боки 13 – Kurir.mk

Заврши операцијата на Бојан Јовановски, остана со 10 проценти од желудникот

Ристе Здравков — Thu, 30 Mar 2023 13:00:43 +0000

Доктор Јованов, дигестивен хирург од градската болница за „Слободен печат“ потврдува дека е завршена операцијата која денеска беше извршена врз Бојан Јовановски, објави слободен печат. -Направивме субтотална ресекција на желудникот. Отстранети се ткива со предканцерогени состојби. Беше долга и тешка операција после која пациентот е во животозагрозувачка состојба бидјеќи не знаеме како ќе се одвива постоперативниот тек. Јовановски не е свесен и не е на машина. Речиси целиот желудник е отстранет, можеби се останати 10 проценти, најмногу 15 проценти од желудникот, рече за „Слободен печат“ доктор Јованов еден од хирурзите кои ја изведоа интервенцијата. Тој додаде дека пациентите со вакви операции мора да имаат строг начин на исхрана, да јадат по 10 пати на ден по многу мали количества миксирана храна и да се на постојана терапија.

Во тек е операција на Боки 13 во болницата „Св. Наум Охридски-Скопје“ – ќе му биде изваден желудникот

Дарко Андоновски — Thu, 30 Mar 2023 09:24:26 +0000

Во тек е операција на Бојан Јовановски-Боки 13 во болницата „Св. Наум Охридски-Скопје“. Тој утринава бил однесен во операциона сала, каде треба да му биде извршен оперативниот зафат. Адвокатот Владимир Туфегџиќ, полномошник на Јовановски-Боки 13 за дел од медиумите ја потврди информацијата и посочува дека станува збор за сложена интервенција која е ризична и животно-загрозувачка “. Дека ќе дојде до операција се навестуваше месеци наназад од страна на Јовановски-Боки 13 и неговиот адвокатски тим. Тие бараа хуман третман и да бидат почитувани мислењата од докторите од болницата „Св.Наум Охридски Скопје“ кои ординираа терапија и кажаа дека состојбата не може да се санира во затворски услови.

Боки 13 хоспитализиран, ќе му биде отстранет желудникот

Ивана Ефремовски — Fri, 17 Mar 2023 10:14:43 +0000

Денеска во 10 часот Бојан Јовановски со прекар Боки 13 е хоспитализиран во Универзитетската клиника за хируршки болести Св.Наум Охридски Скопје, заради извршување на хируршка интервенција, тотална гастректомија, односно целосно отстранување на витален орган - желудник. -Согласно специјалистичкиот извештај, ве информираме дека за извршувањето на операцијата која по својот карактер е сложена, високо - ризична и со неизвесен исход од истата, формиран е тим на повеќе хирурзи - специјалисти од областа кои ќе ја извршат операцијата, а истовремено напоменуваме дека хирурзите - специјалисти се оградуваат од ризикот и одговорноста за исходот од оперативниот зафат, дотолку повеќе што тие навремено и повеќекратно даваа категорични препораки и укажувања преку конзилијарните стручни мислења да не дојде до оваа операција и да се избегне овој мутилантен хируршки зафат, од причини што самата хируршка интервенција е високо ризична и сложена, придружувана со можни компликации кои можат да бидат кобни за пациентот, информира неговиот правен тим. „Оттука, произлегува фактот дека поради апсолутно и крајно непочитување на издадените задолжителни препораки и мислења на стручните колегиуми на државните клиники од страна на судските власти и Управата за извршување на санкциите, дојде до оваа непосакувана и ризична актуелна здравствена состојба на Бојан Јовановски, после која во најдобар случај и позитивен исход од операцијата, Бојан Јовановски ќе биде со траен инвалидитет. Целата оваа ситуација и операцијата можеше да се избегне доколку властите кои одлучуваа по барањата за прекин ги почитуваа специјалистичките препораки кои категорично укажуваа дека ќе дојде до сето ова, бидејќи во затворски - пенални услови нема можност за лекување и третирање на болеста на пациентот. Бојан Јовановски после денешната хоспитализација, во наредните денови ќе му бидат извршени сите потребни испитувања и подготовки за операцијата, по што хирурзите - специјалисти ќе пристапат кон извршување на истата. Ја информираме јавноста, дека пред Основниот кривичен суд веќе е поднесено ново барање за прекин на издржување на казната затвор согласно чл.224 ст.2 од ЗИС и очекуваме одлука која ќе биде донесена во итен рок, која ќе биде темелена врз основа на реални факти и неселективна оценка на доказите со примена на начелото на хуманост, согласно новонастаната состојба, односно одлука со која ќе биде уважено барањето за прекин согласно сите исполнетите законски услови, совест и одговорност при одлучување од страна на судот. Во овие чувствителни моменти за Бојан Јовановски и неговото семејство, ја повикуваме јавноста на солидарност и емпатија, како доблесни карактерни особини на секој поединец, бидејќи со овој пример на Бојан Јовановски имаме за цел да ги укажеме негативните појави, а истовремено да дадеме придонес кон подобрување на јавното добро“ - се наведува во нивното соопштение.

