чави – Kurir.mk

Чави по ремито со Мајорка: Барселона загуби бодови поради две еклатантни грешки

Дарко Андоновски — Wed, 27 Sep 2023 07:57:45 +0000

Тренерот на Барселона, Чави го критикуваше тимот грешките во одбраната на синоќешното гостување во Палма де Мајорка. Каталонците одиграа 2:2 со Мајорка и освоија само бод, иако важеа за големи фаворити. - Проблемот е што противникот поведе по нашата грешка. Само што почнавме да го играме нашиот најдобар фудбал, имаше уште една грешка во одбраната. Вакви грешки не треба да се случуваат, особено на вакви натпревари. Имавме чисти шанси, а примивме два гола по наши очигледни грешки. Не победивме поради грешки. Треба да ја подобриме нашата дефанзивна игра. Минатата година во одбрана бевме многу силни, изјави Чави. Барселона по седум натпревари во Ла Лига има 17 бодови и во моментов е на првото место.

Два натпревара суспензија за Чави и Рафиња

Дарко Андоновски — Wed, 16 Aug 2023 16:33:07 +0000

Тренерот на Барселона, Чави кој доби црвен картон на натпреварот од 1. коло на Ла Лига против Хетафе (0:0) поради расправии со судиите доби суспензија на два натпревара. Тренерот избегна дополнителна дисквалификација поради тоа што остана во подтрибинскиот тунел по исклучувањето. Чави избегна казна и поради коментарите по натпреварот за судискиот тим на Цезар Сото Градо. Главниот тренер на „Барселона“ ја нарече работата на судиите „апсолутна срамота“. Два меча суспендиран е и крилниот напаѓач на Барса, Рафиња, кој доби директен црвен картон поради ударот со лакт на дефанзивецот Гастон Алварез во слепоочницата. Чави и Рафиња поради суспензиите ќе ги пропуштат натпреварите против Кадиз и Виљареал.

Барселона ќе започне преговори со Чави за нов договор

Ивана Ефремовски — Thu, 16 Mar 2023 12:45:49 +0000

Раководството на шпанскиот фудбалски великан Барселона, наскоро ќе разговара со тренерот Чави за неговиот нов договор. Шпанските медиуми пишуваат дека клубот е задоволен од работата на Чави и сака да го обноват договорот со него, кој истекува ова лето. Двете страни ќе започнат преговори по претстојниот натпревар со Реал Мадрид, без оглед на исходот на дербито. На 19 март екипите ќе одиграат натпревар на „Камп Ноу“, кој е многу важен за шампионскиот торфеј. Чави е на чело на Барселона од ноември 2021 година. Моментално Барселона води во Шпанското првенство со девет бода предност пред Реал Мадрид кој е бранител на трофејот. (МИА)

Чави: На Барселона не и требаат трансфери оваа зима

Ивона Петрова — Wed, 04 Jan 2023 10:27:24 +0000

Тренерот на Барселона, Чави, зборуваше за плановите за зимскиот преоден рок и призна дека е задоволен од сегашниот состав. – Ние сме тоа што сме и среќни сме. Имаме победнички тим. Нашите фудбалери сакаат да победуваат, тоа го покажуваат на секој тренинг. Многу сум задоволен од составот што го имам, го цитира Чави италијанскиот новинар Фабрицио Романо на социјалните мрежи. Вече род 21 часот Барселона ќе одигра куп натпревар против Интерсити. Каталонците се на врвот на табелата во Примера со 38 бодови од 15 кола.

Барселона брка двајца фудбалери во јануари

Бошко Тасиќ — Sat, 19 Nov 2022 06:43:55 +0000

Барселона сака да се раздели со напаѓачот Мемфис Депај и дефанзивецот Хектор Белерин во зимскиот преоден рок, пренесува „Мундо Депортиво“. Од Барселона се спремни да го раскинат договорот со Мемфис Депај, со цел да ги намалат расходите за плати. Исто така се спремни да го пуштат и Белерин. Од клубот решиле сигурно да го задржат Фреки де Јонг во јануари, бидејќу Холанѓанецот е важен играч кај Чави и е потребен во трката за титулата. Лапорта призна дека Барса нема да доведува нови играчи во јануари, а медиумите тврдат дека сигурно ќе се ослободи од Депај и Белерин.

Диарио спорт: Барса нема да го отпушти Чави и покрај поразот од Реал во Ла лига и неуспехот во Лигата на шампионите

