бранко азески – Kurir.mk

Средба Пендароски – Азески: Политичките случувања, нивните влијанија врз економијата и заштита на интересите на бизнисот

Ристе Здравков — Fri, 14 Jul 2023 13:22:53 +0000

Актуелните општествено-политички случувања во земјава и нивните влијанија врз економскиот амбиент, како и за заштита на интересите на бизнис-заедницата, се темите за кои се разговарало на средбата на претседателот Стево Пендаровски со претседателот на Комората, Бранко Азески, и претставниците од Асоцијацијата во Стопанската комора на Северна Македонија ТИМ-40. Претседателот Пендаровски беше информиран за иницијативата за потпишување декларација за економски реформи, политики и мерки, која е поттикната од бавниот реален раст на македонската економија, кој во периодот од 1993 до 2021 година просечно годишно изнесувал само 1,7 отсто. – Според претставниците на Комората, постојат пет приоритетни области во нашата држава, потенцирајќи дека за создавање стабилен и предвидлив економски амбиент, неопходни се решавање на сивата економија, корупцијата, гасификацијата, решавање на проблемите со извозните компании, издавање на дозволите за градба и регулирање на статусот на интернет-порталите – информира Кабинетот на претседателот. Пендаровски ја поддржа иницијативата и ги поздрави напорите на бизнис-заедницата со цел поттикнување нови инвестиции, нови работни места и долгорочен одржлив економски раст и развој на земјата. Во разговорите беше констатирано дека за унапредување на севкупните економски односи на државата, потребно е решавање на сите отворени прашања преку дијалог и меѓусебна соработка, се наведува во соопштението.

Азески: Извозот да стане врвен национален приоритет

Дарко Андоновски — Thu, 08 Jun 2023 06:16:55 +0000

Извозот да стане врвен национален приоритет, ќе порача денеска претседателот на Стопанската комора Бранко Азески во третото месечно обраќање што го организира оваа институција како дел од своите понови активности. Азески, кој е и претседател на Националниот совет за извоз, ќе зборува на темата „Извоз, Извоз, Извоз!”. Негови гости ќе бидат академик Гоце Петрески, професорот од Економски факултет – Штип и претседател на Клубот на извозници при Комората Дарко Лазаров, професорот на University College London UCL Славо Радошевич, претседателот на Белгиската стопанска комора Оливер Вилокс, извршниот директор на Тиквеш АД - Кавадарци и потпретседател на Клубот на извозници при Комората Радош Вуќикевиќ, како и генералниот директор на компанијата „Актива” Штип Иле Николов. -Азески со своите гости нема да зборува за тоа што било, туку за тоа што треба да се направи во иднина, а тоа е - извозот да стане врвен национален приоритет, најавува Стопансаката комора.

„Постои ли во оваа држава поим ОДГОВОРНОСТ?“: Азески со пет прашања до Владата!

