честитка – Kurir.mk

Пендаровски со честитка за Илинден: Да се сплотиме за иднината на младите и заедно да градиме европска, а не емигрантска македонска држава

Катерина Бојаџиева — Wed, 02 Aug 2023 07:20:20 +0000

Денеска, на нашиот најсветол празник Илинден се потсетуваме на генерациите кои се изборија за двете наши републики – Крушевската во 1903-та и АСНОМ-ската во 1944-та година. Водени од прогресивни идеи за политичка слобода и социјална правда, младите беа вистинските двигатели на двата Илиндена. Младите први се кренаа во борба против фашизмот и станаа најборбеното јадро на народноослободителната војска. Самиот АСНОМ, пред сè, беше заседание на младите. Ние денес имаме слободна македонска држава, благодарение на младите од илинденската и од антифашистичката генерација, се вели во честитката на претседателот Стево Пендаровски по повод Илинден. Пендаровски наведува дека младите се клучни за каква било општествена трансформација, од народни востанија и револуции, па сè до креирање политики и спроведување реформи. -Но, за да ги мотивираме младите да останат и да се вклучат во изградбата на европска Македонија, мора со европски реформи да ја градиме нашата држава како праведна и прогресивна република во која македонските граѓани ќе имаат пристоен живот, добро образование, квалитетно здравство, ефикасен правен систем што ќе ги искоренува криминалот, корупцијата и непотизмот. Токму европската интеграција ќе ни помогне да го оствариме овој витален национален интерес. Затоа, мора без одлагање да ги надминеме разликите, да се сплотиме околу итно започнување на преговорите и да престанеме да им го трошиме времето на младите. Бидејќи, ако ја пропуштиме и оваа шанса, ќе го изгубиме виталниот дел од македонското општество, стои во честитката на Пендаровски. Тешко е да се стекне слободна држава, додава претседателот, но уште потешко е да се изгради и одржи слободно и праведно општество. -Додека првото е дело на една генерација, второто станува обврска на сите наредни поколенија. Затоа, да се сплотиме за иднината на младите и сите заедно да градиме европска, а не емигрантска македонска држава. За многу години Илинден!, наведува Пендаровски во честитката за Илинден.

Мицкоски: Илинден е симболот за македонската борба за слобода и темелот на државноста

Катерина Бојаџиева — Wed, 02 Aug 2023 07:17:16 +0000

Илинден е најсветлиот македонски ден. Илинден е симболот на македонската борба за слобода. Илинден е македонскиот темелник на државноста. Македонија и Илинден се две испреплетени нишки кои го означуваат идентитетот на секој МакедонецЧ, вели во честитка Претседателот на ВМРО-ДПМНЕ Христијан Мицкоски, по повод државниот празник 2-ри Август - Илинден. -Пред 120 години воден од идеалот за слобода, народот во Македонија ја започна епопејата, го посеа семето на непокорот и тоа беше крунисано со првото заседание на АСНОМ и создавањето на македонската држава. И двата Илиндена и тој во 1903 и тој во 1944 година беа меѓниците во македонската историја кои оставија неизбришлив траг во колективната меморија на Македонија. Илинден беше и ѕвездата водилка и на сите оние кои ја сонуваа и ја изборија македонската независност на 8-ми Септември, но ќе останат и ѕвезда водилка и на сите идни генерации кои ќе се борат за Македонија. Борбата за Македонија никогаш нема престане. Таа е вечна исто како што е вечна идејата да изградиме татковина која е своја на своето, која е еднаква со сите под ова сонце и која ќе биде напредна и просперитетна. Тоа битисувало и во двата Илиндена, тоа битисува и денес. Горди сме на нашето минато и нема да дозволиме тоа некој да ни го погази или присвои. Горди сме на нашите предци и на нивната саможртва да ја изградат Македонија. Тие се нашиот пример дека со сплотеност и одлучност можат да се постигнат сите цели. И денес како и пред еден век се справуваме со внатрешни и надворешни предизвици, но минатото не учи дека со обединетост, достоинство и верба во правдата ќе изградиме подобра иднина. Нека е вечен празникот Илинден. Нека е вечна Македонија, додава Мицкоски.

