депонии – Kurir.mk

Децата се гушат во ѓубре: Градинките во Тетово претворени во депонии

Ивана Ефремовски — Tue, 05 Sep 2023 08:27:43 +0000

Сите тетовски градинки без исклучок се места каде има огромни купишта смет оставени покрај преполните контејнери, па наликуваат на депонии среде урбана средина. Кај градинката Поток, комуналното претпријатие ги отстрани контејнерите од пред објектот, со цел да се оневозможи оставање смет пред самиот влез. Поставен беше само еден контејнер во дворот, одзади објектот за потребните на градинката. Но сега иако е во внатрешноста, и тој контејнер се полни и се создаваат поголеми купишта. Дел од соседите сметаат дека одговорноста е во вработените во градинката. - Се соочуваме со непријатна миризба, ѓубре низ цело маало и собирање на кучиња поради остатоците од храна што ги фрлаат од самата градинка. Не ни може да се седи во двор, ниту да се отвори прозорец. Ѓубрето е извор на бактерии, а деца играат и во градинката и во маалото, велат жителите кои се обратија до нашата редакција. Директорката на Општинската јавна установа детски градинки „Младост“-Тетово, Фатлинда Јаја вели дека во градинката Поток се соочува со несовесност на граѓани, пред сè од други населби и населените места. Објаснува дека секоја градинка има контејнер за свои потреби но дека тоа се злоупотребува од граѓаните кои и покрај преполните садови оставаат купишта смет. - Внатре во градинките контејнерите се предвидени само за потребите на градинките. Не создаваме многу смет. Главната кујна е во Тетекс, таму има повеќе смет. Во Поток се фрлаат само еднократни пелени. Сега има и случаи кога пример се шиша тревата па има малку повеќе, но одговорно тврдам поголемите количини смет се од граѓаните, погледнете каков смет е фрлен и ќе ви стане јасно. Таков отпад нема во градинките, изјави Фатлинда Јаја. Љуљзим Шаќири од Јавното комунално претпријатие (ЈКП) Тетово тврди дека тековно сметот се собира,а исто така потенцира дека граѓаните не треба да оставаат смет покрај преполните контејнери. - Кај што имавме контејнери, ги тргнавме од пред градинката Поток, моравме за потребите на градинката да ставиме еден внатре, пак фрлаат и соседите и од други места. Тековно се собира сметот, но има некои локации каде што граѓаните го сметаат како депонија и оставаат. Пример имаме некои рурални општини каде не се извршува соодветно собирањето на сметот како што треба од страна на фирми-концесионери па на граѓаните им останува сметот дома. Што прават тие, го носат сметот во Тетово и го оставаат покрај преполните контејнери. Ние пробуваме максимално да се подигаат контејнерите, намалени се количините смет што се остава, заминаа печалбарите, изјави Шаќири. Купиштата смет каде има остатоци од храна се причини многу бездомни кучиња да бидат присутни околу контејнерите. Така граѓаните се соочуваат и со уште една опасност да бидат нападнати од бездомните кучиња. - Таков проблем имаме кај градинката Спортски центар и тука сме почнале постапка да се отстранат контејнерите. Но пак проблем се несовесните граѓани кои оставаат се и сешто. Чуварите во градинките нема. А и да има што ќе прават со несовесните. Слики имаме како фрлаат кај контејнерите пред Тетекс. Цело Фалише фрла смет кај контејнерите пред Тетекс, цело Ѓермо и Дреновец носи во Поток. И внатре влегуваат за да оставаат смет. Пријавено е во СВР Тетово, дека ни го оштетија новото детско катче во дворот од градинката Поток, објаснува директорката Фатлинда Јаја. Според директорката, кај некои од градинките не помага ни тоа што има натпис на кој е назначено дека има видеонадзор, па и покрај тоа продолжува оставањето отпад пред контејнерите. Оставањето смет значи потенцијална опасност по здравјето на граѓаните, постојано предупредува докторот Ратко Давидовски од Центарот за јавно здравје, со специјалност по здравствена екологија и хигиена. - Самата непријатна миризба ја загрозува социјалната благосостојба, тоа е основен постулат на Светска здравствена организација. Покрај тоа, отпадот што е биоразградлив , а особено на топло време развива бактерии и така претставуваат ризик по јавното здравје поради опасност од појава на бактериски зарази, потенцира д-р Давидовски. За подобрување на состојбите, односно за посоодветно собирање смет, Општината во јуни 2022 донесе дополнителен број нови 15 полуподземни контејнери, како и 100 контејнери добиени како донација од турска општина. За полуподземните контејнери беа набавни и две специјални возила. Од 15-те полуподземни контејнери осум контејнери се од 3000 литри и седум од 5000 литри. (МИА)