НА БОКИ МОРА ДА МУ СЕ ИЗВАДИ ЖЕЛУДНИКОТ, НЕГОВАТА СОСТОЈБА Е ДРАМАТИЧНО ВЛОШЕНА – тврди неговиот адвокат Туфегџиќ

Дарко Андоновски — Thu, 16 Mar 2023 18:52:21 +0000

Ново барање за прекин на казната на Бојан-Јовановски-Боки 13 е поднесено од неговиот адвокат Владимир Туфегџиќ. Тој за „Макфакс“ посочува дека има драматично влошување на здравствената состојба, а поради тоа, тврди: „Неизбежен е оперативен зафат со кој ќе биде отстранет витален орган-желудник и ќе настане траен инвалидитет на лицето. За оваа состојба денеска писмено е известен и претседателот на Кривичниот суд Скопје“. Адвокатот посочува дека Кривичен и Управата за санкции знаеле за последиците кои може да ги има Боки 13 ако не се почитуваат лекарските напатствија. „За жал, во изминатите 7 месеци постојано му укажувавме на судот и надлежните во Управата за извршување на санкциите за значењето на редовната примена на задолжителниот здравствен режим и сериозните последици кои можат да произлезат по животот и здравјето, доколку секојдневно не се применува. Постојано укажувавме на последиците по животот и здравјето на лицето доколку само неколку дена не се применува овој задолжителен медицински режим бидејќи природата на болеста е таква што за само неколку дена настануваат тешки последици. За жал од страна на надлежните органи не наидовме на разбирање за нашето тврдење засновано на стручно медицинско мислење, дека задолжителниот здравствен режим не може да се спроведе во пенални услови“, вели адвокатот Туфегџиќ за „Макфакс“. Тој посочува дека Брза помош се обидувала да го спроведе задолжителниот здравствен режим во затворот „Идризово“ каде Боки 13 издржува казна, но без успех, за што сведочат и 11-те писмени извештаи. „Напротив, судот и Управата за извршување на санкциите врз основа на мислењето на домскиот лекар утврдија дека КПУ Идризово ги има сите услови за спроведување на задолжителниот медицински режим. Доставивме обемна медицинска документација во изнинатите 7 месеци во две последователни постапки пред судот и управата за санкции, бидејќи состојбата се влошуваше на дневна основа. Ниту еден надлежен орган при одлучувањето не направи ниту еден обид да стапи во контакт со лекарите специјалисти кои го лекуваат лицето. Останува впечарокот дека Бојан Јовановски покрај казната на која е осуден сега се казнува и поради неговата болест. Прекинот на казната го баравме поради факти засновани на стручната медицина, бидејќи само на тој начин ќе беа одбегнати последиците со кои денеска се соочува лицето. За жал, денеска ризикот и исходот по животот на пациентот е неизвесен и во тој дел се оградуваат и лекарите специјалисти од областа“, додава Туфегџиќ. Тој потсетува дека пред седум дена го алармирал и Кривичен суд каде укажал дека прекинот е неопходен и преважен за Боки 13. „Во последното мое обраќање до судот на 09.03.2023 укажав дека поради ваквата состојба на работите е потполно основано и легитимно евентуалното барање одговорност за последиците од страна на осудениот и неговото семејство, а заради идните несакани и неизвесни последици по животот и здравјето на лицето. Како и да е, се надевам дека овој случај ќе биде повод да се извлече поука за во иднина, за поинаков пристап во вакви сложени постапки, а пред се да проработи совеста, разумот и хуманоста кај надлежните за да во иднина не ни се случуваат вакви несакани последици, кажано со реториката на сегашниот Министер за правда, условите во затворите да не останат и понатаму срамни“, додава Туфегџиќ. Претходно, Јасминка Јовановска, мајка на Бојан Јовановски-Боки 13 преку писмо до јавноста алармираше дека животот на нејзиниот син е донесен во ризик. Јовановска, во писмото потпишано од неа и нејзиниот сопруг Миле Јовановски, посочува дека Боки 13 е во лоша здравствена состојба поради тоа што е мета на изживување, малтретирање и тортура. Најавува дека за ваквите последици по неговото здравје, одговорност ќе бара од инволвирни лица.