Честитка од СПМ по повод 24 Мај, Денот на сесловенски просветители Свети Кирил и Методиј

Тале Кристо — Wed, 24 May 2023 12:30:18 +0000

Големината и богатството на еден народ се состои во можноста несебично и на другите народи да им ги пренесе своите знаења како што преку македонските просветители Светите браќа Кирил и Методиј со писменост се даруваа словенските народи. Делото на Светите Кирил и Методиј во вековите е запишано како рамноапостолно и свето со кое се издигаат словенските народи со писменост и проповед на христијанството. Како православен македонски народ, денес чувствувајќи радост, да размислуваме за големината на делото со кои не задолжија Светите Кирил и Методиј, па обединувајќи се во верата, вистинските добродетели и меѓу себе да ја искажеме нашата искрена благодарност. Денес кога сме загрозени од оние околу нас ние Македонците сме заветени нашиот јазик да го чуваме, негуваме и почитуваме, бидејќи со тоа уште повеќе ја вреднуваме нашата култура и традиција, нашата историја и памтење, го воздигнуваме нашето име и идентитет и на тој начин им оддаваме вистинска и достојна почит на нашите Свети учители. Врежано е во помнењето дека токму ние Македонците сме нивните горди наследници и ние сме тие кои го продолжуваат нивното завештание да вложуваме во сопственото образавание и да ја чуваме и проддолжиме нивната света мисија. Во името на Социјалистичката партија на Македонија и во свое име до македонскиот народ, православните верници и просветните работници упатувам искрени честитки за светлиот 24 Мај, Денот на македонските и сесловенски просветители и учители Свети Кирил и Свети Методиј. Љупчо Димовски, Претседател на СПМ

Ахмети на македонски јазик го честиташе 24 мај – денот на светите браќа Кирил и Методиј (ВИДЕО)

Тале Кристо — Wed, 24 May 2023 10:49:06 +0000

Преку видеообраќање на македонски јазик лидерот на ДУИ, Али Ахмети, го честиташе Денот на сесловенските просветители, светите браќа Кирил и Методиј и порача дека во духот на мултикултурализмот имаме заедничка обврска да го негуваме македонскиот јазик. -Почитувани мои сограѓани, нека е честит денот на словенските просветители Кирил и Методиј! Во нивното дело е израснат и современиот македонски јазик кој претставува израз на посебноста на македонскиот народ и нашите сограѓани Македонци! Во духот на мултиетничкото општество кое заеднички го градиме, да се потсетиме на овој важен ден, дека заеднички ја преземаме обврската да ја зачуваме, негуваме и унапредиме меѓународната артикулација на македонскиот јазик на ист начин како што тоа го правиме и за посебноста на македонскиот идентитет. Нека е среќен и честит празникот!, вели Ахмети во видеото.

Мисајловски со честитка по повод 24 мај – денот на Светите браќа Кирил и Методиј

Тале Кристо — Wed, 24 May 2023 08:56:14 +0000

Честит 24-ти Мај, Ден на македонските и сесловенските просветли и учители, Светите браќа Кирил и Методиј. Нека ни е за многу години големиот празник Свети Кирил и Методиј! Да ни е вечна Република Македонија!, пишува во својата честитка потпретседателот на ВМРО-ДПМНЕ Владо Мисајловски.

Мицкоски со честитка по повод 23 Мај – Националниот ден на Власите

Тале Кристо — Tue, 23 May 2023 10:05:15 +0000

Во свое лично име и во име на ВМРО-ДПМНЕ на сите припадници на влашката етничка заедница Ви го честитам 23 Мај - Националниот ден на Власите и Ви посакувам добро здравје, многу љубов и многу среќа во Вашите семејства, пишува лидероот на ВМРО-ДПМНЕ Христијан Мицкоски во својата честитка. На денот на одбележувањето на влашката култура и традиција, мора да се истакне придонесот на влашката заедница во Македонија кон заедничкиот развој. Слогата и соживотот граден со векови наназад во Македонија е основа за трасирањето на заедничката иднина. И денес кога заедно ги споделуваме тешките мигови за државата со октроирано правосудство, девастирано здравство и образование, во услови на должничка и економска криза, а се' заради криминалот и корупцијата на власта којашто немилосрдно ја разјадува државата, во услови кога се тргува со македонскиот национален идентитет, но и со унитарниот карактер на државата, убеден сум дека со заеднички сили наскоро ќе се избориме да се вратиме на вистинскиот пат заеднички да продолжиме да ја градиме нашата држава врз темелите на заедничките вредности за да создадеме иднина за следните генерации тука во Македонија. Нека Ви е честит и за многу години 23 Мај - Националниот ден на Власите!, стои во честитката на Мицкоски.