Ивана Ефремовски — Mon, 30 Jan 2023 09:34:17 +0000

Колумна на Бранко Азески, претседател на Стопанската комора на Македонија 1. Започнавме со спротивставени мислења околу Законот за работни односи, со кој недела се прогласува за неработен ден. Завршивме на Уставен суд. Во образложението на решението со кое се отфрла нашата иницијатива, а кое, впрочем, го добивме година дена по поднесувањето на иницијативата, Уставниот суд елаборираше дека една од причините е тоа дека здравјето на луѓето е определувачко за да не се прифати иницијативата. На тоа, впрочем, не се повикува ниту законското решение, плус еден куп исклучоци кои покажуваат дека здравјето на тие луѓе не е важно. Зарем ова не и пречи на Владата во градењето правна држава да мора да биде одбранета и со вака нелогични квалификации?! 2. Согласни сме околу барањето да ги зголемиме квотите за увоз на работна сила. Но имаме едно просто прашање: што е со нашите вундеркиндзи кои ги испративме на државна сметка на најпрестижните универзитети, а кои никако да се вратат и да и помогнат на државата. Каде се тие сега и за што се потрошени 150 милиони денари годишно, т. е. 1,5 милијарди денари за 10 години? Па нели заеднички на сите ни е обврската да ги зголемиме продуктивноста и конкурентноста ако сакаме економски развој!? Некој ќе рече дека увозот на работна сила подразбира дреари, тесари, заварувачи, но не е лошо да се провери бројката на издадени дозволи за странски менаџери, а потоа да се објави како стојат работите на овој план. 3. Постои ли во оваа држава поим ОДГОВОРНОСТ за доцнењето на инфраструктурните проекти? Сигурен сум дека во овие изминати 50-ина година потрошените пари за одржување на планинските превои ќе исфинансираа тунели низ целата држава, а да не зборувам за тешкотиите што ги имаат камионџиите кои превезуваат стока за бизнисот и за жртвите и опасностите кои демнеат на секој чекор. 4. Нели се договоривме за даночен календар заради предвидливост на билансите на компаниите?! Ако се договоривме, тогаш треба да го почитуваме тоа. Ние не сме сами за себе, тука имаме и 200 странски компании и многу други странски капитални инвестиции за кои ова е нормална работа. 5. Бидејќи од минатата година почнавме да славиме годишнини, немојте оваа година да прославуваме 12 години од иницијативата за промена на член 218 од Законот за извршување или 10 години од иницијативата за воведување холдинг-друштва или 7 години од иницијативата за зголемување на контролниот праг за преземање акционерски друштва или 5 години од барањето за промена на методологијата за пресметка на придонесите за пензиско-инвалидско осигурување. Донесете ги прво овие закони, па потоа, непочитувајќи го даночниот календар, предлагајте нови закони. П.С. Имавме и имаме успешни заеднички проекти: зголемување на конкурентноста со ревидирање на царинските стоки; зголемување на финансиската поддршка за компаниите кои инвестираат и кои воведуваат иновации; допрецизирање на листата за непризнавање трошоци за даночни цели на данокот на добивка; овозможување доброволно регистрирање ДДВ во кој било период од годината, како и навремено враќање на ДДВ. Овде може да се споменат и соработката во решавањето на проблемите произлезени од енергетската криза, регионалните иницијативи, како и беспоговорната комуникација на сите нивоа, што значи дека Владата секогаш беше отворена за соработка. Не дека ние не знаеме оти Владата е одговорна за целокупниот живот во државата, но во тоа милје бизнисот мора да има посебно место поради бројките, приходите и поради кохезивноста во своето работење. Владата е наш партнер и овие прашања ги поставуваме најдобронамерно, без никакви калкулации, зашто само во услови на консензус може да се најде излез од кризите и да се постигнат позитивни економски резултати.

Азески со македонски бизнисмени на средби со американски, норвешки, германски и јапонски компании во Белград и Берлин

