Србија ќе добие финансиска поддршка од ЕУ за изградбата на пругата кон Македонија

Тале Кристо — Mon, 26 Apr 2021 14:57:30 +0000

Српскиот претседател Александар Вучиќ попладнево и официјално ја најави изградбата на пругата со висока брзина која треба да го поврзе Белград со Република Македонија, но и со Турција, јави дописничката на МИА од Брисел. На овој проект кусо алудираше утринава претседателката на Европската Комисија, Урсула фон дер Лајен во твит. Попладнево претседателот Вучиќ понуди повеќе детали за железничката линија. -Многу сум благодарен на претседателката Фон дер Лајен, се плашев до сега да зборувам за ова, но сега имаме поддршка, ќе градиме пруга со висока брзина што ќе ги поврзе Белград со Ниш, и потоа Лесковац, Табановце до Македонија, ова ќе ги смени целосно работите, ќе создаде можности за луѓето и подобар превоз, изјави Вучиќ, објаснувајќи дека проектот ќе ја подобри поврзаноста на регионот од Виена па се до Истанбул, Атина и Софија. Српскиот претседател рече дека „не може да ја сокрие“ својата радост што го соопштува овој нов проект кој, според него ќе ги зголеми странските директни инвестиции во регионот за наредните десет години. За изградбата на оваа пруга Вучиќ рече дека ќе може да смета на грантови од ЕУ во износ што ќе може да достигне 35 отсто најмалку, бидејќи проектот ќе се вклопи во Зелената агенда на ЕУ за западен Балкан.

Србија ќе гради брза пруга и од Белград до Ниш

Тале Кристо — Thu, 04 Jun 2020 10:08:52 +0000

Српската вицепремиерка и министер за градежништво, транспорт и инфраструктура, Зорана Михајловиќ, изјави денеска дека Србија инвестира вкупно околу 6,5 милијарди евра во модернизација на железничката пруга и дека е планирано да се изгради брза пруга од Белград до Ниш, јави дописникот на МИА од Белград. -Србија е транзитна земја и за да се поврзе со регионот, не е доволно да имаме брза пруга само преку Војводина. Планот е да се изгради брза пруга и од Белград до Ниш за брзина до 200 километри на час, а од Ниш до Прешево за брзина до 160 километри на час. Тоа ќе биде огромна инвестиција, вредна околу две милијарди евра, изјави Михајловиќ во соопштението од нејзиниот кабинет. Таа оцени дека работите на делниците на брзата пруга кои во моментот се во изградба добро напредуваат и оти очекува во септември следната година од Белград до Нови Сад со воз да се патува околу половина час. Михајловиќ додаде дека на брзите пруги нема да има вкрстување на патиштата и пругите, што е важно за поголема безбедност во сообраќајот, додека од друга страна, се инвестираат околу 15 милиони евра за уредување на железничките премини на регионалните пруги.

брза пруга – Kurir.mk

Србија ќе добие финансиска поддршка од ЕУ за изградбата на пругата кон Македонија

Србија ќе гради брза пруга и од Белград до Ниш