буџет – Kurir.mk

Собранието ја усвои Предлог-одлуката за прераспределба на средства во Буџетот за 2023 година

Катерина Бојаџиева — Tue, 03 Oct 2023 12:25:13 +0000

Во Собранието денеска во рамки на 126. седница е усвоена Предлог-одлуката за прераспределба на средства во Буџетот за 2023 година, за која „за“ гласаа 62 и 10 воздржани пратеници. Со Одлуката се прераспределуваат 18,2 милиони за исплата на повисоките плати, зголемени пензии, регрес за годишен одмор за сите вработени во јавниот сектор, социјални права, субвенции за земјоделци, за здравствена заштита, односно лекот „Трикафта“ и мерачи за лицата со дијабет, како и средства за нов пакет антикризни мерки. -Со Одлуката вршиме реалокација на средства во интерес на социјалниот аспект, односно главните реалокации се токму во насока на поддршка на граѓаните и стандардот - покачување на платите во јавниот сектор за 10% и обезбедување на К-15 согласно Одредбите од Општиот колективен договор за вработените во јавниот сектор, пораст на пензиите за околу 6% согласно воспоставеното системско решение, зголемување на средствата за социјални трансфери, субвенции за земјоделците, поддршка на домашните и странските компании и обезбедување средства за деветтиот пакет на антикризни мерки. Нашата цел е поддршка за граѓаните, за што е можно повеќе да ги олесниме ценовните притисоци, а истовремено да ја задржиме и развојната компонента на Буџетот, со повисоко ниво на планирани капитални инвестиции во однос на буџетскиот дефицит. На ваков начин продолжуваме со стратегијата за заздравување на економијата пред се, преку заштита на стандардот на граѓаните, а понатаму и преку забрзување на економскиот раст, рече министерот за финансии Фатмир Бесими при образложување на предлогот во Собранието. Министерот потенцираше дека со Одлуката се врши реалокација на 18,2 милијарди денари кои се обезбедени по основ на заштеди од помалку реализираните расходи кај одредени буџетски корисници, како и со дополнително обезбедените средства по основ на КАПЕФ механизмот и дека со ова се обезбедува сигурна ликвидност во Буџетот и сервисирање на обврските. Со Предлог-одлуката за исплата на зголемувањето на платите на вработените во јавниот сектор за 10 проценти и исплата на регрес за годишен одмор во висина од 10.000 денари се обезбедени 4,25 милијарди денари, за пораст на пензиите за околу 6 проценти за 336 илјади пензионери почнувајќи од месец септември 2023 година 3,5 милијарди денари, 1,81 милијарда денари за државна помош за компании и тоа: за домашни компании 581 милион денари, за странски компании 200 милиони денари и за компании и инфраструктурно уредување во ТИРЗ зоните 300 милиони денари, 800 милиони денари се наменети за земјоделски субвенции, пред се за субвенции за млеко, сточарско производство, како и за авансно финансирање на земјоделците за растително и сточарско производство. Натаму, 650 милиони денари се предвидени за исплата на „МОЈ ДДВ“ за третиот квартал заради зголемувањето на лимитот на повратот, 600 милиони денари за исплата на социјалните права за 36.000 корисници на гарантирана минимална помош, 290 милиони денари се наменети за исплата на студентски оброк за 29.000 корисници, стипендии за 6.900 студенти и 9.600 ученици, 200 милиони денари за редовно сервисирање на породилните боледувања, 166 милиони денари за превод, печатење и откуп на учебници за основно и средно образование, 110 милиони денари за справување со Африканската чума, 100 милиони денари за набавка на лекот „Трикафта“ за 55 пациенти, како и 20 милиони денари за дигитални сензори за мерење на шеќерна болест. Со одлуката, исто така се алоцирани, 4,55 милијарди денари во Програмата П1 средства наменети за антиркизни мерки за справување со кризата. Министерот посочи дека со ваквата прераспределба не се отфрла ниту еден капитален проект и дека капиталните расходи остануваат на повисоко ниво од буџетскиот дефицит, кој пак останува на исто ниво во номинален износ, со што се покажува посветеноста кон постепена фискална консолидација. Собранието го усвои и Предлог-законот за измени на Законот за извршување буџет.