Ивана Ефремовски — Tue, 01 Nov 2022 12:52:47 +0000

Стопанската комора на Македонија продолжува со редовните, но најавува и повеќе меѓународни активности. Во Белград, Берлин и Скопје, како што информира, ќе се одржат состаноци, дебати и средби за инвестиции, како и за проширување на соработката во енергетиката, дигитализацијата, напредните технологии и иновациите. -И во услови кога енергетската криза е во полн ек со сериозни проблеми во деловното функционирање на компаниите, Комората ги продолжува останатите редовни активности кои се од интерес за нашите компании. Фокусот во претстојниот период е на меѓународните активности. Утре во Белград ќе се одржи средба со 100 влијателни американски компании на тема „Нов пат и можности: Регионот на Западен Балкан во однос на Соединетите Американски Држави“, на која бизнис познавачи од регионот и учесниците од САД ќе имаат можност да разговараат за нивните планови и за тоа како да се соочат, да се прилагодат и да одговорат на новите глобални трендови во ИТ и енергетскиот сектор, обезбедувајќи јасна слика за тековните изгледи на пазарот и идните можности за соработка, вели претседател на Комората, Бранко Азески. Во Белград ќе се одржи и седница на Управниот одбор на КИФ, каде Азески е копретседател. На седницата, меѓу другото, ќе се разгледува вториот годишен извештај за мерење на постигнувањата во спроведувањето на акцискиот план за заеднички регионален пазар – колку фирмите на терен ги чувствуваат придобивките од одлуките што се носат за регионалното поврзување, во насока на воспоставување единствен регионален економски пазар. На седницата ќе се разговара и за претстојната инвестициска конференција на 22 ноември 2022 година во Љубљана што КИФ ја организира заедно со Регионалниот совет за соработка (РСС) со седиште во Сараево, на кој заеднички ќе се претстават инвестициските потенцијали на регионот на Западен Балкан пред потенцијални инвеститори од Словенија, Хрватска Италија и Австрија. Во четврток, на 4 ноември, во Берлин, Азески заедно со претседателот на Асоцијацијата за напредни технологии при Комората, Виктор Мизо ќе има средба со германските компании кои потенцијално разгледуваат можности за инвестиции или проширување на нивните инвестициски активности во Северна Македонија. На 17 ноември, пак, Норвешката амбасада во Белград организира инвестициска конференција за енергетика на тема „Инвестициските можности во обновлива енергија“, на која ќе учествуваат 50-тина норвешки фирми и сите претседатели на влади и министри за економија на балканските земји, но и бизнисмените кои веќе имаат искуства во оваа област. Во Скопје на 18 ноември ќе се одржи Балкански економски форум, поддржан од Стопанската комора со фокус на развој и имплементација на иновативни стратегии и креативни решенија за тековните економски предизвици со кои се соочуваат балканските земји за да се стимулира економскиот раст кој, пак, ја зајакнува регионалната соработка, мир и безбедност. Комората информира и дека почнуваат активностите за основање јапонско-македонска стопанска комора, преку која ќе се спроведат програми специјализирани за Комората како најголема и најбројна бизнис заедница, а се работи и на продолжување на договорот со Јапонската агенција за меѓународната соработка (JICA), која нуди грантови за поддршка на приватниот сектор во развој на инфраструктурни проекти кои ќе придонесат за ублажување на климатските промени и заштита на животната средина, програми за зголемување на менаџментниот капацитет преку обуки, тренинзи и посети на нашите компании, организирани од страна на Јапонија. (МИА)

Азески со тим од Комората во посета на компаниите погодени од енергетската криза

Дарко Андоновски — Mon, 10 Oct 2022 07:33:27 +0000

Делегација на Стопанската комора на Северна Македонија предводена од претседателот Бранко Азески денеска ќе ги посети рудниците „Бучим“ и „Боров дол“, кои поради порастот на цената на електричната енергија од 1 септември годинава привремено прекинаа со процесот на производство. Од Стопанската комора посочуваат дека во двата рудника има вкупно 674 директно вработени и се едни од најголемите работодавци во регионот кои придонесуваат за одржливиот економски и социјален развој на општините Конче, Штип и Радовиш. – Во следниот период претставници на Стопанската комора ќе ги посетуваат компаниите коишто се наоѓаат во исклучително тешка состојба предизвикана од енергетската криза, велат од Комората. За посетата на рудниците „Бучим“ и „Боров дол“, од Комората најавуваат соопштението.

