денови на германски филм – Kurir.mk

Денови на германскиот филм од 15 до 18 октомври

Ивона Петрова — Thu, 13 Oct 2022 07:00:54 +0000

Со проекција на филмот „Јас сум твојот човек“, добитник на Германската филмска награда за 2021 година, в сабота (15 октомври) од 20 часот во Кинотеката ќе биде отворен годинашниот фестивал Денови на германскиот филм. Фестивалот го организира Амбасадата на Германија во земјава, во соработка со Кинотеката, Балканскиот центар за соработка „Лоја“ во Тетово и Куќата на Европа во Струмица и Крива Паланка. Во наредните денови по отворањето, 16, 17 и 18 октомври, на програмата се и филмовите: „Рабије Курназ против Џорџ В. Буш“, „Светот ќе биде поинаков“ и „A E И О У – Брзата азбука на љубовта“. Деновите на германскиот филм задутревечер со поздравно обраќање ќе ги отвори амбасадорката на Германија Анке Холштајн. Покрај во Скопје, проекции ќе има и во Тетово, Кавадарци, Штип, Струмица, Крива Паланка, Куманово Кратово. Филмовите се на германски јазик, со превод на македонски и на албански. Влезот за проекциите во Кинотеката е 100 денари, а бесплатен во другите градови.

Денови на германски филм

Ивона Петрова — Wed, 01 Sep 2021 06:06:49 +0000

Со проекција на наградуваната драма „Берлин Александерплац“, вечер во летното кино „Мирно лето“ на Кинотека почнуваат Деновите на германски филм. Филмските денови ќе траат до 4 септември. Влезот е слободен, а поради актуелната ситуација со КОВИД и важечките заштитни мерки, секој гостин постар од 18 години при влегување ќе мора да приложи доказ за извршена вакцинација со барем една доза или доказ за прележаност не постар од 45 дена. Според програмата, утре ќе биде прикажан „Кожурец“, трогателно нежен филм за растењето и изјава за љубов кон Берлин, а на 3 септември публиката ќе може да го види „Рока го менува светот“, современа Пипи долгиот чорап-приказна за една храбра девојка. На 4 септември е пакетот кратки неконвенционални, автентични кратки филмови „Short Export 2021“ и уште една проекција на „Берлин Александерплац“. Организатори на Деновите се Германската амбасада и нејзините партнери, Гете Институт и Кинотека, а ќе ги отвори амбасадорката Анке Холштајн, на 1 септември во 20:00 часот.