Родителите на Боки 13 бараат правда: „Животот на нашиот син е донесен до крајна црвена линија, му се случуваат тортура и линч“

Ивана Ефремовски — Thu, 16 Mar 2023 08:57:51 +0000

Родителите на Бојан Јовановски - Боки 13, Јасминка Јовановска и Миле Јовановски утрово испратија јавно обраќање. Нивното соопштение го пренесуваме во целост: Првично изразуваме сериозна загриженост како родители за актуелната здравствена состојба во која се наоѓа Бојан, а како граѓани на оваа држава во најблага форма кажано се чувствуваме згрозени и огорчени од организираната тортура и линч кои му се случуваат на Бојан целиот овој период, на него лично, а и на целото наше семејство како рефлексија од омразата, нечовечноста и антагонизмот кон Бојан. Ве информирам дека за целиот овој период од почетокот на кривично-правните процеси против Бојан па се до денес се немам огласено ниту еднаш во јавност, не од причина дека немам што да кажам, напротив и како негова мајка и како професионалец во областа на правото, како истакнат правник со повеќе од 30 годишно работно искуство имам многу да зборувам за здруженото НЕПРАВО кон Бојан, за максимата на човечкото лицемерие, за сите атакувања, етикитирање и ниски удари кои што сме ги добиле во целиот овој период. Сум била воздржана, но повеќе самата актуелна состојба со животот и здравјето на Бојан тоа не ми го дозволуваат, бидејќи врз него ќе биде извршена операција тотална гастректомија, односно целосно отстранување на витален орган желудник, со што ќе настапи траен инвалидитет на мојот син Бојан. Од тие причини со целиот мој морален и професионален дигнитет и се обраќам на јавноста преку ова јавно соопштение и немам за цел да предизвикам чувство на сожалување, туку единствено да порачам дека од овој момент преку сите законски инструменти предвидени со домашното и меѓународното законодавство ќе се борам заедно со мојот сопруг преку нашите правни полномошници против злото и неправдата која му е сторена на Бојан и на тој начин директно му е загрозен неговиот живот. Животот на мојот син Бојан е донесен до крајна црвена линија и согласно последните медицински наоди и извештаи, операцијата која ќе се изврши е неизбежна и е со висок ризик по неговиот живот, се работи за операција со неизвесен исход после која операција повторувам дека Бојан ќе има траен инвалидитет. Па оттука, заради сето ова сите инволвирани лица кои системски, свесно со сторување и несторување здружено и со намера му го сторија ова неправо на Бојан ќе мораат да понесат кривична одговорност и да бидат најстрого санкционирани. За ова изживување, малтретирање и тортура кон Бојан одговорност мора да има! Како мајка и родител, на ниедна мајка и родител не им го посакувам ова пеколно и злосторничко однесување кон било чие дете, затоа упатувам апел до јавноста, за човечноност и разумност во овие чувствителни моменти од причини што Бојан е мета на најголемиот јавен говор на омраза сите овие години, а никој не понел одговорност за таквиот отворен и директен говор на омраза, каде со најпогрдни зборови, навреди и пцовки се опишувало името на Бојан, а за воља на вистината ниту еднаш досега ниедна организација за борба на човековите права не изнела јасен став, не ги осудиле ваквите појави и не застанале во одбрана на правата на Бојан, ниту барем декларативно, а Бојан е флагрантен пример за повреда на човековите права! Поради сето погоренаведено, поради организирано и здружено делување и соизвршување од безобѕирна одмазда, користољубие и по нарачка, под сомнение за сторени повеќе кривични дела ќе бидат поднесени кривични пријави за лица од правосудството, органи на извршната власт и здравствени работници кои заеднички, здружено, свесно и со намера, секое од пријавените лица со одделни и поврзани дејствија на сторување, ги сториле делата за кои ќе биде иницирана кривична постапка од нас, како подносители, родителите на Бојан Јовановски, Јасминка и Миле Јовановски пред надлежното јавно обвинителство. Пред надлежен јавен обвинител ќе бидат образложени сите наводи и кривичните пријави ќе бидат поткрепени со цврсти докази. Одговорност за целото нанесено зло и за сите инволвирани лица кои се директно одговорни за оваа ситуација, ќе има, без исклучок! Нашата борба ќе биде до крај, се до конечна правда, за која правда сум се борела и работела цел работен век во областа на правото, без ниедна морална и професионална дамка со целиот мој изграден морален и професионален интегритет. Во прилог на ова соопштение ви го испраќаме последниот специјалистички извештај со кој Бојан се упатува на оперативен зафат тотална гастректомија, односно целосно отстранување на витален орган желудник.

