царини – Kurir.mk

САД предлагаат ЕУ да воведе царини за испораките на нафта од Русија

Тале Кристо — Tue, 17 May 2022 13:50:43 +0000

Претставници на американското Министерство за финансии изјавија дека на состанокот на министрите за финансии на Г7 што почнува утре во Бон ќе предложат земјите од ЕУ да воведат царини за испораките на нафта од Русија како побрза остварлива алтернатива на идејата за целосно ембарго на руската нафта. Според американските власти, царинскиот механизам ќе го задржи присуството на руската нафта на пазарот, но ќе ги ограничи приходите на Русија од извозот. Тие сметаат дека ваквата мерка би имала побрз ефект од планираната забрана за увоз на нафта од Русија во ЕУ во 2023 година. Членките на ЕУ сè уште не постигнаа договор за шестиот пакет санкции против Русија, вклучително и нацрт ембаргото за нафта: Европската комисија (ЕК) предложи забрана за увоз на сурова нафта од Русија шест месеци по стапувањето во сила на шестиот пакет. Во исто време, Европската комисија предложи да им се дозволи на Унгарија и Словачка да купуваат руска нафта до крајот на 2024 година. Како што пренесува Бгнес, според добро упатени извори, Европската комисија веќе морала да ублажи голем број од своите предлози за времето, параметрите и можните исклучоци од ембаргото за нафта. Унгарија се противи на ембаргото за нафта, и е поддржана од голем број други земји, кои велат дека штетата од мерката би била катастрофална за Европа.

Индија ќе воведе повисоки царини за кинеските производи

Магдалена Андонова — Thu, 25 Jun 2020 08:59:53 +0000

Индија планира да воведе повисоки царини за артиклите од Кина и построга контрола на квалитетот на кинеските увезени производи, објави Блумберг повикувајќи се на индиски неименувани извори. Зголемувањето на царините за кинеските производи имплицира дека воените тензии помеѓу двете држави ги влошуваат и економските односи. Државнатра служба за индиски стандарди ги финализира построгите норми за повеќе од 370 артикли, меѓу кои хемикалии, електроника, мебел, хартија, индустриски машини, гумени производи, стакло, фармацевтски артикли и пластични играчки. Нормите се разгледуваат од Министерството за финансии на Индија, а Владата инсистира на стимулирање на локалното производство. Индија минатата година увезла од Кина производи во вредност од приближно 70 милијарди американски долари, додека трговската размена помеѓу Пекинг и Њу Делхи изнесувала околу 50 милијарди долари. (МИА)

Блумберг: САД размислуваат за нови царини за европски производи од 3,1 милијарди долари

Магдалена Андонова — Wed, 24 Jun 2020 13:39:08 +0000

Американските власти размислуваат да воведат нови царини, како и да ги зголемат постојните за увоз од Франција, Германија, Шпанија и Велика Британија за вкупно 3,1 милијарди долари. Според агенцијата Блумберг, ова се наведува во изјавата на американскиот трговски претставник, Роберт Лајтхајзер. Агенцијата наведува дека американските власти се подготвуваат да воведат нови царини на производи како што се маслинки, пиво, џин и камиони, а исто така сакаат да ги зголемат царините за одредени категории стоки како што се авиони, сирење и јогурт. Во средината на март, САД ги зголемија царините за авионите од Европската унија од 10 на 15 проценти. Новите царини, според „Блумберг“, би можеле да влијаат на француските модни брендови „Живанши“ и „Хермес“, како и на групата компании ЛВМХ (Луј Витон Мот Хенеси). Царините за џин и пиво значително ќе ја зголемат цената на овие алкохолни пијалоци во САД, што ќе има негативно влијание врз британските и германските производители. Плановите за наметнување нови царини се поврзани со историскиот спор помеѓу САД и ЕУ за субвенциите за „Боинг“ и „Ербас“. Арбитражата на Светската трговска организација на почетокот на октомври 2019 година им овозможи на американските власти да воведат царинии за речиси 7,5 милијарди американски долари за земјите од ЕУ, поради фактот што Европската унија не ги испочитувала одлуките донесени од организацијата во врска со субвенциите на „Ербас“. Соединетите Американски Држави во моментов ги продолжуваат преговорите со ЕУ за склучување трговски договор. Администрацијата во Вашингтон се заканува дека ќе воведе царини за европските автомобили доколку нацрт-документот не одговара. (МИА)

