ченто – Kurir.mk

Контроли на Бит Пазар, Зелен Пазар и пазарите во Тетово и Ченто: Запленети пиротехника и режан тутун кои нелегално се продавале (ФОТО)

Катерина Бојаџиева — Mon, 30 Oct 2023 19:46:09 +0000

Денеска (30.10.2023) полициски службеници од Одделот за криминалистичка полиција- Сектор за економски криминал и корупција и Одделот за сузбивање на организиран и сериозен криминал во координација со царински службеници од Секторот за контрола и истраги при Царинската управа и Државниот пазарен инспекторат на повеќе локации во Скопје спроведоа мерки и активности за сузбивање на криумчарење на акцизна стока и избегнување на давачки за продажба на режан тутун и производи од тутун без акциза и платени давачки. При контролата на Бит Пазар во Скопје констатирано е дека повеќе физички лица на импровизирани тезги вршат недозволена продажба на режан тутун, а со тоа избегнуваат плаќање акциза, како и поголема количина на пиротехнички средства, кои се одземени и по целосно документирање на случаите против лицата ќе бидат поднесени соодветни пријави, како и глоби од пазарните инспектори. Голема количина режан тутун и цигари се одземени и од пет физички лица кои вршеле продажба на импровизирани тезги пред зелениот пазар во Тетово, како и кај две лица на пазарот во населбата Методија Андонов Ченто во Скопје. На Зелен пазар во Скопје пак се одземени околу 180 килограми режан тутун, за што исто така ќе следуваат соодветни поднесоци.

Стефковски: Изградивме нов спортски терен во Ченто

Ивона Петрова — Fri, 28 Jul 2023 10:11:44 +0000

Градоначалникот на општина Гази Баба Бобан Стефковски информираше дека се завршени градежните работи за изградба на нов спортски терен на најсовремена тартан подлога во Ченто. -Завршија градежните активности за изградба на четвртиот спортски терен на најсовремена тартан подлога во Ченто. Продолжуваат инвестициите во спортската инфраструктура во општина Гази Баба. Досега изградивме спортски терени во Пуста Кула и Чукур Маало Трубарево, Ченто кај Св. Лидија, Кирил Петрушевски и спортски терен на вештачка трева во Инџиково. Изградба на нови спортски терени ќе продолжи и во следниот период. Создаваме услови за спорт и рекреација на нашите граѓани. Гази Баба добива лик на модерна и урбана општина! - напиша Стефковски на Фејсбук.

Поради дефект без вода корисиците на Ченто

Ивана Ефремовски — Tue, 20 Dec 2022 10:18:33 +0000

Поради уличен дефект ф-80 мм на улица „Кожув“ 18, денеска прекинато водоснабдување ќе имаат корисниците од улиците „Кожув“, „Сава Михајлов“, „Тодор Чапов“, „Тодор Ецов“ и „Томас Минцер“. Како што информираат од ЈП „Водовод и канализација“ водоснабдувањето ќе биде прекинато од 11:00 часот до завршување со санација на дефектот.

