братислава – Kurir.mk

Братислава ги одложува одлуките за воена помош за Киев до формирање нова словачка влада

Ивана Ефремовски — Fri, 06 Oct 2023 06:35:28 +0000

Словачка одлучи да ги одложи одлуките за воена поддршка за Киев во очекување на новата влада по изборниот успех на партиите кои се противат на помош за соседна Украина, соопшти Претседателството во Братислава. - Претседателката (Зузана) Чапутова го споделува гледиштето на (премиерот во оставка Лудовит) Одор, според кого одлуката за ова прашање треба да ги одразува резултатите од последните парламентарни избори, изјави Мартин Стризинец, портпарол на претседателството. - Одлуката да се обезбеди воена помош во овој момент би поставила преседан за идни промени во политичката моќ. Исто така, сегашната влада во заминување има ограничени овластувања“, додаде портпаролот. Тој не кажа дали наскоро ќе бидат донесени некои важни одлуки, но нагласи дека претседателката Чапутова „не го сменила својот став за воената помош за Украина и дека ќе продолжи да ја поддржува во границите на можностите што сè уште се достапни за словачките вооружени сили. Во понеделникот, претседателката му додели мандат за формирање нова влада на популистот Роберт Фицо, кој се противи на воената помош за Украина и се смета за проруски настроен. (МИА)

Вучиќ го откажа патувањето во Братислава

Ивона Петрова — Tue, 30 May 2023 13:25:45 +0000

Српскиот претседател Александар Вучиќ соопшти дека го откажал патувањето во Братислава и воедно упати порака до Квинта да исполни два услови, јави дописникот на МИА од Белград. На Инстаграм профилот „Иднината на Србија“, Вучиќ истакна дека за безбедноста на луѓето во Косово е важно Квинта да исполни два услови: -Вчерашниот ден беше исклучително тежок за српскиот народ. Убеден сум дека ќе успееме да се избориме за слободата на нашиот народ, за безбедноста на нашиот народ на Косово и Метохија. Има еден толку мал услов за тоа, што не можам да верувам дека луѓето од Квинта, најмоќните западни земји, не можат да го исполнат - а тоа е повлекување на полициските сили од северот на Косово и вториот е отстранување на лажните градоначалници кои реално никого не претставуваат. Што се однесува до нас, ќе продолжиме да се залагаме за мир и да го зачуваме тој мир и во однос на Кфор и во однос на сите други, рече Вучиќ. Вучиќ објасни дека го откажал патувањето во Братислава „бидејќи ми е поважно да бидам со мојот народ и денеска ќе ги посетам нашите војници“. -Убеден сум дека и вистината и правдата и Србија ќе победат на крајот, рече тој на крајот од своето видео. И премиерот на Косово Албин Курти нема да учествува на Форумот во Братислава поради ситуацијата на северот на Косово.

Син на политичар уби две лица пред ЛГБТ бар во Братислава

Тале Кристо — Thu, 13 Oct 2022 18:02:47 +0000

Две лица загинале во пукање во Братислава, пред бар во кој се собираат припадници на ЛГБТ популацијата, додека уште едно лице е рането, а осомничениот напаѓач утрово е пронајден мртов, соопштила полицијата. Нападот се случил во средата навечер во близина на барот Тепларен, во близина на главниот град на Словачка, пренесува „BBC“. Информациите за мотивот не се објавени, но локалните медиуми јавуваат дека осомничениот напаѓач на социјалните мрежи објавувал постови кои укажуваат на ставови против ЛГБТ и Евреите. Се наведува дека момчето во словачките медиуми исто така било идентификувано како син на поранешен кандидат на една крајно десничарска политичка партија. Премиерот Едуард Хегер денеска го осудил нападот, велејќи дека било каков облик на екстремизам е неприфатлив, а претседателката Зузана Чапутова ги повикала политичарите во земјата да не шират омраза.

