БРИКС – Kurir.mk

Мадуро сака поддршка од Кина на патот на Венецуела кон БРИКС

Тале Кристо — Mon, 11 Sep 2023 07:44:06 +0000

Венецуелскиот претседател Николас Мадуро денеска изјави дека сака Кина да ја поддржи Венецуела во нејзините напори да се приклучи на групата БРИКС и додаде дека постоечките односи меѓу Кина и Венецуела можат да послужат за зајакнување на тој блок. Мадуро, кој е во официјална посета на Кина, изјави дека Венецуела ќе стане членка на БРИКС како земја со најголеми резерви на нафта во светот, пренесува Блумберг. Тој изрази надеж дека кинеските инвестиции во Латинска Америка и Карибите ќе се зголемат. Бразилскиот претседател Луис Игнасио Лула да Силва претходно годинава изјави дека ќе ја поддржи кандидатурата на Венецуела да се приклучи на БРИКС, чии членки сега се Бразил, Индија, Кина, Јужна Африка и Русија, а од 1 јануари следната година, членки ќе бидат и Иран, Саудиска Арабија, Аргентина, Обединетите Арапски Емирати, Египет и Етиопија.

Заедничка валута БРИКС – предизвик за американскиот долар?

Ристе Здравков — Thu, 31 Aug 2023 09:35:23 +0000

Русија зборуваше за можностите за „дедоларизација“, а Бразил ја претстави идејата за заедничка валута БРИКС на самитот на овој блок, кој сака да го предизвика Западот и да ја намали важноста на американскиот долар во трговијата и финансиите. Заменик-директорот на одделот за истражување на Меѓународниот монетарен фонд, Џан Марија Милези-Ферети за РСЕ вели дека такво нешто е малку веројатно Блокот БРИКС, група на земји во развој за кои се смета дека сака да им се спротивстави на Соединетите Држави и на Западот, се согласи на самитот минатата недела да прими шест нови земји - Аргентина, Египет, Етиопија, Иран, Саудиска Арабија и Обединетите Арапски Емирати. Новите членки ќе го направат БРИКС главно седиште на стоки, со значителен дел од глобалниот извоз на нафта, пченка и пченица. БРИКС - што значи Бразил, Русија, Индија, Кина и Јужна Африка - сега сочинува 40 отсто од светското население, удел што ќе се зголеми кога другите земји ќе се приклучат следната година. На самитот, бразилскиот претседател Луис Игнасио Лула да Силва ги повика земјите од БРИКС да создадат заедничка валута за трговија и инвестиции како начин да се намали доминацијата на американскиот долар. Во деновите што следеа, руските државни медиуми ја промовираа идејата за заедничка валута БРИКС, а на јавноста и беше кажано дека ќе значи пад на доларпт и економското влијание на Соединетите Држави. „Иако земјите - членките на БРИКС би можеле да постигнат напредок во намалувањето на уделот на доларот во нивната билатерална трговија, ќе биде потешко да се извлечат од него како резервна валута поради далеку поголемата леснотија за купување и продавање“, вели во интервју за РСЕ Џан Марија Милези-Ферети, висок соработник во Центарот за фискална и монетарна политика на институцијата Брукингс, Хачинс. Милези-Ферети, кој претходно беше заменик-директор на одделот за истражување на Меѓународниот монетарен фонд, вели дека изгледите за заедничка валута БРИКС се малку веродостојни, укажувајќи на големите разлики во структурата на економиите на членките, во нивното ниво на развој, во отвореноста на нивните финансиски пазари и во управувањето со нивните валути. Ако доминацијата на американскиот долар значително згасне во иднина, тоа најверојатно ќе има повеќе врска со лошото управување со американската економија, како на пример големите дефицити, отколку со какви било напори на БРИКС „да го симнат доларот од тронот“, заклучува Милези-Ферети. Во