центар жупа – Kurir.mk

Училиштата во Центар Жупа собраа 480 илјади денари за настраданите од земјотресот во Турција

Тале Кристо — Fri, 10 Feb 2023 18:07:03 +0000

Учениците и професорите во двете основни и нивните подрачни училишта и гимназијата во Центар Жупа во акцијата за собирање средства за настраданите подрачја во Турција собраа 480 илјади денари. - Со доброволни прилози учествуваа учениците и ние, просветните работници, и до денес собрани се 480 илјади денари. Во ООУ „Неџати Зекерија“ во село Коџаџик собрани се 200.000, во „Мустафа Ќемал Ататурк“ во Центар Жупа 150.000, додека, во гимназијата „АТА“ 130.000 денари. Акцијата продолжува, потврди за МИА, Аќиф Селман, директор на училиштето во Коџаџик. За оваа хуманитарна акција, директорите на училиштата денеска го информирале градоначалникот Аријан Ибраим, кој изразил благодарност за нивната хуманост. Советот на Општина Центар Жупа едногласно одлучи да се издвојат 500.000 денари, а 11-те советници се договорија едномесечен финансиски надомест да донираат за настраданите подрачја. Со одлука на Советот, до 12 февруари трае седумдневната жалост и пред општината знамињата се спуштени на половина копје.

Во општина Центар Жупа седумдневна жалост за настраданите во земјотресот во Турција

Ивана Ефремовски — Tue, 07 Feb 2023 14:06:54 +0000

Советот на општина Центар Жупа на вчерашната попладневна вонредна седница донесе одлука со која во општината се прогласува седумдневна жалост за жртвите од катастрофалниот земјотрес во Турција, информираше за МИА градоначалникот Аријан Ибраим. Знамињата во оваа општина се спуштени на половина копје. -Многу не погоди оваа трагедија, тагата во нашите срца е огромна. Нашите мисли и молитви се со жителите на братска Турција. Изразуваме длабоко сочувство до семејствата на настраданите а на повредените им посакуваме побрзо закрепнување. Во општината веќе се собира хуманитарна помош, рече Ибраим. Советот на општината утре на вонредна седница ќе донесе одлука за износот на финансиска помош која ќе биде доделена за настраданите подрачја. (МИА)

Излезноста во Центар Жупа до 11 часот 14 отсто

Тале Кристо — Sat, 20 Aug 2022 10:06:33 +0000

Во општина Центар Жупа, каде денеска се спроведуваат втори повторени избори за градоначалник, до 11 часот правото на глас го оствариле 1.035 лица или 14 отсто, од вкупно 7154 запишани избирачи. -Излезноста постепено се зголемува, што е вообичаено за секои избори. До 9 часот имавме 5,69 отсто излезност додека два часа подоцна излезноста е 14 отсто. Во сите 16 гласачки места изборниот процес минува без проблеми, рече Неџип Илјаз, претседател на општинската изборна комисија. Споредено со повторените избори на 17 април, кога до 11 частот правото на глас го остварија 593 лица или 8,38 отсто денеска излезноста е поголема за 5,62 отсто. Вчера правото на глас во оваа општина го искористија 29 болни и немоќни лица.

Излезноста до 9 часот во Центар Жупа 5,69 отсто

Тале Кристо — Sat, 20 Aug 2022 08:11:00 +0000

Непречено се одвива изборниот процес во општина Центар Жупа, каде до 9 часот правото на глас го оствариле 407 лица. -Во процент тоа изнесува 5,69 отсто од вкупно запишаните 7.154 гласачи. Гласањето се одвива без проблеми и се надеваме дека така ќе биде до затворањето на избрачките места. Вообичаено поголема излезност се очекува во попладневните часови, вели Неџип Илјаз, претседател на општинската изборна комисија. Споредено со редовните локални избори на 17 октомври минатата година, бројот на оние кои го остварите правото на глас е поголем за 4,09 отсто. Тогаш до 9 часот гласале 120 лица или 1,6 отсто од 7.317 колку што беа во единствениот избирачки список. Во април пак излезноста беше 2,17 отсто од запишаните 7077 лица, што значи дека денеска излезноста до 9 часот е поголема за 3,52 отсто. Според Излјаз, членовите на комисијата се во постојана обиколка на 16-те гласачки места.