КРИВИЧНИОТ СУД НЕ МУ ВЕРУВА НА БОКИ 13: тој останува во затвор иако вели дека е болен!

Дарко Андоновски — Thu, 09 Mar 2023 17:24:57 +0000

Бојан Јовановски-Боки 13, осуден во случајот „Рекет“, останува во затвор. Кривичниот суд донесе одлука за која посочува дека ја испратил и до подносителот, а со која ја одбива жалбата преку која осудениот се бореше за привремен прекин на казната поради влошено здравје. Адвокатот Владимир Туфегџиќ, пак, не ја добил одлуката, па дури вели и дека поднел нови докази, со кои побива дека Јовановски може да продолжи со издржување на казната, oбјави А1он.мк. Оваа одлука на судот доаѓа по денешното писмо на правниот тим на Јовановски во кое тврдат дека неговото здравје е нарушено и оти е во животна опасност

Здравјето на Боки 13 е АЛАРМАНТНО влошено, правниот тим открива дека тој преживува агонија и тиранија

Ивана Ефремовски — Thu, 09 Mar 2023 08:29:26 +0000

На ден 07.03.2023 на ЈЗУ УК за ГЕХ Скопје, на осудениот Бојан Јовановски со прекар Боки 13, му беше напревена Горнодигестивна ендоскопија, Гастроскопија , при која инвестигација, во наодот од истата е констатирано крајно и алармантно влошување на здравствената состојба на Бојан Јовановски, со предлог за оперативен третман тотална гастректомија со езофаго-јејуно анастомоза, односно целосно отстранување на витален орган желудник, бидејќи врз пациентот терапевтскиот третман не е спроведуван, ниту реализиран, односно со ова медицинско иследување и наод се потврдува фактот дека осудениот Бојан Јовановски нема услови и можност да се лекува и да се третира во пенални затворски услови. Целото соопштение од Правниот тим на Бојан Јовановски, го пренесуваме во продолжение: Наодот од извршената гастроскопија е рефериран и одобрен од стручниот колегиум на Клиниката УК за ГЕХ Скопје. Животот на осудениот Бојан Јовановски е ставен во ризик, бидејќи извесно е во секој момент да настане компликација која ќе биде фатална по неговиот живот, па наместо законита постапка имаме состојба на хазардерско постапување од страна на надлежните органи, а како влог е ставен животот на осудениот Бојан Јовановски! Оттука, потенцираме дека Основниот кривичен суд Скопје веќе цели 4 месеци нема донесено правосилна одлука по барањето за прекин, постапка која по својот карактер и итна, а истовремено судот не презема никакви дејствија и не одлучува по жалбената постапка ниту во разумен рок, иако до судот навремено се доставени сите овие медицински докази и од страна на одбраната се преземени сите расположливи средства предвидени со закон, но за жал, негативната тенденција и тортура кон осудениот Боја Јовановски е поголема од сите реални факти и законски основи за уважување на барањето за прекин на издржување на казна затвор. Воедно ја информираме јавноста дека на ден 01.02.2023 година поднесено е барање за прекин и до директорот на Управата за извршување на санкциите, кој е суверен во својата одлука и не е врзан со одлуката на судот, но и од овој орган нема сѐ уште одлука! Ја информираме општата и стручната јавност дека оваа агонија и тиранија кон осудениот Бојан Јовановски трае повеќе од 7 ( седум ) месеци и дека во текот на двете последователни постапки