Нацев на Глобалниот безбедносен форум „ГЛОБСЕК 2022“ во Братислава

Тале Кристо — Thu, 02 Jun 2022 08:19:15 +0000

Универзитетскиот провесор по одбрана и безбедност, Александар Нацев учесник на Глобалниот безбедносен форум „ГЛОБСЕК 2022“ во Братислава. -Деновиве присуствувам на Глобалниот безбедносен форум „ГЛОБСЕК 2022“ во Братислава, настан кој обединува голем број на водечки политички фигури, како и меѓународни безбедносни експерти и практичари. Во фокусот на годинешниот настан се случувањата во Украина, како и потребата за зајакнување на европскиот одбранбен систем, пишува во својата објава на социјалната мрежа на Фејсбук Нацев.

Метеоролозите предупредуваат: Бранот кој ги поплави Германија и Австрија може да ја зафати и Словачка

Ивона Петрова — Mon, 19 Jul 2021 06:23:19 +0000

Метеоролозите предупредуваат дека бранот од Германија и Австрија кој ги предизвика поплавите може да влијае и на Братислава. Нивото на Дунав може да се искачи за 2,5 метри во Словачка, според последните податоци на страницата imeteo.sk, која ја следи состојбата на реките. Словачкиот хидрометеоролошки институт (ШМУ) во неделата издаде предупредување за можни силни бури низ Словачка, каде може да падне голема количина дожд. „Како резултат на обилните дождови што паднаа претходните денови во Германија и Австрија долж Дунав, очекуваме значително зголемување на водостојот во словачкиот тек на Дунав“, велат метеоролозите. Нивото на Дунав достигна 526 сантиметри во предградието на Братислава, Девин и 565 сантиметри во Братислава. „Според нашите проценки, нивото на водата во Девин може да достигне 700 сантиметри, а во главниот град 740“, се наведува во соопштението на ШМУ и се додава дека постепеното опаѓање на нивото на Дунав може да започне денеска во попладневните часови.

Македонија отвора амбасада во Братислава

Ивона Петрова — Tue, 15 Jun 2021 05:09:12 +0000

Министерот за надворешни работи Бујар Османи денеска ќе престојува во работна посета на Словачка по повод официјалното отворање на Амбасадата на земјава во Братислава, со што ќе биде официјализирано нашето дипломатско претставување во оваа пријателска држава, соопшти МНР. На отворањето на нашата Амбасада во Братислава ќе присуствуваат шефот на дипломатијата Османи и неговиот словачки колега, министерот за надворешни и европски работи Иван Корчок.

Маж нападнал со нож четири лица во центарот на Братислава

Магдалена Андонова — Mon, 27 Jul 2020 12:28:16 +0000

Четири лица се повредени во напад со нож што се случил утрово во Братислава, соопшти денеска портпаролот на службата за вонредни ситуации Алена Крчова. Меѓу повредените е и еден тинејџер, а како што соопшти полицијата, напаѓачот е уапсен. Жртвите се пренесени во болница во Братислава и никој не е во сериозна состојба, додаде Крчова. Универзитетската болница соопшти дека примила три лица со сериозни повреди и дека веднаш биле оперирани, но никој не бил во опасност по живот. Тинејџерот бил пренесен во детска болница. (МИА)

Аеродромот Братислава заработува како паркинг за авиони

Дарко Андоновски — Sat, 16 May 2020 09:22:33 +0000

Аеродромот во Братислава промовира нов деловен модел за време на кризата со коронавирусот, кога бројот на патнички летови е сведен на минимум. На овој аеродром во моментов се приземјени 72 авиони од типот „Бомбардиер“ на „Еуровингс“, „AУA“ и другите авио-компании, за шпо аеродромот наплаќа паркирање. Поради ниските трошоци и компанијата ќерка на австриската авио-компанија „AУA техника“ е преместена во Братислава, каде околу 300 вработени ги одржуваат авионите од типот „Даш“. Во моментов, 15 авиони на „Еуровингс“ и четири авиони на „AУA“ се наоѓаат на аеродромот во Братислава, а австриската компанија има намера таму да ги пренесе сите 17 авиони „Даш“.