бугарска влада – Kurir.mk

Донев: Бугарската Влада подготвена за одмазднички мерки кон Холандија и Австрија за вето за Шенген

Дарко Андоновски — Mon, 05 Dec 2022 12:46:44 +0000

Бугарската Влада е подготвена за одмазднички мерки доколку Холандија и Австрија наметнат вето за влез во Шенген, изјави техничкиот премиер Гулаб Донев по средбата со министрите за внатрешни, за надворешни работи и за правда Иван Демерџиев, Николај Милков и Крум Зарков. Како што јави дописникот на МИА од Софија, Донев изјавил дека сите мерки ќе бидат насочени и во одбрана на националниот интерес на Бугарија, која никогаш не се залагала за позиции на поделеност и двојни стандарди во однос на која било земја од ЕУ и очекува ист став од другите земји-членки. Според бугарскиот технички премиер, повеќе од очигледно е дека позициите на премиерот на Холандија и на канцеларот на Австрија се диктирани од внатрешно-политички размислувања, а не од фактички идентификувани недостатоци во спроведувањето на шенгенските правила од страна на Бугарија. Донев кажа дека има сомнежи за примена на двојни стандарди, особено од страна на Холандија. Според него, во својата позиција, канцеларот на Австрија ги истакнал недостатоците на Шенген системот во целина, кои во никој случај не се одговорност на бугарската страна, додека премиерот на Холандија прибегнал кон недостојни сугестии, кои во Бугарија малку е веројатно дека наскоро ќе бидат заборавени. Тој потсети и на улогата на тројцата бугарски гранични полицајци кои загинаа чувајќи ја надворешната граница на ЕУ во последните три месеци.

Хакерски напад на веб-страницата на бугарската влада

Тале Кристо — Sun, 13 Nov 2022 16:29:35 +0000

Официјалната веб-страница на бугарската влада била подложена на кибер напад,соопшти информативната служба. Како што јави дописникот на МИА од Софија, засега не е познат сторителот на нападот. Страницата на Советот на министри на Република Бугарија на интернет „www.government.bg“ е привремено недостапна како резултат на кибер напад, се наведува во соопштението. Властите во Софија соопштија дека се преземени неопходните активности за неутрализирање на нападот и враќање на пристапот до сајтот.

Почнуваат консултациите за формирање нова бугарска влада

Ивона Петрова — Sat, 02 Jul 2022 10:40:46 +0000

Најголемата партија во бугарскиот парламент „Продолжуваме со промените“ почнува коалициски преговори за поддршка за нова влада, јави дописникот на МИА од Софија. Целта на „Продолжуваме со промените“ е да собере 121 бугарски парламентарец за поддршка на програмата за управување во следните шест месеци и водење на Бугарија низ економската и политичката криза. Денеска во Народното собрание на Бугарија „Продолжуваме со промените“ ќе има консултации со Бугарската социјалистичка партија и со „Демократска Бугарија“. „Продолжуваме со промените“ има рок до петок, 8 јули, во 17 часот, да го информира претседателот на Бугарија, Румен Радев, дали има парламентарна поддршка и мнозинство да управува во Народното собрание. Министерот за иновации и развој Даниел Лорер за БНТ изјави дека е оптимист за формирање нова бугарска влада во рамките на 47. Народно собрание. Тој рече дека Кирил Петков ќе продолжи да биде активен дел од власта, но засега никој не размислува за места и позиции, туку за парламентарна поддршка.

За денеска во 15 часот закажана седница на бугарската Влада

Катерина Бојаџиева — Wed, 22 Jun 2022 09:44:05 +0000

Бугарската Влада, денеска во 15 часот, ќе одржи седница, соопшти прес-службата на оваа институција. Како што јави дописникот на МИА од Софија, на дневен ред е разгледување на извештајот за одобрување на позицијата на Бугарија за учество на состанокот на Европскиот совет на 23 и 24 јуни во Брисел, вклучително и ставот на Бугарија за учество на самитот ЕУ-Западен Балкан, кој ќе се одржи утре пред пладне. Во исто време е соопштено дека бугарскиот премиер Кирил Петков ќе отпатува во Брисел на самитот ЕУ-Западен Балкан, организиран од француското претседателство со ЕУ, по што ќе следи средба на шефовите на влади на земји од ЕУ.

Тројца министри од бугарската влада денеска поднесоа оставки

Дарко Андоновски — Fri, 31 Aug 2018 13:27:57 +0000

Тројца министри од бугарската влада денеска поднесоа оставки по автобуската несреќа во која загинаа 17 луѓе и неколкумина беа повредени. Претходно, бугарскиот премиер Бојко Борисов ги повика министрите за внатрешни работи, сообраќај и регионален развој да поднесат оставки и преземат политичка одговорност. Оставките на Валентина Радева, Ивајло Московски и Николај Нанков треба да ги потврди Парламентот. Несреќата се случи во саботата кога се преврте патнички автобус и слета од автопат на околу 50 километри северно од Софија. Засега нема информации за причината за несреќата.

Бугарската Влада не смее да потпишува билатерални договори за мигранти

Даниел Василев — Fri, 20 Jul 2018 15:44:53 +0000

Бугарскиот Парламент денеска усвои Резолуција со која на Владата и се забранува да потпишува билатерални договори со други земји од Европската унија за реадмисија на мигранти, кои во Европа влегле преку тие држави. Резолуцијата ја поддржаа 177 пратеници, кои одлучија и дека бугарската Влада, предводена од премиерот Бојко Борисов, до крајот на семптември треба да го претстави бугарскиот предлог за реформа на Даблинскиот договор. Бугарија поддржува затворање на надворешните граници на ЕУ за мигранти и изградба на прифатни центри за бегалци надвор од територијата на ЕУ. МИА

Владата во Бугарија го „преживеа“ и второто гласање за недоверба

Даниел Василев — Fri, 29 Jun 2018 11:24:43 +0000

Владејачката коалиција во Бугарија, државата која месецов го завршува претседавањето со ЕУ, „преживеа“ денеска гласање за недоверба, кое го побара опозицијата, обвинувајќи ја владата на премиерот Бојко Борисов за неуспешна борба против нараснатиот криминал и неможноста да гарантира владеење на правото. Во бугарскиот парламент, од вкупно 240 пратеници, 131 пратеник ја поддржаа владата, 104 беа против, а петмина беа воздржани. Ова е второ гласање за недоверба со кое се соочи владата на Борисов, откако неговата партија ГЕРБ минатата година дојде на власт. Опозицијата како причина за иницијативата го наведе спектакуларното бегство на двајца затвореници од централниот затвор во Софија, неразјаснети убиства на јавни личности и порастот на криминалот. МИА