Кина: САД не треба царините да ги користи како оружје и средство за присила

Тале Кристо — Wed, 06 May 2020 14:23:25 +0000

Кина денеска соопшти дека царините не би требало да се користат како оружје, откако американскиот претседател Доналд Трамп во петокот се закани дека со зголемување на царините ќе се одмазди кон оваа земја заради начинот на кој таа управуваше со епидемијата. -Царината негативно влијание на сите страни, изјави портпаролот на кинеското Министерство за надворешни работи Хуа Чунџинг, додавајќи дека САД треба да престанат да размислуваат за царините како оружје и средство за присилување, пренесоа британските медиуми. Трамп во петокот кажа дека зголемувањето на царините за кинеските производи секако е една од опциите за одмазда заради начинот на кој Кина се однесуваше кон пандемијата на коронавирусот. Хуа Чунџинг изјави дека САД не треба да го свртуваат вниманието од сопственото лошо управување со кризата предизвикана од пандемијата со префрлање на вината кон Кина. Тој истакна дека Кина презела соодветни мерки многу брзо по избувнувањето на епидемијата и дека за тоа на 3 јануари ја известила и Светската здравствена организација и земјите ширум светот, вклучително и САД. -Наводите дека Кина намерно го шири вирусот, за кој шпекулираат некои американски официјални претставници, се неосновани, рече Чунџинг.

Трамп ја разгледува опцијата за нови царини за Кина поради Ковид-19

Ивона Петрова — Fri, 01 May 2020 07:17:13 +0000

Американскиот претседател Доналд Трамп изјави дека планира да наметне казнени такси за Кина бидејќи верува оти има многу докази што сугерираат дека новиот коронавирус потекнува од лабораторија во Вухан. Во изјава за американски медиуми два извора од Белата куќа нагласија дека се разгледуваат опции против Кина, но предупредија дека тоа е се во почетна фаза. – Се разгледува колку силно да се погоди Кина и како правилно да се изврши калибрација, изјави еден од изворите. Според Трамп, станува споредно потпишувањето на трговскиот договор поради се што се случи со вирусот. – Ситуиацијата со вирусот едноставно не е прифатлива, изјави Трамп. Тој синоќа одговори потврдно на прашањето дали има доволно елементи за сериозно да верува дека лабораторијата Вухан е изворот на пандемијата. Трамп не прецизираше какви докази ги поседува и рече дека може да наметне казнени „царински давачки“ за Кина. Американскиот претседател ја критикува Кина од избувнувањето на епидемијата и редовно ја обвинува земјата дека не го пријавила вистинскиот биланс на смртни случаи од коронавирусот. Тој, исто така, ја спомена можноста да се бараат неколку милијарди долари отштета од Кина заради штета предизвикана од вирусот во САД.

Нови кинески царини на американките производи

Дарко Андоновски — Wed, 23 Oct 2019 08:23:45 +0000

Кина сака да воведе нови царини на американскиот увоз во вредност од 2,4 милијарди долари во спорот околу субвенциите покренати пред Светската трговска организација. Во спорот, кој започна во 2012 година, Кина и се пожали на Светската трговска организација за царините кои Вашингтон ги воведе за да ги олесни ефектите од наводните кинески субвенции за претпријатијата во државна сопственост. Арбитрите на Светската трговска организација утврдија дека американските царини не се согласно меѓународните трговски прописи и Вашингтон ги прилагоди. Кина потоа изрази незадоволство од прилагодените американски царини и Светската трговска организација потврди дека Вашингтон не ги применил адекватно нивните претходни пресуди. Според прописите на Светската трговска организација, Пекинг сега може да одговори со воведување царина на американскиот увоз. На почетокот од следната недела, Светската трговска организација ќе го разгледа кинескиот предлог за воведување царина на увоз на американската стока во вредност од 2,4 милијарди долари. Конечната одлука за вкупната вредност на американската стока, на која Пекинг може да воведе царина, ќе ја донесат арбитри на Светската трговска организација.

