Центар за култура – Kurir.mk

„Танец“ в четврток ќе гостува во Центарот за култура во Тетово

Ивона Петрова — Mon, 06 Jun 2022 11:54:01 +0000

Националниот ансамбл за народни песни и игри „Танец“ в четврток (9 јуни) ќе настапи во Центарот за култура „Иљо Антески-Смок“ во Тетово. Гостувањето е дел од циклусот целовечерни концерти „Танец низ татковината“ кои имаат атрактивна играорна и вокално-инструментална програма со фолклорно богатство од различни региони на земјава –Постојаниот контакт со домашната публика има клучна улога за континуитетот и опстанокот на македонската музичко-сценска фолклорна традиција и е од исто толкаво значење како и претставувањето надвор од границите на земјата. Главната цел на овие концерти на „Танец“ е доближување на македонското народно творештво до нова и поширока публика. По успешните мартовски концерти во центрите за култура во Делчево, Радовиш, Свети Николе, Пробиштип и Кичево, „Танец“ ќе настапи во Тетово со комплетна изведувачка формација, составена од играорците, хорот и оркестарот, која ќе брои педесетина уметници, изјави Бранка Костиќ-Марковиќ, уметнички раководител во „Танец“. Концертот ќе претстави кореографии и повеќе инструментални и вокални изведби од богатата македонска фолклорна ризница. Ќе се одржи на големата сцена во Центарот за култура со почеток во 20 часот. Влезниците по цена од 100 денари може да се купат на билетарницата на Центарот за култура.

На Центарот за култура во Кичево истакна албанско знаме, кривична за директорот

Ивана Ефремовски — Thu, 01 Apr 2021 14:17:47 +0000

ОВР Кичево поднесе кривична пријава против М.О.(44) од Кичево, поради постоење основи на сомнение за сторено кривично дело „повреда на угледот на РМ“. Тој, на 25.03.2021, како директор на Национална установа - Центар за култура „Кочо Рацин“ - Кичево, државна институција под Министерството за култура, дозволил во просториите на библиотеката „Кочо Рацин“ да се постави табла, каде се истакнати име и грб на странска држава со натпис на албански јазик, без да бидат истакнати името, грбот или знамето на Република Македонија, обележја на општина Кичево или на Министерство за култура.

Дводневен Џез фестивал во Куманово

Ивана Ефремовски — Fri, 20 Sep 2019 06:59:25 +0000

Во Центарот за култура „Трајко Прокопиев“ вечер и утре ќе биде одржан традиционалниот џез фестивал. Двете фестивалски вечери почнуваат во 20:00 часот. Кумановци ќе имаат можност да уживаат во настапите на бендови од македонската сцена, Грција, Словенија и БиХ. Фестивалот го организира Институтот за наука, уметност, култура и спорт, а е поддржан од Министерството за култура. Директорот на фестивалот Марјан Стевановски изјави дека послениве три години се постигнува целта, афирмација на џез музиката и џез културата. -Иако бевме скептични изминативе години се покажа дека нашата публика има потреба за ваков вид музика, од тој аспект фестивалот премина во традиција со квалитативни и квантитативни елемнти во тој поглед. Цврсто веруваме дека фестивалот ќе продолжи да се реализира и во иднина, изјави Стевановски. Вечер ќе настапат Мacedonian Dixieland Jazz Orchestra и Танос Ставридис Трио од Грција, а утре Васко Атанасовски Трио од Словенија и Аднан Тескерeџиќ од Босна и Херцеговина. Уметничкиот директор, Филип Ставновски истакна дека кумановци ќе имаат можност да слушнат квалитетна музика, со различни стилови на џез и интересна програма. Цената за влез е 100 денари.