дејан манасков – Kurir.mk

Дејан Манасков е пред потпис со Еурофарм Пелистер

Бошко Тасиќ — Tue, 29 Aug 2023 04:36:35 +0000

Дејан Манасков е трансфер во Е.Пелистер, во шампионот на Македонија. Некогашниот ракометар на Металург, потоа на на РНЛ, Вецлар, Веспрем ова лето се раздели со Вардар, има немколку понуди на маса од неколку клубови, а со Е. Пелистер имало контакти. Сега останувада се види дали тие преговори ќе вродат со плод и левото крило ќе се пресели во Битола.

Манасков си оди, Томовски останува, Вардар има шест нови ракометари!

Ристе Здравков — Wed, 19 Jul 2023 10:22:40 +0000

Со новата раководна структура на Вардар неодминливи се подновувањата и во играчкиот кадар, особено откако од тимот си заминаа важни играчи. На денешната прес-конференција, Борко Ристовски потврди дека Дејан Манасков е исто така еден од оние кои си заминаа. Тој го дополнува списокот во кој се Филип Талески, Куни Моралес, Дутра Фереира и Андреј Добрковиќ. На местото на петмината кои си заминаа плус Стојанче Стоилов, кој премина во тренерската структура на клубот, доаѓаат шест нови ракометари. Србинот Марко Срдановиќ е изборот за наследник на Манасков на левата крилна позиција. Понатаму, меѓу шесте нови играчи има најмногу леви бекови, во прв ред синот на Владимир Петриќ, Стефан Петриќ, кој дојде од Партизан, заедно со младинските репрезентативци на Португалија Нилтон Мело и Ансер Родригез. Можеби најважни ќе бидат засилувањата на позиција среден бек, каде што досега единствено Мартин Карапалевски играше постојано и стандардно. Доаѓа јапонската сензација Косуке Јасухира, како и Словенецот Матија Николиќ, а Карапалевски и понатаму останува во тиомт. Нема корекции на десната надворешна линија, каде што останува само Томи Јагуриновски, но Борко Ристовски не исклучи можно дополнување на ростерот. „До овој период имаме потпишано шест играчи, за кои Недановски и Стоилов проценија дека им се потребни. До крајот на подготвителниот период можно е да приклучиме уште некој, ако тренерите проценат дека е потребно.“ ЕКИПА НА ВАРДАР ЗА СЕЗОНА 2023/24 голмани: Мартин Томовски, Васил Гогов леви крила: Марко Срдановиќ, Марио Стојановски леви бекови: Стефан Петриќ, Нилтно Мело, Ансер Родригез, Марко Мишевски средни бекови: Матија Николиќ, Косуке Јасухира, Мартин Карапалевски десни бекови: Томислав Јагуриновски десни крила: Гоце Георгиевски, Дарко Ѓукиќ, Ален Ќосевски пикери: Михаил Аларов, Милан Лазаревски, Стефан Атанасовски

РФМ со суспензија за Владо Недановски и Дејан Манасков

Бошко Тасиќ — Sat, 03 Jun 2023 06:42:14 +0000

Ракометната федерација на Македонија изрече суспензија од еден натпревар за членовите на Вардар тренерот Владо Недановски и крилото Дејан Манасков. Вардар во последното коло од плеј-офот во Суперлигата беше поразен од РК Алкалоид со што го загуби второто место во домашниот шампионат, а по мечот РФМ отвори истрага против Недановски и Манасков. Недановски доби суспензија од четири, а Манасков од два натпревари. Двајцата се казнети поради вербални навреди. Не е потенцирано кој кого и што навредувал, туку само се наведуваат членовите 112 и 114 во кои се става до знаење дека суспензијата е доделена по повод навреда на службени лица или играчи за време и по крајот на натпреварот. Прашање е дали Манасков би ја одработил казната на почетокот на следната сезона, бидејќи мали се шансите да остане дел од Вардар.

Манасков: Играме катастрофално, очигледно немаме квалитет за вакви натпревари

Ивана Ефремовски — Sun, 15 Jan 2023 18:51:29 +0000

„Играме катастрофално, тоа што го кажав пред натпреварот се исполни. Кажав, ако играме како против Норвешка ќе загубиме со десет гола и тоа се исполни“. Ова го истакна ракометарот Дејан Манасков по поразот кој Македонија го доживеа од Холандија вечерва. -Очигледно немаме квалитет за вакви натпревари. Овие средби се играат со памет и срце, а без мотивација и со загубени глави не се игра. Во периодот кога колку-толку се вративме, пак ги направивме истите грешки како претходно. Мислам дека тоа се должи на неискуството на одредени играчи, имаме доста дебитанти, што и не е оправдуввање. Ќе собереме сили, ќе се обидеме да ја победиме Аргентина и да се пласираме во вториот круг, барем достоинствено да се простиме од СП, а таму со Бог напомош, рече Манасков.

Манасков до навивачите: Фала ви за жртвата за да нè бодрите

Бошко Тасиќ — Fri, 13 Jan 2023 22:37:30 +0000

Дејан Манасков одигра солиден натпревар, но не успеа да и помогне на Македонија против фаворизираната Норвепка која го отвори Светското првенство (СП) со посакуван триумф (27-39). По шеесетте минути во Краков, еден од најискусните играчи во селекцијата им се заблагодари на навивачите за поддршката, а за натпреварот истакна дека против себе „црвено-жолтите“ имале моќник. „Сакам да им се заблагодарм на нашите навивачи за поддршката. Направија многу жртви да дојдат тука, патуваа со автомобили по цели ноќи и сакам да им оддадам признание. Кога играте против селекција како Норвешка секогаш е тешко. Знаеме какви играчи имаат. Ако не играте максимално и правите технички грешки, невозможно е да се игра и видовте како во пет минути го решија прашањето на победникот. Ова е само почеток, нашите шанси ги гледаме против Холандија и Аргентина“, изјави крилото.

