„Бритиш ервејс – Kurir.mk

„Бритиш ервејс“ откажа над 10.000 летови

Ивона Петрова — Thu, 25 Aug 2022 07:46:32 +0000

Британскиот национален авиопревозник „Бритиш ервејс“ откажа повеќе од 10.000 летови од својот зимски распоред, отстранувајќи од продажба речиси два милиони места. Откажувањето на летовите на кратки релации, од крајот на октомври до крајот на март, има за цел да се минимизираат прекините во сообраќајот во текот на зимата. Авиокомпанијата, исто така, ги откажува летовите на долги релации до Кина и Бангкок, повикувајќи се на ограничувања за Ковид-19. Портпаролот на компанијата истакна дека продолжувањето на летовите за Хонг Конг ќе биде одложено до декември, кога ќе има еден лет дневно. „Бритиш ервејс“ од почетокот на летото откажал 38.000 летови. Откажаните зимски летови се еднакви на речиси една десетина од планираните летови. Одлуката е резултат на потресите во секторот на воздушниот транспорт, објави весникот „Тајмс“. Европските авиокомпании трпат рекордни доцнења во европскиот воздушен простор поради недостиг на персонал, големи отсуства поради болести и метеж предизвикан од затворањето на воздушниот простор над Русија и Украина.

„Бритиш ервејс“ откажа 10.000 летови од зимскиот распоред

Ивона Петрова — Tue, 23 Aug 2022 05:37:38 +0000

„Бритиш ервејс“ ја заврши 2020 година со загуба од 7,4 милијарди евра

Ивана Ефремовски — Fri, 26 Feb 2021 17:43:35 +0000

Сопственикот на британската авиокомпанија „Бритиш ервејс“ ИАГ соопшти дека ја заврши 2020 година со загуба од 7,43 милијарди евра поради прекинот на патувањата во пандемијата, предупредувајќи дека е тешко да се предвиди кога бизнисот ќе се врати во нормала. Оперативната загуба пред вонредните ставки, показател за деловната активност што ја претпочита ИАГ , минатата година изнесувала 4,37 милијарди евра, покажа деловниот извештај објавен денеска. Во првите три месеци од оваа година, ИАГ очекува летови на ниво од само една петтина од реализираните во истиот период во 2019 година. Во претходниот квартал беше на ниво од 27 проценти. Во последните два месеци, многу земји ги заострија ограничувањата за патување, што, предупредуваат аналитичарите, може да ја загрози клучната летна сезона и на многу авиокомпании може да им треба нов пакет финансиска помош. (МИА)

Од Британија до Њујорк со авион само со негативен корона-тест

Магдалена Андонова — Mon, 21 Dec 2020 18:10:55 +0000

„Бритиш ервејс“ се согласи да дозволи само патниците кои се негативни за новиот коронавирус да користат летови до меѓународниот аеродром Џон Ф. Кенеди, изјави денеска гувернерот на Њујорк, Ендру Куомо, откако во Велика Британија беше откриен нов вид на вирусот Ковид-19. Куомо исто така рече дека побарал од Делта ерлајнс и Вирџин Атлантик да ги прегледаат патниците на летовите до аеродромот Кенеди, под услов патниците да се согласат на тоа. – Ако не се согласат на преглед, државата Њујорк ќе бара други опции, рече Куомо. (МИА)

Првиот човек на „Бритиш Ервејз“ поднесе оставка

Дарко Андоновски — Mon, 12 Oct 2020 13:43:08 +0000

Шефот на „Бритиш ервејз“, Алекс Круз, поднесе оставка, се наведува во денешното соопштение на компанијата „Интернешнл ерлајнс груп“(ИАГ). Шпанецот Круз од 2016 година се наоѓаше на чело на „Бритиш ервејз“. Негов наследник ќе биде сегашниот извршен директор на ирскиот авиопревозник „Ер Лингус“, Шон Дојл, компанија што, исто така, е дел од групацијата ИАГ, соопшти комапнијата. -Минуваме низ најтешката криза во нашата индустрија и уверен сум дека овие внатрешни промоции ќе обезбедат ИАГ да биде во добра состојба за да си обезбеди силна позиција, изјави извршниот директор на ИАГ, Луис Галего. Круз (54), инаку, останува неизвршен претседател на „Бритиш ервејз“. Авиосообраќајот, што речиси целосно замре во пандемијата, многу бавно закрепнува. Кон крајот на јули групацијата соопшти дека загубата на ИАГ во вториот квартал изнесува 2,1 милијарда евра, за разлика од 736 милиони евра во истиот период минатата година.

Поради штрајк, откажани стотици летови на Бритиш ервејс

Ивона Петрова — Tue, 10 Sep 2019 09:20:59 +0000

„Бритиш ервејс“ денеска откажа стотици поаѓања поради пилотите кои продолжија со 48-часовен штрајк во кој бараат зголемување на платите. Авиокомпанијата процени дека дводневниот штрајк, што започна вчера, ќе влијае на 195.000 клиенти. Штрајкот е еден од најголемите во историјата на авиокомпанијата и прв на нејзините пилоти. Според британското здружение на пилоти на авиокомпанијата (Балпа), еден ден штрајк ја чини авиокомпанијата околу 40 милиони фунти (49 милиони долари). Во јули, пилотите ја одбија понудата на „Бритиш ервејс“ за зголемување на платите од 11,5 проценти во текот на три години. „Бритиш ервејс“ лета во повеќе од 70 држави и пренесува повеќе од 40 милиони патници годишно. Вториот штрајк е планиран за 27 септември.