Врнежите ја наполнија браната Калиманци

Ивона Петрова — Tue, 16 May 2023 11:12:46 +0000

Интензивните врнежи од дожд значително го покачија нивото на вода во реките од хидросистемот „Брегалница“ со што браната Калиманци е пред полнење до максималниот капацитет од 115 милиони кубни метри вода. Дотокот на вода од реката Брегалница и нејзините притоки изнесува околу 11 метри кубни во секунда и со таква динамика на полнење се очекува наскоро акумулацијата да ја достигне горната кота за прелив. Каналската мрежа од хидросистемот е ставена во целосна функција, а во десниот магистрален канал се пуштаат по шест кубни метри во секунда, како надополнување на проточните води од реките за полнење на оризовите ниви во регионот. -Во моментот во Калиманци има околу 113 милиони кубни метри вода, односно недостасуваат уште околу педесетина сантиметри до прелавање преку страничниот преграден ѕид. За да се обезбеди прифаќање на новите количини, од пред три недели ја пуштивме водата во главниот канал, а дел се користи и за потребите на хидроелектраната во рамки на браната. Во наредните денови постепено ќе ги зголемуваме количините во десниот магистрален канал, сè до неговиот оптимален капацитет. Поволната хидролошка состојба помогна полнењето на нивите со вода и сеидбата на оризот да тече според планот, а според наши проценки околу 70 отсто од планираните површини се веќе посеани, истакна Благојчо Богатинов, раководител на водостопанската подружница „Брегалница“ во Кочани. Мобилните екипи на водостопанското претпријатие и понатаму се на терен и работат на каналската мрежа за обезбедување вода за полињата во атарите на населените места во општина Чешиново-Облешево, каде сеидбата на оризот вообичаено се реализира во текот на мај. Според годишниот план за наводнување, годинава со ориз се опфатени околу 3.500 хектари. Од водостопанската подружница „Брегалница“ нагласуваат дека и покрај максималното ниво на акумулирана вода во Калиманци, распределбата ќе се врши крајно економично за да се обезбеди наводнување во текот на летниот период за полињата во кочанскиот, пробиштипскиот и светиниколскиот регион

Прекин на сообраќајот за товарни возила во близина на браната Калиманци

Магдалена Андонова — Tue, 12 Jan 2021 14:44:22 +0000

Поради одрон на патниот правец Штип – Делчево, во близина на браната Калиманци, кај м.в. Драки сообраќајот е во прекин за товарни возила, соопштија од Автомотосојузот на Македонија. Поради одрон во прекин е и сообраќајот на патниот правец А3 Кочани – М.Каменица, на делницата од Истибања до брана Калиманци, кај м.в. Ајдучки Камен. За лесните возила сообраќајот се одвива по направена девијација, додека тешките товарни возила и автобуси се пренасочуваат на регионалниот патен правец Кочани – Бигла – Делчево. Екипите на Ј.П.Македонија пат работат на расчистување на одронот и нормализирање на сообраќајот на овој патен правец. На учесниците во сообраќајот им се препорачува внимателно управување со возилата и прилагодување на брзината спрема условите на патот. (МИА)

брана калиманци – Kurir.mk

Врнежите ја наполнија браната Калиманци

Прекин на сообраќајот за товарни возила во близина на браната Калиманци