бујар османи – Kurir.mk

Османи во официјална посета на Финска

Тале Кристо — Fri, 27 Oct 2023 06:07:18 +0000

Министерот за надворешни работи Бујар Османи денеска ќе престојува во официјална посета на Република Финска, на покана на финската министерка за надворешни работи. Како што соопшти МНР, во рамки на посетата Османи ќе оствари средби со својот хомолог, министерката Елина Валтонен и со претседателот на финскиот Парламент, Јуси Хала-ахо. -За време на престојот во Хелсинки, Османи ќе го потпише меморандумот за пристапување на Република Северна Македонија во Европскиот центар за извонредност за справување со хибридни закани, со седиште во Хелсинки, велат од МНР.

Османи: Домашните безбедносни служби ги следат состојбите, информирание сме за зголемувањето на сензитивноста

Ивана Ефремовски — Wed, 18 Oct 2023 14:31:17 +0000

Министерот за надворешни работи Бујар Османи во однос на безбедносната состојба во земјава по подигнувањето на нивото на безбедност во европските држави изјави дека надлежните ја следат ситуацијата, но дека нема конкретни закани. -Во однос на состојбата во Македонија, тоа е надлежност на домашните служби, постојано сме известени за зголемувањето на сензитивноста без конкретни закани, но исто така сме во постојана координација и ги следиме состојбите преку надворешно политичката комуникација и преку внатрешната комуникација, рече Османи, одговарајќи на новинарски прашања по прес-конференција со австрискиот покраински министер за европски и меѓународни прашања, образование и човечки ресурси на Штаерска, Вернер Амон. Австрискиот министер рече дека безбедносната состојба е напната во сите европски држави и дека е зголемен степенот на безбедност. - Поради се што се случува, треба да создадеме повеќе безбедност. Безбедносната состојба е напната во сите европски држави и го имаме зголемено нашиот степен на безбедност. Начелно безбедносната состојба е напната и ќе мора да се обезбедат соодветни мерки, рече Амон. Во однос на тоа дали ќе биде испратена хуманитарна помош во Газа, министерот Османи рече дека кога ќе се создадат услови за тоа, земјата е подготвена за такво нешто. За брачниот пар кој се наоѓа во Газа, како што информира Османи, нема нови моменти. Се комуницира со нив, но единствениот излез преку Египет е се уште затворен поради што не може да се евакуираат. (МИА)

Османи: Нападот врз болница и училиште во Газа со стотици цивилни жртви е нехуман чин на терор

Катерина Бојаџиева — Wed, 18 Oct 2023 09:13:18 +0000

Министерот за надворешни работи и претседавач со ОБСЕ, Бујар Османи се огласи на Фејсбук во врска со синоќешниот напад врз болницата Ал Ахли во Газа, истакнувајќи дека „тоа е нехуман чин на терор за кој нема оправдување“. -Нападот врз болница и училиште во Газа со стотици цивилни жртви е нехуман чин на терор за кој нема оправдување. Почитување на меѓународното и хуманитарно право е приоритет, а цивилите мора да бидат целосно заштитени по секоја цена, објави Османи на својот Фејсбук профил. Како што посочува Османи во објавата, сторителите на овој чин мора да бидат јасно идентификувани и да одговараат. Во синоќешниот воздушен напад врз баптистичката болница Ал-Ахли Араби во центарот на градот Газа загинаа најмалку 500 луѓе.

Османи: Доколку има наши граѓани во Либан да ја напуштат државата поради непредвидливата ситуација

Тале Кристо — Tue, 17 Oct 2023 10:49:58 +0000

Шефот на дипломатијата Бујар Османи денеска најави дека МНР ќе упати повик до нашите граѓани кои се наоѓаат во Либан да ја напуштат државата поради, како што кажа непредвидливата ситуација таму. -Можеби денеска ќе пуштиме соопштение да ги повикаме нашите граѓани кои се во Либан да ја напуштат државата поради непредвидливата ситуација таму, а особено треба да бидат внимателни поради фактот што со Либан немаме ниту дипломатски односи, ниту амбасада и би било многу тешко потоа да ги згрижиме во услови состојбата да се влоши. Затоа сакаме однапред да испратиме покана до сите наши граѓани кои евентуално се во Либан или планираат да патуваат таму тоа да го одложат, односно тие што се таму да ја напуштат државата, рече Османи. Во однос на брачниот пар, кој е во Газа, повтори дека тие се локални жители на Газа кои имаат државјанство на Северна Македонија. -Ние сме должни секој наш државјанин да го згрижиме. Тие се во рамки на овие напори да се овозможи граничен премин од Газа во Египет, така што во комуникација сме и со луѓето и со МНР на Египет, рече Османи.