Со години нема решение за депониите пред тетовските градинки

Ивона Петрова — Tue, 05 Sep 2023 08:26:51 +0000

Нула депонии во Аеродром во 2023-та година: Интензивни активности за чистење на јавните површини

Ивана Ефремовски — Tue, 10 Jan 2023 10:55:40 +0000

Активностите за чистење на јавните површини кои започнаа во 2022 година, продолжуваат и оваа година. Локалните комунални служби оваа работна недела ја започнаа со акција за чистење на депониите кои се наоѓаат на територијата на Општина Аеродром. Почнувајќи од вчера, денеска и во следните денови, се чисти депонијата што се наоѓа зад „Урбан Гарден“ на улицата „Трета Македонска Бригада“. Интензивните активности се спроведуваат на повеќе локации низ општината и ќе траат до крајот на овој месец. Истовремено, инспекциските служби се активни на терен и активно работат на санкционирање и вршат засилен надзор секаде каде што се забележува несоодветно одложување на отпадот. „Решавањето на проблемите на граѓаните останува во фокусот на нашето работење. Ги слушаме нивните проблеми и веднаш интервенираме онаму каде тоа е потребно. Oдржувањето на јавната хигиената е во фокусот и оваа година, a паралелно со тоа работиме и на подигнување на свестa кај граѓаните. Поради ова активностите за чистење на депониите кои ги започнавме лани, продолжуваат да се реализираат и оваа година, а паралелно се одвива и тековно чистење и одржување на Аеродром. Ова ќе биде година на промени во начинот на работата на комуналните служби, и со тоа општината веќе започна со највената реорганизација на начинот на одржување на јавната хигиена“, напиша градоначалникот Тимчо Муцунски на својот фејсбук профил. „Активностите за расчистување на депониите продолжуваат и следните денови. Свеста за екологијата и чистата животна средина е важна за секојдневното живеење и поради тоа апелираме до граѓаните да бидат одговорни и да дадат свој придонес во одржување на јавната хигиената. Воедно, апелираме до граѓаните во следните денови да ги дислоцираат своите автомобили од локациите каде ќе се спроведуваат акциите за чистење. На тој начин општинските служби ќе можат поефикасно да ги реализираат своите активности на терен. Општина Аеродром останува посветена на обезбедување здрава и чиста средина за граѓаните, преку секојдневните активности на комуналните работници и инспекциските служби“, велат од општината.

Се чистат сите големи и мали депонии во Општина Аеродром

Ивона Петрова — Tue, 26 Jul 2022 07:23:49 +0000

Заедно со службите на ЈП „Комунална хигиена“ неделава Општина Аеродром ја стартуваше големата акција за чистење на деловите од Општина Аеродром на кои во изминатиот период беше забележана поголема концентрација на отпад. Акцијата почна од Долно Лисиче, Горно Лисиче, Населба Лисиче, Ново Лисиче и Реонски центар, а ќе трае во текот на целата недела и ќе ги опфати сите делови на општината. Предвидено е да се чистат сите помали депонии што се создаваат во и околу контејнерите, а претставуваат грда слика за општината. -Истовремено, интензивно се работи на расчистување и на една од најголемите диви депонии во Општина Аеродром лоцирана кај мостот во Долно Лисиче што граничи со Јурумлери. За оваа голема акција се ангажирани голем број сезонски работници, а се користи тешка механизација, велат од Општината. Акцијата ќе продолжи и во наредните денови, при што ќе бидат целосно исчистени сите големи депонии на територијата на Аеродром. Општина Аеродром уште еднаш упатува апел до граѓаните својот кабаст, крупен и друг вид отпад да го оставаат на точно определени локации и притоа да се избегнува фрлање отпад на тревниците и на други јавни површини кои се за други намени.