„Буџетот за 2023 е инфлаторен, планиран на база на инфлација, наплатата се намалува, во делот на приходите ќе недостасуваат 300 милиони евра“

Тале Кристо — Mon, 04 Sep 2023 19:01:25 +0000

„Ако ја погледнете фискалната стратегија, во однос на претходната ќе забележите дека во делот на даночните приходи дури имаме и намалување, за разлика од тоа имаме раст на придонесите во делот на наплата на приходи што повеќе од јасно кажува дека оваа Влада очигледно иднината ја гледа преку раст на плати, а во делот на даночните приходи никакви промени“, истакна потпретседателката на ВМРО-ДМНЕ, Гордана Димитриеска Кочоска во вечерашното гостување во „Интервју 24“ на Телевизија 24. Таа додаде доколку се погледне Буџетот ќе се види дека околу 300 милиони евра ќе фалат во делот на приходите во однос на тоа што беше буџетирано. „Во исто време спомнуваат дека имаат борба со сива економија, ќе воведуваат е фактура што би значело на некој начин намалување на сивата економија. Но ако ги погледнеме бројките и видиме дека даночните приходи малку ги намалуваат во однос на претходно тоа јасно кажува дека тие немаат воопшто никаков концепт за борба со сивата економија“, кажа Димитриеска Кочоска. Таа истакна дека ДДВ-то за 2023-та година е со катастрофална наплата односно во суштина на исто ниво како со 2022-ра година и нема никакви промени. „Проблемот укажува, ние и на почеток зборувавме дека Буџетот е исклучиво за 2023-та година планиран на база на инфлација и е инфлаторен и ништо повеќе од тоа. Во самата фискална стратегија зборуваат дека веќе потрошувачката кај населението се намалува, тоа е како резултат на високите цени и куповната моќ се намалува“, изјави Димитриеска Кочоска. Таа кажа дека доколку се планира поголема наплата на придонесите тогаш значи дека се очекува повисока инфлација па затоа платите да растат или пак е во прашање демографскиот проблем „Ако планирате поголема наплата на придонесите во периодот што следи тоа значи дека или вие очекувате и понатаму висока инфлација па како резултат на тоа платите да растат или пак имаме друг проблем кој е реален проблем во Македонија, а тоа е демографскиот да кажеме се повеќе имаме иселување од Македонија и се помалку деца се раѓаат меѓутоа ако немате политика како да ги задржите младите и да го спречите иселувањето природно доаѓа до притисок и зголемување на платите“, потенцираше Димитриеска Кочоска.

Стоилковски: Зошто 4 милиони долари не се вратени во буџетот?

Ивана Ефремовски — Tue, 01 Aug 2023 10:49:04 +0000

Уште еден скандал на повидок со амин на СДС и одобрување од страна на Бујар Османи! Тивко се кријат 4 милиони долари пари што и припаѓаат на Македонија и на Македонците, истакнува портпаролот на ВМРО-ДПМНЕ, Наум Стоилковски. Во продолжение следува интегрален текст од неговата прес-конференција Апартманот на Тито на Парк Авенија во Њујорк беше продаден пред повеќе од една година. Во процесот на сукцесија односно поделба на имотот на сите 6 републики од бившата држава, на Република Македонија и припаднаа 4 милиони американски долари од оваа продажба. 3,4 милиони долари веќе се префрлени на сметката на Постојаната мисија на Македонија при ОН уште минатата есен, додека останатите 600.000 се очекуваат секој момент да се вратат на Македонија. Според информациите, амбасадорот Љубомир Фрчкоски и покрај неколку инструкции од МНР, една во декември, а другата во јуни годинава, парите да ги префрли во буџетот на државата, тоа одбива да го направи и ги држи на сметката од Мисијата. Па прашуваме: 1. Какви инструкции има амбасадорот Фрчкоски за трошење на државните 4 милиони долари? 2. Дали овие пари се планирани за купување на имот и потенцијална матна зделка? 3. Зошто Ковачевски молчи кога најверојатно е информиран за сето ова? 4. И на крај, дали транзицискиот професор и политичар смета дека може да присвои пари од оние што се на граѓаните на Македонија како што тоа било во пракса во 90-тите години? Го повикуваме Бујар Османи веднаш и без размислување да си поднесе оставка! Ги повикуваме истражните органи во државата веднаш да побараат објаснување зошто 4 милиони долари не се вратени во Буџетот на Македонија! Го охрабруваме Ковачевски да и каже на македонската јавност што знае за оваа сума на пари и зошто до сега не преземал ништо?