Тале Кристо — Mon, 17 Oct 2022 12:47:43 +0000

Барселона верува во Чави и покрај поразот од Реал Мадрид и неуспехот во Лигата на шампионите. Како што пишува „Diario Sport“, раководството на каталонскиот клуб е разочарано и вознемирено од резултатите од изминатата недела, во која Барселона ремизираше со Интер (3:3) во Лигата на шампионите и максимално ја отежна својата позиција во борбата за стигнување до плејофот, а исто така загуби од Реал Мадрид (1:3) во 9. коло од Ла Лига. И покрај овие резултати, раководството на Барселона има доверба во Чави и очекува тимот брзо да реагира на моменталната ситуација во следните два натпревари во Ла Лига против Виљареал и Атлетик. Барселона не размислува да го отпушти Чави. Важи за најподготвен тренер за организација на преструктуирање во тимот. Истовремено, од тренерот се очекува напредок во неколку аспекти одеднаш – раководството сака оние кои повеќе го заслужуваат да играат во Барса, а исто така очекува тимот да покаже подобар фудбал во тешките натпревари. Клубот сè уште нема објаснување зошто резултатите на Барса по паузата за натпреварите на репрезентациите толку многу се влошија. По паузата тимот забележа две тешки победи над Мајорка (1:0) и Селта (1:0) во Ла лига, не победи со Интер во Лигата на шампионите (0:1 и 3:3), а загуби и од Реал Мадрид. Претседателот на Каталонците, Жоан Лапорта е многу лут, се чувствува немоќен. Му се чини дека даде сè од себе за да создаде конкурентен тим вложувајќи повеќе од 200 милиони евра во трансфери. Во исто време, Лапорта знае дека Чави работи напорно за да го обнови тимот и разбира дека на тренерот треба да му се даде време. Клубот верува дека Барса сепак ќе биде поуспешна од Реал Мадрид во трката за трофејот во шпанското првенство.

Чави: Лигата на шампионите не ја освојуваат секогаш најсилните Милано

Ивона Петрова — Tue, 04 Oct 2022 11:53:56 +0000

Тренерот на Барселона, Чави ја гледа титулата во шпанската Ла Лига како поприродна за освојување, отколку трофејот во Лигата на шампионите. – Мислам дека е потешко да се освои Лигата на шампионите. Поприродно е да се победи во домашното првенство. Во Ла Лига има повеќе шанси да се поправиш ако некаде си направил кикс. Во Лигата на шампионите не секогаш победува најсилниот. Таму деталите предничат. Успехот во Ла Лига е поприроден, изјави Чави. Каталонците вечер од 21 часот ќе му гостуваат на Интер во 3.коло од елитната Лига на шампиони. По две кола во Ц-групата, лидер е Баерн Минхен со шест бодови, Барселона и Интер имаат по три, последна е Викторија Плзењ без освоен бод. Италијанските медиуми лиферуваа информација дека вечерашниот дуел е последна шанса за тренерот на Интер, Симоне Инзаги, кој се наоѓа пред отказ по слабите игри на „нероазурите“.

Чави без клучни фудбалери во пресрет на “Ел Класико”

Бошко Тасиќ — Sat, 24 Sep 2022 07:07:58 +0000

Репрезентативната пауза донесе проблеми за Чави, откако тренерот на Барселона oстана без двајца стандардни првотимци. Проблемите се уште поголеми ако се знае дека Барса веднаш по паузата ја очекува двомеч со Интер кој ќе биде клучен за пласманот во осминафиналето од ЛШ, а за 16 октомври е закажано големото дерби на Ла Лига против Реал Мадрид. Жил Кунде поради повреда на мускулот мораше да биде заменет уште во првото полувремето. Лекарите не се големи оптимисти дека Кунде би можел да се врати во терените во наредните дваесетина дена.Се повреди и Араухо, стандардниот дефанзивец кој стартуваше на седум од првите осум овосезонски дуели на Барса. Сеуште не се знае колку овој фудбалер ќе одсуствува од фудбалските терени.

Чави се откажа од тројца фудбалери кои беа дел од првиот тим на Барселона

Бошко Тасиќ — Sun, 18 Sep 2022 06:24:01 +0000

Тренерот на фудбалскиот клуб Барелона Чави веќе не смета на тројцата играчи со најдолг стаж во клубот. Жерар Пике, Жорди Алба и Серхио Бускетс кои на клупата за резервни играчи го следеа мечот со Елче. Капитенската лента ја зеде голманот Марк Тер-Штеген, а во игра не влегоа тројца фудбалери кои некогаш му беа соиграчи на Чави. Младиот Алекс Балде, кој е огранок на школата на Барса, си го „зацементира“ местото покрај левата аут линија додека стоперскиот тандем го направија Гарсија и Араухо, додека дури и Френки де Јонг има предност пред Бускетс во средниот ред. Ваквиот однос кон поранешните ѕвезди ги принуди шпанските новинари да развијат теорија дека клубот наскоро ќе им се заблагодари на сите тројца фудбалери за соработката.

Чави: Поразот од Баерн е чекор назад, но Барселона одигра добар натпревар

Дарко Андоновски — Wed, 14 Sep 2022 06:26:39 +0000

Тренерот на Барселона, Чави, за поразот од Баерн (0:2) синоќа во натпреварот од 2. коло од групната фаза на Лигата на шампионите, рече дека е чекор назад на патот кон осминафиналето. – Создадовме шест или седум одлични шанси за гол, но не ги искористивме, а Баерн не ја пропушти својата шанса. Одигравме натпреварувачки, одигравме многу добро, а да постигневме гол, натпреварот ќе беше сосема поинаков. Сепак, ова е Лигата на шампионите, треба да се обидеме да избегнеме такви грешки при корнери. Поразот е чекор назад, но сепак сме во добра позиција на табелата. Дојдовме овде со намера да победиме. Треба да учиме од сопствените грешки. Мислам дека генерално имавме добар натпревар. Доволно добар за победа, а не за реми, изјави Чави. Баерн е на врвот во групата Ц со 6 бодови, а Барселона е втора со 3 бода колку што има и Интер на третото место. Последна е Викторија Плзeњ без освоен бод.