богданци – Kurir.mk

Пожарот меѓу Богданци и Дојран ставен под контрола

Тале Кристо — Thu, 31 Aug 2023 18:06:37 +0000

Пожарот меѓу Богданци и Дојран, кој избувна денеска на пладне на планината Карабалија, во атарот на селото Селемли, во близина на границата со Грција, е локализиран и е ставен под контрола, но се уште не е целосно изгаснат. Според директорот на Центарот за управување со кризи (ЦУК) Стојанче Ангелов, кој е на местото на пожарот, со дејствување на двата авиони „Ер трактор“ на Дирекцијата за заштита и спасување (ДСЗ), но и на пожарникарите од Гевгелија и Дојран, спречено е проширување на пожарот. - Се повлековме. Локализираниот пожар ќе го следиме зашто постои можност од негово активирање доколку ветрот го промени правецот, изјави Ангелов. Како што рече тој во последната видео изјава од местото на пожарот во прилог на гаснењето е и ветрот кој го насочуваше огнот кон изгорените делови. Ангелов информираше дека големиот пожар е на линијата на фронтот од Првата светска војна и досега се слушнале повеќе детонации од експлозивни направи и истрели од куршуми од голем калибар.

Пожарот меѓу Богданци и Дојран делумно ставен под контрола

Тале Кристо — Thu, 31 Aug 2023 16:38:51 +0000

Делумно е ставен под контрола пожарот меѓу Богданци и Дојран што избувна денеска на пладне на планината Карабалија, во атарот на селото Селемли, во близина на границата со Грција. Како што изјави директорот на Центарот за управување со кризи (ЦУК), Стојанче Ангелов, горат уште два краци. -Со дејствување на двата авиона „Ер трактор“ на Дирекцијата за заштита и спасување (ДСЗ), но и на локалните пожарникари од Гевгелија и Дојран, спречено е проширување на пожарот кон полето, рече Ангелов. Според него, големиот пожар е на линијата на фронтот од Првата светска војна и досега се слушнале дваесетина детонации од експлозивни направи и истрели од куршуми од голем калибар. -Тоа го усложнува гаснењето на пожарот, бидејќи ја загрозува безбедноста на пожарникарите, но и на леталата. Авионите пристапуваат внимателно и исфрлаат вода од повисоко, додаде Ангелов. Во прилог на гаснењето на пожарот оди и ветрот кој го насочува огнот кон изгорените делови и, според директорот на ЦУК, има можност во наредните неколку часа пожарот целосно да биде локализиран.

Пожарот меѓу Богданци и Дојран засега не се заканува на селото Селемли

Тале Кристо — Thu, 31 Aug 2023 13:40:51 +0000

Пожарот меѓу Богданци и Дојран, што избувна денеска на пладне на планината Карабалија, во атарот на селото Селемли, го гаснат два авиони „Ер трактор“, пожарникари од Гевгелија и од ЈП „Национални шуми“. Според градоначалникот на Богданци, Блаже Шапов, пожарот зафатил нискостеблеста, но и квалитетна шума и засега нема опасност да се прошири кон селото Селемли. -Местото на избувнувањето на пожарот е на многу непристапен и небезбеден терен и бргу се шири. Засега нема опасност да се доближи до селото Селемли. На терен се пожарникарите од Гевгелија и од ЈП „Национални шуми“ и во координирана акција со авионите прават напори пожарот да го стават под контрола, изјави за МИА градоначалникот Шапов. Инаку, како што претходно информираа од Центарот за управување со кризи (ЦУК) пожарот е изгаснат на еден крак кај плантажи со овошни насади, а на едно место пожарот се префрлил и на грчка територија. Директорот на Центарот за управување со кризи Стојанче Ангелов, претходно информира дека голем пожар избувна денеска околку на отворено на границата со Грција, помеѓу Богданци и Дојран, каде поминува линијата од фронтот од Првата светска војна и во кој досега експлодираа најмалку четири гранати од Прва светска војна. -Денеска околу пладне изби голем пожар помеѓу Богданци и Дојран. Пожарот се наожа во атарот на селото Селемли но поминува преку линијата од фронтот од Првата светска војна, линија на којашто има многу заостанати минско експлозивни неексплодирани средства. Во текот на овие два часа колку што е пожарот активен слушнати се најмалку четири силни експлозии. Ваквите експлозии го усложнуваат гаснењето на пожарот бидејќи не е безбедно пожарникарите да се приближат до него, рече Ангелов, кој веќе е на пат кон локацијата каде што се наоѓа пожарот. Пожарот, како што информира тој, е изгаснат само на еден крак каде што беше безбедно пожарникарите да пријдат, а останатиот опожарен дел се гаси со Ер тракторите на Дирекцијата за заштита и спасување којшто користат вода со посебна пена со поголем ефект. -Двата ер трактори на ДЗС веќе се активни. Исфрлија по неколку тури вода. Ќе продолжат да дејствуваат се додека пожарот целосно не го изгаснат. Пожарот меѓу другото се движи и кон грчка територија и според сегашните информации на едно место веќе е префрлен на грчка територија, информира Ангелов. Директорот на ЦУК соопшти дека од тие причини преку системот 112 уште пред да се префрли пожарот на грчка територија тамошните служби се известени за да се подготват.