Стефковски: Донесен ребалансот на буџетот на општина Гази Баба, нови 47.000.000 денари за нови инвестиции

Ивана Ефремовски — Thu, 06 Jul 2023 16:20:28 +0000

На денешната редовна седница на Советот на општина Гази Баба на предлог на градоначалникот Бобан Стефковски беше усвоен ребалансот на буџетот со кои се обезбедуваат нови 47.000.000 денари за нови инвестиции. За донесената одлука, градоначалникот Стефковски информираше на својата официјална страна на фејсбук на која напиша: ДОНЕСЕН РЕБАЛАНСОТ НА БУЏЕТОТ ЗА 2023 ГОДИНА. ОБЕЗБЕДЕНИ НОВИ 47.000.000 ДЕНАРИ ЗА КАПИТАЛНИ ИНВЕСТИЦИИ! На денешната редовна седница, Советот на општина Гази Баба на мој предлог, го усвои ребалансот на буџетот за 2023 година. Со овој ребаланс се врши зголемување на буџетот за цели 47.000.000 денари исклучиво наменети за реализација на проекти во сите населени места низ општина Гази Баба. Со ребалансот на буџетот обезбедуваме финансиски средства за: Изградба на нова детска градинка во Трубарево; Изградба на нов паркинг на ул. Габреш, Автокоманда; Изградба на атмосферска канализација на ул. Јордан Поп Јорданов, Маџари; Комплетна реконструкција на ул. Модест Мусоргски, Триангла; Изградба на нов голем зелен парк и спортски комплекс на местото на старото ООУ Вера Јоциќ, Хиподром; Изградба на ограда на ООУ Наум Охридски, Раштак; Изградба на филтер станица во Булачани; Изградба на нови спортски терени; Изградба на нови детски забавни катчиња; Изградба на нови фитнес зони на отворено; Изградба на пешачки патеки, паркинзи, скверови и улици со павер елементи; Дополнително со ребалансот на буџетот обезбедуваме финансиски средства со кои за прв пат, општина Гази Баба ќе доделува стипендии за ученици со посебни образовни потреби и ќе врши стоматолошка едукација на учениците од училиштата. Обезбедуваме и финансиски средства за оддржување на манифестација Мото - фест, која планираме да се оддржи кон крајот на септември и истата ќе ги собере сите љубители на мото културата од Скопје и цела Македонија на плоштадот во Автокоманда. Општина Гази Баба храбро чекори по патот на напредокот и развојот! Очекувајте реализацијата на проекти насекаде низ општина Гази Баба! - напиша Стефковски.

Во септември можен е ребаланс на Буџетот

Ивона Петрова — Tue, 04 Jul 2023 18:19:57 +0000

Ако се оцени дека е потребно, можно е во септември да има ребаланс на Буџетот, рече вечерва министерот за финансии Фатмир Бесими. Како што истакна Бесими во интервју за телевизија Сител, досега средствата се реализираат според планот, а во Буџетот се обезбедени и 225 милиони евра за антикризни мерки кои стојат како резерва. -Досега, тоа што го имавме планирано, го реализираме. Во однос на приходи и расходи сме блиску до 50 отсто, во однос на дефицитот сме на 55 отсто зашто капиталните расходи годинава имаат значително поголем раст и во однос на лани за 1,5 пати имаме поголем степен на реализација, над 45 отсто во оваа фаза. Се уште сме во планот, сметаме дека до крајот на годината ќе остане во рамките на планот, може да има во септември евентуално, ако се покаже потреба, и тоа е, во вакви улсови на кризни ситуации може, ако има потреба, да се редефинираат работите. Во Буџетот имаме обезбедено и 225 милиони евра за антикризни мерки кои ни стојат како резерва, веќе 60 милиони имаме исплатено за ЕСМ во однос на субвенции за цената на струјата. Останува уште простор за поддршка до крајот на годината за потребите на граѓаните и стопанствтоо кои се најпогодени од инфлацијата и енергетската криза, истакна Бесими.