Состојбата станува сериозна: Косово воведува такси за македонски производи

Предраг Кукиќ — Fri, 16 Aug 2019 12:34:39 +0000

Поради забраната за увоз на риби за порибување од Косово, косовскиот министер за трговија и индустрија Ендрит Шала порача дека одлучиле да воведат реципрочни мерки за македонските производи, пишува ТВ21. -Од јуни годинава кога Македонија ги наметна царинските бариери за косовските производи, јас бев во контакт со надлежните од оваа земја и испратив поплаки преку Секретаријатот на ЦЕФТА, но и лично писмо до нивниот министер за економија. Веќе поминаа два месеци и немаме одговор, затоа сум должен да го штитам интересот на Косово, косовскиот бизнис . Поради заштитата на нашите производи должни сме преземаме други правни дејствија, согласно законите на Република Косово, односно да воведеме реципрочни мерки, порача косовскиот министер Ендрит Шала. Домашните власти, пред изесно време рекоа дека мерката била неопходна, и не се однесува само на Косово, туку на сите држави кои немаат гаранција за здравствена исправност на нивните икри. Што се однесува до забраната таа се однесува само на порибувачкиот материјал, односно за икра и млади риби, додека пак свежата риба може да се увезува во земјава.

Србија загубила 260 милиони евра поради царините на Косово за 8 месеци

Ивона Петрова — Thu, 01 Aug 2019 06:35:39 +0000

Министерот за трговија, Расим Љајиќ, изјави за „Новости“ дека за осум месеци, колку што се во сила царините на Приштина за производи од централна Србија, на Косово се пласирани 260 милиони евра помалку стоки отколку во истиот период минатата година. „Тоа се директни финансиски загуби, но долгорочните штети ќе бидат уште поголеми, бидејќи нашите бизнисмени може трајно да го загубат тој пазар“, нагласи Љајиќ. Грција го зголеми извозот кон Косово за 3,5 пати во мај, Унгарија, Словенија, Бугарија и Хрватска за повеќе од 2,5 пати, додека Македонија за 50 проценти, објави весникот. Царините од 100 проценти на српските производи беа воведени на 21 ноември минатата година

Мексико и САД се договорија, Трамп на „неодредено“ се откажа од зголемување на царините

Дарко Андоновски — Sat, 08 Jun 2019 08:36:02 +0000

Мексико се согласи да прими повеќе мигранти кои бараат азил во САД во периодот додека азилантите ќе ја чекаат одлуката на американските власти за нивните случаи, се наведува во заедничката декларација на САД и Мексико, која беше објавена синоќа. Мексиканскиот министер за надворешни работи Марсело Ебрард вели дека в понеделник ќе почне распоредување на припадници на Националната гарда на Мексико на кужната граница со Гватемала со цел да се спречи прилив на мигранти кои одат кон САД. Американскиот претседател Доналд Трамп на Твитер објави дека поради постигнатиот договор, тарифите кои требаа да стапат во сила в понеделник се суспендирани на неопределено време.

Весели го поддржува Харадинај, но бара укинување на царините за Србија и за БиХ

Предраг Кукиќ — Sun, 03 Feb 2019 10:50:05 +0000

Претседателот на косовското Собрание Кадри Весели синоќа ја отфрли можноста за пад на владата во Косово, но повтори дека царините за стоки од Србија и од БиХ треба да се укинат на 120 дена. – Ние имаме различни ставови со премиерот Рамуш Харадинај за царините, и тоа јавно го кажав, рече Весели, лидер на Демократската партија на Косово. Тој додаде дека на Владата и на Харадинај треба да им се даде шанса. Весели изјави дека идните одлуки на Приштина треба да се носат во соработка со САД и западните партнери. – Косово со САД задржува се, без нив, без меѓународна поддршка, ризикува се, потенцира Весели.