Поглаварот на ИВЗ, Фетаи упати честитка на по повод Рамазан Бајрам

Тале Кристо — Thu, 20 Apr 2023 12:49:31 +0000

По повод утрешниот празник Рамазан (Фитр) Бајрам честитка до верниците од исламска вероисповед упати поглаварот на ИВЗ, реисул улема, Шаќир Фетаи, со желби и „молејќи се на Семоќниот Алах да ги прифати со Неговата милост сите наши молитви, нашиот пост, сите наши дела направени во свет месец“. - Во овие среќни денови Рамазанската школа нè научи да не ги заборавиме нашите луѓе кои имаат потреба: сиромашните, сираците, инвалидите но и нашите исламски институции. Затоа, на крајот на Рамазан, давањето на Садакатул Фитр ни стана обврска, како што Божјиот Пратеник ни покажа дека со давање на Садакатул Фитр го прочистуваме нашиот пост од прекумерни зборови. Со еден збор, Фитр Бајрам е прослава на доброто наспроти злото, духовно наспроти страсти, морално наспроти неморално, трпението наспроти нетрпеливоста, божественото наспроти сатанското. Сето тоа нé прави луѓе на акција, луѓе кои повикуваат да негуваме добри дела и луѓе кои спречуваат лоши дела, вели во честитката Фетаи. Со еден збор, се посочува во честитката на поглаварот Фетаи, Фитр Бајрам е прослава на доброто наспроти злото, духовно наспроти страсти, морално наспроти неморално, трпението наспроти нетрпеливоста, божественото наспроти сатанското. - Сето тоа нé прави луѓе на акција, луѓе кои повикуваат да негуваме добри дела и луѓе кои спречуваат лоши дела. Во овие денови на радоста на Фитр Бајрам, со чисти срца се обраќаме кон Семилосниот Алах, да ни даде сила на верување, можност да се одвратиме од гревовите, храброст да простиме и да се помириме, да се насмееме со другите, да негуваме сегашна и уште посветла иднина, да создадеме подобри можности и услови во нашето општество за да го запреме трендот на економски миграции. Го молиме Семоќниот Аллах да им даде радост и надеж на срцата на сиромашните, луѓето со физички и духовни проблеми, за денес и секогаш во животот да бидеме среќни и радосни, а пред сè - благодарни на Големиот Бог за неговите добринии што ни ги дал, се истакнува во честитката на Фетаи. Првиот ден од Рамазан Бајрам е неработен за сите граѓани на Република Македонија.

Пендаровски: Велигден да ни донесе оптимизам и инспирација за добри дела, заедно да придонесеме за напредок на татковината

Катерина Бојаџиева — Sun, 16 Apr 2023 08:01:03 +0000

Претседателот на државата Стево Пендаровски, по повод големиот христијански празник Воскресение Христово – Велигден, упати честитка до поглаварот на Македонската Православна Црква – Охридска Архиепископија, г.г. Стефан и до сите православни верници, како и до претседателот на Црковното претставништво на Евангелско – методистичката црква, Емил Заев и припадниците на Евангелско – методистичката црква во државата. - Празникот на христовата победа над смртта има посебно место во срцето на секој христијанин и инспирира вера, надеж и љубов. Посакувам овие празнични денови да се посветиме на најблиските и да даруваме насмевки, ведрина и оптимизам. Заедно да придонесеме за просперитетот, напредокот и благосостојбата на нашата татковина. Најискрено се надевам дека Велигден ќе ни донесе добра мисла, оптимизам и инспирација за правење добри дела и помагање на сите на кои им потребна помош и поддршка без разлика на религиската или етничката припадност. Да внесеме светлина и топлина во нашите животи осмислувајќи ги и спротивставувајќи се на сите кризи, проблеми и искушенија, пишува Пендаровски во честитката.