Манасков: Ако не веруваме дека може да ја поминеме групата, не треба да патуваме на СП

Ристе Здравков — Tue, 20 Dec 2022 12:55:09 +0000

Поради повреди, Дејан Манасков ги пропушти последните две големи репрезентативни натпреварувања, но сега искусното крило вели дека е подготвен повторно да ја радува македонската јавност на Светското првенство кое започнува за помалку од еден месец. „Мило ми е што повторно сум тука, помеѓу овие момци. Со нетрпение го чекам ова првенство. Ова е нова генерација, нов спој на ракометари, искуство и младост. Тука сме да им помогнеме на помладите, ние поискусните ја прифаќаме улогата на лидери во селекцијата. Треба добро да се подготвиме и сите да го дадеме максимумот“, вели Манасков. Ракометарот кој зад себе има многу одиграни важни мечеви на Светски и европски првенства вели дека има респект кон секој противник, но и дека мора да се верува во сопствените сили, па затоа нашата цел е да се помине групата. „Во спортот секогаш постојат изненадувања, така што ако не веруваме, не треба да патуваме таму. Силно веруваме и сме убедени дека ќе ја поминеме групата. Противниците се тешки, силни, сериозни. Се собираме рано, имаме доволно време да се подготвиме, да ги анализираме сите противници и да направиме тактика за секој од нив. Најважно е да бидеме здрави, комплетни и сплотени како репрезентација за да стигнеме до посакуваното. За Норвешка не треба да се трошат зборови, Холандија изгледа многу моќно на физички план, а тука е и Аргентина. Стручниот штаб ќе реши што е најдобро како тактика за секој од ривалите“, вели Манасков.

Манасков: По два пропаднати трансфери, решив да му помогнам на Вардар!

Ристе Здравков — Fri, 02 Sep 2022 12:58:16 +0000

Македонскиот репрезентативец Дејан Манасков се очекува да биде ударна сила на Вардар 1961 по враќањето во овој клуб. Трансферот во скопскиот тим беше изненадувачки за многумина, а крилото веќе покажа дека ќе биде сериозно засилување. Манасков во гостување на интернет емисија реши да проговори за одлуката за кам-бек во Вардар. Тој откри дека претходно му пропаднале два трансфери, па решил да се врати и да му помогне на својот поранешен клуб. „Понеколку години во странство и повредата која ме оддалечи од терените, во недостаток на опции и пропаднати два трансфери, одлучив да ја прифатам понудата на Вардар. Сакам да му помогнам на клубот да дојде до посакуваните цели, да ја освои титулата и пак да игра во Лигата на шампионите. Дисквалификацијата беше нефер, ама тука има други фактори за кои не сакам да зборувам. ЕХФ одлучи поради долгови да го суспендира клубот, а тоа е на штета на македонскиот ракомет. Оваа година ќе играме во Суперлигата и СЕХА. Клубот е на стабилни нозе, можеби не е буџетот висок каков што беше, ама има пристојни финансии. Сметам дека до крајот на оваа сезона ќе се обезбеди иднината и Вардар пак ќе има силна екипа“, кажа Манасков во гостувањето во „Жешко столче“. Својата играчка кариера Манасков ја започна во Металург. Во 2014 година замина во Германија и играше во Вецлар, пред да се врати и да мине една сезона во Вардар. Следеше трансфер во Рај Некар Левен, ама и таа германска авантура траеше една година, по што Манасков прејде во Веспрем и играше во Унгарија до ова лето.

Дејан Манасков нов ракометар на Вардар 1961

Курир — Sat, 30 Jul 2022 11:46:20 +0000

– Долгогодишниот македонски репрезентативец Дејан Манасков ги засили редовите на актуелниот шампион Вардар 1961 и се врати во „црвено – црниот“ дрес по пауза од шест години. Манасков се враќа во актуелниот македонски шампион од редовите на унгарски Веспрем каде со успех настапуваше изминатите неколку сезони, како еден од најдобрите стрелци со 540 голови на 160 натпревари. Претходно Манасков настапуваше за Борец Велес, Металург, Вецлар и Рајн Некар. – Вардар добива брз, прецизен и искусен играч со големо меѓународно искуство со што екипата повторно гради силен, респектабилен и конкурентен тим и за следната сезона, соопшти попладнево македонскиот шампион.

Манасков брилијантен – даде десет гола за 40 минути!

Ристе Здравков — Sat, 14 May 2022 18:03:13 +0000

Тимот на Веспрем по фантастичната победа над Алборг во Лигата на шампионите, одигра уште еден добар натпревар. Унгарскиот гигант славеше над Дабас со 44-29, а најдобар на теренот беше македонскиот репрезентативец Дејан Манасков. Тој постигна десет погодоци од 11 обиди за четириесетина минути помина на теренот во „Веспрем Арена“. Веспрем е блиску да го освои првото место на табелата во регуларниот дел од унгарското првенство, а со тоа да ја има предноста на домашен терен во плеј-офот за титулата со ПИК Сегед.

Манасков по осум месеци се врати во тимот на Веспрем

Ристе Здравков — Thu, 12 May 2022 20:24:18 +0000

Македонскиот ракометен репрезентативец Дејан Манасков по долга пауза повторно е на теренот. Тој по осум месеци се врати во тимот на Веспрем на денешниот меч против Алборг во четврт-финалето од Лигата на шампионите. Манасков успеа да постигне и еден погодок во триумфот на Веспрем од 36:29. Реваншот се игра за шест дена на теренот на ривалот.