Влада: Издвоени 615 милиони евра за амортизирање на ценовни шокови

Ивона Петрова — Mon, 11 Apr 2022 10:22:39 +0000

За амортизирање на ценовните шокови предизвикани од пандемијата и воениот конфликт во Украина, издвоени речиси 615 милиони евра, соопшти деенска Владата. Посочувата дека минатата година се преземени мерки за амортизирање на порастот на цените, а годинава дополнително е донесен сет од 26 мерки за поддршка на стандардот на граѓаните и фирмите, но и за финансиска поддршка на фирмите преку Развојната банка. -Благодарение на овие мерки имаме најниска цена на нафта и нафтени деривати во регионот. Ефектите од владините одлуки дадоа резултати. Преку замрзнување на цените на прехранбените производи, а потоа и намалување на данокот на додадена вредност од пет проценти на нула проценти, успеавме да спречиме огромен раст на цените. Дополнително, на основните прехранбени производи се ограничени и малопродажните и големопродажните маржи за заштита на стандардот на граѓаните. Без овие мерки сметките за храна би биле повисоки за 1.500 денари месечно, соопштија од владината прес-служба. Дополнително, како што потсетуваат, за ранливите категории граѓани обезбедена е финансиска поддршка од 1.000 денари месечно за да можат да ги покријат своите сметки и е покачена минималната плата на 18.000 денари. -Во изминатиот период, Владата сите ресурси ги насочи кон справување со кризата. Со мерките за одржување на ликвидноста на компаниите и ликвидноста на енергетскиот сектор, како држава одлучивме 80 проценти од сметките за електрична енергија да ги субвенционираме. Без овие мерки цената на електрична енергија, односно сметките за струја на граѓаните би биле за 2.150 денари повисоки. доколку не беа ограничувањата на маржите и намалувањето на ДДВ, а нафтените деривати би ги плаќале само по основ на ДДВ, без намалувањето на акцизата, 300 денари повеќе, се наведува во соопштението на Владата. Исто така, како што потенцираат, порасна и просечната плата, а во најголемиот дел од секторите во државата во изминатите години платите беа покачени и за над 20 проценти низ изминатите три години. -Владата е на чекор од реализација на ветувањето од минимум 30.000 просечна плата, последните податоци покажуваат дека просечната плата изнесува 29.980 денари. Влогот во стандардот на граѓаните е врвен приоритет, особено во услови на огромна економска криза и Владата ќе продолжи финансиски да ги поддржува граѓаните и компаниите, соопштија од Владата.

Ковачевски: Спречивме големи ценовни шокови за граѓаните

Тале Кристо — Wed, 09 Feb 2022 08:08:44 +0000

Премиерот Димитар Ковачевски во интервју за ТВ Алсат-М истакна дека Владата ги презеде сите неопходни чекори уште на почетокот на енергетската криза за да се ублажат ценовните шокови за граѓаните и стопанството. – Го намаливме ДДВ-то за резиденцијалните потрошувачи, односно за домаќинствата и за малите потрошувачи од 18 на 5 отсто бидејќи го предвидовме ова што се случува. Издвоивме финансиски средства во буџетот во значителен износ со цел да можеме да извршиме субвенционирање на трошоците за електрична енергија која што граѓаните ја плаќаат, за да не се случи ценовен шок за граѓаните и тоа не се случи бидејќи има држави каде што за 50-60 проценти е покачена цената на струјата, рече Ковачевски и дополни дека од оваа перспектива со мерките што се преземаат континуирано сѐ уште се држат до основното сценарио во однос на цената на електричната енергија. Премиерот Ковачевски посочи дека предвидувањата укажуваат дека кон средината на оваа година ценовниот притисок ќе се намали и дека ќе следува стабилизација на цените. – Уште во првите денови од мандатот, оваа Влада покажа ефикасност на дело и спроведе конкретни чекори што значат надминување на предизвиците од актуелните кризи, порача Ковачевски. Уште првиот ден, како што додаде, на првата седница на Владата, донесена е одлука за преземање на управувањето со БЕГ и заради таа одлука, вели, сега има сега непречено снабдување со топлинска енергија во Скопје. – Потоа на втората седница донесовме одлуки за справување со енергетската криза и трето, одржавме кризен штаб на кој што донесовме одлуки во однос на отпочнувањето на школската година. Гледате дека сите три одлуки беа донесени и спроведени, истакна Ковачевски. Тој посочи дека оваа Влада својот легитимитет го црпи од резултатите на изборите од 2020 година и дека она што е значајно во однос на нејзиното функционирање, е дека таа се заснова на програмски принципи и сите заложби на коалиционите партнери се вградени во програмата.

ценовни шокови – Kurir.mk

Влада: Издвоени 615 милиони евра за амортизирање на ценовни шокови

Ковачевски: Спречивме големи ценовни шокови за граѓаните