Мицкоски со честитка по повод Велигден: Верувам дека нашата света црква како и до сега, ќе продолжи да биде големиот чувар на идентитетот на македонскиот народ

Катерина Бојаџиева — Sun, 16 Apr 2023 07:35:48 +0000

Дозволете во мое лично име и во име на ВМРО-ДПМНЕ да Ви го честитам најголемиот христијански празник - Воскресението Христово Велигден. Ви посакувам безброј мигови на среќа, на спокој и на љубов за вас и вашите семејства. Благодат за секој еден од нас која произлегува од радоста на Христовото Воскресение кое пак, еве веќе два милениума претставува најмаркантниот настан во историјата на човештвото, но и сведок за неизбежноста на победата на доброто врз злото, стои во честитката по повод празникот Воскресение Христово - Велигден од Претседателот на ВМРО-ДПМНЕ, Христијан Мицкоски. -Драги пријатели, Живееме во време полно со предизвици, поделби, гнев, со омраза едни кон други, но и во време на големи неправди. А тоа највеќе нé боли! Кога гледаме дека од нашите раце сакаат да ја оттргнат надежта, соништата - нашите најмлади членови на ова општество кои притиснати од очајот на властa се приморани да ја бараат својата среќа во други држави, надвор од нивните родни огништа! Имаме задача - моја, ваша, заедничка - да му ставиме крај на ова сивило и да ги промениме работите! Да ставиме крај на неправдите и на заедничките болки што предизвикуваат заеднички страдања! Заедно да се избориме за нови стандарди! Друга опција немаме, и ова е Македонија за која се бориме. Ова е Македонија во која веруваме! Ова е Македонија за која вреди секоја наша болка, секоја промена, секоја возобновена надеж, секоја заедничка иднина. Да ги кренеме главите, и да покажеме што можеме. Со срце, со ум. Заеднички. За неповторливата шанса на нашата генерација. Драги браќа и сестри, Историјата нé учи дека предизвиците и ударите врз нас никогаш не престанале. И денес се нападнати нашите темели кои се основата на сите наши силни колективни верувања, но и она што сме! Овој пат разликата ќе ја правиме по мудроста што ќе ја покажеме и по обединетоста која мораме да ја имаме. Во овие празнични денови испраќам и порака кон една од нашите најголеми идентитетски тврдини - Македонската Православна Црква - Охридската Архиепископија: единството и трепетот над македонскиот оган, како и секогаш низ вековите - да продолжат да бидат главната одлика. Мудроста и разумот да продолжат да бидат главните двигатели на сите одлуки во овие историски времиња. Целосно знаејќи за она што сме и за она што мора да продолжиме да бидеме. И верувам дека нашата света црква како и до сега, ќе продолжи да биде големиот чувар на идентитетот на македонскиот народ. Почитувани пријатели, Добрината и љубовта нека биде водилка во вашите срца, а светлината и топлината нека бидат присутни во сите наши домови! Нека е за многу години Велигден! Христос воскресна! Навистина воскресна!, додава Мицкоски.

Мицкоски за 8ми март: Потребни се промени, ако сакаме здраво општество базирано на еднаквост, не декларативна заложба за еднаквост, а жените да тонат во сиромаштија заради криминалот на власта која краде

Катерина Бојаџиева — Wed, 08 Mar 2023 13:47:04 +0000

Родовата еднаквост е повеќе од цел сама по себе, тоа е предуслов за намалување на сиромаштијата, промоција на одржлив развој и градење на добро владеење“ кажа поранешниот генералниот секретар на ОН Кофи Анан. И навистина низ неговите зборови најдобро се опишува борбата за родова еднаквост, затоа што тоа не е цел сама по себе, туку е само дел од поширок спектар на добри практики кои мора да бидат исполнети, ако сакаме здраво општество, базирано на еднаквост, почит и просперитет, истакна во Честитката за 8ми март- Меѓународен ден на жената од претседателот на ВМРО-ДПМНЕ, Христијан Мицкоски. -Не е доволно само декларативна заложба за родова еднаквост, како што тоа го прави актуелната власт, тоа е потценување на интелигенцијата на жените, потребни се коренити промени, а тие доаѓаат најпрво преку градење на систем на добро владеење кој се темели на закони и правила, а не на криминал и криминални кланови кои го загрозуваат животот на граѓаните. Не е доволно власта да се залага за еднаквост, а жените, исто како и мажите, да тонат во сиромаштија заради тоа што власта е криминална и краде. Потребни се големи чекори напред. Потребна е вистинска заложба и искрени намери, не за политички поени, туку за подобра иднина на нашите деца. Честит 8 Mарт. Промените ќе дојдат, стои во честитката.