црн петок – Kurir.mk

Европските трговци се надеваат дека „црн петок“ ќе ја спаси лошата божиќна сезона

Катерина Бојаџиева — Fri, 25 Nov 2022 15:41:58 +0000

Трговците на мало во Европа стравуваат дека целата божиќна сезона би можела да биде најлоша во изминатата деценија, бидејќи купувачите ја намалија потрошувачката, а оперативните трошоци продолжуваат да растат, намалувајќи ги нивните профитни маржи. Европските трговци се надеваат дека попустите на „црниот петок“ ќе ги поттикнат клиентите да трошат повеќе и ќе ја турнат во втор план кризата на животниот стандард, пишува Хина. Двоцифрената инфлација ја намали куповната моќ на потрошувачите, а нивната доверба е на или многу блиску до рекордно ниско ниво бидејќи скокот на сметките за енергија ги зголеми трошоците за живот. Сепак, за да ги контролираат своите финансии што е можно повеќе, потрошувачите го започнаа божиќното купување на почетокот на оваа година, а се чини дека многумина сепак „ќе го отворат кесето“, пишува Хина. Британците ќе потрошат 8,7 милијарди фунти (10,1 милијарди евра) на црниот петок (25 до 28 ноември), приближно исто како и минатата година, покажува истражувањето на GlobalDate за VoucherCodes. Но, проценката за раст од 0,8 отсто го прикрива големиот пад на обемот на продажбата кога ќе се земе предвид инфлацијата. Оваа година потрошувачите ќе го користат црниот петок повеќе за спонтани купувања и за божиќни подароци отколку за поголеми и подолго одложени набавки, според консултантската куќа Мекинсли. Нивното истражување покажува дека четвртина од потрошувачите во Велика Британија веќе го направиле своето божиќно купување и дека само околу десетина планираат најголемиот дел од купувањето да го направат на самиот Црн петок. Европскиот портал за споредба на цените Idealo пишува дека 65 отсто од Италијанците кои купуваат онлајн се подготвени да купат производ за време на „фестивалот“ на потрошувачката. Во Франција, 70 отсто од потрошувачите планираат да купуваат во „Црн петок“ и „Кибер понеделник“, според истражувањето на PwC France. Шпанците се помалку заинтересирани и само една четвртина од нив планираат да ги искористат поволните зделки на црниот петок за божиќен шопинг, според Шпанската асоцијација за стоки за широка потрошувачка. Националната федерација за малопродажба на САД (NRF) предвидува дека продажбата за време на празниците ќе расте со побавно темпо оваа година, но проценува дека 166,3 милиони граѓани сè уште планираат да купуваат помеѓу Денот на благодарноста и кибер понеделникот. Амазон очекува најслаб раст на приходите во споредба со кој било период на одмор во последните неколку години. Нејзините работници во неколку земји, вклучувајќи ги САД, Германија и Франција, на „црн петок“ се повикани на штрајк за да се борат за повисоки плати.

Што всушност значи „црн петок“: Мрачни случувања, кои немаат врска со шопинг и попусти

