деца со посебни потреби – Kurir.mk

Нека биде ова пример за другите училишта: Погледнете што добија децата со посебни потреби во Прилеп (ВИДЕО)

Ивана Ефремовски — Wed, 22 Jun 2022 15:01:06 +0000

Од некого малку, за друг е многу. Секое дете заслужува добри услови во градинките и училиштата, а посебно е важно да се исполнат потребите на децата со посебни потреби. Тоа успешно го реализира основното училиште „Климент Охридски“ во Прилеп. Директорот на училиштето Ахил Јаков ја прикажа комплетната реконструкција на тоалетот за децата со посебни потреби. Еве што напиша тој на својот Фејсбук профил: Чест и гордост ми е да ја прикажам комплетната реконструкција на тоалетот за децата со посебни потреби на нашето училиште. Огромен и макотрпен проект кој никако не можеше да се оствари ако не ми помогнеа општествено одговорните фирми и луѓе во моето опкружување. Посебна благодарност до: Ангромеханика, Матадор, Пост експрес, Авто Контрол -Прилеп, Марфил-Прилеп, Техно Мега-Прилеп,советникот на Вмро-Дпмне Др.Кире Јоноски и вредната рака на Мастер принтинг! И како што вели онаа народната: Да имаш пари а да не дадеш..е исто како никогаш да си немал Благодарност од се срце и од мое име и од името на децата со посебни потреби

Тие се ПОСЕБНИ, а другите имаат чудни ПОТРЕБИ

Ивана Ефремовски — Tue, 16 Feb 2021 12:05:32 +0000

Децата со посебни потреби имаат скромни желби. Бараат само љубов и прифаќање од околината. За жал, во Македонија сфаќаат дека овие желби тешко се остваруваат. Кога од Дедо Мраз сакавме да нарачаме најскапи играчки, многу на број, родителите ни објаснуваа дека таа желба не може да ни се исполни бидејќи тој треба да купи и за другите деца. Вистината беше дека тие немаат пари да ни го овозможат сето тоа што го пишувавме во писмата. Но родителите на овие деца, посебните деца на посебните родители, секој ден треба да смислуваат нови изговори. Да ја голтаат грутката која боли поради неправдите, да го правдаат тоа за кое оправдување нема, да трагаат да обезбедат нешто кое ниту со пари се купува, ниту некаде може да се најде. Трнлив им е патот, секој ден минуваат низ истите пречки, а и тие, како и нивните деца, имаат скромни желби. Имаат замислено пат на кој соседите, роднините, соучениците им ставаат трње секој ден. Дијагнозите со кои се соочени своевремено им се чинеле како најголема болка со која мораат да живеат. Но ако таа болка е рана, секој ден околината им става сол на раната, за да боли и пече уште повеќе. Тие се посебни, а дел од луѓето имаат чудни потреби. Сакав да кажам луди, ненормални потреби, но ајде да ги наречеме чудни. Луѓето имаат потреба да осудуваат, да гледаат со чуден поглед, да нафрлат некој недоличен коментар, да го дистанцираат своето дете од овие деца, да се повлекуваат и самите. До тие кои ги игнорираат овие дечиња:Не грижете се, не се заразни нивните болести, но пеколна е вашата неинформираност, суета, себичност и злоба. Детето е одраз на родителите. Посебните деца од своите родители ќе научат што значи да се биде храбар борец, посветена личност, добар човек... Што ќе научат децата кои на игралиштата се влечени за рака за да не им се доближи тој “чудниот“, “збунетиот“, “досадниот“, “нападниот“?... Ќе научат да бидат себични, да не знаат што е љубов и емпатија, ќе научат да бидат добри само за мама и тато, но лоши луѓе за општеството. Погледнете ги поубаво децата со посебни потреби. Ќе видите дека нивните насмевки се поискрени од другите насмевки, дека нивните очи зрачат топлина која не сте ја виделе кај никој друг, нивните прегратки се потопли од туѓите. Подајте им рака, а ако не сакате да им помогнете, барем не правете го спротивното. Патот по кој одат не е вашиот пат за да имате право да кажете дека ви пречат по било која основа. Изминатиов период се запознав со Весна, Даниела и Дарко. Родители на деца со посебни потреби. Побарав од нив да направиме приказни за нивните животи и животите на нивните деца, со единствена цел – да ја подигнеме свесноста за оваа група. Мислев дека ќе бараат измени во закон, мислев дека како нивни најголеми проблеми ќе наведуваат што се недостасува во нашата држава за овие деца да имаат нормално образование, заштита од институциите. Очекував овие проблеми да ги направиме аларм до институциите, да ги повикам да помогнат во секој сегмент и финансиски за да им олеснат на овие семејства. Овие проблеми навистина постојат, но посебните родители не ги издвоија како најголема болка. Најмногу ги боли што нивните деца не се прифатени од околината. Ги болат неправдите кои ги трпат секој ден – во продавница, во маалските игралишта, во маркетите, во автобусите, на улица... Неправдите кои им се нанесуваат од другите деца и од другите родители. Зошто ова толку ги боли? Затоа што истите ги тераат да направат три чекори назад по едниот напред кои ги прават заедно со нивните деца. Каков е тој разум на другите што има чудни потреби да ги отфрли различните? Мора да престане селекцијата на децата со кои ќе си игра вашето дете, според нивната здравствена состојба. Тие деца имаат посебни потреби, но не заборавајте дека се само деца кои ги имаат истите потреби како и вашето дете. За дијагнозата си примаат терапија. Но нема лекови што ја лекуваат болката која им ја нанесувате секој ден отфрлувајќи ги и неприфаќајќи ги. Доста со тие предрасуди! Престанете да бидете трн на нивниот пат само затоа што на нив гледате како на трн во вашето око. Тоа се ДЕЦА. Деца како вашите деца. Деца кои имаат потреба од љубов и прифаќање. За државата и нејзината негрижа кон овие деца ќе продолжам да раскажувам низ приказните на родителите. Го вклучивме алармот и исклучување нема. Ќе го слушнеме нивниот крик за помош, сведочејќи на нивниот молк кој кажува многу повеќе. Многу судбини ќе бидат прераскажани како низ приказните кои можете да ги прочитате подолу:

