0-3) влегуваат со императив да победат и да останат во трка за првото место во Групата 4 од Ц-дивизијата во Лигата на нации. – Наша обврска е да бидеме на нивото и да го даваме максимумот. Мора да се стават сите во функција на тимот и да бидат на нивото кое се очекува код нас. Имаме почит кон секој противник, тоа се однесува и на утрешниот натпревар. Ние бевме доминантни на претходните натпревари, но мора да бидеме многу повеќе конкретни во завршната фаза, изјави попладнево селекторот Милевски на официјалната прес – конференција. Македонскиот селектор нагласи дека се соочува со проблемите околу составот на тимот за утрешниот дуел. – Александар Трајковски нема да биде во комбинација поради повреда, Елиф Елмас е под знак прашалник, а имаме неколку играчи кои, исто така, се неизвесни за настап поради настинка. Голем број од играчите поради распоредот се исцрпени. Искрено, во кој состав ќе истрчаме на терен, ќе мора да почекаме сите заедно да видиме кој ќе биде подготвен. Сите фудбалери конкурираат за настап, што се однесува до Валон Етеми, тој може да дебитира на овој дуел, рече македонскиот селектор. Капитенот Енис Барди посочи дека поразот од Грузија не ја нарушил позитивната атмосфера во репрезентацијата. – Нè боли секој пораз. Но, мора да мислиме напред. Јас можам да гарантирам дека секој играч го дава максимумот, но фудбалот понекогаш е таков. Мора да се оди напред и да одиме кон нашата цел. Мора да продолжиме да играме добро, а атмосферата во тимот уште е истата и посакуваме подобри резултати, изјави Барди.

Милевски: Победата е најважна

Бошко Тасиќ — Sun, 05 Jun 2022 18:37:55 +0000

Македонскиот фудбалски селектор Благоја Милевски после денешната победа над Гибралтар со 2-0 за прва победа и четири бода по два од четирите меча во Лигата на нации, посочи дека само победата е најважна. „Кога ќе играте во вакви услови резултатот е најважен, сѐ друго е во втор план. Јас можам само да им честитам на фудбалерите за залагањето и за желбата за победа на ова гостување. Одиме понатаму, сега нѐ чека Грузија. И пред стартот на овој циклус реков дека ќе има ротации за да се зачуваат силите за овие четири меча. Сите го дадоа максимумот и на вакви мечеви најважни се победите. Илиев доби шанса зашто брани за клуб кој игра на вештачка трева, а и да го одмориме Столе Димитриевски, Серафимов и Тодоровски покажаа дека може да се смета на нив и во иднина“, рече Милевски

Милевски: Претстојните натпревари се можност да го видиме потенцијалот со кој располагаме

Ивона Петрова — Thu, 26 May 2022 12:14:26 +0000

Селекторот на македонската фудбалска репрезентација Благоја Милевски, од претстојните натпревари во Лигата на нации очекува помладите фудбалери кои ќе добијат шанса за настап да ги покажат своите квалитети. – Ќе ги искористиме овие натпревари да дадеме шанса буквално на сите и да имаме увид со што располагаме за она што ни следи во иднина. Се среќаваме со противници со изедначен квалитет, тука мислам и на Гибралтар кој во никој случај не смее да се потцени, рече Милевски на денешната прес-конференција. Тој во првите четири кола од четвртата група Ц-сегмент во Лигата на нации нема да може да смета на повеќе репрезентативци, меѓу кои и стандардниот Аријан Адеми, додека капитенот Стефан Ристовски неизвесно е колку средби ќе пропушти. – Приморани сме да правиме ротации, но ова е можност на вакви натпревари да го видиме вистинскиот потенцијал. Најзадоволен ќе бидам ако сите кои ќе излезат на терен ја оправдаат нашата доверба. Се надевам дека повиканите фудбалери ќе бидат доволни да го заокружиме овој циклус, посочи Милевски. Селекторот најави игра на победа на сите четири натпревари, а отсутниот поради повреда Ристовски, во улогата на капитен ќе го замени Енис Барди. Македонските фудбалери циклусот во Лигата на нации ќе го почнат против Бугарија на 2 јуни, потоа следува гостувањето кај Гибралтар (5 јуни), а двата домашни натпревара се со Грузија (9 јуни) и Гибралтар (12 јуни).