Бесими: Засега нема потреба од ребаланс на Буџетот

Катерина Бојаџиева — Wed, 14 Jun 2023 12:10:39 +0000

Министерот за финансии Фатмир Бесими вели дека Буџетот е во добра кондиција и затоа не очекува наскоро да има ребаланс. -Сега за сега се оди според планот во однос на приходите и во однос на расходите и мислам дека ќе продолжиме така како што е планирано во Буџетот, изјави Бесими во одговор на новинарско прашање пред презентација на Извештајот од петтиот круг на евалуација на системот за спречување перење пари и финансирање на тероризам на Република Северна Македонија усвоен од страна на Мoneyval Комитетот при Советот на Европа. Прашан дали Владата ќе предложи да се пролонгира враќањето на ДДВ-то за струјата од 10 на 18 отсто што треба да стапи на сила од 1 јули годинава, Бесими рече дека во Буџетот се обезбедени средства за поддршка на најранливите потрошувачи. -Како Влада ги разгледуваме сите можни варијанти и опции во однос на антикризните мерки и гледаме мерките да бидат поефикасни и поефективни. Од 2020 година досега имаме интервенирано со две милијарди евра. Тоа се околу 13 отсто од Бруто домашниот производ (БДП). И во текот на оваа година ќе продолжиме со таргетирани мерки за поддршка на граѓаните и стопанството зашто треба да го менаџираме Буџетот во однос на дефицитот и во однос на јавниот долг, рече Бесими и додаде дека со одредени мерки ќе им се излезе во пресрет на најзагрозените. Владата, како што посочи, за годинава има одвоено 225 милиони евра за антикризни мерки или околу 1,5 отсто од БДП.

Како да го зачувате домашниот буџет?

Super Admin — Mon, 08 May 2023 13:15:21 +0000

Дали вашите долгорочни цели, меѓу другото, се заштеда на време и ефикасно трошење на домашниот буџет? Тогаш, време е краткотрајните акции и намалувања да ги замените со долгорочно СЕКОГАШ ПОВОЛНИ цени. Што се долгорочно поволни цени? Овој концепт на нашиот пазар започна да го промовира дрогерискиот ланец на dm, кога овој мај реши во целост да ги замени акциските намалувања со СЕКОГАШ ПОВОЛНО цени, порачувајќи им на купувачите дека не мора да ,,трчаат’’ по попусти, туку дека своите омилени производи може да ги купуваат кога ќе посакаат, по цени кои нема да бидат зголемени најмалку четири месеци. Не мора да купувате ,,за да ви се најде’’ Со овој концепт, нема да морате да правите залихи на производи. Упатете се во најблиската dm дрогерија и пронајдете го производот со ознака СЕКОГАШ ПОВОЛНО, тогаш кога ви е навистина потребен, бидејќи цената нема да му се зголеми за најмалку четири месеци, туку може само да биде уште помала – со што постигнувате долгорочна заштеда. За да забележите каква е користа од овој концепт во однос на вашиот буџет, рационалното купување треба да стане дел од вашата рутина. Од компанијата велат дека се надеваат дека купувачите на нашиот пазар се подготвени да ги променат навиките, но и во контекст на глобалната економска ситуација пред сѐ дека се во потрага по стабилни видови на купување, кои долгорочно поволно ќе влијаат врз нивниот домашен буџет. Како да ги препознаете СЕКОГАШ ПОВОЛНО производите? На ценовните етикети на повеќе од 7.500 производа, во сите категории започнувајќи од прехранбени намирници, преку сегментот за одржување на домот, одделот за нега и исхрана на бебиња, па сѐ до асортиманот за нега и убавина, е јасно назначен датумот од кога цената на производот нема да биде зголемена, гарантирано најмалку четири месеци. Оваа информација купувачите ќе можат да ја проверат и во двонеделниот и месечниот каталог, како и на социјалните мрежи на dm. Да сумираме – пресметка пред шопингот веќе нема да биде потребно да правите, купувањето може да се направи и без стрес, а да се штеди може секој ден, и сето тоа со концептот СЕКОГАШ ПОВОЛНО!