Дарко Андоновски — Fri, 25 Nov 2022 09:34:38 +0000

Милиони луѓе ширум светот со нетрпение го чекаат црн петок и попустите во продавниците, но дали всушност знаете од каде потекнува овој израз? Треската на масовно купување означено како феномен „црн петок“ до пред неколку години бил апсолутно непознат и нерпизнат во нашата култура, за да сега масовно се оддомаќини кај домашните трговци и љубители на шопингот. Оваа традиција потекнува од Америка и малкумина знаат дека влече корени од мрачните и несреќни случувања. „Црн петок“ со децении се смета како почеток на Божиќните пазарења во САД, која ја одбележуваат многубројни и големи попусти. Всушност поради нив луѓето масовно брзаат кон најголемите шопин центри, поради што многумина завршувале со тепачки и со повреди. Дека „Црн петок“ во САД е најлуд и најцрн ден покажува и статистиката која покажала дека во 2006 година на денот со најголеми попусти животот го загубиле 7 луѓе, додека 98 биле сериозно повредени. Прва забележана употреба на терминот „Црн петок“ во историјата, не се врзува за никаков шопинг туку за нешто соосема спротивно-финансиска криза. Поточно , за крахот на американскиот пазар на злато на 24 септември 1869 година. Тоа се случило како последица на преголемиот раст во предходниот период, која вештачки ја придвижиле манипулатори и брокери од Вол Стрит, Џеј Гоулд и Џејмс Фиск со откуп на големи количини на злато и негово натрупување. На тој петок во септември 1869 година се открива овој заговор и тоа предизвикало слободен пад на берзата и банкротство на сите од Вол Стрит и обилните фармери. Покрај тоа, популарниот „црн петок“ назив е поврзан со работниците кои и после Денот на благодарноста јавувале дека се болни, за да имаат повеќе слободни денови. Со голед на тоа дека на овој ден луѓето би правеле огромни гужви, полицијата би имала полни раце работа, па самиот назив настанал благодарејќи на полицајците, а не на трговците како што многумина сметале. Постои и објаснување кое се поврзува со продавачите. Тој петок наводно бил ден кога продавачите најпосле почнале да прикажуваат добивка што во книговодствениот речник би значело дека од црвено преминале во црно. Уште еден синоним за „црн петок“ се поврзува со 1800 година, кога сопствениците на плантажите од југот на Америка ги продавале робовите по намалена цена после Денот на благодарноста. Иако оваа верзија на „црн петок“ сосема разбирливо доведувала до протести со кои би се укинало традиционалното славење на „црн петок“ каков што денес го знаеме и понатаму не е утврдено дека е виситинита.

„Црн петок“: Поради грешка со точка-запирка во цената, си купила скутер за 0,69 долари

Ивона Петрова — Wed, 02 Dec 2020 08:04:03 +0000

„Црниот петок“ беше возбудлив за една Мексиканка, која се врза себеси за скутер, бидејќи управата на синџирот продавници „Волмарт“ не сакаше да ѝ го продаде производот по цена од 69 центи… Жената влегла во продавницата во градот Сан Луис Потоси, Мексико, па по долги расправи и расправии уште еднаш се докажа оти „муштериј(к)ата е во право“. Првично, скутерот чини 19.990 мексикански пезоси (околу 1.000 американски долари), но, во периодов на намаленија, по грешка, еден од работниците напишал дека новата цена е 13,999 пезоси, што е еднакво а 0,69 долари. Проблемот настанал кога раководството не сакало да го продаде по таа цена, па жената повикала агент за заштита на потрошувачите. И тој исто така, не успеал да ги убеди вработените во продавницата дека жената е во право. Потоа, таа се врзала себе за скутерот со синџир… Генералниот директор на „Волмарт“ потоа потврди дека скутерот е продаден за 0,69 долари на првиот клиент од многумина што забележале грешка во цената.

Над два милиони потрошувачи во Грција планираат да купуваат за Black Friday

Магдалена Андонова — Fri, 27 Nov 2020 11:40:05 +0000

Околу два милиони потрошувачи во Грција планираат да купат нешто за Black Friday, две третини од нив, тоа ќе го сторат преку интернет, додека пак прометот се очекува да достигне до 280 милиони евра, покажуваат податоците од истражувањето на грчкиот Институт за стоки за широка потрошувачка , јави дописничката на МИА од Атина. Седум од десет Грци, односно 73 отсто, не планираат денеска да купат нешто, додека пак останатите 27 проценти, просечно ќе потрошат 140 евра. -Околу 2,3 милиони потрошувачи проценуваат дека ќе пазаруваат овој период, што во последните години обично трае неколку дена. Во однос на просечните трошоци, проценките се дека овие два милиони потрошувачи ќе потрошат 140 евра во просек, соопштуваат од Институтот. Од анкетираните, 32 отсто рекле дека ќе потрошат до 50 евра, 27 проценти од 51 до 100 евра, а девет отсто планираат да потрошат над 500 е, што, според Институтот, „значи дека важните потреби на домаќинствата ги одложуваат додека не начекаат значајни попусти“. Истражувањето за потрошувачките навики со анкетирани 850 лица, било спроведено на 2 и 3 ноември, односно пред почетокот на карантинот и во периодот кога се уште беа отворени продавниците. Во Грција, попустите за Black Friday, не се само денеска, туку започнаа пред неколку дена, а поради карантинот, Грците имаат можност да купуваат само преку интернет. (MИА)

Како настанал најпопуларниот ден за шопинг во годината, популарниот „црн петок“?