Изгореа над 350 хектари нискостеблеста шума кај Богданци

Катерина Бојаџиева — Fri, 04 Aug 2023 18:47:59 +0000

Пожарот кај Богданци кај местото Брдаров камен, кој избувна вчера во 11 часот, целосно е изгаснат, сопштија од Центарот за управување со кризи (ЦУК). Противпожарните тимови се повлекуваат од терен, а на местото на пожарот е оставена дежурна екипа за да внимава да не дојде до повторно разгорување. Според информацијата од ЦУК, изгорени се над 350 хектари нискостеблеста деградирана шума, грмушки и трева. Нема штета на четирите ветерници низ кои помина пожарот. Пожарот го гаснеа шеесетина пожарникари и тимови на „Национални шуми“ и комуналното претпријатие на Богданци, како и авионите „Ер трактор“ и хеликоптер. Според градоначалникот на Богданци, Блаже Шапов, пожарот вчера почнал да се шири од пониските делови на овој терен каде се наоѓаат обработливи површини и тој се сомнева дека причина е човечки фактор.

Пожарот кај Богданци целосно изгаснат, денеска регистрирани 10 пожари во земјава

Ивона Петрова — Fri, 04 Aug 2023 17:02:54 +0000

Пожарот во Богданци е целосно изгаснат, а противпожарните тимови се повлекуваат од терен, информира ЦУК. На лице место е оставена дежурна екипа да внимава да не дојде до повторно разгорување. -Изгорени се приближно над 350 ха нискостеблеста деградирана шума, грмушки и трева. Нема штета на четирите ветерници под кои помина пожарот. Благодарност до храбрите пилоти и пожарникари, вели директорот на ЦУК, Стојанче Ангелов. На територијата на државата во текот на денешниот ден се регистрирани 10 пожари на отворено: - Општина Велес, с.Сливник 1 (куќа). - Општина Демир Хисар, с.Сопотница (сува трева и нискостеблесто). - Општина Струмица, с.Костурино (стрниште, сува трева и гуми). Во скопско се изгаснати и се уште се гасат 6 пожари на отворено: 1) Во Горно Блаце гореше мешана деградирана шума и трева 2) Кај с.Љубош, Студеничани над Батинци гореше деградирана шума и дива депонија 3) Во Волково гори трева, нискостеблеста деградирана шума и ѓубре. Изгоре и еден помошен објект. Пожарот е под контрола. 4) Во Бојане, Сарај гореше шума и трева, 5) Во општина Бутел околу ул. Боца Иванова кон обиколницата гореше сува трева, а изгоре и еден помошен објект. 6) Гореше и депонијата Вардариште. 7) Општина Зелениково, с.Орешани (ѓубре).

Пожарот кај Богданци ставен под контрола

Дарко Андоновски — Fri, 04 Aug 2023 09:20:27 +0000

Пожарот кај Богданци кај местото Брдаров камен, каде гори нискостеблеста шума, прнар и сува трева, е локализиран и ставен под контрола, но на одредени места се распламтува, информираа од Центарот за управување со кризи (ЦУК). Пожарот го гаснат шеесетина пожарникари и тимови на „Национални шуми“ и комуналното претпријатие на Богданци, кои со брзата интервенција не дозволуваат пожарот да се прошири. И градоначалникот на Богданци, Блаже Шапов потврди дека пожарот е локализиран, но екипите се уште се на терен и внимаваат да не се разгори на нови места. -Засега пожарот е локализиран и ставен под контрола, но критично е во наредните неколку часови. Доколку не се појават нови жаришта, пожарот ќе биде целосно изгаснат, изјави Шапов. Според него, пожарот вчера почнал да се шири од пониските делови на овој терен каде се наоѓаат обработливи површини и тој се сомнева дека причина за пожарот е човечки фактор. Опожарени се околу 500 хектари нискостеблеста деградирана шума и сува трева. Пожарот вчера помина низ ветерниците над Богданци без да предизвика штета на нив.