Навреме отворени избирачките места во општините Центар Жупа, Маврово-Ростуше и Тетово

Тале Кристо — Sat, 20 Aug 2022 08:05:19 +0000

Навреме се отворени гласачките места во Центар Жупа и Маврово-Ростуше каде се избира градоначалник, како и гласачките места во општина Тетово каде се бираат членови за Советот на општината. Во општина Центар Жупа се спроведуваат по вторпат повторени избори за градоначалник. – Во 7 часот отворени се сите 16 гласачки места. Во единствениот избирачки список запишани се 7.154 лица, а за да биде избран градоначалник, гласачкото право треба да го остварат 2.385 лица. Вчера гласаа 29 болни и немоќни лица, изјави за МИА, претседателот на Општинската изборна комисија Неџип Илјаз. На гласачкото ливче овој пат е само еден кандидат, предложен од политичка партија. Во оваа печалбарска општина, каде над 60 отсто од популацијата живее во некоја западноевропска земја, се повторува гласањето за градоначалник бидејќи ниту на редовните локални избори на 17 октомври минатата година, ниту на повторените на 17 април годинава, не беше обезбеден потребниот цензус од една третина или 33,33 отсто од вкупното гласачко тело. Во октомври излезноста беше 25,77, додека во април 29,97 отсто. Навреме започна и гласањето за градоначалник на територијата на општина Маврово-Ростуше. Граѓаните ќе гласаат во еден круг, со оглед дека има двајца кандидати. – Сите избирачки места се отворени навреме и гласањето од утрово се одвива без забелешки. Материјалите, потребни за спроведување на изборниот процес се распределени навреме и не очекуваме некаков застој или прекин текот на денот, изјави за МИА претседателката на ОИК, Ивана Ѓорѓевска. Гласањето во Маврово и Ростуше го спроведуваат 33 избирачки одбори. Право на глас во оваа општина имаат 9.948 граѓани. Изборите за градоначалник беа распишани откако во два наврати не беа исполнети условите. Вчера гласот го дадоа 40 болни и немоќни лица. Се гласа и во општина Тетово за избор на членови во Советот на општината. -Избирачките одбори не информираа дека во сите избирачки места е започнато гласањето и се одвива во најдобар ред. Нема поголеми проблеми, информира Назми Даути, секретар на ОИК Тетово. Во избирачкиот список за Општина Тетово се евидентирани 84.071 гласач кои во текот на денот ќе може да го остварат правото на глас на едно од 117 избирачки места во градот Тетово и неколкуте рурални населени места. За 31 едно место во Советот на Општина Тетово доверба од гласачите бараат 403 кандидати од 13 кандидатски листи. Денеска во периодот од 7 до 19 часот отворена ќе биде и подрачната канцеларија на Народниот правобранител во Тетово, а граѓаните ќе можат за заштита на своите права да се обратат лично во канцеларија или на телефонскиот број 044 344-082.

Утре истекува рокот за пријавување за гласање во домашни услови за изборите за градоначалници на Маврово и Ростуше и на Центар Жупа и за Советот на Тетово

Тале Кристо — Thu, 11 Aug 2022 14:16:37 +0000

Утре истекува рокот за пријавување за гласање во домашни услови за болни и немоќни лица и оние кои се во изолација за изборите за градоначалници на општините Маврово и Ростуше и Центар Жупа и за членови на Советот на Општина Тетово, што ќе се одржат на 20 август. – Рокот за пријавување за гласање во домашни услови, за болни и немоќни лица и оние кои се во изолација поради ковид, истекува утре. Тие треба да се пријават или електронски во Општинската изборна комисија или преку овластено лице. Гласањето за овие лица е на 19 август, ден пред одржувањето на изборите, соопшти членот на ДИК Борис Кондарко. Бидејќи денот на одржување на изборите е сабота, овие лица треба да гласаат во петок на 19 август, во работен ден. – Со оглед на тоа што гласањето е во работен ден, сите членови на избирачките одбори, треба да бидат ослободени од работни обврски и општинските комисии треба да им дадат потврда која треба да ја однесат на работа, изјави потпретседателката на ДИК Дитмире Шеху. На 19 август, петок, ќе гласаат и затворениците. Изборите за градоначалник на Општина Маврово и Ростуше и градоначалник на Центар Жупа и Совет на Општина Тетово треба да се одржат на 20 август.

Утврден редоследот на гласачките ливчиња за избор на градоначалници на Центар Жупа и Маврово-Ростуше и за членови на Советот на Тетово