за прекин кон судот и кон двете постапки за прекин кон Управата за извршување на санкциите, од страна на одбраната се поднесени безброј писмени поднесоци, темелени врз основа на цврсти медицински докази кои укажуваат на сериозноста и животно-загрозувачкиот карактер на болеста на осудениот Бојан Јовановски, кој е дефинитивно предмет на нечовечно однесување, истиот се третира како експериментален предмет, а не како човек, врз осудениот Бојан Јовановски веќе несомнено се спроведува тортура од највисок степен и му се нарушуваат сите загарантирани човекови права согласно Устав и согласно Европската конвеција за заштита на човекови права. Вакво институционално постапување и директно изживување од позиција на моќ е незапаметено во поновата историја, дотолку повеќе што однапред предупредувавме во барањата за прекин дека доколку осудениот Бојан Јовавски не се лекува и третира согласно специјалистичките извештаи и конзилијарните мислења на десетици специјалисти и суб-специјалисти, ќе дојде до оваа крајна и непосакувана последица, а тоа е операција со висок ризик на смртност и настанување на траен инвалидитет кај Бојан Јовановски. После сето ова веруваме, но не сме убедени, дека за Бојан Јовановски еднакво важи загарантираното Уставно начело на неповредливост на физичкиот и психичкиот интегритет, како и за сите други граѓани во Р.С.Македонија. Оттука, јавно прашуваме на кого му одговара да настанат смртоносни последици по животот на осудениот Бојан Јовановски? Дали системот свесно, организирано и координирано, секојдневно и стихијно го убива Бојан Јовановски? Кој ќе понесе одговорност за веќе настанатите последици по здравјето и животот на Бојан Јовановски? Осудениот Бојан Јовановски беше осуден и пред да биде осуден со пресуда на сомнително правен начин, но тоа е тема за друго идно време, а на оваа тортура мора да се стави крај! Знаеме и свесни сме од каде доаѓаат наредбите за ова изживување кон Бојан Јовановски, но по словото на законот и легалитетот ќе се бориме со сите законски средства до крајна линија на секој расположлив начин со наредбодавачите и извршителите на оваа системска тортура и линч! Порачуваме дека не се откажуваме од намерата за правдата да добие светлост на денот и дека не се плашиме од директните и индиректните закани, од причини што бранејќи ги правата на осудениот Бојан Јовановски, ја браниме законитоста, а преку тоа ја браниме и правната стабилност која е сериозно разнишана преку вакви негативни примери. И секако важно за напомена е дека барањето за прекин на издржување казна затвор претставува институт од времен карактер, а не ослободување од изречената санкција! Во прилог на ова соопштение ви го испраќаме специјалистичкиот извештај од извршената Гастроскопија од УК за ГЕХ Скопје од 07.03.2023 година и дополненијата на барањата за прекин на издржување на казна затвор кон судот и Управата за извршување на санкциите од 08.03.2023 година од бранителот м-р Владимир Туфегџиќ, адвокат од Скопје. Согласно вашите потреби и цели на вашето информирање, согласни сме да користите содржина од доставените прилози и истите да ги објавите и прикажете и визуелно во целост, согласно ваша одлука и потреба.