продолжение извадоци од интервјуто: БРИКС постои речиси 13 години. Како би го споредиле овој блок со блокот Г7? Според мене, БРИКС досега беше повеќе форум за разговор за некои од најголемите економии во развој, наместо структуриран ентитет со целосно заедничко гледиште за основите на економијата. Мислам дека има јасно елементи кои се заеднички за овие земји. Но, постојат многу суштински разлики во структурата на економиите, во нивото на развој, во политиката, во многу аспекти, кои ги надминуваат разликите меѓу Г7, кои имаат тенденција да бидат земји со заеднички збир на вкупни вредности, а слична општа структура на економијата и слично ниво на развој. Се разбира, некои се побогати од другите, но генерално, јасно е дека има поголема хомогеност во групата Г7 отколку во БРИКС. Не гледам дека ова ја прави групата похомогена. Тоа ќе додаде плус билиони долари долари во вкупниот БДП, но разликите во структурата и економските предизвици се огромни. Да ја земеме на пример Аргентина која се бори со многу висока инфлација и има драматична буџетска ситуација и споредете ја со тоа што Саудиска Арабија се расфрла со најскапите фудбалери во светот со ниво на расположлив приход, секако за луѓето родени во Саудиска Арабија, што е многу покачено. Дури и во однос на валутата, Саудијците се врзуваат за доларот додека Аргентина има контрола на капиталот и добро управуван девизен курс. Тоа се само многу различни економски околности, па дури и институции и политики. По самитот на БРИКС во Јоханесбург, руската државна телевизија изнесе смели тврдења за падот на глобалното економско влијание на САД. Каков е вашиот став? Ако го погледнете уделот во БДП што го сочинуваат Соединетите Држави, мислам дека доказите за пад не се таму. Точно е дека во просек, економиите во развој пораснаа побрзо од напредните економии. Кина и Индија одиграа голема улога во тоа и оттука, уделот во БДП што го сочинуваат овие економии се зголеми, во споредба со учеството на Г7. Но, тоа се должи на Кина и Индија. Не и на Русија. Нејзината стапка на раст е прилично скромна веќе неколку години. Не и за Јужна Африка. Таа има ужасни економски проблеми, пад на БДП по глава на жител. И секако не за Бразил, кој исто така имаше средна стапка на раст, со некои добри години, но потоа ужасна рецесија во 2015-2016 година. Значи има многу разлики во економските перформанси. Но, ако ја погледнете улогата на САД на глобалните финансиски пазари, сигурно нема да кажете дека има докази за пад. Американските фирми постигнаа неверојатно добар развој во текот на изминатата деценија и половина или повеќе. Особено компаниите поврзани со технологијата - но ако ја погледнете берзата капитализација, ако ги погледнете перформансите на акциите во целост, јасно е дека американските компании постигнаа исклучително добар напредок. Ако се фокусирате повеќе на краток рок, како што е опоравувањето на економијата после пандемијата со ковид, може да се каже дека американската економија помина исклучително добро. Тоа беше помогнато од многу стимулации, но се покажа исклучително добро. Така што, секако не би се согласил со констатацијата дека има севкупен пад на американската економија, особено во последните години. Руските државни медиуми, исто така, зборуваат за изгледите на валутата БРИКС да се спротивстави на доларот. Дали е тоа реално? Тоа го гледам како многу измислена идеја. Како што споменав претходно, ова се земји со неверојатно различни режими на девизен курс, очигледно со една земја (Кина) која е исклучително голема и не сака да отстапи