Денис Шмигал – Kurir.mk

Шмигал: Украина е подготвена да ги започне преговорите за влез во ЕУ до крајот на годината

Тале Кристо — Thu, 27 Apr 2023 20:20:01 +0000

Украина планира да ги исполни сите услови неопходни за почеток на преговорите за влез во Европската унија до крајот на оваа година, изјави денеска украинскиот премиер Денис Шмигал, јави ДПА. „Украина ги исполни сите седум препораки на Европската комисија што ги добивме кога го добивме статусот на кандидат за членство“, изјави украинскиот премиер на прес-конференција во Рим. Шмигал учествуваше на конференцијата за обнова на Украина чиј домаќин беше Италија. Тој денеска се сретна со папата Франциско во Ватикан. Киев ќе ги спроведе сите реформи потребни за влез во ЕУ, и покрај руската инвазија на земјата, рече тој. Шмигал истакна дека антикорупциските мерки што Киев веќе ги воведе „се целосно спроведени, како што Украина се договори со своите европски партнери“.

Украинскиот премиер сe надева дека неговата земја за две години ќе стане членка на ЕУ

Ивана Ефремовски — Mon, 30 Jan 2023 07:33:48 +0000

Украинскиот премиер Денис Шмигал има двегодишен графикон за обезбедување на членството на неговата земја во ЕУ, што сигурно ќе доминира во дискусиите на овонеделниот историски самит ЕУ-Украина – првиот што ќе се одржи на украинска територија, објави Политико. Според изданието, никој во ЕУ не мисли дека тоа е реално. Еврокомесарите ќе отпатуваат за Киев подоцна оваа недела пред Самитот в петок со украинскиот претседател Володимир Зеленски и шефовите на Европската комисија и Советот. Самиот Шмигал поставува тежок рок. „Имаме многу амбициозен план за влез во Европската Унија во следните две години“, изјави тој за Политико. „Значи, очекуваме дека оваа година, во 2023 година, веќе ќе можеме да ја одржиме оваа прелиминарна фаза од пристапните преговори“, рече тој. Минатата година францускиот претседател Емануел Макрон рече дека може да поминат „децении“ пред Украина да се приклучи на ЕУ, потсетува Политико. Дури и лидерите на ЕУ, кои го поддржаа кандидатскиот статус на Украина на нивниот самит во јуни минатата година, во приватни разговори признаваат дека изгледите за реално приклучување на земјата всушност се со години далеку. На крајот на краиштата, земјите кандидати како Србија, Турција и Црна Гора чекаат многу години – од 1999 година во случајот со Анкара, потсетува Политико. „Украина е загатка за ЕУ. Многумина тврдат дека Брисел има посебна одговорност кон Киев. На крајот на краиштата, гневот на Украинците беше поради одлуката на поранешниот претседател Виктор Јанукович, по налог на Русија, да се повлече од договорот за политичка и економска асоцијација со ЕУ, што го предизвика бунтот на Мајдан во 2014 година и го постави теренот за војна. Како што рече претседателката на Европската комисија Урсула фон дер Лајен: Украина е „единствената земја во која луѓето беа застрелани затоа што се завиткаа во европско знаме“, пишува Политико. Блиските сојузници на Украина во ЕУ, како што се Полска и балтичките земји, силно го поддржуваат притисокот за членство на Киев, гледајќи го како демократија која се спротивставува на агресорот. Сепак, многумина од старата гарда на ЕУ се многу повнимателни, посочува Политико. (МИА)

Шмигал: Украина доби две милијарди евра од ЕУ

Катерина Бојаџиева — Tue, 18 Oct 2022 11:46:37 +0000

Премиерот на Украина, Денис Шмигал денеска изјави дека земјата добила финансиска помош од две милијарди евра од Европската унија. „Дополнителните финансиски средства ќе помогнат да се покријат итните буџетски трошоци, особено за социјални и хуманитарни потреби“, објави Шмигал на Телеграм. Тоа е прва транша од пакетот од пет милијарди евра, усвоен по воената операција покрената од Русија.

Шмигал: При руските напади оштетени се 11 инфраструктурни објекти

Ивана Ефремовски — Mon, 10 Oct 2022 09:40:39 +0000

Премиерот на Украина, Денис Шмигал изјави дека се оштетени 11 инфраструктурни објекти во осум региони и во главниот град Киев во денешните руски ракетни напади. Според ситуацијата во 11 часот, оштетени се 11 важни инфраструктурни објекти во осум региони и градот Киев. Сега некои области се отсечени, потребно е да се подготвиме за привремени прекини на струјата, водоснабдувањето и комуникациите, објави Шмигал на Телеграм. Украинската армија соопшти дека Русија утрово истрелала 75 проектили во Украина, додека претседателот Володимир Зеленски изјави дека главната цел на руските напади била енергетската инфраструктура на земјата, а втората цел биле луѓето. (МИА)

Премиерот на Украина ќе го посети Вашингтон

Ивана Ефремовски — Sat, 16 Apr 2022 08:00:43 +0000

Делегација предводена од украинскиот премиер Денис Шмигал следната недела ќе го посети Вашингтон, пренесе Бгнес. Во делегацијата ќе бидат и министерот за финансии Сергеј Марченко и гувернерот на Централната банка Кирил Шевченко. Нивната посета се совпаѓа со традиционалната пролетна посета на Меѓународниот монетарен фонд и Светската банка. Се очекува Шмигал, Марченко и Шевченко да одржат билатерални состаноци со финансиски претставници на Г7 и да присуствуваат на тркалезна маса организирана од Светската банка за конфликтот во Украина. Настанот ќе биде прва можност за раководството на Украина лично да се сретне со голем број финансиски функционери од развиените економии од почетокот на руската инвазија врз Украина. (МИА)

Шмигал: Украина претрпе штета над 500 милијарди долари

Ивона Петрова — Wed, 16 Mar 2022 07:38:00 +0000

Премиерот на Украина, Денис Шмигал изјави дека неговата земја од почетокот на руската инвазија претрпе штета од над 500 милијарди долари. Тој, на вчерашната средба со лидерите на трите земји од ЕУ – Чешка, Полска и Словенија во Киев, истакна дека Русија по војната треба да плати за обновата на Украина. Шмигаl додаде дека Украина ќе побара финансиска помош од сојузниците.

Шмигал: Украина се префрла на воена економија

Ивана Ефремовски — Thu, 10 Mar 2022 22:54:31 +0000

„Заедно со целиот свет, ние продолжуваме да ја градиме нашата победа. За таа цел, Украина се префрла на воена економија. Енергетска безбедност и работа на критична инфраструктура. Одбранбено-индустриски комплекс. Агроиндустриски комплекс. Логистика. Успешното работење на овие сектори се исто така интегрални компоненти на нашата победа“, изјави вечерва премиерот на Украина, Денис Шмигал. Според него, една од суштинските теми на агендата на Владата е сеидбена кампања во регионите кои не се погодени од активни воени дејствија, пренесува Укринформ. -Наш приоритет се прехранбените култури. Ја интензивиравме работата со земјоделците во оваа насока за да може Украина целосно да ги задоволи потребите и да ја има потребната количина на храна, рече тој.