давид силва – Kurir.mk

Се пензионира легендарен шпански фудбалер, до пред една недела не размислувал за тоа (ВИДЕО)

Ристе Здравков — Thu, 27 Jul 2023 16:18:23 +0000

Давид Силва (37) го објави крајот на својата професионална кариера. Шпанскиот репрезентативец ненадејно се пензионираше откако ги скина предните вкрстени лигаменти на коленото за време на тренингот на Реал Сосиедад минатата недела. Тој процени дека на негова возраст најдобра опција е да ја заврши кариерата, иако за тоа не размислувал до пред една недела. „Денес е тажен ден за мене. Денеска се збогувам со она на што го посветив целиот живот“, вели Силва во видеото што го објави на социјалните мрежи, а во кое се прикажани некои од најдобрите моменти од неговата богата кариера.

Muchas gracias…fútbol pic.twitter.com/HoB6TPojAd
— David Silva (@21LVA) July 27, 2023

Силва ја започна кариерата во Валенсија која го позајми на Селта и Еибар, но во 2010 година направи трансфер во клубот кој ќе ја одбележи неговата кариера - Манчестер Сити. Во Сити освои 13 трофеи, вклучувајќи четири титули во англиската лига. Тој беше и капитен на клубот и пред стадионот е поставена негова статуа. Тој дојде од Сити во Реал Сосиедад во 2020 година, каде што беше многу важен член на тимот три сезони. Таму го освои Купот на кралот, што претходно го имаше со Валенсија, а сезонава освои и настап во Лигата на шампионите. Долги години играше за шпанската репрезентација и за неа забележа 125 настапи и постигна 35 гола, а освои и едно светско и две европски првенства.

Силва парично казнет поради тепачка на карневал

Катерина Бојаџиева — Thu, 22 Sep 2022 18:39:13 +0000

Фудбалерот на шпанскиот прволигаш Реал Сосиедад, Давид Силва, е казнет парично поради физички напад врз жена за време на карневал на Канарските острови во јуни оваа година. На поранешниот шпански репрезентативец му е изречена глоба од 1.080 евра, објавија локалните медиуми, додавајќи оти нападнатата жена при инцидентот се здобила со повреди на вратот и раката, како и гребнатинки на рацете и колената. Инцидентот, во кој бил вклучен и братот на Давид Силва и уште едно лице, се случил на 19 јуни во гратчето Маспаломас на Канарските острови.

Реал Сосиедад го продолжи договорот со Давид Силва

Бошко Тасиќ — Sat, 30 Apr 2022 06:01:23 +0000

Шпанскиот фудбалер од редовите на Реал Сосиедад Давид Силва потпиша нов договор со важност до јуни 2023 година објави клубот од Баскија. Последните две сезони Давид Силва го носи дресот на „сино белите“ и ги оправда очекувањата станувајќи еден од најдобрите нивни фудбалери. Пред Сосиедад Силва помина десет сезони во редовите на Манчестер Сити. Во споменатите две сезони за Сосиедад одигра 56 натпревари и постигна три голови во сите натпреварувања. Сосиедад потврдата за продолжувањето на соработката ја објави на навистина уникатен начин.

Давид Силва му се придружи на Реал Сосиедад

Магдалена Андонова — Tue, 18 Aug 2020 07:08:12 +0000

Поранешниот играч од средниот ред на Манчестер сити, Давид Силва, стана играч на Реал Сосиедад, објавено е на официјалната веб-страница на клубот од Сан Себастијан. Договорот на играчот важи до 2022 година. Триесет и четиригодишниот Шпанец играше во Сити од 2010 година, каде се пресели од Валенсија. Вкупно, тој на сите турнири одигра 435 натпревари за англискиот клуб, постигна 77 голови и направи 140 асистенции. (MИА)

Манчестер сити ќе постави статуа во чест на Давид Силва

Магдалена Андонова — Mon, 17 Aug 2020 17:02:58 +0000

Во чест поранешниот играч од средниот ред на Манчестер сити, Давид Силва, клубот ќе подигне подигната статуа на својот стадион. Претседателот на бордот на директори на „граѓаните“ Халдон ал Мубарак соопшти дека статуата ќе се наоѓа на матичниот стадион „Етихад“. Исто така, на теренот за тренинг, Сити ќе направи специјален мозаик посветен на шпанскиот фудбалер. Давид Силва се приклучи на Манчестер сити во 2010 година од Валенсија и помина 10 години во англискиот клуб. (МИА)