каков било дел од суверенитетот и контролата врз својата економија и нејзините финансиски пазари. Значи, има постепено отворање во Кина, но усвојувањето нешто што наликува на заедничка валута подразбира некој елемент на заеднички суверенитет, што е она што го имате во еврозоната, на пример, секако за монетарната политика. И тоа е нешто што едноставно не гледам дека ќе се случи со оглед на преференциите на овие земји. Да не заборавиме и Кина и Индија имаа „гранични недоразбирања“ неодамна. Од она што го разбирам, односите се подобруваат, но не зборуваме за долгогодишни сојузници, сигурно. И ќе ви треба доста заедничко за да споделите нешто толку важно како што е валута. Значи, има многу работа ако сакаат тоа да го направат? Поставувањето на вистинска заедничка валута, е нешто што бара многу подготовка, многу сличности меѓу земјите. Едноставно е незамисливо, повторно, овие земји да се откажат од монетарниот суверенитет на заедничка власт, заедничка централна банка или заеднички издавач на валута со оглед на големите разлики во економијата, политиката, историјата, сè. Едноставно е многу тешко да се случи. Може да се замисли нешто многу поограничено по обем, но тогаш тоа навистина не е заедничка валута. Значи, некоја заедничка единица на деноминација за трговија. Но, повторно, не разбирам како всушност го постигнувате тоа? Дали само конструирате кошница што е просек на валутите? Тоа навистина не е нова валута. Дали е тоа само чисто деноминација на трговијата? Кој ќе инвестира во тоа? Таму има многу прашалници. Значи, многу е тешко да се направи проценка. Она за што сум сигурен е дека заедничка валута во буквална смисла на терминот, што би значело тие да се ослободат од националните валути и да усвојат заедничка, ми се чини целосно исклучена. РСЕ: Кои се другите ризици поврзани со заедничката валута? Кога ги врзувате вашите валути заедно, класичен е проблемот со таканаречените асиметрични шокови. Значи, шокови кои влијаат на една земја поинаку од другите. Генерално, девизните курсеви се добар начин да се апсорбираат овие шокови. Ако се преселите во БРИКС и имате извозници на стоки наспроти увозници на произведени стоки, степенот на разликата е многу, многу голем. Размислете за цените на нафтата. Тие одат нагоре, Русија е среќна, Саудиска Арабија е среќна, но Кина е увозник на нафта, Јужна Африка е увозник на нафта. Индија е голем увозник на нафта. Значи, таму имате класичен асиметричен шок. И, кога цените на нафтата растат, обично рубљата се зголемуваше, а индиската рупија поевтинуваше. Со заедничка валута не можете да го имате тоа. Што е со разговорите на БРИКС за намалување на зависноста на доларот од билатералната трговија? Целта за намалување на зависноста од доларот е нешто во кое повеќе верувам во однос на намерите. Како ќе се постигне тоа ќе биде голем знак прашалник. Мислам дека едно прашање е валутата што ја прифаќате за деноминација на трговијата, за порамнување, но постои генерално прашање како управувате со вашите надворешни финансии. Во која валута ги ставате вашите девизни резерви? Која валута ја користат вашите фирми за да се финансираат на меѓународните пазари? Мислам дека, повторно, можно е во одредени домени да видите одредена ерозија на улогата на доларот во некои аспекти на меѓународната трговија. Но, тоа е многу различно од усвојувањето финансиска стратегија со која целосно се избегнува доларот. Во однос на финансиската стратегија, Русија го зголеми уделот на кинескиот јуан во своите девизни резерви. Зошто повеќе земји не би го следеле