Пожарот кај Богданци се уште не е ставен под контрола

Тале Кристо — Fri, 04 Aug 2023 06:06:17 +0000

Пожарот кај Богданци, кој избувна вчера околу 11 часот во месноста Брдаров камен, веднаш до препумпната станица на Хидросистемот „Дојранско Езеро“, се уште не е ставен под контрола. Гаснењето продолжи од 6 часот утрово. Со огнената стихија, која досега проголта околу 500 хектари нискостеблеста деградирана шума и сува трева и која помина низ ветерниците над Богданци без да предизвика штета на нив, се борат шеесетина лица. Според Стојанче Ангелов, директор на Центарот за управување со кризи (ЦУК), чад има на повеќе места, а пожарникари од Гевгелија, Валандово, Кавадарци и Штип, заедно со тим од Дирекцијата за заштита и спасување (ДЗС), „Национални шуми“ и комуналното претпријатие од Богданци, се обидуваат да го заобиколат пожарот. -Доколку во подоцнежните часови дојде до разгорување на пожарот на располагање стојат трите авиони „Ер Трактор“ на ДЗС, како и два хеликоптери на МВР, информираше Стојанов. Според градоначалникот на Богданци, Блаже Шапов, кој е на местото на пожарот, засега нема опасност од негово проширување. -Со сите расположиви сили се обидуваме да го заобиколиме пожарот и да не дозволиме негово повторно избувнување. Засега се оди според планот и договореното од синоќешната координација. Доколку за неколку часови не дојде до повторно разгорување на пожарот ќе успееме да го локализираме и изгаснеме, изјави Шапов за МИА. Според него, пожарот вчера почнал да се шири од пониските делови на овој терен каде се наоѓаат обработливи површини и тој се сомнева дека причина е човечки фактор.

ВИДЕО: Хеликоптерот на МВР исфрли 17 тони вода на пожарот кај Богданци

Ивона Петрова — Thu, 03 Aug 2023 20:51:47 +0000

Хеликоптерската единица за полициски намени денеска дејствуваше во реонот на Богданци, каде успешно беше локализиран пожарот кој настана околу 11.00 часот кај месноста Брдаров Камен, веднаш до препумпната станица на Хидросистемот „Дојранско Езеро“. -Пожарот кај Богданци, во кој биле опожарени околу 500 хектари нискостеблеста шума, го зголемил интензитетот попладнево и покрај интервенцијата на двата Ер трактора на ДЗС кои низ повеќе налети и исфрлање вода учествуваа во гасење на пожарот, по што кон локацијата се упати и еден од полициските хеликоптери опремени за гаснење на пожари. Притоа хеликоптерот на МВР исфрли 17 тони вода, пожарот е локализиран, спречено е негово ширење кон пределот каде се поставени ветерниците, но поради смрачување, односно слаба видливост, сѐ уште не е изгаснат, информира МВР. Во гаснењето на пожарот покрај МВР и ДСЗ, учествуваат и пожарникари од Дојран и Валандово.

ВИДЕО: Досега изгорени над 500 хектари во пожарот кај Богданци, огнот поминал низ дел од ветерниците

Ивона Петрова — Thu, 03 Aug 2023 18:00:24 +0000

Над 500 хектари нискостеблеста шума досега се зафатени од големиот пожар во близина на Богданци. Според последните информации, пожарот поминал низ четири ветерници од ветерниот парк, но како што се соопштува нема штети на нив. Во гаснење на големиот пожар вклучени се два авиони Ер трактор на Дирекцијата за заштита и спасување и еден хеликоптер на МВР. Опожарена е нискостеблеста деградирана шума и сува трева. Пожарот избувнал околу 11.00 часот во месноста викана Брдаров камен веднаш до препумпната станица на хидросистемот Дојранско езеро.

Пожарот кај Богданци се засили, активиран и хеликоптер на МВР

Ивона Петрова — Thu, 03 Aug 2023 16:30:37 +0000

Пожарот кај Богданци се засили, велат најновите информации од Центарот за управување со кризи. Оттаму посочуваат дека пожарот се уште беснее и покрај интервенцијата на двата Ер трактори кои направиле повеќе од 19 прелети прецизно исфрлајки ја водата врз огнот. Директорот на ЦУК, Стојанче Ангелов вели дека активиран е и еден хеликоптер на МВР кој веќе е упатен кон пожарот. Гори нискостеблеста деградирана шума и сува трева, а поради опасноста пожарот да се прошири кон ветерниот парк претходно беа активирани авионите за гаснење пожар. Пожарот избувнал околу 11.00 часот во месноста викана Брдаров камен веднаш до препумпната станица на хидросистемот Дојранско езеро.