Демократска Бугарија – Kurir.mk

Бугарија: Кирил Петков не сака министри од ГЕРБ-СДС во неговата влада

Ивана Ефремовски — Mon, 24 Apr 2023 06:37:38 +0000

Не можеме да поддржиме влада со првиот мандат и не сакаме учество на министри од ГЕРБ-СДС во нашата влада, но сакаме влада, рече копретседателот на „Продолжуваме со промените – Демократска Бугарија“ (ПП-ДБ) Кирил Петков во емисијата „Во фокус“ на бугарската Нова Телевизија. - Нашите избирачи јасно ставија до знаење дека имаме мандат да постапуваме по политиките што ги ветивме. Никогаш не сме ветиле дека ќе има коалициска влада и нема шанси да отстапиме од овие ветувања, додаде Петков. Тој коментира дека „клучот“ е ПП-ДБ да предложи малцинска влада, а заедно со ГЕРБ-СДС да разговараат за политиките. - Според мене, многу е разумно, ако сакаат да видат каква влада ќе предложиме, да не поканат на состанок, на кој ќе одиме, рече Петков и објасни дека на таа средба ќе бидат претставени политиките и периодот во кој може да функционира евентуалната малцинска влада. (МИА)

„Демократска Бугарија“: Не е точно дека било поставено прашањето дали македонската амбасадорка да биде поканета на конститутивната седница на бугарското Собрание

Ивана Ефремовски — Fri, 14 Oct 2022 07:56:11 +0000

За време на средбата на претставници на парламентарни партии во новото Народно собрание на Бугарија, не било покренато прашањето дали амбасадорката на Македонија, Агнеса Руси Поповска да биде поканета од администрацијата на Собранието, на конститутивната седница на новиот бугарски Парламент, изјавија за дописникот на МИА од Софија од прес-ценарот на „Демократска Бугарија“. Оттаму, како што јави дописникот на МИА од Софија, беа категорични дека според нивните претставници кои учествувале на средбата, станува збор за апсолутно неточна информација, дека било поставено прашањето дали Руси Поповска да биде поканета или не на првата седница на 48-то Народно собрание. Претставниците на политичките партии во новиот бугарски Парламент, потсетува дописникот на МИА од Софија, вчера се договорија да не ги поканат амбасадорите на Русија и на Белорусија во Софија, поради руската агресија во Украина. ГЕРБ-СДС, Промената продолжува и Демократска Бугарија се изјаснија против присуството на амбасадорката на Русија во Софија Елеонора Митрофанова на првата седница на новоизбраното Народно собрание на Бугарија, што ќе се одржи на 19 октомври. (МИА)

Радев: „Демократска Бугарија“ ја турка земјата во војна

Ивана Ефремовски — Fri, 07 Oct 2022 18:20:28 +0000

Неверојатно е што на маргините на енергетската и економската криза, „Демократска Бугарија“ брза да ја турне земјата во војна уште пред да биде свикана првата седница на новоизбраното Народно собрание, изјави претседателот Румен Радев во Прага. Според него, тешко е да се поверува дека раководството на коалицијата „Демократска Бугарија“, која претендира за демократија и морал во политиката, може да користи директни лаги и манипулации. Румен Радев рече дека со целосно убедување не ја потпишал декларацијата на неговите колеги претседатели од Централна и Југоисточна Европа за пристапување на Украина во НАТО и додаде дека ќе работи против вмешаноста на Бугарија во војната во Украина. (МИА)

Иванов: Ако ДБ го добие третиот мандат ќе се обидеме да составиме новата бугарска влада

Ивана Ефремовски — Fri, 08 Jul 2022 11:09:56 +0000

„Демократска Бугарија“ (ДБ) е подготвена, доколку и биде доделен мандат, одговорно и дијалошки, ќе се обиде да направи сè што е можно за формирање нова влада во рамките на овој состав на Народното собрание на Бугарија, изјави претседателот на пратеничката група на ДБ, Христо Иванов. Како што јави дописникот на МИА од Софија, Иванов оцени дека ДБ се докажа со својата одговорност и подготвеност на дијалог, а следната година ќе се решат важни кризи за Бугарија. Тој додаде дека најдобро е да има влада во Бугарија, всушност дека најдобро би било да се формираше влада со првиот мандат. Според него, ако БСП го добие третиот мандат, тогаш ДБ ќе разговара за тоа прашање со нејзиното раководство. „Демократска Бугарија“ апелира претседателот Румен Радев да продолжи со консултациите со парламентарните политички партии. Доколку првиот мандат се покаже како неуспешен, според него, би било добро претседателот на Бугарија да одржи уште една рунда консултации пред да го врачи третиот мандат за формирање нова влада во рамките на 47. Народно собрание на Бугарија. (МИА)

Петков: Не треба на изборите да одиме со заеднички листи со „Демократска Бугарија”

Ивана Ефремовски — Tue, 21 Sep 2021 07:07:29 +0000

Коосновачот на политичкиот проект „Промената продолжува“ и доскорешен бугарски министер за економија, Кирил Петков, за Нова ТВ искоментира дека е многу среќен што слушнал дека Христо Иванов и Маја Манолова, лидерите на „Демократска Бугарија”и „Исправи се БГ. Доаѓаме ” сакаат да разговараат со нивната коалиција. И двете формации побараа разговор бидејќи тоа била една од нивните цели. Петков, меѓутоа, ја отфрли идејата за заеднички листи меѓу коалицијата „Промената продолжува“ и „Демократска Бугарија“ пред претстојните парламентарни избори, закажани за 14 ноември, изјавувајќи дека на изборите секој треба да се појави сам. Целта, рече Петков, е во новото 47. Народно Собрание на Бугарија да има 121 искрен пратеник. Тој посочи дека „Има таков народ“, партијата на Слави Трифонов, работеше добро со претседателката на 46. Народно собрание, Ива Митева, и со Мика Зајкова. Според него, „Има таков народ“ треба да го проголтаат своето его и да разберат дека не можат сами да управуваат. Потребно е обединување според заеднички принципи. Според Петков, „Промената продолжува“ станува нов политички центар во Бугарија. -Мора да им дадеме целосна демократија на гласачите да гласаат за цела палета – од најлево кон најдесно, додаде Петков. (МИА)