патот на Русија? Кои се ризиците со кои се соочуваат земјите во чувањето на јуани наспроти доларите? Па, едно прашање е безбедноста и тргувањето со финансиските инструменти што ги користите. Кина сè уште има силни контроли на капиталот, па оттука и тргувањето со финансиски инструменти деноминирани во јуани не гарантира ист степен на непосредна ликвидност и флексибилност на инструментите за тргување деноминирани во долари. Кина има историски ниска инфлација, валутата е генерално доста стабилна, а со оглед на големината на кинеската економија и нејзиното искуство, не е изненадувачки што имате одреден дел од резервите кои се деноминирани во кинеската валута. Но, повторно, во глобалниот финансиски систем каде земјата сè уште задржува многу ограничувања на способноста на нерезидентите да инвестираат или да тргуваат со финансиски инструменти во Кина, тешко е да се замисли централна улога на кинеската валута исто како доларот. И, исто така, претпоставувам, ако размислувате за геополитичките аспекти, не се само САД тие кои имаат силни меѓународни преференци за тоа кои земји се сојузници и кои земји ги сметаат за предизвик. Што е најдоброто што БРИКС може да го постигне? Имаме многу докази генерално дека поголема интеграција може да помогне за ефикасно користење на ресурсите. Значи, намалувањето на трговските бариери меѓу нив секако би било корисно. Може да размислите и за некои аспекти на финансиската интеграција, како што се олеснување на финансиските трансакции меѓу нив, иако би рекол дека потенцијалот за ова да има големи придобивки во групата е веројатно поограничен, имајќи предвид дека тие го надминуваат обемот на трговијата, особено Кина за производство и другите за стоки, но на финансиските пазари тие сè уште имаат поограничена улога. Така што, намалувањето на трговските бариери, поттикнување на трговската интеграција, трансфер на технологија, сите тие работи би можеле да бидат потенцијално корисни. Од економска гледна точка, САД сè уште тргуваат доста со Кина. Има многу производствени капацитети во Кина. Синџирите за снабдување сè уште се таму. Во тек е многу преструктуирање, но ова е долг процес. Соединетите Држави секако имаат добри економски односи со Индија. Таа тргува и со Бразил и Јужна Африка, се разбира Русија сега е поинакво прашање. Дали има нешто што САД можат или треба да направат за да ја задржат доминацијата на доларот? Би рекол дека тоа е споредна придобивка од доброто макроекономско управување. Значи, ако можам да го превртам вашето прашање, тоа би било како да се избегне она што може да доведе до пад или ерозија на улогата на доларот што оди подалеку од природниот, здрав процес со кој другите земји постепено ги спојуваат нивоата на приходи. Тоа ќе биде лошо макроекономско управување во САД. Објективно имаме застрашувачки фискални предизвици кои следуваат за САД. Имаме целосна вработеност, но буџетскиот дефицит не е само голем, туку се проектира да остане голем неколку години, а засега нема договор за тоа може да се намали. Тоа е прашање со кое на крајот ќе треба да се соочат САД. Таа не е единствената земја што се соочува со овие предизвици, но ненавременото справување со нив може да има последици и да влијае на целокупниот статус на доларот на меѓународните пазари. Не зборувам за некаква краткорочна драматична промена, туку повеќе за забрзување на подолгорочниот процес. Здравата економија и стабилните финансиски пазари, доброто макроекономско управување, ова се основите што ја одржуваат улогата на доларот како безбедно средство и валута.

