бугарски пасоши – Kurir.mk

Османи: Група македонски граѓани бараат бугарски пасоши на секое доцнење за членство во ЕУ

Ивана Ефремовски — Sat, 29 Jul 2023 11:12:23 +0000

За ниту едно од 35-те поглавја, Договорот и Протоколот со Бугарија не е услов за отворање и затворање на поглавјата. Договорот со Бугарија е само во општиот впечаток за добрососедските односи, но за тоа не се гласа во Европската унија. Нема да има ниту писмен извештај од страна на Европската комисија во однос на степенот на реализација на Договорот со Бугарија, категоричен е шефот на македонската дипломатија Бујар Османи. Се друго, според него, е пропаганда за да се исплашат граѓаните додека се изложени на процес на пасошизација. Се сомневам, рече Османи на денешната прес-конференција, дека радикалите од двете држави имаат некој премолчен договор. -И сега некој ќе ми каже дека со спомнувањето на Бугарите како посебно малцинство во Уставот ќе се бугаризира државата, а не со земање на пасоши со кои сами се пријавувате дека по потекло сте Бугари. Затоа сум кажал дека често се сомневам оти меѓу радикалите од двете држави има некој премолчен договор - ние ќе ја задржиме државата да не напредува, а вие продолжете со својата мисија за бугарски пасоши, истакна Османи. Секое доцнење за членство во ЕУ, како што посочи, една група македонски граѓани добиваат бугарски пасош, а за да го добијат, треба да одат во Софија и да се пријават дека се Бугари по потекло и да обезбедат стан во којшто живеат. -Најнепатриотски и најштетен чин кон државата е нашиот пасош да биде подреден на бугарскиот пасош. Овој процес на пасошизација е најголемата платформа за бугаризација, оцени Османи на денешната прес-конференција. (МИА)

Претседателите на бугарските клубови во Македонија добиваат бугарски пасоши – ќе им ги врачи претседателот Румен Радев!

Дарко Андоновски — Fri, 19 May 2023 09:55:28 +0000

На свечена церемонија бугарскиот претседател Румен Радев ќе им ги врачи бугарските лични документи на Љубчо Георгиевски и Благој Шаторов – претседателот и секретарот на затворениот бугарски клуб од Битола „Иван Михајлов“. Потпретседателката на Бугарија Илијана Јотова ги потпиша указите за стекнување бугарско државјанство врз основа на нивното бугарско потекло, јавува „БНТ“. Пред една недела, на официјална церемонија и со интонирање на химната, Јотова му врачи буагрски документи на секретарот на затворениот бугарски културен клуб во Охрид, Христијан Пендиков. Потпретседателката во таа прилика го опиша Пендиков како храбар млад човек, кој и покрај провокациите, останал верен на бугарската самосвест и идентитет. Пендиков подоцна, во интервју за БНТ истакна дека сè уште има многу македонски Бугари, како што се претседателите на бугарските клубови, кои немаат бугарско државјанство, а за ова доставиле документи пред долго време. „Најистакнатите македонски Бугари, тие што најмногу се борат, кои добиваат најмногу закани, тие немаат бугарско државјанство, но тие пред многу години поднеле документ за бугарско државјанство и чекаат, им треба помош“, рече Пендиков во интервјуто. Пендиков е родум од Охрид. За јавноста непознат додека не беше натепан, инцидент кој потоа беше политизиран. Како причина беше наведено тоа што Пендиков се декларира како Бугарин, а се зборуваше дека тој имал нерасчистени сметки со напаѓачите. Тој беше секретар на сега згаснатиот бугарски клуб во Охрид, со контроверзно име „Цар Борис III“. Против него се води и предмет во охридското Обвинителство поради омаловажување на македонскиот народ и Македонија.

Стојаноски до Костадинов: Те повикувам повтори ја лагата за бугарските пасоши, без точки и запирки за да те тужам, а парите ќе одат за музејот на холокаустот подигнат за жртвите убиени од бугарските фашисти

Тале Кристо — Thu, 11 Mar 2021 11:18:19 +0000

Еден од главните пропагандисти на лажните вести Костадин Костадинов, кој го повикувам уште еднаш да ги произнесе овие тврдења, ама без точки, запирки и релативизирања за да можам да го тужам доколку не се извини за оваа лажна информација, а средствата кои ќе ми ги исплати за таа клевета ќе ги донирам за Меморијалниот центар на холокаустот на Евреите од Македонија, реагира пратеникот на ВМРО-ДПМНЕ Бојан Стојаноски. Во продолжение ви ја пренесуваме целата реакција на пратеникот Стојаноски: Тажно е и жално што Министер за одбрана на земја членка на ЕУ шири лажни вести и манипулира со непроверени информации. Моето име и презиме е Бојан Стојаноски. Без В. Родум и потекло од с. Попоец - Кичево, од западот на Република Македонија. Мајка и татко - македонци. Државјанство - само македонско. Лична карта - само македонска. И само македонско. Жалам што перјаниците на СДСМ во обид на креирање ексклузива побрзаа да ја пласираат оваа лажна вест. Еден од нив и портпаролот на СДСМ, еден од главните пропагандисти на лажните вести Костадин Костадинов, кој го повикувам уште еднаш да ги произнесе овие тврдења, ама без точки, запирки и релативизирања за да можам да го тужам доколку не се извини за оваа лажна информација. Средствата кои ќе ми ги исплати за таа клевета ќе ги донирам за Меморијалниот центар на холокаустот на Евреите од Македонија. Красимир Каракачанов лаже. Го повикувам да ги извади документите со сите генералии за да докаже дека таа личност сум јас. Поздрав од Бојан Стојаноски (без В), Македонец од Република Македонија, пишува Стојаноски во својата реакција.