Во Струга отворена изложбата „Ченто биографија низ фотографии“

Ивона Петрова — Fri, 02 Dec 2022 13:30:23 +0000

Патувачката изложба „Ченто биографија низ фотографии“, од прилепскиот автор Рубинчо Белчески денеска беше отворен во фоајето на центарот за култура „Браќа Миладиновци“ во Струга. Изложбата содржи 250 хронолошки подредени фотографии, собрани на едно место, а произлегла од желбата на авторот да даде свој придонес во презентација на првиот претседател на президиумот на АСНОМ, Методија Андонов – Ченто. – Со започнувањето на процесот за независност и осамостојувањето на Република Македонија се почесто се зборуваше за името на големиот македонец, борец, деец и политичар, Методија Андонов Ченто, првиот претседател на Президиумот на АСНОМ. Од тој период до денес, повеќе историчари, публицисти и други личности, вклучувајќи го и синот на Ченто, Илија Андов, напишаа повеќе публикации, а беа издадени и зборници за животот и делото на човекот – визионер, кој уште во минатото знаеше дека Македонија еден ден, ќе стане независна и самостојна држава. Желбата ми беше и ја да дадам свој придонес во расветлувањето,а пред се во презентирањето на ликот и делото на Ченто, создавајќи едно дело, но со поинаква форма и содржина од досегашните напишани дела за него. Така ја започнав својата „собирачка“ дејност, информира Белчески, кој работи како историчар – кустос во Прилепскиот музеј. Според него, гледачот преку хронолошки подредените фотографии растеретен од читање на долги текстови може да го следи животот на Ченто, исполнет со голем број активности, но и фотографии кои зборуваат за неговиот живот после смртта. – Ако една изрека вели „Една фотографија – илјада зборови“ тогаш можете да замислите колку зборови содржат овие фотографии. Проектот го реализирав истражувајќи низ Прилеп и државата, а во голема мера ми помогна семејството на Ченто, особено неговиот син Илија Андов – Ченто, и ќерката Марија Јакимоска на кои им изразувам голема благодарност за соработката, истакна Белчески. Содржините од изложбата збогатени со кратки информации од 150 настани, кои ги дообјаснуваат „замрзнатите“ моменти од фотографиите, неколку текстови и делови на говори, мисли и изјави на Ченто се сублимирани во фотомонографија, која беше промовирана пред струшката публика.

Казнети 70 возачи во населбата Ченто во Скопје

Тале Кристо — Sat, 01 Oct 2022 19:14:57 +0000

Министерството за внатрешни работи соопшти дека денеска во периодот од 10 до 16 часот била спроведена засилена акциска контрола во делот на сообраќајот на територија на населба Ченто во Скопје. При контролата, како што посочуваат од МВР, санкционирани се 70 возачи од кои 29 за вградени фолии без А -тест, 10 без возачка дозвола, три за технички неисправни возила, две нерегистрирани и 26 по останати прекршоци. Од МВР информираат дека засилените сообраќајни контроли продолжуваат и во наредните денови и апелираат граѓаните да ги почитуваат сообраќајните правила и прописи.

Гореше автомобил во скопската населба Ченто

Тале Кристо — Fri, 02 Sep 2022 14:49:00 +0000

На 02.09.2022 во 02.16 часот во СВР Скопје било пријавено дека во двор на ул.„19“во нас.Ченто-Скопје, настанал пожар во патничко возило „мерцедес“, сопственост на И.Б.(40) од Скопје. Повредени лица нема. Увид бил извршен.

Арсовска: Започнуваме нов зелен плоштад и парк од 5000 квадратни метри во населбата Ченто