Османи: Неопходно е нашата Влада да набави авион, но тешко е бидејќи јавноста тоа ќе го смета за луксуз

Ивана Ефремовски — Mon, 16 Oct 2023 13:50:04 +0000

Министерот за надворешни работи Бујар Османи, во 21Анализа на ТВ21 зборуваше за евакуацијата на нашите граѓани од Тел Авив. Османи кажа дека е неопходно владата да набави авион, но тоа е тешко затоа што јавноста ќе го смета тоа како луксуз. Тој коментираше дека пред евакуацијата, Владата имала седница на која одлучено е да се обезбеди чартер лет за евакуација на наши граѓани од Тел Авив, но тоа било многу тешко поради ситуацијата во Израел. -Владата веднаш свика седница и обезбеди средства до СЗР да обезбеди веднаш чартер лет. Но поради безбедноста беше тешко да обезбеди таков лет до Тел Авив, и се најде Ер-Србија како авиокомпанија која прифати да склучи договор со Владата. СЗР ги покри трошоците на сите граѓани, така што граѓаните не беа принудени да платат, рече тој. Османи посочи дека не се одлучиле да набават авион бидејќи јавноста ќе смета дека тоа е луксуз. -Но, ова уште еднаш зборува за фактот колку ни отежнува што немаме владин авион. Албанската влада уште прв ден ги евакуираше своите граѓани, затоа што имаше свој владин авион. Сите влади не се осмелуваат да набават свој авион, затоа што реакцијата на јавноста би била дека тоа би било луксуз. Ете на пример вакцините доцнеа поради тоа што немавме авион. Имаме владино летало, но тоа не е соодветно да одговори на вакви ситуации. Затоа вакви работи покажуваат дека има потреба, но за тоа ќе видиме понатаму, рече Османи.

Брачен пар од Македонија заглавен во Газа, Османи вели дека во моментов нема начин како да се извлечат

Дарко Андоновски — Thu, 12 Oct 2023 10:53:50 +0000

Досега се контактирани 150 наши граѓани од Израел, од кои 60 веќе стигнаа, а останатите 90 очекувам утре, во текот на денот сите да бидат вратени во Северна Македонија, информираше министерот за надворешни работи Бујар Османи. Амбасадата во Каиро, нагласи Османи, е во комуникација со еден брачен пар што се наоѓа внатре во загрозените подрачја во Газа, што е изолиран од Израел, откако не успеале да излезат пред да се затвори единствениот граничен премин со Египет, – Тие во моментот се безбедни. Ситуацијата таму е многу променлива, и тие можеме да сметаме дека се во некаков ризик. Работиме и со властите во Египет, за да ги ослободат да излезат, а потоа ќе организираме превоз од Египет. Меѓутоа, засега немаме начин како да ги извлечеме од Газа, изјави Османи. Дел од граѓаните кои беа затекнати во загрозените подрачја во регионот на Газа, ноќеска со авион пристигнале во Атина и веќе се на пат кон својот дом. Во Атина, Османи посочи дека тие биле пречекани од нашата амбасада, од каде со автобус се префрлени до граница, од каде МНР ги презема со возила и ги носи до нивните домови. – Така беа вратени ноќеска петмина, а утринава дополнително 17 од тие дваесетина што беа во загрозените подрачја пристигнаа веќе во Атина и во моментот се на пат кон Солун и МНР организира превози и ги пречекува на граница и организира превоз до нивните домови, изјави Османи. Според Османи, првично фокусот бил да се идентификуваат, контактираат и извлечат од загрозените подрачја нашите граѓани, и потоа да се пренесат до Тел Авив, каде и имало функционален аеродром. Османи, исто така, се заблагодари и посочи дека дел од вратените граѓани се преку Јордан, Албанија, Турција, Црна Гора и Србија. Тој додаде дека имало и случаи на контактирани граѓани кои одбиле да заминат, но без да ја посочи нивната бројка. Шефот на дипломатијата најави дека се прават напори од Владата за организирање лет со кој би се вратиле преостанатите македонски државјани од Израел, за што најави дека ќе информираат денеска попладне. Прашан за коментар за информациите од Еврејската заедница во земјава, за наводно загинати тројца македонски државјани во Израел, Османи рече дека, немаат такви информации.