Пендаровски: Невкусно е во економска криза да се покачуваат платите од државниот Буџет

Ивона Петрова — Thu, 30 Mar 2023 18:12:07 +0000

Претседателот на државата Стево Пендаровски во врска со одлуката на Уставниот суд со која се укинуваат одредби од Законот за плата и други надоместоци на избрани и именувани лица во Република Македонија, ја повика Владата да се најде законско решение со кое ќе се регулира прашањето преку намалување на бодовите. - Сметам дека е невкусно во време на економска криза да се покачуваат платите кои се исплаќаат од државниот буџет, изјави за МИА претседателот Пендаровски. Со одлука на Уставниот суд на 21 март се укинати член 4 од Законот за изменување и дополнување на Законот за плата и други надоместоци на избрани и именувани лица во Република Македонија („Службен весник на Република Македонија“ бр.97/2010) и член 1 од Законот за изменување на Законот за плата и други надоместоци на избрани и именувани лица во Република Македонија („Службен весник на Република Македонија“бр.139/2014). Како што информираа од Уставниот суд, со првата укината одредба е утврдено дека основицата за пресметување на плата на избраните и именуваните лица се применува од јануари 2012 година и е во износ од 25.726 денари, додека со втората укината одредба е предвидено дека платите на избраните лица во 2014 година може да се зголемат за 4 отсто започнувајќи со исплатата на платите во 2014 година. Уставниот суд смета дека во случајот, постои двојство во уредувањето на прашањето за основицата на платата на избраните и именуваните лица, што претставува неконзистентност во законското уредување на оваа материја. Судот утврди дека истовремено постојат две норми, односно две правни правила за утврдување на основицата на платата oпфатени во еден ист закон, односно едното е член 11 од Законот, според кое, основицата се определува според просечната плата остварена во претходната година што ја утврдува Државниот завод за статистика, а второто правило е оспорената одредба од член 4 во кој основицата е утврдена во фиксен износ од 25.726 и која со усогласувањето од 4 отсто (предвидено со второспорената одредба) изнесува 26.755,оо денари што е всушност основица која е моментално во сила односно примена. Поради наведеното, Судот оцени дека укинатите одредби не се во согласност со членот 8 став 1 алинеја 3 од Уставот, согласно кој владеењето на правото е темелна вредност на уставниот поредок.

Извршниот директор на фондацијата Гејтс најави најголем годишен буџет досега

Тале Кристо — Tue, 17 Jan 2023 09:05:35 +0000

Филантропската организација на Бил и Мелинда Гејтс годинава ќе потроши 8,3 милијарди долари, што е најмногу досега, соопшти извршниот директор на Фондацијата Марк Сузман во денеска објавеното годишно писмо. Воедно, тој одговори на критиките дека Фондацијата е премногу моќна и влијателна во глобалното здравство, вклучувајќи ја и Светската здравствена организација, а притоа не презема соодветна одговорност. – Не е во ред приватна филантропска организација да биде еден од најголемите финансиери на глобалните здравствени напори, рече Сузман, додавајќи дека државите треба да бидат лидери. Но, да нема забуна – онаму каде има решенија за спасување и подобрување на животите на луѓето, ние ќе бидеме таму. Нема да престанеме да го користиме нашето влијание и нашите пари за да најдеме решенија, потенцираше извршниот директор. Сузман рече дека целта на Фондацијата не е да им каже на СЗО и на другите здравствени организации што да прават, туку да им понуди различни опции и податоци за да можат да донесат клучни одлуки. Со инвестиции насочени кон искоренување на болести како маларија и полио, фондацијата е вториот најголем донатор на СЗО. Ова е едно од прашањата што критичарите редовно го истакнуваа, особено за време на пандемијата на Ковид-19. „Би сакал многу повеќе влади да не надминат на таа листа, бидејќи тоа би значело повеќе спасени животи“, напиша Сузман. СЗО минатата година договори земјите-членки да ги зголемат своите плаќања за да ја намалат улогата на приватните донатори и да и овозможат на организацијата да ги троши парите пофлексибилно.

