БСП – Kurir.mk

Нинова: БСП нема да поддржи мандат на ГЕРБ за состав на нова Влада во Бугарија

Ивана Ефремовски — Wed, 16 Nov 2022 16:59:13 +0000

Лидерката на БСП, Корнелија Нинова, по консултациите со бугарскиот претседател, Румен Радев, најави дека нејзината партија нема да го поддржи првиот мандат на ГЕРБ, јави дописникот на МИА од Софија. -Доколку ги покани „Промените продолжуваат“ ќе учествуваме во вториот обид за формирање бугарска Влада, изјави таа. Бугарските социјалисти, според Нинова, нема да ги поддржат Движењето за права и слободи и „Преродба“ доколку тие го добијат третиот мандат за формирање влада. БСП сметаат дека може да има редовна бугарска Влада, но дека вистинските преговори меѓу партиите ќе почнат по врачувањето на првиот мандат. Нинова коментираше дека на денешниот разговор со претседателот, Радев и кажал дека преодната влада ќе размисли за зголемување на минималната плата на 850 лева (425 евра). Според неа, ова е добар резултат од средбата. Доколку бугарските социјалисти го добијат третиот мандат, ќе вложат максимални напори да формираат редовна влада. Нинова коментираше и дека БСП и претседателот на Бугарија се на исто мислење дека извозот на оружје во Украина е опасен за земјата и може да ја вклучи во конфликтот во Украина. По одлуката на 48. Народно собрание за испраќање оружје во Украина, БСП ја дефинираше коалицијата што ја донесе таквата одлука како „коалиција на војната“, а на оваа тема се обедини ГЕРБ, „Промените продолжуваат“, Движењето за права и слободи, „Бугарски подем“ и Демократска Бугарија. Бугарскиот претседател не и кажал на Нинова кога има намера да го додели првиот мандат за формирање влада, но доколку не успее парламентарната процедура, не е исклучена можноста 48. Народно собрание да се распушти во јануари 2023 година и земјата повторно да тргне кон нови предвремени парламентарни избори. (МИА)

„Без БСП нема стабилна влада“

Тале Кристо — Sat, 24 Jul 2021 09:17:44 +0000

Лидерот на бугарските социјалисти Корнелија Нинова, неколку часа пред да се сретне со раководството на партијата „Има таков народ“, која победи на парламентарните избори во Бугарија, за БНТ изјави дека без нејзината партија не може да има стабилна влада. Како што јави дописникот на МИА од Софија, таа ја оцени како лицемерна можноста „партиите на промени“ да формираат нова бугарска влада со поддршка на Движењето за права и слободи, поради протестот на „Демократска Бугарија“ на плажата Розенец во близина на резиденцијата на почесниот претседател на ДПС Ахмед Доган пред една година и сега формираната специјална комисија на оваа тема во новоизбраниот бугарски парламент. Нинова смета дека може да има повеќе состаноци со „Има таков народ“. Според неа, политиките се поважни, но исто така и луѓето кои ќе ги спроведат. Таа е категорична дека има неколку многу важни приоритети за земјата, како што се усвојување на Планот за обновување и одржливост, актуелизацијата на буџетот на Бугарија за 2021 година и подготовка на Буџетот за 2022 година, како и подготовка за новиот бран на Ковид-19. Според неа, долгорочни приоритети се реформата на здравството, економијата и судскиот систем на Бугарија.

Бугарија: И БСП нема да ја поддржи владата предложена од Слави Трифонов

Тале Кристо — Tue, 13 Jul 2021 14:26:03 +0000

БСП нема да ја поддржи владата на Слави Трифонов, најави лидерот на партијата Корнелија Нинова, јави дописникот на МИА од Софија. Нинова како аргумент ги посочи четирите цели на БСП – да се промени моделот на управување на паралелната држава, да се врати државноста, да се решат социјалните проблеми на луѓето преку политики и да се обезбеди сигурност и стабилност на Бугарија. Таа додаде дека „гневот на луѓето од протестите беше искористен за уште еден политички експеримент“. Нинова истакна дека Слави Трифонов му нанесе тежок удар на парламентаризмот со начинот на кој го презентираше својот предлог. Покрај тоа, рече дека Трифонов немаше предлози за социјални мерки, промена на моделот на здравствена заштита и образование. -Ако ГЕРБ ја предложи владата, БСП ќе гласа против. Ако бугарскиот претседател Румен Радев го врачи мандатот за нова влада на Нинова, тоа ќе се реализира, најави лидерот на социјалистите.

БСП за Бугарија бара Борисов да се обрати во Собранието по повод потезите против Скопје, ГЕРБ не го дава

Магдалена Андонова — Wed, 18 Nov 2020 09:13:12 +0000

Пратеничката група БСП за Бугарија повторно побара од Националното собрание лично да го слушне премиерот Бојко Борисов на тема Република Македонија и за позицијата на Бугарија за членството на нашиот сосед во Европската унија. Премиерот Борисов нема да се појави во пленарната сала, но ќе бидат сослушани Екатерина Захариева, министер за надворешни работи и Красимир Каракачанов, министер за одбрана. Според заменик претседателот на Националното собрание, Кристијан Вигенин, владејачката партија повторно го скрила Борисов. Според Вигенин, „откако позицијата на нашата земја е веќе заземена и објавена, се поставуваат други прашања во врска со идната политика на Бугарија кон нашиот сосед и во врска со проширувањето“. - Ние веруваме дека дискусијата треба да биде посеопфатна, не конкретно за оваа позиција, туку за односите меѓу двете земји од сега п анатаму. Затоа, сметаме дека треба да се одржи сослушување со премиерот Бојко Борисов, а не со вицепремиерите, како што се предложен од ГЕРБ, рече Кристијан Вигенин, пренесоа бугарски медиуми.(MИА)