Мароко не размислува уште за БРИКС и ја обвинува Јужна Африка за неосновани извештаи

Ристе Здравков — Mon, 21 Aug 2023 08:43:48 +0000

За Кралството Мароко никогаш не постоела можноста за позитивен одговор на поканата за состанокот на „БРИКС/Африка“, планиран да се одржи во Јужна Африка или за учество на овој состанок на кое било ниво, вели овластен извор од Министерството за надворешни работи, африканска соработка и марокански иселеници. Како одговор на неодамнешните медиумски извештаи во кои хипотетички се претпоставува приклучување на Кралството кон групата БРИКС, како и неговото можно учество на следниот состанок на „БРИКС/Африка“, закажан за 24 август во Јоханесбург, Јужна Африка, истиот извор нагласува дека ова не било иницијатива на БРИКС или на Африканската унија, туку покана од страна на Јужна Африка. „Станува збор за состанок организиран врз основа на едностраната иницијатива на јужноафриканската влада“, вели истиот извор, додавајќи дека од таа причина Мароко ја оценува оваа покана во светлина на затегнатите билатерални односи со оваа земја. Според истиот извор Јужна Африка отсекогаш манифестирала непријателство кон Кралството и систематски заземала негативни и догматски позиции по прашањето за мароканска Сахара. „Преторија на тој начин ги зголеми, како на национално ниво така и во рамките на Африканската унија, нејзините злонамерни дејства против повисоките интереси на Мароко“, вели истиот извор. Се нагласува дека јужноафриканската дипломатија е позната по своето лесно, импровизирано и непредвидливо менаџирање кога станува збор за организирање на ваков вид настани. Доказ, додава изворот, се намерните и провокативни прекршувања на протоколот што ја одбележаа поканата на Мароко на оваа средба. Уште полошо, многу земји и правни лица се чини дека се произволно поканети од страна на земјата домаќин, без вистинска основа или претходна консултација со другите земји-членки на групата БРИКС. „Така станува јасно дека Јужна Африка планирала да го киднапира овој настан од неговата вистинска природа и цел, за да послужи на нејзината скриена агенда“, вели истиот извор, истакнувајќи дека Мароко од самиот почеток последователно отфрлил каква било поволна реакција на јужноафриканската покана. Во врска со односите на Кралството на Мароко со групата БРИКС, овластениот извор на Министерството забележува дека јужноафриканската дипломатија повторно си го присвојува правото да зборува за Мароко и неговиот однос со БРИКС, без претходна консултација, на тој начин креирајќи произволности кои во никој случај не соодветствуваат со реалноста. Според истиот извор, Мароко навистина одржува суштински и ветувачки билатерални односи со другите четири членки на Групата, па дури и е поврзан со три од нив преку договори за стратешко партнерство. Но сепак, Кралството никогаш официјално не аплицирало за членство во групата БРИКС. „Сеуште нема рамка или прецизни процедури со кои се регулира проширувањето на оваа групација“, вели истиот извор. Овластениот извор додава дека иднината на односите на Мароко со групацијата каква што е, имајќи ја предвид нејзината природа или опсег, „ќе припадне во општата рамка и стратешките ориентации на надворешната политика на Кралството, како што е дефинирано од кралот Мохамед VI“. „Мароко останува посветен на ефикасен, поддржувачки и обновен мултилатерализам“, нагласува истиот извор, додавајќи дека Кралството смета дека мултилатералните платформи не треба да се користат за поттикнување поделба или мешање во внатрешните работи на суверените држави, ниту пак треба да создаваат преседани кои во иднина би можеле да се свртат против нивните иницијатори.

Алжир заинтересиран за придружување во БРИКС

Ивона Петрова — Mon, 01 Aug 2022 06:11:18 +0000

Алжирскиот претседател Абделмаџид Тебуне рече дека неговата земја е заинтересирана да се приклучи на групата БРИКС. Во телевизиско интервју тој нагласи дека Алжир најмногу ги исполнува условите за приклучување кон групата. Групата земји БРИКС ја сочинуваат Кина, Русија, Бразил, Индија и Јужна Африка.

„Известија“: Саудиска Арабија, Египет и Турција планираат присоединување кон БРИКС

Катерина Бојаџиева — Thu, 14 Jul 2022 06:17:17 +0000

Египет, Турција и Саудиска Арабија планираат да поднесат барање за членство во економската заедница БРИКС, составена од Бразил, Русија, Индија, Кина и Јужна Африка), објави рускиот весник „Известија“ повикувајќи се на изјава на претседателката на меѓународниот форум на БРИКС, Пурнима Ананд. „Сите овие земји се заинтересирани за членство и се подготвуваат да аплицираат. Мислам дека ова е добар чекор бидејќи проширувањето секогаш се перципира позитивно, а тоа очигледно ќе го зголеми влијанието на БРИКС во светот“, вели Ананд. Според неа, пристапувањето на овие земји во унијата нема да трае долго. Таа уште посочува дека на следниот самит може да се очекуваат дискусии и можна одлука за прием на некоја од петте земји, меѓу кои се Аргентина, Египет, Иран, Саудиска Арабија и Турција. „Се надевам дека пристапувањето на земјите во БРИКС ќе се случи многу брзо, бидејќи сега сите претставници на јадрото на асоцијацијата се заинтересирани за проширување. Така, тоа ќе се случи многу брзо“, уверува Ананд.