Османи очекува процесот на уставни измени да заврши успешно и на време

Ивона Петрова — Thu, 12 Oct 2023 10:26:36 +0000

Министерот за надворешни работи Бујар Османи е оптимист и очекува уставните амандмани, кои се услов за продолжување на пристапните преговори со ЕУ, а на кои, вели, се работи во моментов, да бидат донесени, и целиот процес успешно да заврши. -Моја задача е да сум оптимист и да работам тоа да се случи. Според моите сознанија процесот ќе заврши успешно, се надевам на време, рече Османи на новинарско прашање на денешниот брифинг во МНР. Како првичен краен рок за уставните измени беше посочен ноември, кога треба да заврши и скрининг процесот и да се одржи втората меѓувладина конференција со што ќе почнат преговорите по поглавјата. Засега нема консензус по однос на уставните амандмани, бидејќи опозициската ВМРО-ДПМНЕ одбива да поддржи измени на Уставот, како што посочуваат, под бугарски диктат, и инсистираат на предвремени парламентарни избори. Во однос на Акцискиот план во контекст на преговарачкиот процес со ЕУ, Османи додаде дека е во подготовка на што работат експерти домашни и надворешни, и веќе има и втор драфт. Неговата подготовка е поврзана и со процесот на уставните измени и штом биде подготвен ќе биде испратен на усвојување во ЕК.

Османи на министерски состанок во рамки на Берлински процес во Тирана

Ивана Ефремовски — Thu, 05 Oct 2023 07:16:40 +0000

Министерот за надворешни работи Бујар Османи утре ќе учествува на состанокот на министри за надворешни работи во рамките на Берлинскиот процес, чиј домаќин годинава е министерот за Европа и надворешни работи на Албанија, Игли Хасани.

На состанокот се очекува да се разговара за постигнувањата во рамките на Берлинскиот процес и влијанието на оваа клучна иницијатива врз регионалната соработка, нејзината важност во заокружувањето на европската интеграција, како и билатералните односи.

На маргините на состанокот во Тирана министерот Османи ќе има билатерални средби со свои хомолози од регионот и пошироко.

Османи: Со ништо не може да се намали важноста и итноста на уставните измени

Ивона Петрова — Wed, 04 Oct 2023 19:51:46 +0000

Со ништо не може да се намали важноста и итноста на уставните измени. Мораме да ја искористиме отворената врата на ЕУ поради геополитичките случувања на европскиот континент, затоа што во спротивно Македонија друга ваква шанса може да чека со децении, изјави вечерва министерот за надворешни работи Бујар Османи. Османи во емисијата „Топ тема“ на телевизија „Телма“ рече дека се наоѓаме пред сериозен историски моментум. -Знам дека политичарите тоа го кажуваат секогаш и веќе губи од тежина. Меѓутоа навистина, после Втората светска војна и формирањето на ЕУ, ваков геополитички моментум немало никогаш со руската агресија во Украина и оттука е нашата итност да фатиме чекор со ова отворање на ЕУ. Често велам дека ЕУ се шири по два принципи- меритократски и геополитички. Што значи тоа? Дека таа голема железна врата се отвара периодично во одредени геополитички тригери и моментуми, а влегуваат, во тој период на отворена врата тие што се спремни, рече Османи. Според него, земјава не смее да ја пропушти оваа шанса. И покрај ставот на опозицијата која е против уставни измени, Османи е оптимист посочувајќи дека покажал оптимизам и на 19 јули 2022 година, кога никој не верувал дека „ќе се пробие процесот“. - Јас ви кажувам дека ќе го пробиеме пак, и тоа во најдобар интерес, рече Османи. За тоа кога е последниот рок за уставни измени, Османи вели дека вратата ќе почне „да се подзатвора по декември, бидејќи повторно фокусот ќе биде Украина. -Би требало сега со сите сили да го фатиме декември. Но, ако не биде, за мене последниот ден е мандатот на овој Парламент, затоа што сум убеден дека по изборите, ќе биде многу тешко, рече Османи. Османи неколкупати нагласи преговарачкиот процес за ЕУ да не се поврзува со протоколите што произлегуваат од Договорот со Бугарија. Запрашан за тоа кога ќе се одржат претседателските и парламентраните избори, министерот рече дека најверојатно тоа ќе биде во редовниот термин.

Османи: Загижен за трупањето на војска на границата помеѓу Србија и Косово, разговарав со Дачиќ, за поздравување е одлуката за повлекување на војската

Ристе Здравков — Sun, 01 Oct 2023 10:59:48 +0000

Министерот за надворешни работи Бујар Османи, во улога на претседавач со ОБСЕ, имал телефонски разговор со министерот за надворешни работи на Србија Ивица Дачиќ, за како што вели загриженоста од трупањето на војска на границата помеѓу Србија и Косово. Османи додава дека за поздравување е одлуката Србија да почне да ја повлекува војската додавајќи дека ОБСЕ е подготвено да помогне во намалувањето на тензиите.

Concerned abt mil build up along 🇽🇰 🇷🇸 border I contacted @MFASerbia #Dačić this morning. Welcome statement abt withdrawal as 1st step to de-escalation. Welcome @NATO decision for additional #KFOR troops.
OSCE present & ready to assist to reduce tensions & return to dipl.table.
— Bujar Osmani (@Bujar_O) October 1, 2023