Правниот тим на Боки 13: 11 лекари од Брза помош утврдија дека Јовановски не може да се лекува во затвор

Ивона Петрова — Sat, 04 Mar 2023 11:10:31 +0000

Правниот тим на Бојан Јовановски - Боки 13, испрати соопштение за неговата здравствена состојба, и неможноста за санирање во пенални услови. Велат, сето изнесено е аргументирано со мислења на кои се повикува и Кривичниот суд, но и со потврди од Итната медицинска помош која 11 пати бил повикана во затворот „Идризово“ и дала потврда дека не може да се аплицира терапија, ниту да се одржи хигиено-диететски режим. -Сите веќе доставени медицински докази (медицински конзилијарни стручни мислења) до судот кои со сигурност упатуваат на фактот дека осудениот Бојан Јовановски со прекар Боки 13 не може да се лекува во пенални услови, а особено поради конзилијарното мислење од ЈЗУ УК за Дигестивна хирургија Скопје од 23.01.2023 година, мислење кое беше истакното и издвоено од страна на Основниот Кривичен суд при известувањето до јавноста од страна на судот на ден 17.02.2023 година. Во посоченото мислење од ЈЗУ УК за Дигестивна хирургија Скопје се вели дека специјалист истите од таа клиника се согласни со дадените препораки од страна на колегите хирурзи од ЈЗУ УК СВ. НАУМ ОХРИДСКИ за препишаната терапија и за потребата од спроведување на строг хигиено-диетски резим, истите се оградуваат од прашањето дали има услови за спроведување на хигиено-диетскиот режим во затворот и во последниот пасус наведуваат дека во насока на сето наведено општата состојба на пациентот не е компромитирана, особено доколку му се овозможат соодветни услови за апликација на тераписки третман и примена на хигиено диетски режим. Во однос на сето наведено, а доведено во корелација со мислењата од државни универзитетски клиники, ја информираме јавноста дека е констатирано и утврдено дека во затворот, односно во пенални услови не постои ниту начин, ниту постојат услови за неопходно лекување и третман на Бојан Јовановски. Од страна на 11 доктори од Итната помош која доаѓала секојдневно во затворот констатирано е дека препишаната терапија од отпусното писмо од 17.02.2023 година нема услови целосно да се спроведе во затворски услови и да се аплицира и дека на лице место во затворот е утврдено од 11 лекари дека нема услови и можност за спроведување и примена на неопходниот хигиено-диетски режим. За констатираното и утврденото од докторите од Медицинската итна служба изготвени се писмени потврди од самите доктори со нивни печат и потпис кои ви ги доставуваме во ова соопштение за јавност. Овие докази се доставени до Основниот кривичен суд каде сеуште трае жалбената постапка за барањето за прекин на ден 02.03.2023 година, доставени се и до Управата за извршување на санкции на ден 03.02.2023 година, како и специјалистички контролен извештај од 01.02.2023мгодина од ЈЗУ УКХБ св.Наум Охридски. Во прилог на ова соопштение откако институционално во законска форма се доставени сите докази до надлежните органи, ги доставуваме и до јавноста, се со цел јавноста да ја знае и увиди вистинската слика за тортурата која му се случува на осудениот Бојан Јовановски кој и покрај сите јасни недвојбени лекарски препораки, не му се овозможува прекинот кој го има како законска можност како и секое друго осудено лице. Ве информираме дека жалбената постапка сеуште трае и дека целата постапка за прекин на казна трае веќе 4 месеци, иако согласно закон се работи за постапка од итен карактер, а во правна смисла ќе се согласиме дека постапка од итен карактер е недозволиво и законски незамисливо да трае 4 месеци! Овие докази кои ги доставуваме до медиумите и до јавноста ја покажуваат тортурата на дело, па оттука гласно го поставуваме прашањето кој ќе сноси одговорност за оваа организирана и координирана хајка и најважно од се е кој ќе сноси одговорност доколку настанат компликации кои директно може да резултираат со смртоносни последици по животот на Бојан Јовановски, бидејќи од сето приложено и сега докажано на лице место во затворската установа од 11 лекари дека нема услови за лекување и третман во затворот. Апелираме и истакнуваме барање до сите надлежни органи, а особено до сите домашни и меѓународни институции и организации за заштита на човековите права веднаш да преземат активности и дејствија во рамки на своите надлежности, со цел да се спречи оваа незапаметена тортура и флагрантно кршење на загарантираните човекови права кој согласно Устав ги има и осудениот Бојан Јовановски со прекар Боки 13, велат адвокатите на Боки. До медиуми доставија и 11 потврди од Итна медицинска помош потпишани од 11 различни доктори и друга медицинска документација.