Азески: Натамошното ескалирање на енергетската криза ќе има негативен ефект кај 20-тина отсто од компаниите

Ивана Ефремовски — Wed, 05 Oct 2022 19:13:34 +0000

Да се изнесе реалната ситуација и да се промени методологијата на поддршка, побара првиот човек на Стопанската комора на Македонија, Бранко Азески, кој денеска беше еден од учесниците на состанокот на владиниот Економски совет во проширен состав, на која околу три часа се разговараше за енергетската криза и мерките, кои Владата би требало да ги преземе за да се ублажи ценовниот удар. – Да ни се каже реалната ситуација и да се промени методологијата на поддршка. Тоа значи да се биде сега и веднаш. Тоа нас не чини, бизнисот е менлива категорија и зависи од берзите од многу елементи, истакна Азески. Според него, натамошната ескалација на енергетската криза ќе има негативен ефект кај 20-тина отсто од компаниите, кои и заради други причини не можеа да ги пребродат работите. Академик Таки Фити по седницата на Советот изјави дека земјава се најде во тешка ситуација, затоа што немаме доволна домашно производство на енергија, туку сме увозно зависни. – Со години тука не е инвестирано ништо и сега треба да го решаваме проблемот ваков каков што е, а ситуацијата станува се потешка со ограничен фискален простор и опасност во светски размери, рече Фити. Според него, најлошата варијантана на економска криза е онаа која значи едновремено паѓање на производството и класична рецесија, меѓутоа и релативно високи стапки на инфлација и високи стапки на невработеност. – Оваа година ние нема да влеземе во таков тип на рецесија. Ќе видиме како ќе биде до година, бидејќи се зависи од тоа што ќе се случува со цената на енергијата, а нема шанси брзо да заврши војната во Украина, додаде Фити. Според поранешниот министер за финансии Никола Поповски, пак, светот денес е соочен со избор или да ја зачува макроекономската стабилност, што значи ниски цени и валутни односи и ниска инфлација или да жртвува дел од растот. – Мое мислење е дека во моментот треба да води сметка за ценовата стабилност, бидејќи растот и да се изгуби за еден-два три квартали, тоа не значи ништо, тој ќе се врати. Но, ако се наруши ценовата стабилностна долг рок, сите квартали во идните години ќе бидат со економски проблеми, изјави Поповски по седницата на владиниот Економски совет. Според него, тоа е приоритетно, но сепак конечната одлука ќе треба да ја донесе Владата. (МИА)

Мицкоски денеска на состанок со Азески

Катерина Бојаџиева — Mon, 12 Sep 2022 08:37:12 +0000

Претседателот на ВМРО-ДПМНЕ, Христијан Мицкоски денеска ќе одржи работен состанок со претседателот на Стопанска комора на Република Македонија, Бранко Азески во просториите на Стопанска комора на Република Македонија на тема енергетска криза. По завршување на средбата, во 12:30 часот изјава за медиуми ќе даде претседателот на ВМРО-ДПМНЕ, Мицкоски.

Работна средба на Азески и Мицкоски за енергетската криза

Дарко Андоновски — Mon, 12 Sep 2022 05:31:45 +0000

Претседателот на Стопанската комора на Северна Македонија, Бранко Азески, и претседателот на ВМРО-ДПМНЕ, Христијан Мицкоски, денеска ќе имаат работна средба на која ќе разговараат за енергетската криза. На средбата во просториите на Комората ќе присуствуваат и претставници од нејзиното раководство, бизнисмени и градоначалници на неколку општини. Стопанската комора информира дека тема на состанокот е енергетската криза која го погодува стопанството и дека ќе се разговара за постапките за поставување фотоволтаици за кои надлежност има локалната самоуправа.