Општина Кисела Вода влегува во 2023-та година со историски најголем Буџет

Ивана Ефремовски — Mon, 26 Dec 2022 15:26:10 +0000

Општина Кисела Вода го донесе Буџетот за 2023 година. Проектиран е на 507.982.798 денари што претставува најголем основен Буџет во поновата историја на Општина Кисела Вода. Она што е најважно за граѓаните е дека неговата висина не се должи на задолжувања и зголемување на даноци, како што е примерот со државниот Буџет, туку на пренесен вишок од 104 милиони денари како резултат на доброто работење на оваа локална самоуправа во годината што изминува. -Со акумулираните средства, кои се должат на кратењето на непродуктивните трошоци, на затворањето на сите предмети на легализација за кои постоеше соодветната документација, а кои донесоа директен приход преку Данокот на имот, а најмалку од дадени дозволи за градење на згради, што било пракса во минатото, согласно долгорочниот финансискиот план и стратегија, во првиот квартал од 2023 година Кисела Вода ќе ги затвори сите обврски кон добавувачи и за прв пат во нејзината историја ќе стане општина која што не е задолжена. Буџетот на Општина Кисела Вода за 2023 година е развоен и посветен на реализација на многу капитални инвестиции, но и одржување на постоечката инфраструктура, сервисирање на тековните проблеми на граѓаните, субвенции на културни и спортски настани, помош во делот на образованието, детската заштита и културата, разни субвенции по повеќе основи за жителите на општината, информираат од општината. Планирани се рекордни 202.394.571 денари за капитални инвестиции или повеќе од 40% од основниот Буџет, без притоа општината да влегува во нови задолжувања. Колку за споредба за 19,06% повеќе од 2021 година кога планираните капитални инвестиции биле 170 милиони, 168 милиони во 2020 или 160 милиони во 2019 (со владина помош од 64 милиони денари). -Споредбено, државата во својот буџет има едвај 15% капитални инвестиции кои во 90% се покриени со задолжувања. Како капитални проекти за 2023-та ќе ги издвоиме: реконструкцијата на мостот на Киро Фетак, изградбата на водовод во Стаклара, одводна мрежа во Пинтија, изградба на нова спортска сала во ООУ Кузман Јосифовски Питу, изградба на нови преку 500 паркинг места, градинки, проект за ново основно училиште во село Драчево, нови линии за осветлување и поставување на фотоволтаици на училиштата. Посебно внимание во капиталните проекти се посветува на реконструкција на улици и патишта за кои се планирани 107,5 милиони денари односно 21,3% од Буџетот на општината, што е во просек речиси 2,5 пати повеќе во однос на секоја претходна година. Се планираат и дополнителни 1,2 милиони денари за сообраќајна инфраструктура. За подземна инфраструктура се планирани 38,8 милиони денари или 7,7% од вкупниот буџет на општината што повторно е за неколку милиони денари повеќе од просекот на најдобрите години во минатото во износ од 35 милиони денари, велат од општината. За урбана опрема се планирани 24,4 милиони денари или 4,83% од буџетот што повторно е драстично повеќе од минатото односно речиси исто колку за 3 години. Во 2021/2020 и 2019 година заедно, планирани се 27,4 мил денари, а притоа истите не се ни приближно целосно реализирани. За одржување на улици/опрема/осветлување се обезбедуваат дополнителни 20,15 мил денари или 4% од буџетот. За јавна чистота, животна средина и други комунални услуги се обезбедуваат 34,5 мил денари или 6,84% од буџетот. За урбанизам се обезбедуваат 16,5 мил денари или 3,27% од буџетот и важно е да се напомене дека за прв пат ќе се прави 10 годишна стратегија за урбанизмот во Општина Кисела Вода со цел да се стави ред во градењето.За локалниот економски развој се обезбедуваат 16,4 мил денари или 3,26% од буџетот на општината. -Со останатите средства се обезбедува набавување на информатичка опрема, подршка на спортските клубови и настани, подршка на културни настани и реновирање на културниот дом, подршка во образованието и детската заштита, субвенции за граѓаните за дрва, електрична енергија, партиципација во детските градинки, ужинки во училиштата и друго. Дополнително продолжува помошта на жителите за лекување, настанати штети од невреме, спонзорирање на учество во меѓународни натпревари, помош за нега на стари лица, награди за талентирани ученици и спортисти. Буџетот го поддржаа 13 советници, 1 беше воздржан. Против гласаа советниците од СДСМ и од Левица, информираат од општина Кисела Вода.