Кристијан е дете со посебни потреби, а неговата мајка е херој: Била жртва на насилство, а секој ден води нова битка за своето дете

По објавата на КУРИР: Тагата стана среќа во приказната на мајката-херој Весна и нејзиниот син Кристијан – семејството добива социјален стан

Мајка на дете со пречки во развојот ги открива проблемите и бара помош: „Најтешко ми е што другите деца го избегнуваат син ми“

Секој ден е нова борба против неправдите: Марко има аутистичен спектар, еве кои се најголемите проблеми на овие деца и нивните родители

Ивана Ефремовски

Неодговорност на владата, децата со посебни потреби без асистенти

Магдалена Андонова — Tue, 15 Sep 2020 08:49:37 +0000

И додека слушаме секој ден како кажуваат надлежните дека се залагаат за квалитено образование и како се грижат за лицата со посебни потреби, родителите на овие ученици сведочат дека нивните деца се заборавени од властите. Имено учениците со посебни потреби непосредно пред почетокот на школската година, немаат асистенти кои по закон треба да им ги обезбеди Министерството за образование. И додека родителите се жалат, од надлежното министерство за образование и наука, министерката Мила Царовска вели дека има простор да се ангажираат асистенти, но оти нема интерес. Асистентите со своја приказна велат се водат како хонорарци и работат цел месец за 7.500 денари. Осумгодишиот Огнен од Ѓорче Петров од први октомври треба да почне да оди во прво одделение. Малиот Огнен е со аутизам и со оглед на тоа во текот на наставата има потреба од образован асистент. Но, иако Законот за основно образование му гарантира такво право, постои можност Огнен да има застој во наставата. Причината е недостиг на асистенти. Неговата мајка која сама се грижи за него, за ТВ21 вели дека државата воопшто не се грижи за децата со посебни потреби. -Можеби моето дете ќе добие асистент оваа година, ама можеби уште десет деца ќе останат без асистенти затоа што МОН нема програма за работа за аутистичните деца, ниту онлајн програма, ниту работа во училиштата. Немаат сите родители финансии да им обезебедат на децата личен асистент приватно. Јас како самохран родител, мајка на две деца од кои едното е со аутитстичен синдром, ме прашува ли мене некој дали можам да опстанам со неговите 7500 денари кои ми ги дава државата, вели мајката на малиот Огнен. Во општина Ѓорче Петров, 20 родители доставиле барање за образовен асистент, но се пријавиле само 7 асистенти. Дефектозолите се жалат и велат дека не прифаќаат работа се платени само 7500 денари. Дефектологот сокој разговаравме вели дека има работа цел месец, а ги ангажираат како хонорарци, а ко се разболат и не одат на работа им се одбива од средствата. Тие порачуваат министерката Мила Царовска да проба да живее еден месец со 7500 денари. Инаку, министерката за образование, Мила Царовска, вели дека може да обезбеди 422 асистенти, колку и што се потребни, но нема заинтересираност. Прашањето за образовните асистенти е регулирано со измените на Законот за основно образование кои стапија на сила во август 2019 и оттука ова прашање е од делокругот на работењето на минситерството за образование. Врз основа на Законот за основно образование, за поддршка на учењето за учениците со попреченост основното училиште обезбедува: образовен асистент, личен асистент, соодветна стручна поддршка од центар за поддршка на учењето, инклузивен тим и асистивна технологија по препорака на стручното тело за процена и во согласност со индивидуалниот образовен план или модифицираната програма.