Боки жали за одземената гардероба: Чии ли нечисти нозе ми ги носат чевлите, замолува и уметничките слики да се донираат!

Дарко Андоновски — Fri, 03 Mar 2023 12:05:43 +0000

Бојан Јовановски познат како Боки 13 повторно се огласи во јавнсота со негова реакција за одземениот имот. Во неговото соопштение посочува дека се огласува по повод соопштение од Агенцијата за одземен имот, поврзано за одземената гардероба и друга брендирана стока во предметот Рекет. Дополнува дека токму поради таа гардероба и друга брендирана стока е осуден на 9 годишна затворска казна.– Од страна на Агенцијата за одземен имот соопштиле дека за одземената гардеробара и за таков вид на брендирана стока нема направено вештачење, нема утврдена вредност, ниту проценка од причини што немало вработено или ангажирано такво стручно лице, вештак и проценител во Бирото за судски вештачења, откако побарале информација од Министерството за правда – Биро за судски вештачења! Токму така, браво за агилноста што после скоро 4 години самите си потврдувате дека без вештачење, без утврдена вредност и проценка како задолжителни законски елементи од една законита кривично-правна постапка, јас сум осуден и денеска издржувам казна затвор, алал вера! – пишува во соопштението од Боки 13. Тој дополнува дека во текот на судењето за недокажаниот случај “Рекет” многу пати со бранителот Сашко Дукоски, истакнувале барање за вештачење на одземената гардероба, чевли, чанти, накит, очила, часовници, уметнички слики, лустери, фотелји и гарнитури за седење. – Истото тоа го наведовме и пред Апелациониот суд во жалбената постапка, за истото тоа пишувавме и пред Врховниот суд во барањето за вонредно преиспитување на правосилна пресуда, но се беше залудно, бидејќи наредбата да бидам осуден (без докази и без законито спроведена постапка) беше посилна од законот и правото!!! Онаа суспендиранана Вилма Русковска беше должна пред да ја достави како доказ во обвинителниот акт мојата одземена гардероба, чевли, чанти, накит, часовници, очила, уметнички слики, лустери, фотелји и гарнитури за седење да изготви вештачење со вешт наод и мислење од вешто лице, со точна проценка и утврдена вредност, за да можеше истото да биде доказ во судска постапка согласно ЗКП, а не така на ѓутуре како крвник да ми ја одземе цела гардероба која била стекната во изминатите 15-20 години, за која истата таа Вилма во обвинението наведе дека целата одземена гардероба и друга брендирана стока сум ја купил за само четири месеци, замислете супермен да бев па не ќе можев да ја купам за 4 месеци – пишува во соопштението. Тој дополнува дека „во моментите на супер слава и супер моќ на денес суспендираната Вилма и проаѓаше се како подмачкано, па така и магаре да донесеше во судница и да кажеше дека сум купил магаре од 1,5 милиони евра (никогаш недокажаните и наводни пари од Орце Камчев), ќе беше круцијален доказ за онаа судијкана Васка роднина-братучетка на Иван Џолев и онаа другана судијка Софче да ме осудат така крвнички и политички нарачано!!!“ – Прашање кое мачи, чуму сега вештачење и проценка после четири години??? Дали доколку се изврши вештачење и проценка после 4 години, агенцијата со истото сака да ми помогне па вештачењето и проценката да ми бидат основ за повторување на постапката и одново процнување на Рекет, па ви благодарам многу другари, направете го што побрзо, иако однапред знам дека давате само голи соопштенија, а дека вештачење и проценка никогаш нема да направите, бидејќи не ви одговора, бидејќи веќе и немате што да вештачите, дотолку повеќе што главната поента зошто молците и глувците ќе останат гладни е токму тоа, што одземената гардероба и друга брендирана стока е дрско испокрадена и заменета со други парчиња слични на одземената брендирана стока!!! Само си се прашувам: чии ли нечисти раце ми ги носат чантите? Чии ли нечисти нозе ми ги носат чевлите? Чии ли проклети очи ги скриваат моите очила? И кој ли си го мери времето до зад решетки со моите часовници?!?! – пишува во обраќањето Тој исто така посочува дека „ако дојде денот бесправно одземеното да ми биде вратено, јас не го сакам и ќе го донирам, но за жал до тоа нема да дојде бидејќи лоповите си го донираа одземеното пред време“ – И сосема за крај, Вилма ти порачувам дека ќе одговараш за сите злодела кои ги имаш направено, меѓудругото и за овој криминал со одземената гардероба и брендирана стока, бидејќи ти си директно одговорна заедно со твоите помошнички судијки Васка Масевска- Наумовска и Софче Гаврилова-Ефремова и ти тврдам дека ќе дојдеш зад решетки, бидејќи суспендирањето за тебе е награда а не казна, за тебе вистинската казна ти следува со процесот “Бумеранг”!!! – вели Боки 13, и бара барем уметничките слики да се продадат во некој од уметничките музеи на Македонија, барем тоа добро направете го, ако веќе и тие не висат на нечии крвави ѕидови!

