британска влада – Kurir.mk

Британската влада преместува група мигранти од скапи хотели во пловечки хостел во јужна Англија

Катерина Бојаџиева — Mon, 07 Aug 2023 17:48:20 +0000

Мала група баратели на азил се преместени во пловечки хостел на риморкер, вкотвен во јужна Англија, како дел од обидот на владата на Велика Британија да ги намали трошоците за сместување на луѓето кои бараат заштита во земјата, објавија британските медиуми. Барателите на азил беа префрлени во пловечкиот хостел „Биби Стокхолм“, што може да прими до 500 мажи, од други локации низ земјата. Американските медиуми наведуваат дека британските власти се обидуваат да го намалат бројот на баратели на азил сместени во скапи хотелски соби за итни случаи, бидејќи последниве години е регистрирано зголемување на бројот на мигранти. Риморекрот, што е во сопственост на британската компанија „Биби Марин“, вообичаено се користи за да се обезбеди привремено сместување за работниците кога друго сместување не е достапно. Со три ката цврсто набиени спални соби, пловниот објект наликува на студентски дом, иако сместувачките единици се опремени со кујни, трпезарии, заеднички простории и пералници. „Биби Стокхолм“ е закотвен во пристаништето Портланд на јужниот брег на Англија, а некои локални жители се спротивставија на доаѓањето на мигрантите поради загриженоста дека тоа негативно ќе влијае врз малата околна заедница, која се соочува со недостиг од медицински услуги. Групите за права на имигрантите, исто така, се против ваквото решение, бидејќи сметаат дека таквото сместување за барателите на азил е несоодветно. Британската влада планира да користи бродови и поранешни воени бази за сместување на некои мигранти, откако трошоците за нивно сместување во хотелите минатата година се зголемија на 1,9 милијарди фунти. Сара Дајнс, државна секретарка во Министерството за внатрешни работи, за Би-би-си изјави дека луѓето кои илегално доаѓаат во нивната земја треба да имаат „основно, но соодветно сместување“ и дека „не може да очекуваат да останат во хотел со четири ѕвезди“.

Уште пет државни секретари во британската влада поднесоа оставки

Тале Кристо — Wed, 06 Jul 2022 16:13:02 +0000

Во владата на британскиот премиер Борис Џонсон, пет државни секретари и потсекретари денеска преку заедничко писмо објавија дека поднесуваат оставки. -Ја имавте најтешката задача во една генерација. Се восхитуваме на вашата цврстина, издржливост и траен оптимизам. Со право можете да се гордеете со значајните одлуки кои, со заедничка акламација, сте ги направиле исправни. Меѓутоа, станува се појасно дека владата не може да функционира со оглед на прашањата што излегоа на виделина и начинот на кој тие се постапуваа. Со добра волја мораме да побараме, за доброто на партијата и државата, да се повлечете, се наведува во писмото до премиерот. Државните секретари Ками Беднок и Џулија Лопез и парламентарните потсекретари Нил О’Брајан, Алекс Бургарт и Ли Роули поднесоа оставки. Сега бројот на членовите на британската влада кои поднесоа оставки се зголеми на 27.

Хакирани Твитер и ЈуТјуб налогот на британската Влада

Дарко Андоновски — Mon, 04 Jul 2022 08:04:38 +0000

Британската армија соопшти дека води истрага откако биле хакирани нејзините профили на Твитер и ЈуТјуб. Видео снимки од криптовалути со фотографија од милијардерот Илон Маск се појавија на канал на ЈуТјуб, додека на Твитер се ретвитнати неколку коментари поврзани со НФТ токените, јави Би-Би-Си. Војската го потврди „упадот“, соопштувајќи дека ја сфатила безбедносната ситуација многу сериозно и дека сега ги решава проблемите, а двата налога биле вратени. -Бидејќи го решивме прашањето и истрагата е во тек, во моментов не би било соодветно да коментираме повеќе, рече портпаролот на армијата. Не е познато кој го извршил хакерскиот напад, во кој беа сменети имињата на налозите на британската армија. Во еден момент името на профилот на Твитер беше сменето во Бапесклан, а до неделата вечерта се се врати во нормала. „Се извинуваме за привременото суспендирање на нашиот налог. Ќе спроведеме целосна истрага и ќе научиме од овој инцидент. Ви благодариме што не следите и нормалното функционирање сега ќе продолжи“, соопшти војската.

