дебар – Kurir.mk

Поголем дел од Дебар утре 8 и пол часа без струја

Ивона Петрова — Wed, 18 Oct 2023 10:38:10 +0000

Во периодот од 7 до 15:30 часот без напојување со електрична енергија ќе биде поголем дел од градот Дебар. Според Регионалниот центар на ЦУК без струја целосно ќе биде населбата „Венец-1", како и поголемиот дел од потрошувачите во населбата „Венец-2". - Тоа поради реализација на зафати на Електродистрибуција во насока на реконструкција и модернизација на дистрибутивната мрежа во наведените локации. Оваа активност е со цел подобрување на квалитетот на снабдувањето со електрична енергија, наведуваат од РЦУК-Дебар.

На преминот Џепиште-Требиште кај Дебар за три месеци регистрирани 12.798 патници

Тале Кристо — Mon, 18 Sep 2023 17:06:41 +0000

На граничниот премин Џепиште-Требиште, на македонско-албанската граница кај Дебар, кој со градот ја поврзува областа Голо Брдо, во летниот период од годинава забележана е видно зголемена фреквенција. - Во периодот јуни, јули и август на преминот се регистрирани вкупно 12.798 патници. Од вкупниот број 6.366 биле за влез и 6.428 за излез, потврдуваат од Министерството за внатрешни работи. Тоа, поради зголеменото присуство на печалбарите, роднинските посети, домашните веселби и секако, поради близината, доаѓањето на Македонците од оваа област на пазарување во Дебар, но и за други, пред сè здравствени услуги. Овој премин, кој беше отворен во мај 2013 година, е од локален карактер и во летниот период работи од 8 до 20 часот, додека во зимскиот од 8 до 18 часот. Македонците од Голо Брдо во континуитет бараат преминот да работи непречено 24 часа. Токму ова прашање беше во фокусот на средбата што деновиве во Тирана ја оствари македонскиот министер за внатрешни работи Оливер Спасовски и неговиот албански колега Таулант Бала. - Двајцата министри се договорија да започнат подготовките од двете страни кои ќе значат позитивен одговор на барањата на македонската заедница во Албанија, поточно областа Голо Брдо, граничниот премин Џепиште-Требиште кај Дебар да работи 24/7, со што ќе се олеснат потребите на Македонците што живеат и работат, наведуваат од македонското министерство. Оваа активност ја поздрави Македонското друштво „Илинден“-Тирана. - Дваесет и четиричасовното работење на овој премин ќе биде од голема полза за жителите на Голо Брдо бидејќи сега работи со ограничено време и создава проблеми во комуникацијата и патувањето за Македонија. За нив поблиску е да патуваат до Дебар, отколку до најблискиот албански град Пешкопеја. Ќе се зголеми соработка меѓу жителите од двете страни на границата, а и поголем број туристи ќе ја посетуваат областа Голо Брдо, која располага со многу природни убавини, оцени за МИА, Никола Ѓурѓај, претседател на друштвото. Преминот моментно е наменет за жителите во пограничните зони на двете држави, а од 2014 година, по изградбата на асфалтен пат и од албанска страна, се патува и со моторни возила.