Хуманитарна акција на МУНА (Асоцијација на Обединетите Нации на Македонија) за децата со посебни потреби од Куманово

Дарко Андоновски — Thu, 23 Jul 2020 07:55:11 +0000

На 10 јули (петок) беше организирана хуманитарната аукција „Limitless art” на која беа претставени делата на уметниците Влатко Тасевски и Марија Харпер. Аукцијата беше организирана од страна на невладината организација „МУНА“ и се одвиваше со наддавање во живо во комплексот Капан Ан во Скопје. За време на аукцијата беа запазени сите мерки за превенција и заштита од Ковид-19, беа обезбедени маски за сите посетители и имаше прописно растојание.Преку оваа аукција успешно беа собрани средства за децата со посебни потреби од специјалните паралелки на Основното училиште „Браќа Миладиновци” во Куманово. На настанот беше присутен и специјалниот рехабилитатор и едукатор на децата со посебни потреби Тино Шаботиќ како претставник на училиштето. Со собраните средства МУНА успеа да обезбеди УВ лампа за дезинфекција, статичен велосипед и други реквизити за вежбање специјално наменети за деца со посебни потреби, како и соодветен тепих за училницата. “Асоцијација на Обединетите Нации на Македонија” или скратено “МУНА” е релативно нова невладина организација посветена на информирање и ангажирање на граѓаните за работата, целите и вредностите на ООН .Акцентот на нивната работа се приоритетните области од сферата на ООН како што се човековите права, заштита на животната средина, кампањи за подобрување на јавното здравство, родова еднаквост, мир и безбедност, преку организирање на различни хуманитарни и информативни настани со цел подигање на свеста кај луѓето за најважните вредности во целиот свет. Покрај настани од хуманитарен карактер МУНА активно организира работилници, дебати, симулации каде што на учесниците им се дава платформа да ги подобрат своите ораторски вештини и да ја изоштрат својата способност за критичко мислење. Сите настани и активности се најавени на нивната ФБ и Инстаграм страна каде што секој заинтересиран може да стапи во контакт со тимот на оваа невладина организација.

СКАНДАЛ: Асистентите на децата со посебни потреби на општина Карпош од јануари до денес добиле едвај 3 илјади денари

Дарко Андоновски — Wed, 20 Mar 2019 09:15:53 +0000

Програмата за општинско корисна работа, на почетокот на учебната 2017/18 година, Министерството за труд и социјална политика во соработка со Министерството за образование и наука, обезбеди средства за ангажирање на 106 образовни асистенти и 34 лични асистенти за деца кои посетуваат настава, со што е зајакната и поддршката на децата со попреченост во образовниот процес. Вака гласи дел од проектот кој што е објавен на страната на Министерството за труд и социјална политика. Точно така обезбедени се лични и образовни асистенти. Но што со нив? Имате слушнато дека проектот се одвива во најдобар ред, дека оние кои што се вклучени како лични или пак образовни асистенти се луѓе со голема душа што сакаaт да помогнат на оние на кои им е најпотребна нашата помош. Да ја работи оваа работа не може секој. -Ние секојдневно се справуваме со нови предизвици, не знаеме дали денес нашиот корисник ќе има епилептичен напад, агресија, анксиозен напад итн. Секој ден за нас претставува нов предизвик, нова приказна. Работиме со прекрасни личности, се поврзавме секој на посебен начин со нив, најдовме заеднички јазик. Секој нов ден е нова приказна за нас, за нивните родители, за самите деца. Се трудиме, даваме се од себе да гледаме како тие се движат во нагорна линија, како напредуваат, но не секогаш е така. Некогаш сме полни со разочарување. Зошто? Денес е 20 Март, плата нема за личните и образовни асистенти. Плата за Февруари. Неколку пати некој од нас се обратија до општините, до UNDP но конкретен одговор нема, ова за КУРИР го потврдија дел од вработените асистенти низ училиштата во Карпош. Oбразовните асистенти се незадоволни и се чувствуваат изманипулирани од Надлежните институции како причина за револт и незадоволство се наведени следните точки: -Ветуван им е договор за вработување од лани но за жал се уште немаат, работат 10 месеци има прекин за време на летниот распуст па потоа имаат нов договор, -Доцнење на плата, која лани изнесуваше 5.000 денари. -Немаат здравствено и пензиско осигурување, -Не им тече стаж, -Немаат трошоци за храна и превоз.