Ивана Ефремовски — Wed, 29 Jun 2022 11:24:07 +0000

Градоначалничката на Град Скопје, Данела Арсовска, заедно со градоначалникот на општина Гази Баба, Бобан Стефковски и директорот на ЈП Паркови и зеленило, Ангеле Сотировски, извршија увид во започнувањето на изградбата на нов зелен плоштад и парк во населбата Ченто во општина Гази Баба. Градоначалничката на Град Скопје, Данела Арсовска истакна дека согласно програмата за модерно Скопје воспоставувањето на нови зелени површини и нови паркови е еден од приоритетите во работата на Градот Скопје, а граѓаните на овој дел од општината за прв пат ќе добијат модерен парк и нови уредени зелени површини. -Согласно програмата за модерно Скопје и воспоставување на нови зелени површини на територија на градот Скопје, денеска започнуваме со хортикултурно уредување на јавна површина, нов зелен плоштад на улицата „Јужноморавски бригади“, во населбата Ченто, нов парк за над 20.000 жителите на овој дел од општината, кој ќе биде уреден на површина од 5000 квадратни метри, истакна Арсовска. Директорот на ЈП Паркови и зеленило, Ангеле Сотировски истакна дека на иницијатива на градоначалничката екипите на јавното претпријатие веќе се започнати со целосно расчистување на теренот. -Екипите на ЈП Паркови и зеленило веќе започнаа со целосно расчистување на теренот, а во следниот период ќе се пристапи кон рамнење на почвата како и пополнување на површината со квалитетна почва, спроведување на систем за полевање и подготовка на почвата за садење на дрвја и вегетација, а се предвидува и флористичко збогатување на просторот, вели Сотировски. Градоначалникот на Општина Гази Баба, Бобан Стефковски истакна благодарност до градоначалничката на Град Скопје за напорите кои ги вложува за нови проекти во општината Гази Баба кои се секогаш поздравени и во интерес на граѓаните, како и тоа дека жителите на Ченто за прв пат ќе добијат ваков нов зелен простор. -Благодарност до градоначалничката на Град Скопје, за напорите кои ги вложува Градот Скопје за нови проекти во општина Гази Баба, соработката со Градот е поздравена и е во интерес за граѓаните на општина Гази Баба. Ова место кое претходно беше неуредно и полно со шут и ѓубре, сега жителите на населбата Ченто со овој проект за прв пат откако е населена оваа населба ќе добијат нов зелен плоштад и уреден простор за одмор, спорт и рекреација, истакна Стефковски.

Стефковски: Населба Ченто добива нов парк на површина од 5000 метри квадратни

Ивана Ефремовски — Wed, 29 Jun 2022 10:11:39 +0000

Ченто добива нов парк на површина од 5000 метри квадратни.- -Утрово заедно со градоначалничката на Град Скопје, Данела Арсовска и директорот на ЈП Паркови и Зеленило Ангеле Сотировски означивме почеток на градба на новиот зелен парк во населба Ченто. Паркот ќе содржи нови зелени површини со поставен систем за наводнување како и нови дрвја и вегетација, а се предвидува и флористичко збогатување на просторот. Изградбата на паркот се врши на улица Јужноморавски бригади на просторот позади спортската сала. Овој простор често во минатото беше место за диво депонирање на отпад, а денес на негово место се гради голем зелен парк, информира градоначалникот Бобан Стефковски. Тој посочи дека овој парк е доказ за одличната соработка која ја има општина Гази Баба со Градот Скопје и јавно се заблагодарам на градоначалничката Данела Арсовска за силната поддршка. -Изминатиот период извршивме реконструкција на паркот спроти средното училиште Панче Арсовски, градиме мултифункционален парк во Триангла, се подигаат нови зелени површини, засадени се над 4000 нови садници но сето ова е само почеток. Следуваат години на развој на нашата Гази Баба, истакна градоначалникот.

За 6 часа казнети 60 лица во Ченто, 16 возеле без дозвола

Ивана Ефремовски — Sun, 06 Mar 2022 18:29:58 +0000

На 06.03.2022 во времето од 10.00 до 16.00 часот спроведена е зајакната акциска контрола во делот на сообраќајот на територијата на скопската населба Ченто, при што санкционирани се 60 возачи.

Од нив 16 управувале возило без возачка дозвола, а санкционирани се и други прекршоци.

Засилените контроли продолжуваат и во наредните денови.

Тешка сообраќајна несреќа вечерва во Ченто, загина едно лице

Тале Кристо — Mon, 10 Jan 2022 20:41:11 +0000

Според првичните информации од МВР, едно лице го загуби животот во тешката сообраќајна несреќа што се случи вечерва во скопско Ченто. Денеска околу 17.35 часот пријавено е дека на ул.„М.А.Ченто“ се случила сообраќајна незгода помеѓу автобус на ЈСП линија бр.65, управуван од С. С.(1961) од Скопје и ПМВ „Голф“ со скопски таблички, управувано од С.О.(1982) од Скопје. Од страна на ИМП констатирана е смрт кај С.О. Возачот на автобусот и еден сопатник од автобусот пренесени се во УЦ „Мајка Тереза“, а тројца сопатници од автобусот пренесени се во ГОБ „Св.Наум Охридски“.