Магдалена Андонова — Fri, 27 Nov 2020 09:50:44 +0000

Секој ноември со нетрпение се чека „црниот петок“ со цел да се пласираат производи по пониски цени. Сепак, малку се размислува за фактот дека потеклото на овој „празник на попустите“ не може да се поврзе со некоја весела прослава, напротив. „Црниот петок“ е главниот ден за шопинг во годината, кој потекнува од Соединетите држави, а се слави низ целиот свет. Се карактеризира со подготвки денови порано за купување на стоки со големи попусти што ги нудат трговците во последниот петок во ноември. Некои попусти се протегаат низ целиот викенд, а некои и цел ноември. И во последно време, овој ден во Америка е честопати обележан со масовни борби, честопати придружени со употреба на оружје. Колку и да звучи чудно, луѓето во тие моменти стануваат „подготвени на сè“, за да дојдат до ефтината стока. Постојат неколку приказни и теории за потеклото на оваа „прослава“. Уште во 1863 година, тогашниот американски претседател Абрахам Линколн го основаше Денот на благодарноста на последниот четврток во ноември. Во тоа време, петокот по Денот на благодарноста сè уште не беше познат како „Црн петок“. Една од теориите е дека терминот првпат бил употребен на 24 септември 1869 година, како резултат на падот на американскиот пазар на злато. Финансиерите на Волстрит, Џеј Гол и Џим Фиск, работеа заедно за да купат што повеќе злато, а потоа да ги зголемат профитите со зголемувањето на цените. Фотографијата на табла во златната соба во Њујорк, на која се гледа падот на цената на златото, го симболизира чинот. Кога заговорот на Голд и Фиск бил откриен во петок, пазарот доживеал слободен пад и сите банкротираа, од банкари на Вол Стрит до земјоделци. Повеќе може да прочитате на ПАРИ.КОМ.МК

Бруно ле Мер: Не е време за „Црн петок“

Ивона Петрова — Thu, 19 Nov 2020 07:11:32 +0000

Францускиот министер за финансии Бруно ле Мер ги повика супермаркетите и трговците на интернет да го одложат таканаречениот „Црн петок“, што привлекува голем број клиенти поради значителни попусти. „Црниот петок“ е на 27 ноември, а во Франција, продавниците што не продаваат есенцијални стоки се затворени поради ограничувачките мерки за борба против коронавирусот. Помалите продавници, што не работат поради одлуката на Владата, стравуваат дека ќе претрпат загуби од конкурентите, големите онлајн компании како „Амазон“, кои можат да работат и да испорачуваат стоки за време на втората блокада во Франција. – Дали следниот петок е навистина вистинското време да се организира Црн петок? Мојот одговор е не, нагласи Ле Мер во Сенатот. Тој најави дека ќе побара од супермаркетите и продавачите на интернет да ги истражат сите опции за одложување на настанот. Директорот на Амазон за Франција претходно изјави дека компанијата забележала зголемување на активноста до 50 проценти за време на второто заклучување.

Крвав „Црн петок“: Пукање во трговски центар, едно лице убиено

Ивона Петрова — Fri, 23 Nov 2018 16:14:13 +0000

Во пукотници во трговски центар во Алабама пред „Црн петок“ еден тинејџер настрада, а две лица се повредени. Властите наведуваат дека пукотниците се случиле околу 21:30 часот, пренесува АП. Полицијата соопшти дека расправија меѓу двајца тинејџери, вклучително и еден 18 годишник завршила со размена на оган од оружје. Еден тинејџер избегал, но подоцна полицијата го опколила. Кон напаѓачот пукала полицијата која го усмртила на лице место. Вториот тинејџер е хоспитализиран во тешка состојба, а во болница е и 12 годишно девојче но засега нема информации во каква состојба се наоѓа.

Лудилото започна: Купувачи чекаа да влезат во продавниците- потоа започна пеколот за вработените (ВИДЕО)

Дарко Андоновски — Fri, 23 Nov 2018 15:47:17 +0000

Денес е така наречен „Црн петок“ (Black Friday), ден кога во Америка сите најголеми трговски ланци нудат огромни попусти, а масовна хистерија редовно ја следат бесни тепачки. Црн петок се одржува еднаш годишно и тој ден во продавниците има огромни попусти . Многумина велат дека тоа е само маркетиншка измама, но сеедно стотици илјади фанатични потрошувачи цела ноќ во редови чекаат да влетаат во продавниците - и потоа почнува пеколот.