Британската Влада ќе предложи измени што може да доведат до тровска војна со ЕУ

Тале Кристо — Mon, 13 Jun 2022 06:53:00 +0000

Владата на Велика Британија денеска ќе предложи закон со што еднострано ќе се укинат правилата за трговија со Северна Ирска, воведени по Брегзит. Но, со тоа можеби ќе започне трговска војна со Европската Унија. Според Лондон, предност и понатаму има договорот со ЕУ за реформата „Северноирскиот протокол“. Но, во отсуство на договор преку дијалог, законот би стапил на сила за да ги замени одредбите од британскиот договор за повлекување од ЕУ. Со тоа, британската Влада тврди дека не го прекршува меѓународното право. Британскиот министер за Северна Ирска, Брендон Левис изјави дека протоколот ја нарушува трговијата и оти ја загрозил работата на властите во покраината, поради отпорот на унионисти. – Затоа, правилно е тоа да го поправиме, истакна Левис. Потребата да се заштити мировниот договор од 1998 година во Северна Ирска, како што Левис нагласи, има „примат“ над протоколот. Тој ги отфрли заканите на поединци од ЕУ дека едностраните промени може да поттикнат суспензија на поширок трговски договор, договорен во рамки на повлекувањето на земјата од Европската Унија, што би довело до санкции и царини против Велика Британија. Земјата тешко може да си дозволи трговска војна, во период кога нејзините граѓани се борат со најлошата инфлациска криза во една генерација. – Сметам дека таквите пораки навистина се бескорисни, додаде министерот. Тој укажа на потребата, Велика Британија и ЕУ заедно да дејствуваат против руската инвазија на Украина. Меѓутоа, во ЕУ трпението кон тактиките на премиерот Борис Џонсон е сè помало, според ирската Влада. Ирската националистичка партија Шин Фејн вчера го обвини Џонсон за жртвување на стабилноста во Северна Ирска поради сопствен опстанок, откако тој тесно ја доби довербата на конзервативците. Според британската опозициска Лабуристичка партија, Владата нема основа да тврди дека нејзиното решавање на спорот е законско.

Неколку играчи си заминуваат од Челси по одлуката на британската влада

Бошко Тасиќ — Thu, 10 Mar 2022 18:21:06 +0000

Владата во Велика Британија одлучи да го замрзне целиот имот на Роман Абрамович, а му забрани на Русинот да извршува и било какви трансакции. Тоа значи дека и продажбата на Челси ќе биде стопирана, па клубот од Лондон во моментов е во „статус кво“ ситуација. Играчите не смее да бидат продавани, не смеат да им бидат продолжувани договорите, клубот не смее да ангажира нови засилувања, а нема да има ниту гледачи на трибините, освен оние кои имаат сезонски билети. Андреас Кристенсен веќе е договорен со Барселона, а ваквата одлука на британските власти ќе го натера и Аспиликуета да ја прифати понудата на „каталонците“. Од клубот дефинитивно ќе си замине и Антонио Ридигер за кого има интерес од три големи тимови.

По случајот со интервјуто на принцезата Дијана, Британската влада планира да го реформира јавниот сервис на Би-Би-Си

Магдалена Андонова — Fri, 21 May 2021 11:33:28 +0000

Британската Влада денеска соопшти дека ќе преиспита дали е потребно да се изврши реформа во управувањето со јавниот сервис на Би-Би-Си по објавувањето на поразителниот извештај за методот на новинар што се користеше за да се добие интервју со принцезата Дајана во 1995 година. Во тој извештај, објавен вчера, поранешниот судија на Врховниот суд Џон Дајсон го повика новинарот Мартин Башир дека користел лажни документи за да го добие тоа експлозивно интервју од принцезата Дајана, но и од управата на јавниот сервис на Би-Би-Си за водење на случајот. Како што пренесуваат британските медиуми, интервјуто, кое во 1995 година го гледаа 23 милиони гледачи, имаше ефект на бомба. Принцезата Дајана, меѓу другото, рече дека во нејзиниот брак има „три лица“, осврнувајќи се на врската што нејзиниот сопруг принцот Чарлс ја имаше со Камила Паркер Боулс и призна дека и таа имала врска. „Тој извештај очигледно е поразувачки“, изјави денеска министерот за правда Роберт Балкланд за телевизијата Скај Њуз, нагласувајќи дека документот не укажува само на новинарот, туку и на раководството на Би-Би-Си и „на одлуките донесени во тоа време“. „Тоа бара внимателно истражување и Владата ќе го стори тоа сериозно и смирено за да види што треба да се направи за да се подобри управувањето со Би-Би-Си“, додаде британскиот министер. Објавувањето на извештајот на Дајсон го охрабри постариот син на принцезата Дајана, принцот Вилијам, остро да го осуди Би-Би-Си и рече дека тоа ја поттикнало нејзината параноја и ги влошило односите меѓу неговите родители. Принцезата Дајана загина во сообраќајна несреќа во Париз во 1997 година, кога папараците го бркаа нејзиниот автомобил. По истрагата која утврди дека Би-Би-Си паднале под своите стандарди, принцот Вилијам рече дека е многу тажен што Дијана никогаш не дознала дека е измамена. „Нејзе ја изневери не само еден одметнат новинар, туку и шефовите на Би-Би-Си. Бескрајно е тажно да се види до кој степен пропустите на Би-Би-Си ги поттикнувале стравовите, паранојата и осаменоста во последните години што ги поминав со тоа“, рече принцот Вилијам. Неговиот помлад брат Хари ја поврза смртта на неговата мајка со влијанието на таа „култура на експлоатација и практика што е спротивна на секоја етика“. (МИА)