Лацио му нуди супер договор на Силва, куќа во Рим и приватен авион

Тале Кристо — Fri, 07 Aug 2020 06:47:23 +0000

Давид Силва сеуште нема потврдено каде ќе ја продолжи кариерата откако реши да го напушти Манчестер Сити ова лето. Според последните најави од Италија, Лацио кој е прв фаворит за потписот на Силва, на плејмејкерот му нуди двегодишен договор (со можност за уште една година), плата од 53 000 евра неделно, куќа-вила во центарот на Рим и приватен авион. Спортскиот директор на Лацио, Игли таре веќе разговарал со Симоне Инзаги и добил зелено светло за да направи се што може да го ангажира Силва. Шпанецот има понуди и од Валенсија, Бетис и од МЛС лигата. Извор: Дриблинг.мк

Давид Силва и Лацио се во напредни преговори

Магдалена Андонова — Thu, 06 Aug 2020 09:22:54 +0000

Играчот од средниот ред Давид Силва може да ја продолжи кариерата во Лацио. Шпанецот е близу до потпишување на тригодишен договор со плата од три милиони евра годишно, со исклучок на бонусите, јавува новинарот Никола Скира на Твитер. Претседателот на Лацио, Клаудио Лотито се надева дека договорот ќе биде потпишан во наредните денови. Силва (34) е слободен агент бидејќи неговиот договор со Манчестер сити заврши со крајот на сезоната 2019/20 во Премиер лигата. Фудбалерот играше за Сити од 2010 година. (МИА)

Силва има понуди од Шпанија, САД и Обединетите Арапски Емирати

Магдалена Андонова — Thu, 30 Jul 2020 11:51:24 +0000

Фудбалерот од средниот ред на Манчестер сити, Давид Силва, доби понуди од клубови во САД и Обединетите Арапски Емирати, а има опција кариерата да ја продолжи во својата татковина, објави „Скај Спортс“. Според изворот, за услугите на 34-годишниот Шпанец се заинтересирани неговиот матичен клуб Валенсија, Интер Мајами и неименуван клуб од Дубаи (ОАЕ). Силва играше за Манчестер сити од 2010 година и ќе го напушти англискиот клуб на крајот на неговиот договор ова лето како слободен агент. Тој има шест голови и 11 асистенции на 38 натпревари за „граѓаните“ во сезоната 2019/20. (МИА)

Давид Силва доби понуда од Катар

Тале Кристо — Mon, 08 Jun 2020 10:03:00 +0000

Играчот од средниот ред на Манчестер сити, Давид Силва може да ја продолжи кариерата во Катар. Според „Diario Sport“, 34-годишниот Шпанец добил понуда од Ал-Духаил. Тековниот договор на Силва со „граѓаните“ важи до јули 2020 година. Тој или ќе мора да се согласи да го продолжи договорот за кусо време, или да си замине на 30 јуни. Во тековната сезона Силва настапи на 28 натпревари, постигна три гола и направи осум асистенции. Шпанецот се пресели во Манчестер сити во 2010 година од Валенсија. Досега има одиграно за англискиот тим 423 натпревари, постигнато 73 гола и остварено 134 асистенции.

Бетис со понуда до Давид Силва

Дарко Андоновски — Tue, 07 Apr 2020 08:29:42 +0000

Фудбалерот на Манчестер сити, Давид Силва може да ја продолжи кариерата во Бетис, објавија англиските медиуми. Според „Дејли стар“ 34-годишниот фудбалер во лето ќе се пресели во шпанскиот клуб. Договорот на Силва со „гаѓаните“ важи до летото 2020 година. Бетис е подготвен да му понуди договор на шпанскиот репрезентативец две години. Во тековната сезона Силва настапи на 28 натпревари за Манчестер сити, постигна три гола и забележа осум асистенции. Играчот од средниот ред игра за англискиот тим уште од 2010 година.