Иран бара членство во БРИКС

Ивона Петрова — Tue, 28 Jun 2022 06:14:22 +0000

Иран поднесе барање за приклучување кон групата БРИКС, објавија иранските медиуми. Портпаролот на иранското Министерство за надворешни работи Саид Хатибзадех изрази надеж дека членството на Иран во БРИКС ќе донесе „дополнителни придобивки“ за сите страни. Во исто време, портпаролката на Министерството за надворешни работи на Русија, Марија Захарова, објави дека и Аргентина поднела барање за членство во БРИКС. Но, аргентинските власти сè уште не ја потврдиле или демантирале кандидатурата. БРИКС е економска алијанса чии членки се Бразил, Русија, Индија, Кина и Јужна Африка.

Си: Неопходна е безбедносна соработка меѓу земјите од БРИКС

Тале Кристо — Thu, 19 May 2022 16:52:35 +0000

Кинескиот претседател Си Џинпинг денеска изјави дека земјите од БРИКС треба да соработуваат на полето на глобалната безбедност и да ги здружат напорите да се спротивстават на политиката на моќ и конфронтацијата на блокот на светската сцена. -Земјите од БРИКС треба да се спротивстават на хегемонијата и политиката на моќ, да го отфрлат менталитетот на Студената војна и конфронтацијата на блоковите и да работат заедно за да изградат глобална безбедносна заедница и да ја зајакнат политиката на взаемна доверба и безбедносна соработка и да одржуваат блиска комуникација и координација со главните меѓународни и регионални прашања, рече Си Џинпинг, пренесоа британските медиуми, повикувајќи се на кинеското Министерство за надворешни работи. Си изјавата ја даде на седницата на министрите за надворешни работи на земјите од БРИКС, што денеска се одржува преку видео врска. Кинескиот претседател додаде дека земјите од БРИКС мора да ги задоволат суштинските интереси на секоја членка и да го почитуваат меѓусебниот суверенитет и безбедност. -Како позитивна, инспиративна и конструктивна сила во меѓународната заедница, земјите од БРИКС треба да преземат вистинска акција за промовирање на мирот и развојот, да ја поддржат правичноста и правдата и да се залагаат за демократија и слобода, со цел да поттикнат позитивна енергија во меѓународните односи и да направат тие се стабилни, заклучи Си, пренесен од британските медиуми. Членки на БРИКС се Бразил, Русија, Индија, Кина и Јужна Африка.

Закажан состанок на министрите за надворешни работи на БРИКС

Ивана Ефремовски — Wed, 18 May 2022 09:53:10 +0000

Кинеското МНР денеска соопшти дека преку видео-врска утре ќе се одржи состанок на министрите за надворешни работи на земјите од БРИКС. „На маргините ќе се одржи и дијалог меѓу земјите од БРИКС и министрите за надворешни работи на други земји во развој“, изјави пред медиумите портпаролот на кинеското Министерство за надворешни работи Ванг Венбин. БРИКС ја сочинуваат Бразил, Русија, Индија, Кина и Јужна Африка. (МИА)

Средбата на БРИКС посветена на ризиците од трговска војна

Ивона Петрова — Wed, 25 Jul 2018 05:47:46 +0000

Во Јоханесбург денеска почнува средбата на лидерите на групата земји од БРИКС, економии во развој во која се Бразил, Русија, Индија, Кина и Јужноафриканска Република. Заканата од се поверојатната светска трговска војна ќе биде во фокусот на агендата. Рускиот претседател Владимир Путин, кинескиот претседател Си Џинпин и премиерот на Индија Нарендра Моди ќе учествуваат на тридневната годишна средба. Турскиот претседател Реџеп Тајип Ердоган, исто така, ќе присуствува во својство на претседавач со Организацијата за исламска соработка. БРИКС е основан во 2009 година и на тој форум се повеќе од 40 отсто од светстката популација. Една од целите е воспоставување противтежа на економските правила што ги наметнува Западот.