Укината двомесечната рестрикција во водоснабдувањето во Дебар

Ивана Ефремовски — Thu, 31 Aug 2023 13:02:30 +0000

Од денеска укината е рестрикцијата во водоснабдувањето во Дебар, што беше воведена на 31 јули оваа година. Како што за МИА информираше Бурим Каба, директор на Јавното комунално претпријатие „Стандард", кое стопанисува со водоводот Росоки-Дебар, сега нормално е снабдувањето во сите делови во градот. -Во главниот резервоар во градот и во претходниот период пристигнуваа во просек по 120 литри вода во секунда што е доволно за задоволување на потребите на околу 25.000 жители, доколку според европскиот просек се трошат по 200 литри вода дневно по човек. Но, поради злоупотребата, со наводнување градини, миење дворови, тротоари па дури и улици пред домовите бевме принудени да се одлучиме на непопуларната мерка, рестрикција, вели Каба. Дообјаснува дека и покрај редовните апели за рационално користење на водата за пиење, корисниците продолжиле со старата навика. -Поради тоа, се јави проблем во водоснабдувањето во повисоките делови на градот па за да може и тие делови да имаат вода, воведена беше рестрикција од три до четири часа дневно а беа опфатени населбите „Венец1", „Венец2", „Ќернаница", како и главната улица во градот „8-ми септември", нагласува тој. Дебар со вода за пиење се снабдува од изворите во малореканското село Росоки, преку водоводот Росоки-Дебар, но и селата Долно Косоврасти и Рајчица, низ кои минува водоводот или околу 6 илјади физички и правни лица. (МИА)

Хаџи Маќелара прогласен за почесен граѓанин на Дебар

Тале Кристо — Wed, 30 Aug 2023 18:34:20 +0000

Градоначалникот на Дебар Хекуран Дука му врачи признание „Почесен граѓанин на Дебар“ на познатиот уметник Хаџи Маќелара, роден дебранец кој живее во Соединетите Американски Држави. Признанието му беше врачено на посебна свеченост организирана од Општина Дебар. Одлуката за негово прогласување за почесен граѓанин, донесена на предлог на градоначалникот Дука, пред присутните ја прочита Фуат Спахиу, претседател на Советот на општината. -Четириесет години богата уметничка кариера со многу награди и признанија од сите области каде што живеат Албанците и пошироко. Композитор, изведувач на народни песни, кореограф, патриот, сакан од сите, амбасадор на дебарската култура на сите национални културни манифестации. Многу успеси и во иднина, рече, меѓу другото, градоначалникот Дука. Маќелара, кој е родум од Дебар, а живее во САД, се заблагодари за честа да го добие највисокото општинско признание. - Познат сум и по тоа што сум голем говорник, но, простете ми, ме надвладеаја емоциите. Живеам далеку од мојот роден Дебар, каде го поминав детството и младоста и каде ја почнав кариерата, но секогаш го носам во моето срце. Физички сум многу далеку, но душата е тука. Мојата голема љубов за тоа ја пренесов во песната „Горд сум што сум дебарчанец". Голема благодарност, рече Маќелара. Претходно тој имаше средба со градоначалникот во неговиот кабинет, а вечерва ќе се одржи ретроспектива на неговиот музички опус.

Расте бројот на склучени бракови: 75 парови го кажале судбоносното ДА во Дебар

Ивана Ефремовски — Wed, 16 Aug 2023 17:39:37 +0000

Од секторот за бракови при општина Дебар потврдуваат дека годинава е забележан раст на бројот на оние кои го кажале судбоносното "да". -Во изминатите седум месеци од годинава регистрирани 75 бракови, наспроти истиот период минатата година кога имавме 48 бракови. Тоа секако и поради фактот што добар дел од иселениците кои престојуваат во родниот крај на вечна љубов се заколнуваат тука во нашата канцеларија, која функционира во општинската зграда, рече Афрдита Шахини од секторот за бракови при општина Дебар. Според неа, поголемиот број се бракови на млади кои живеат во некоја земја на ЕУ, главно во Италија, Швајцарија, Германија, а потекнуваат од Дебар. - Кога зборуваме за бракови во општина Дебар мора да нагласиме дека жителите на селата Џепиште и Отишани имаат канцеларија на Управата за матична евиденција каде може да склучат брак. Таму се регистрирани девет бракови оваа година, зашто младите од овие две села најчесто тоа го прават во Дебар, нагласува Шаини. Поради масовната миграција, години на ред бројот на бракови ни оддалеку не може да се спореди со претходно. Ако пред повеќе од една деценија имаше и околу 300 бракови годишно, сега во просек има по 100 бракови. (МИА)