Боби Милевски е прв „пик“ на Црвена Звезда за наследник на Станковиќ!

Ристе Здравков — Thu, 31 Mar 2022 15:33:37 +0000

По двете одлични изданија на Македонија против светските гиганти Италија и Португалија во баражот за пласман на СП 2022 во Катар кои го привлекоа вниманието на комплетниот фудбалски свет, македонскиот селектор Благоја Милевски веќе е издвоен како најсериозен кандидат за преземање на кормилото на белградска Црвена Звезда по крајот на сезоната. „Чудотворецот од Македонија, Благоја Милевски е првиот пик на Црвена Звезда за наследник на Дејан Станковиќ во јуни“ – пренесоа поголемиот дел од српските медиуми. Сепак, Милевски во изјава за ЕКИПА демантира дека има било каков контакт со белграѓани во моментов, останувајќи концентриран на активностите во репрезентацијата и продолжување на патот кој го стартуваше низ квалификациите и баражот за мундијалски пласман. „Не, нема никаков контакт со Црвена Звезда. Јасно е дека јас носам огромни симпатии кон Црвена Звезда уште од времето кога бев дел од црвено-белите и тоа е мој клуб, но нема никакви разговори со челниците на клубот. Би сакал да истакнам дека и Црвена Звезда си има еден одличен тренер како Дејан Станковиќ, а јас сум концентиран единствено на репрезентацијата и идните предизвици, во моментов. Тоа е така сега, а што ќе донесе иднината, секако, никој не може да каже“ – вели Милевски за ЕКИПА. Пласманот на Македонија во баражот за СП 2022 и начинот на кој репрезентацијата ги одигра двата натпревари, против Италија и против Португалија, како што тврдат српските медиуми, сериозно го насочија вниманието на белграѓани кон Милевски. Според најавите, од клубот планираат промена на тренерското место во јуни поради што не се исклучуваат разговори и со македонскиот селектор.

Фудбалерите со најубавата роденденска честитка за Боби Милевски (ФОТО)

Ристе Здравков — Fri, 25 Mar 2022 07:02:39 +0000

Фудбалерите со триумфот над Италија му ја подарија најубавата роденденска честитка на селекторот Благоја Милевски. „Сер Боби“ денеска го прославува својот 51-ви роденден, а поголем подарок не можеше да добие од победата од 0-1 среде Италија против европскиот шампион. За Милевски, во осмиот натпревар како предводник на националниот тим, ова четврта победа, дополнети и на три ремија, и само еден пораз.

Милевски: Горд сум на овие момци, не застануваме тука

Ивона Петрова — Fri, 25 Mar 2022 06:14:47 +0000

Селекторот на Македонија, Благоја Милевски по историската победа над Италија во Палермо и пласманот во финалето од баражот за СП во Катар, на официјалната пресконференција по мечот, не штедеше зборови во пофалбите кон нашите репрезентативци. Популарниот „Сер Боби“ кој ја предводеше генерацијата до 21 година на ЕУРО 2017, сега има шанси за нов историски дострел, со победа над Португалија во вторник да биде првиот селектор на Македонија кој водел репрезентација на сениорско светско првенство. -Многу сум среќен за оваа победа, горд сум на овие момци. Не беше планот да играме вака и да шутнеме само два пати, но игравме со европскиот првак и да се победи ваква репрезентација не е мала работа. Италија во моментов е најдобра во Европа, Трајковски имаше одлична партија и ја круниса во својот дом со гол. Не застануваме тука, ни следи последниот чекор пред пласман на СП. На добар пат сме да потврдиме дека сме меѓу најдобрите дваесет селекции во Европа, изјави Благоја Милевски. Македонија во вторник ќе и гостува на Португалија во Порто во финалето од баражот за СП во Катар.