Боки 13 преку адвокатите опоменува: Џабе се заканувате, центрите на моќ да ги тргнат рацете од операцијата „Бумеранг“

Ивана Ефремовски — Wed, 01 Mar 2023 16:35:18 +0000

Бојан Јовановски познат како Боки 13, осуден за случајот Рекет, минатата недела најави операција „Бумеранг“ со над милиони „бомби“ меѓу кои со вмешани бизнисмени и функционери, а сега бара центрите на моќ да не вршат притисоци. Неговиот правен тим соопшти дека во врска со кривично-правната операција со кодно име “Бумеранг” од страна на полномошниците на подносителот Бојан Јовановски , м-р. Владимир Туфегџиќ и Сашко Дукоски, адвокати од Скопје, вчера на ден 28.02.2023 година истакнато е барање за определување на термини за доставување на докази и сослушување на подносителот Бојан Јовановски пред надлежниот обвинител по оформениот предмет од јавниот обвинител Ислам Абази. Од таму велат дека поради итноста, но истовремено и поради целисходноста и ефикасноста на започнатата кривично-правна операција со кодно име ”Бумеранг” ја информираат јавноста дека за почеток на овој процес ќе бидат побарани однапред определени и утврдени повеќе термини со оглед на обемноста на доказниот материјал. Квалитативната обработка на материјалот, доказите ќе се врши исклучиво во присуство на подносителот Бојан Јовановски и на неговите полномошници, адвокати. Како што велат поради чувствителноста , карактерот и сериозноста на отпочнатиот процес со кодно име “Бумеранг” апелираат до јавноста дека истиот ќе се врши транспарентно во име на високиот степен на јавниот интерес. Нивното соопштение прочитајте го во продолжение: Гласно укажуваме до центрите на моќ кои веројатно се директно засегнати од овој процес да не вршат притисоци, да не упатуваат директни и индиректни закани и да престанат со незаконски дејствија на уценувања и заплашувања со цел да го спречат и попречат започнатиот процес “Бумеранг”, секако дека ваквите погоре опишани дејствија од центрите на моќ беа очекувани за нас, но недвојбено истакнуваме дека ништо од сето тоа нема да ја спречи реализацијата на кривично-правната операција “Бумеранг” и дека во одреден момент доколку продолжи трендот на притисоци, закани, уцени, засегнатите страни ќе добијат соодветен одговор за нивните незаконити дејствија кои интензивно и задкулисно се случуваат изминатите денови од кога е јавно објавено започнувањето на процесот“ Го повикуваме и меѓународниот фактор во име на императивната заложба за владеење на правото и во име на фактот сто во изминатите години токму од меѓународната заедница се вложени големи финансиски средства во нашата држава и правосудните институции за подобрување и прогрес на правото и правната држава, да го следат со внимание отпочнатиот процес и во рамки на своите надлежности да дадат свој позитивен придонес кон реализација на процесот. Јавноста ќе биде информирана за првиот термин и за останатите усогласени термини за предавање на доказниот материјал и пријави во ОЈО за ГОКК Скопје.