НАЈНОВО ИСТРАЖУВАЊЕ: Мачките ја намалуваат анксиозноста кај децата со аутизам

Магдалена Андонова — Mon, 26 Apr 2021 10:06:28 +0000

Познато е дека домашните миленици придонесуваат за подобро расположение на нивните сопственици… Ново истражување на Истражувачкиот центар за интеракција меѓу луѓето и животните при Колеџот за ветеринарна медицина во Мисури (САД), посочува дека вдомувањето и одгледувањето мачки може да ја намали анксиозноста и да ја подобри емпатијата кај децата со нарушување од аутистичниот спектар на болести АСД. Трудот објавен во американскиот „Журнал“ за педијатриска нега посочува дека децата со аутизам доживеале значително зголемување на социјалните вештини по спријателувањето со мачки. Тоа значи – опаѓање на проблематичното однесување, како што се агресивност, хиперактивност и невнимание, односно помала вознемиреност. Д-р Гречен Карлајл, научник од Истражувачкиот центар, ги анализирала податоците на над 700 семејства кои поседувале мачка како домашно милениче. Таа открила дека, и покрај одговорноста за миленичето, и децата со аутизам и нивните родители пројавиле позитивни резултати и промени во однесувањето. – Некои од најголемите предизвици со кои се соочуваат децата со аутизам вклучуваат вознемиреност и тешкотии во комуникацијата. А, миленичињата можат да помогнат во зголемувањето на социјалната интеракција и да ја намалат анксиозноста, па така – тие не се само корисни во обезбедувањето спокој и поддршка на децата со аутизам, туку и за нивните родители, објаснува д-р Карлајл. Истражувачите се надеваат дека резултатите од ова истражување ќе поттикнат поголем број семејства да размислат за вдомување мачки. (МИА)

Се разгледува можност за излегување за време на полициски час на деца со аутизам

Дарко Андоновски — Tue, 14 Apr 2020 15:50:40 +0000

Министерот за здравство Венко Филипче на денешната прес конференција наведе дека и покрај повеќето барања за излез за време на полициски час на деца, утре ќе се разгледа само барањато од родителите на децата со аутизам, нагласувајќи дека доколку се дозволи излез за сите деца, мерките ќе немаат ефект. – Разгледувавме повеќе предлози, повеќе мерки, повеќе сугестии, сепак излегувањето макар и со еден родител ја остава можноста да се соберат помали или поголеми групи околу станбените објекти, можеби и во мали паркови околу зградите, местата за живеење што практично ќе направи да немаат ефект мерките за домашна изолација, истакна Филипче. Тој рече дека единствено нешто кое утре ќе се разгледува е барањето за тие деца на кои излегувањето им е дел од рутината, а имат претходна здравствена состојба. – Стигна едно барање на родителите на децата со аутизам за кое што сметаме дека треба да се разгледа и да се излезе во пресрет, сега да видиме на кој начин тоа да се направи. Има една одлука за лица со посебни потреби, меѓутоа има една група на деца со аутизам кои во било кој дел практично треба да им се дозволи излегување заради тоа што тие веќе до сега имаат воспоставено една рутина и ако таа се смени може дополнително да ја комплицира состојбата во смисла на тоа, ако сега завземале некоја рутина, изменување ќе доведе до дополнителна компликација, констатираше министерот. Тој посочи дека во текот на утрешниот дека ќе се дискутира за тоа на Комисијата за заразни болести. – Сметам дека сите други навистина треба да се стрпат, знам дека е тешко, дека не е лесно, меѓутоа ова е нешто што мора секој да го издржи заради тоа што само на тој начин очекуваме ефект од овие мерки, потенцираше Филипче.

деца со аутизам – Kurir.mk

НАЈНОВО ИСТРАЖУВАЊЕ: Мачките ја намалуваат анксиозноста кај децата со аутизам

Се разгледува можност за излегување за време на полициски час на деца со аутизам