Тале Кристо — Mon, 25 Jul 2022 11:38:58 +0000

Државната изборна комисија (ДИК) на денешната седница го утврди распоредот на кандидатите на гласачко ливче за изборот на градоначалници на општините Центар Жупа и Маврово-Ростуше, како и за членови на Советот на Општина Тетово, преку влечење на жрепка од страна на овластените претставници на партиите и групите избирачи. Под број еден на гласачките ливчиња ќе бидат кандидатите за градоначници на Центар Жупа и на Маврово-Ростуше на коалицијата „Најдоброто за мојата општина“ предводена од СДСМ, под број два на Коалицијата на ВМРО-ДПМНЕ, а под број три на Демократска партија на Турците во Македонија (ДПТМ). На гласачкото ливче за избор на членови на тетовскиот општински Совет под бројот еден ќе биде листата на коалицијата предводена од СДСМ, а под бројот два на ВМРО-ДПМНЕ. Под бројот три е ДПА, под четири е Политичката партија ИНТЕГРА, а под бројот пет Група избирачи Агрон Заими. Под бројот шест е Алтернатива, под седум е листата на Алијансата за Албанците, а под бројот осум е Движењето БЕСА. Листата на ДПТМ ќе биде под бројот девет, а Групата избирачи Елмедина Абдулаи ќе биде под бројот 10. Листата на ДУИ ќе се најде на кандидатското ливче под бројот 11, на Партијата за целосна еманципација на Ромите под број 12, а на Левица ќе биде 13-та. Исто така, на денешната седница преку влечње на жрепка беа утврдени и локации на рекламни паноа и билборди за политичко рекламирање за избори за градоначалник на општините Центар Жупа, Маврово и Ростуше.

Аријан Ибрам единствен кандидат за градоначалник на Центар Жупа

Магдалена Андонова — Sun, 17 Jul 2022 15:27:44 +0000

Актуелниот градоначалник Аријан Ибраим, е единствен кандидат, на, по вторпат повторените избори, за градоначалник на општина Центар Жупа, што ќе се одржат на 20 август. -До Општинската изборна комисија пристигна само една кандидатура, која е и потврдена од наша страна. Тоа е кандидатурата на Аријан Ибраим од Турската демократска партија. Сакам да напоменам дека како и претходните два изборни циклуси немавме независна кандидатска листа, изјави за МИА, Неџип Илјаз, претседател на ОИК за Центар Жупа. Изборот за градоначалник се повторува бидејќи не беше обезбеден потребниот цензус на излезност од 1/3 или 33 отсто од вкупно запишаните гласачи, ниту на изборите на 17 октомври 2021, ниту на повторените избори што се одржаа на 17 април годинава. Тогаш во трка за градоначалничката функција беа Ибраим и Шаин Шаќир, од партијата Движење за национално единство на Турците. На изборите во октовмри право на глас во ова општина имаа 7.317 а го остварија 25,77 отсто, додека на повторените избори во април од запишанит 7077 лица гласа 29,97 отсто, што е околу 4 отсто помалку од неопходниот цензус. Цензусот не беше обезбеден поради фактот што над 60 отсто од популацијата живее во некоја од западно евопските земји. Со одлука на Владата на Северна Македонија на 14 ноември 2021 година Аријан Ибраим, кој два мандата е на функцијата, беше наименуван за повереник за надлежностите на градоначалник за оваа општина. Изборната кампања започнува на 31 јули во 0.00 часот и ќе трае заклучно со 18 август до 24 часот. (МИА)

Седница на ДИК: Усвоен финансискиот извештај за Центар Жупа, донесен Правилник за систематизација

Ивана Ефремовски — Fri, 03 Jun 2022 13:22:16 +0000

Државната изборна комисија (ДИК) на денешната седница го усвои финансискиот извештај за реализираните средства за изборите за градоначалник во Општина Центар Жупа, а исто така е донесена одлука со која се предвидува работно место државен службеник за унапредување на родова еднаквост и спроведување на обуки и тренинг центар. За организација и спроведување на овие изборите во Центар Жупа се потрошени 14,7 отсто од одобрените буџетски средства што биле наменети за изборите за градоначалник во општините Центар Жупа и Маврово Ростуше. ДИК, исто така, усвои Правилник за измена на систематизацијата на работните места во стручната служба согласно Родовиот акциски план 2021-2024 во насока на подобрување и унапредување на родовата еднаквост во институцијата и стручната служба, со што е предвидено воведување работно место на државен службеник за унапредување на родова еднаквост и спроведување на обуки и тренинг центар. (МИА)

ДИК: Не е исполнета излезноста на изборите за градоначалник во Центар Жупа

Тале Кристо — Wed, 20 Apr 2022 13:04:03 +0000

Државната изборна комисија (ДИК) на денешната седница изгласа заклучок за конечните резултати од Локалните избори што се спроведоа на 17 април годинава во Општина Центар Жупа, при што беше констатирано дека не е исполнета излезноста на една третина од граѓаните. На избирачкиот список во Центар Жупа беа запишани 7 077 лица како гласачи, на денот на гласањето излегле да гласаат вкупно 2 120 граѓани, што е 29,96 проценти од вкупно запишаните на територија на општината, а недостасувале 239 гласачи за да бидат успешни изборите. Согласно законот, ДИК во предвидениот рок ќе ја извести Владата за резултатите од изборите.