чеченија – Kurir.mk

Руска новинарка и адвокат нападнати во Чеченија

Ивана Ефремовски — Tue, 04 Jul 2023 13:26:55 +0000

Руска новинарка и адвокат биле нападнати и тешко повредени откако нивниот автомобил бил запрен од неколку маскирани лица во Чеченија. Јелена Милашина, новинарка од Новаја Газета и адвокатот Александар Немов биле нападнати додека патувале од аеродромот кон регионалниот главен град Грозни. „Новаја газета“ минатата година ја загуби лиценцата за медиуми во Русија. Напаѓачите и ја избричиле главата на Милашина, и скршиле неколку прсти и ја полеале со зелена боја, соопшти организацијата за човекови права Меморијал. „Брутално ги удирале со клоци, вклучително и по лицето, им се заканувале со смрт, им држеле пиштол на глава, им ја одзеле опремата и ја искршиле“, објави Меморијал на Телеграм. Групата за човекови права Team Against Torture соопшти дека Немов бил прободен со нож во ногата и дека мотивот за нападот е „казна“ за нивното известување. Руските медиуми јавуваат дека претседателот Владимир Путин е запознаен со ситуацијата, а портпаролот на Кремљ Дмитриј Песков изјави дека е потребен „енергичен“ одговор на нападот. „Постои потреба од проверка и истрага за позадината на овој напад“, рече Песков. Со соопштение за поддршка на новинарката и адвокатот излезе и Министерството за дигитална трансформација. „Новинарот додека ја врши својата работа не смее да биде изложен на малтретирање и тортура. Очекуваме дека овој случај ќе биде детално истражен и сторителите ќе бидат казнети“, се наведува во соопштението. (МИА)

Кадиров одби мобилизација во Чеченија: Веќе дадовме доволно војници

Ивона Петрова — Fri, 23 Sep 2022 08:01:29 +0000

Верниот сојузник на рускиот претседател Владимир Путин, Рамзан Кадиров вели дека во Чеченија нема да има мобилизација. -Тој план во Чеченската Република е исполнет за 254 проценти. Такви резултатите се постигнати со претходно формирани нови единици на Министерството за одбрана на Русија. Сите кандидати за служба поминаа во Воениот комесаријат. Тој механизам го разработивме од самиот почеток и пред објавата за делумна мобилизација, вели Кадиров во гостувањето на една телевизија. Во војната во Украина, како што вели, досега заминале 20.000 Чеченци, а истакнува и дека Чеченија веќе ги исполнија сите планови. -Освен тоа, Чеченија има резерви од повеќе илјади доброволци, па ако биде потребно, ќе може да влезат во редовите на бранителите, вели Кадиров.

Милошоски прашува: Што ѝ ветил Талат Џафери на делегацијата од Чеченија?

Ивона Петрова — Fri, 20 May 2022 06:55:17 +0000

Пратеникот на ВМРО-ДПМНЕ Антонио Милошоски на Фејсбук прашува што ѝ ветил претседателот на Собранието Талат Џафери на делегацијата од Чеченија која била во посета. -Чудна посета на Собранието на Македонија се случила на 10.07.2021 година кога Талат Џафери како Претседател бил домаќин на делегација од руската Чеченска Република. На чело на чеченската делегација бил Абдул-Вајед Нијазов, марионета на Кремљ во тамошниот "Исламски културен центар", поранешен пратеник во Думата и основач на здружението "Муслиманите во поддршка на Претседателот Путин". Иако за секоја средба со странски гости собранискиот Спикер ги информира медиумите, овој пат Талат Џафери одлучил да биде дискретен и да не сподели што разговарал и дали нешто му ветил на контроверзниот гостин⁉️ Гостите од Чеченската Република го посетиле и Тетово каде објавиле дека со општината се договориле за изградба на парк и споменик на Ахмат Кадиров, првиот претседател на Ч.Р. и носител на орден "Херој на Русија". Инаку Ахмат Кадиров е татко на сегашниот деспотски шеф на Чеченската Република, Рамазан Кадиров, кој со неговите војници ревносно му помага на претседателот на Русија во инвазијата врз Украина, често извршувајќи ги најбруталните операции. Во чест на милениците на Путин од Чеченската Република бил организиран и свечен ручек во елитниот хотел "Буши" во Скопје, но нема информација дали сметката е платена од буџетот на Собранието или платил некој друг. На собраниската веб страна нема информации за овој настан, но за среќа во Агенциите за безбедност има детални извешта, пишува Милошоски на Фејсбук.

Кадиров вели дека Русија има за цел да го заземе Киев

Ивона Петрова — Mon, 11 Apr 2022 06:18:10 +0000

Претседателот на руската република Чеченија, Рамзан Кадиров, изјави дека офанзивата во Украина нема да се спроведува само во Мариупол, туку и во главниот град Киев како и во другите украински градови. Во видео-пораката објавена рано изутринава преку платформата „Телеграм“ тој вели дека „целосно ќе ги ослободи (источните региони Луганск и Доњецк“)…а потоа ќе ги преземе Киев и сите други градови“. „Ве уверувам дека нема да има ниту еден чекор назад“, вели Кадиров. Неговата изјава доаѓа во мигови кога конфликтот во Украина се преместува на исток каде украинските сили се утврдени и добро подготвени за борба. Руските власти соопштија дека нивните сили ќе се фокусираат кон „целосно ослободување“ на Донбас, притоа алудирајжи на Луганск и Доњецк.

СО ПОРШЕ КАЈЕН НА КИЕВ Чеченците војуваат со стил

Ристе Здравков — Wed, 02 Mar 2022 13:33:06 +0000

Во изминатите неколку дена е навистина тешко да се дојде до проверена информација од воените дејствија во Украина, по покренувањето на инвазијата на руската војска. Објавени се мноштво на фотографии и на видеа, од кои поголемиот дел се употребени во пропагандни цели. Тука секогогаш во преден план се припадниците на чеченската гарда, составен дел на руската армија. Чеченците досега остварија огромен број на прегледи на социјалните мрежи, со поставувањата на своите видеа и фотографии. За континуитетот се погрижија двајцата Чеченци, кои војна како да тргнале со Порше Кајен, скап автомобил на чие задно стакло пишува: „На Киев“.

Терористички напади во Чеченија, одговорност презеде „Исламска држава”

Предраг Кукиќ — Mon, 20 Aug 2018 15:25:03 +0000

Неколку лица се повредени во серијата напади врз полициските сили во руската република Чеченија. Сторителите се неутрализирани, соопшти чеченскиот лидер Рамзан Кадиров. Преку Инстаграм Кадиров соопшти оти нема никакви сомнежи дека „група млади луѓе", ги извеле нападите, а дејствувале откако паднале под влијание на приврзаници на џихадистичката група „Исламска држава" на социјалните мрежи. Претходно, руските медиуми информираа за најмалку три напади врз силите на редот, но со различни податоци за бројот на повредените. Според Кадиров, двајца полицајци биле повредени во градот Шали и неколку сообраќајни полицајци во главниот град Грозни. - Сите обиди беа неуспешни, бандитите беа неутрализирани. Еден од злосторниците се разнесе во воздух, но преживеа и беше однесен во болница, рече тој. Малку подоцна, терористичката група „Исламска држава“ ја презеде одговорноста за нападите. „Борци од Исламска држава нападнаа офицери и членови на чеченската полиција во Грозни и Шали", соопшти пропагандната агенција на џихадистите „Амак“. Идентитетот на двајцата напаѓачи е утврден. Тие се жители на градот Шали, соопшти прес-службата на Рускиот истражен комитет, пренесува ТАСС. (МИА)