Британската Влада не била транспарентна во јавните набавки во почетокот на пандемијата

Тале Кристо — Wed, 18 Nov 2020 07:40:42 +0000

Британската влада не била транспарентна во доделувањето договори за набавки и услуги во вредност од 20,1 милијарди евра во пандемијата, заклучува британскиот ревизор во извештајот објавен денеска. „На почетокот на пандемијата, владата мораше итно да набави опрема за лична заштита за вработените во болницата на многу зафатен глобален пазар. Признаваме дека станува збор за вонредни околности“,нагласи Герет Дејвис, директор на Државниот завод за ревизија (НАО), орган што го надгледува трошењето на народните пари. „Сепак, исклучително е важно тие одлуки да бидат соодветно документирани и јасни, дали владата сака да ја задржи довербата на јавноста кога станува збор за наменското и правилно трошење на парите на даночните обврзници“, додаде тој. „Податоците презентирани во нашиот извештај покажуваат дека правилата за транспарентност и документација не беа доследно применети на почетокот на пандемијата“, забележа тој. Според НАО, до 31 јули биле доделени повеќе од 8.600 договори во вредност од 20,1 милијарди евра, од кои 11,7 милијарди биле договорени без јавен тендер. Воспоставен е „канал со висок приоритет“ за да им се даде предност на компаниите кои имаат препорака од министерства, службени лица, пратеници и од челници во здравството. Некои договори биле доделени ретроактивно.

Дејли меил: Британската Влада ќе воведе карантин мерки за патниците кои доаѓаат од Белгија

Магдалена Андонова — Thu, 06 Aug 2020 07:55:46 +0000

Британската Влада ќе воведе карантин мерки за патниците кои доаѓаат од Белгија, поради зголемување на бројот на случаи на заразени со новиот коронавирус во таа држава, објави Дејли меил. Се очекува министрите да ги одобрат карантин мерките на состанок што се очекува да се одржи наскоро. Министерот за транспорт одби да ги коментира тие наводи на весникот. Велика Британија веќе воведе 14-дневен карантин за патници од Шпанија и Луксембург. (МИА)

Британската Влада апелира до граѓаните да учествуваат во клиничките испитувања за вакцината против Ковид-19

Дарко Андоновски — Sat, 25 Jul 2020 13:18:01 +0000

Британската Влада апелира до граѓаните да помогнат во забрзување на истражувањата за вакцината против коронавирусот со нивно доброволно учество во клиничките испитувања, пишува „Гардијан“. Министерот за економија, Алок Шарма, во колумна објавена во денешниот „Дејли мејл“ ги повика волонтерите да учествуваат во клиничките испитувања. Тој рече дека целта е да се забрза истражувањето за вакцината, за што е можно поскоро да се стави крај на пандемијата. Претходно неделава, прелиминарните тестови на вакцината, развиени од тим на научници од Универзитетот Оксфорд, покажаа дека вакцината е безбедна и предизвикува имунолошки одговор. Овие резултати се ветувачки, но се уште е рано да се каже дали вакцината обезбедува заштита од заразата. Шарма кажа дека во изминатите неколку месеци, економијата во Велика Британија е рестартирана, со претпазливост и преземање на сите неопходни мерки за заштита, што го оцени како исклучително важен чекор. „Единствениот начин да се победи Ковид-19 еднаш засекогаш и да се врати економијата во нормала, како и животот на луѓето, сепак, е да се откријат безбедни и ефикасни вакцини“, посочи британскиот министер. Во Велика Британија има речиси 300.000 лица со дијагностициран коронавирус, а над 45.000 пациенти умреа од Ковид-19.

Еустик: Британската Влада не сака да ги затвори плажите

Магдалена Андонова — Fri, 26 Jun 2020 09:33:01 +0000

Британскиот министер за животна средина Џорџ Еустик изјави дека Владата не сака да ги затвори плажите и покрај вчерашниот инцидент, кога на плажата во Борнемоут имаше илјадници луѓе. Тој додаде дека луѓето мора да се однесуваат според владините препораки за борба против новиот коронавирус. Додека британскиот министер за здравство Мет Хенкок побара затворање на плажите во Велика Британија бидејќи тоа може да доведе до зголемување на бројот на заразени лица со Ковид-19. (МИА)