ЦЕВ – Kurir.mk

ВИДЕО: 8 дена до стартот на ЕП во Скопје, македонските одбојкари добија навивачка песна

Ивона Петрова — Mon, 21 Aug 2023 19:34:56 +0000

Осум дена пред почетокот на Европското првенство во одбојка кое ќе се одржува и во Скопје, македонската одбојкарска репрезентација доби своја навивачка песна. Првата песна за одбојка во Македонија ја изведува Ламбе Алабакоски. Текстот е на Огнен Неделковски, музиката на Филип Неделковски, а аранжманот на Ангел Ќосев. За првпат во историјата на независна Македонија, во Скопје ќе се одржи Европско првенство во машка одбојка. Спортскиот центар „Борис Трајковски“ од 30- ти август до 6-ти септември ќе биде дом на македонската сениорска одбојкарска репрезентација која очекува силна поддршка од трибините. Македонија ќе ги пречека репрезентациите на Данска, Црна Гора, Полска, Холандија и Чешка во рамки на групата „Ц“, а одбојкарите очекуваат голема поддршка од трибините. Пејте и навивајте за Македонија.

Историја, традиција, страст – Европа повторно ќе слушне за Македонија (ВИДЕО)

Ивона Петрова — Wed, 16 Aug 2023 16:50:15 +0000

Спортските настани секогаш се одлична можност за претставување на својата држава. Но, ако Европско првенство се одржува во твојата земја, тогаш тоа е посебно - чувство на гордост, мотив да се биде таму, да се биде дел. За првпат во историјата на независна Македонија, во Скопје ќе се одржи Европско првенство во машка одбојка. Спортскиот центар „Борис Трајковски“ од 30- ти август до 6-ти септември ќе биде дом на македонската сениорска одбојкарска репрезентација која очекува силна поддршка од трибините. Македонија ќе им посака добредојде на репрезентациите на Данска, Црна Гора, Полска, Холандија и Чешка, но и на многубројните странски навивачи кои ќе имаат можност да се запознаат и да слушнат за нашата култура, традиција, историја, страст и желба за победа.

Одбојкарите на Струмица Никоб со убедлив пораз се враќаат од Амстердам

Бошко Тасиќ — Tue, 20 Sep 2022 20:30:05 +0000

Струмица Никоб убедливо со 3-0 во сетови беше поразена од холандскиот тим Динамо Апелдрон во првиот меч од првото квалификациско коло во одбојкарската Лига на шампиони. Холандскиот тим го доби првиот сет со 25-20, а во следните два Апелдрон беше уште поубедлив, нив ги доби со 25-13 и 25-16. Канаѓанецот со македонско потекло, Деан Глобоцки со шест поени беше најдобар во составот на Струмица, додека Бекхуд со 14 поени беше најдобар кај Динамо Апелдрон. Реваншот се игра за седум дена во Скопје, но по овој пораз мисијата на Струмица за пласман понатаму стана речиси невозможна.

Азербејџан се повлече од Сребрената лига

Бошко Тасиќ — Thu, 10 Mar 2022 18:27:51 +0000

Одбојкарската репрезентација на Азербејџан го откажала своето учество во годинешното издание на ЦЕВ Сребрената европска лига, што најверојатно ќе доведе до прекомбинирање на двете групи за првата фаза од годинешното натпреварување во кое учествува и нашата одбојкарска репрезентација. Според информациите, во групата „А“ во која беше Азербејџан сега остануваат само селекциите на Финска и Унгарија, па нив треба да им се приклучи една од селекциите кои беа извлечени во нашата група „Б“, каде покрај Македонија се и селекциите на Албанија, БиХ и Романија. ЦЕВ ја разгледува можноста поради намалување на трошоци за патување, во групата „А“ да се преселат Романците, а ние со Албанија и Босна и Хрецеговина да останеме во втората група. Сепак, одлуката не е финална. Откако ќе дојде до прекомбинирање на групите, најверојатно ќе има и промена на распоредот и термините на натпреварите. Според првичниот распоред, Македонија настапите во ЦЕВ Сребрената европска лига требаше да ги почне на 25 мај на домашен терен со натпревар против селекцијата на Босна и Херцеговина.

Македонија ќе биде организатор на завршниот турнир во Сребрената Лига

Бошко Тасиќ — Fri, 26 Feb 2021 19:13:35 +0000

Одбојкарската федерација на нашата земја ќе биде организатор на завршниот турнир во Сребрената лига оваа година. Турнирот ќе се одржи на почетокот на месец јуни. Претходно се закажани двата турнири од групната фаза кои ќе се одржат од 21-23 и од 28-30 мај. Македонската репрезентација ќе игра во групата А заедно со Израел, Данска и Кипар. Во втората група ќе се надигруваат Хрватска , Австрија, Унгарија и Луксембург. Бордот на ЦЕВ уште еднаш ја потврди целосната доверба во македонската одбојка, па покрај претходната одлука за организација на турнир од групната фаза во континенталното натпреварување, највисокото управно тело на ЦЕВ реши и битката за медалите да биде кај нас. foto : gol.mk