„Дружење без граници“: Се отвора бесплатен центар за инклузија на децата со посебни потреби во секојдневниот живот, пријавете се!

Дарко Андоновски — Wed, 28 Nov 2018 11:35:50 +0000

„Дружење без граници“ е проект на пет ученици од училиштето САБА од Скопје преку кој ќе се отвори дневен центар за едукација, забава и социјализација за ученици со посебни потреби од основните и средните училишта од Скопје. Проектот победи на UPSHIFT повикот за социјално претприемништво, организиран од CEED Hub Скопје, а поддржан од Фонд за иновации и технолошки развој и Уницеф. Инклузијата на ученици со посебни потреби во секојдневниот живот, во училиштето и општество е многу важен дел од нивниот развој. За жал, по часовите тие ученици немаат простор и место каде што можат да се дружат, да се социјализираат, забавуваат и креативно да се изразуваат. Тоа многу често може да доведе до проблем на несоцијализација. Во Скопје, па и во Македонија, не постои центар каде што овие деца би можеле неколку пати во неделата, во нивното слободно време, да дојдат, да учат преку игра и забава и да се дружат заедно со други деца. Исто така, тие ученици во слободно време не можат да одат на курсеви по јазици, спортување или некое друго хоби, бидејќи такви специјализирани курсеви нема. Ова е голем проблем и за родителите/старателите кои се соочуваат со потешкотии на социјализирање на нивните деца и изнаоѓање начини како тие деца да го поминуваат слободното време. Затоа одлучивме преку нашиот проект да создадеме еден центар кој ќе се вика „Дружење без граници“ во кој ќе им овозможиме на децата со посебни потреби од нашиот град, да дојдат да се дружиме, да играме разни игри, да научиме нешто заедно и да се забавуваме. Центарот ќе го водат учениците од ова училиште креатори на овој центар заедно со нивниот ментор и дефектолог. Центарот ќе започне да работи на 3-ти декември 2018. Првата работилница ќе започне во 19 часот. Работилниците ќе се одржуваат во просториите на училиштето САБА. Центарот „Дружење без граници“ ќе работи 2 пати неделно во попладневните часови и ќе овозможи голем број на деца со посебни потреби да доаѓаат и преку различни игри и методи на неформално образование да се запознаат помеѓу себе и да научат нови работи од секојдневниот живот. Ова се дел од активностите кои ќе бидат дел од нашиот центар: - Тим билдинг активности за развој на тимскиот дух - Учење преку игри и квизови - Изработка на проекти преку кои ќе се учат нови работи од областа на општеството, културата, географијата, историјата и слично. - Кратки глуми на различни теми за развивање на драмски способности. - Гледање филмови поврзани со одреден период од годината или празник. - Учење танци од различни култури. - Заедничка прослава на родендени - Во зависност од периодот од годината ќе се организираат работилници на кои ќе се изработуваат различни производи (честитки, новогодишни украси, мартинки, накит, ќе се цртаат слики и слично). Производите ќе бидат изработени од самите ученици. Неколку пати во годината ќе се организираат базари на кои изработените производи ќе бидат изложени со цел родителите на децата кои ќе го посетуваат центарот, нивни пријатели, роднини или наставници да може да видат што тие сработиле и да ги купат производите по симболична цена. Сите заинтересирани за учество во работилниците може да се пријават на: 077/877- 697