Притвор за дилерот од Дебар

Ристе Здравков — Fri, 21 Jul 2023 20:17:35 +0000

Вечерва (21 јули) судија во претходна постапка на Основниот суд Тетово на АХ.(34) од Дебар му определил мерка притвор од 30 дена и тој ќе биде спроведен во КПУ Затвор "Скопје" во Скопје. Ноќеска околу 1 часот на паркинг во близина на угостителски објект во тетовско Жеровјане ј А.Х. беше лишен од слобода од полициски службеници на СВР Тетово, при што кај него биле пронајдени и одземени 42 пакувања кокаин, од кои 4 поголеми. Набргу потоа, тој беше задржан во Полициската станица Тетово и по целосно документирање на случајот, со соодветен поднесок беше изведен пред судија во претходна постапка на Основниот суд Тетово

Дебар утре без вода шест часа

Дарко Андоновски — Thu, 20 Jul 2023 11:59:45 +0000

Во Дебар утре во периодот од 6 до 12 часот ќе има прекин во водоснабдувањето. Од Јавното комунално претпријатие „Стандард", кое стопанисува со водоводот Росоки-Дебар информираат дека прекинот во водоснабдувањето на корисниците во градот е поради изведување зафат во градскиот резервоар, со цел подобрување на водоснабдувањето. Моментно во градскиот резервоар пристигнуваат 135 литри вода во секунда. Од претпријатието посочуваат дека видно е зголемена потрошувачката на вода и апелираат за нејзино рационално користење.

Автомобил удрил во жена во Дебар, истата се здобила со тешки телесни повреди

Тале Кристо — Wed, 21 Jun 2023 09:47:34 +0000

На 20.06.2023 околу 22.24 часот во Полициската станица Дебар било пријавено дека на ул.„Амди Леши“ во Дебар, патничко моторно возило „мерцедес“ со дебарски регистарски ознаки ,управувано од О.З.(45) од Дебар, удрило во В.К.(47) од Дебар. Во несреќата, В.К. се здобила со тешки телесни повреди, констатирани од лекар во Здравствена установа во Дебар. Увид на местото на настанот извршила екипа од Полициската станица Дебар.

Бил агресивен кон сопругата, а сега ќе се соочи со казната – кривична за маж од Дебар

Ивана Ефремовски — Tue, 23 May 2023 16:24:10 +0000

ОВР Дебар поднесе кривична пријава против П.М.(55) од Дебар поради постоење основано сомнение за сторено кривично дело „загрозување на сигурноста“. Тој, на 29.04.2023 во семејниот дом во Дебар агресивно се однесувал кон неговата сопруга и ѝ се заканувал со остар предмет.

Во дебарската гимназија образованието го завршуваат 152 ученика, речиси сите пријавиле државна матура

Тале Кристо — Mon, 15 May 2023 13:37:56 +0000

Во единственото средно училиште во Дебар, гимназијата „28 ноември“ средното образование, во учебната 2022/2023 година, го завршуваат 152 ученика. -Во нашето училиште годинава образованието го завршуваат 152 ученика. Гледано по наставен јазик 97 од матурантите се од паралелките на албански додека 55 на македонски наставен јазик. Од вкупниот број дури 95 отсто се пријавени за државна матура. Тоа потврдува, дека нашите ученици се определени да го продолжат натамошното школување, изјави за МИА, Рамадан Имери, директор на ова образовна установа. Според него ова е бројка на ученици кои редовно следеле настава, додека матура ќе полагаат уште 33 вонредни ученици, од нив 21 со настава на албански и 12 на македонски јазик. Што се однесува до уписот на ученици во прва година, за новата 2023/2024 учебна година, Имери нагласува дека можност за упис имаат 272 ученика во 8 паралелки. Од нив три паралелки, со 102 ученика се за настава на македонски и 5 паралелки или 170 ученици за настава албански наставен јазик, сите гимназиска насока.