Азески: Aко Владата не помогне ќе има затворања на компании и отпуштања

Ивона Петрова — Thu, 21 Jul 2022 11:04:08 +0000

Ако Владата не му помогне на бизнисот кој е соочен со енормни сметки за струја, ќе има намалување на производството, затворања на капацитетите и отпуштања на вработени, предупреди денеска претседателот на Стопанската комора, Бранко Азески. Азески соопшти дека вечерва претставници од Комората ќе имаат средба со премиерот Димитар Ковачевски. -Во Комората во овој момент 1 000 отсто ќе се третира само едно прашање – цената на струјата. Ако Владата не интервенира и не помогне во оваа ситуација, нема друго решение освен да затвораме. Се надеваме дека нема да дојде до тоа, сите ги знаеме проблемите кои се трупаат 30 години и со тоа ниско држење и субвенционирање на цената на струјата сега изгледа огромно тоа покачување во ваква ситуација. Тоа е прв и основен проблем на компаниите и има најава од неколку компании дека ќе почнат да размислуваат за намалување или за затворање на производството и отпуштање на вработените, изјави Азески пред посетата на компанијата „Костал Македонија“ во Охрид заедно со останатите членови на Управниот одбор на Коморскиот инвестициски форум (КИФ). Тој потсети дека Комората веќе побарала помош од Владата. -Побаравме енергично Владата да помогне и да се произнесе по ова прашање. Вечерва имаме средба со премиерот, а вчера е формирана меѓуресорска комисија која наредните десет дена треба да го подготви предлогот врз основа на предлози што ги даде Комората, да оцени дали се прифатливи или не, а потоа средба со премиерот веројатно ќе одржи за десетина дена, истакна Азески. Според него, искуствата од регионот покажуваат дека во сите шест држави компаниите се во поповолна позиција зашто имаат субвенционирана струја, односно струја со определна цена која е директно од сопственото производство. -Ние сме на слободниот пазар и плаќаме огромни суми кои се движат и до 350 евра, а при комплицирана ситуација на прекин на рускиот гас во Европа, може да дојде до уште двојно поголемо зголемување на цените, рече Азески.

Стопанска комора: Владата многу доцни со мерките, бараме итна средба

Ристе Здравков — Thu, 14 Jul 2022 14:28:33 +0000

Бизнисот на колена, додека власта се занимава со политика. Половина од фирмите едвај преживуваат. Стопанската комора на својот 100-ти јубилеј, алармира дека Владата веќе многу доцни со мерките за помош на бизнисот поради политичките случувања. Дури 99% од проблемите на компаниите се поврзани со скапата струја. Затоа комората бара итни средби со Владата и регулаторната комисија за да изврши притисок врз државните електрани да произведат не само за граѓаните, туку и за бизнисот. Засега, се сомневаат дека тоа е воопшто остварливо. Фирмите не знаат ниту колку од оние 76 милиони евра за помош ќе бидат наменети за нив, додека за повеќе пари сега не станува збор бидејќи ММФ тактизира со сумата со која треба да се покрие буџетскиот дефицит. „Тоа не може да биде, зошто оценка на Македонската енергетска асоцијација е дека состојбите во ЕСМ не се такви, ниту кадровски, ниту технички, ниту логистички да може тоа да го направи. Ако во ваква состојба ние бараме решение и за парното греење и за помош на компаниите за зголемување на производството, тој товар ЕСМ не може да го издржи“ – вели Бранко Азески, претседател на Стопанската комора. Стопанската комора со критики и до Народната банка. Откако во последниве 3 месеци таа четирипати ја зголеми основната камата и интервенираше кај задолжителните резерви, Азески со порака дека додека го бранела курсот на денарот, го заборавила бизнисот. Засега фирмите сè уште лесно земаат кредити, а банките биле и повеќе од ликвидни. „Имаме чуство во изминатиот период дека во Централната банка на Македонија ја протажираше едната своја обврска за зачувување на курсот не водејќи смета за реалниот сектор. Така може да се доведеме до ситуација операцијата да биде успешна а пациенот мртов, значи ние инсистираме и понатака да имаме капацитети да ги пренесеме состојбите какви се во реалниот сектор и на тој начин да и Народната банка подеднакво да се занимава со тие две кучни прашања утврдени во Уставот“ – вели Азески. Бизнисот е крајно разочаран од сите владејачки гарнитури. Во изминатите три декади, економскиот раст во просек изнесувал едвај 1,7%. Јавниот долг го достигнал плафонот, но ништо подрастично не се променило – сè уште царува корупцијата, нема инфрастуктура, а судството и образованието се во катастрофално лоша состојба. Стопанската комора апелира ако под итно не се постави економијата како приоритет, ситуацијата водела кон пропаст на државата.