Пожарот во Беровско локализиран, гореа депонии во Скопје, Делчево и Штип

Магдалена Андонова — Sun, 24 Jul 2022 07:10:25 +0000

Пожарот што од пред два дена беснее на потегот во планските ридови помеѓу беровските селата Будинарци и Митрашинци е локализиран вчера попладне во 17 часот. Како што информира Дирекцијата за заштита и спасување (ДЗС), тимовите и сите други учесници во гаснењето на пожарот се вратени во базите, а на терен остануваат дежурни екипи од Шумското стопанство „Малешево“ – Берово. Во објава на својот профил на Фејсбук, ДЗС посочува дека во текот на денешниот ден ќе се направи контрола на теренот. Во гаснењето на пожарот учествуваа тимови од ПОЗС Берово, Валандово и Куманово. Тимот од Свети Николе со пумпи беа ангажирани за полнење со вода базенот за полицискиот хеликоптер. Ер Тракторот дејствуваше на неколку наврати до целосно локализирање на пожарот, наведоа од ДЗС. Командирот на Територијалната противпожарна единица од Берово, Сашко Руменовски информираше дека во гасењето на пожарот од утринските часови имале и хеликоптерска поддршка со направени над 27 прелети. – Користена е вода за гаснење на пожарот од импровизиран базен во соседното село Будинарци, изјави вчера Руменовски. Центарот за управување со кризи (ЦУК), информираше дека покрај полициски хеликоптер во гаснењето на пожарот се вклучени 20 лица од Дирекцијата за заштита и спасување (ДЗС), 35 вработени во шумските стопанства, како и неколкумина локални жители. Според ЦУК, близу пожарот е направен базен со вода од противпожарните сили од кој хеликоптерот го полни со вода ведрото и времето на дејство е скратено за три пати, бидејќи не мора да полни од Беровско Езеро. Вчера во попладневните часови се реактивираше пожарот на депонијата за градежен шут кај месноста Ралова Чука во делчевското село Очипала, кој беше локализиран во петокот вечерта. Во попладневните часови вчера поради високите температури избувна пожар на депонијата „Вардариште“, лоцирана спроти Јавното претпријатие „Лајка“ во Скопје, кој го изгаснаа две противпожарни возила, а се самозапали и депонијата „Трештена Скала“ во Штип, каде интервенираа пожарникари со две цистерни со вода и багер. Во однос на други пожари во државата што биле службено регистрирани во претходните 24 часа, скопската Бригада за противпожарна заштита (БППЗ) имала пет интервенции од кои две поради запалено стрниште и поради опожарена ниска вегетација. Во двата почари вкупно се уништени се околу 6.000 квадратни метри. Територијалните противпожарни единици (ТППЕ) од Битола и Прилеп имале по една интервенција, додека валандовските пожарникари имале три интервенции – две поради запалена ниска вегетација и меѓи во село Брајковци и една за гаснење на запалена шума на површина од два декари кај село Дедели. Кичевската противпожарна единица со пет пожарникари и едно возило гаснела запалено стрниште кај село Црвивци, додека ТППЕ од Охрид имала една мала интервенција. Велешката територијална противпожарна единица со пет пожарникари и едно возило интервенирала за гаснење запалена ниска вегетација кај градската депонија, а ТППЕ Кавадарци, со двајца пожарникари и едно возило, гаснела запалена ниска вегетација во близина на село Фариш на патот кон Плетвар. (МИА)

Пецаков: Започнавме со голема акција за чистење на диви депонии во Охрид

Ивана Ефремовски — Sat, 16 Apr 2022 13:44:57 +0000

Започна големата акција за чистење на диви депонии на територија на Општина Охрид, информира градоначалникот Кирил Пецаков. „Се чистат диви депонии на девет локации, кои беа мапирани од страна на ЈП „Охридски комуналец. Во акцијата учествуваат сите општински јавни претпријатија, со луѓе и механизација, а дополнително е ангажирана и механизација од страна на економските оператори со кои имаме соработка“, истакна тој.

„За 100-тина дена се исчистија над 150 диви депонии и се поставија квалитетни кадри во јавните претпријатија“

Магдалена Андонова — Sun, 13 Mar 2022 11:46:38 +0000

Голем дел од ветувањата што беа дадени во предизборната кампања веќе се остварени или се во фаза на реализација. Јас би ги истакнал како најважни за животната средина впрочем што е исклучително важно, посебно за мене. Тука е чистењето на дивите депонии, детектирани и исчистени над 150 диви депонии, се пристапува кон неселективни и зачестени инспекциски контроли и надзори за да повторно не се дозволи да истите тие депонии повторно да бидат наполнети. Дополнително се заградуваат голем дел од парцелите каде што претходно имало диви депонии и каде што се нелегално се палело шут и отпад и ја загадувале животната средина. Тоа е една од најважните работи за мене лично што е остварено. Меѓутоа има и многу повќе“, истакна Филип Јаневски, советник во Советот на Град Скопје, на денешната трибина насловена „Затекнато – реализирано во Град Скопје, во организација на ВМРО-ДПМНЕ. Јаневски додаде дека дел од тие ветувања кои што се веќе остварени е и ветувањето за Луна паркот, значи веќе се влегува во фазна реализација на тој проект, на неполни четири месеци од преземањето на градската власт. - Од друг аспект исто така би сакал и да напоменам дека исклучително квалитетни кадри и професионалци се поставени во јавните претпријатија. И тоа кои што исклучително добро ги водат јавните претпријатија, што не беше случај во минатото. Се елиминирани голем број неправилности, се пристапува кон изработка на квалитетни програми за работа не само во 2022 година туку и на долгорочен рок. Како еден од најпозитивните примери би ги одвоил ЈП „Лајка“, директорот кој што е исклучително професионалец, и посветен на тој проблем, започнува системски да го решава проблемот со кучињата скитници, и не само да биде решен тој проблем туку и да биде решен од хуман аспект, појасни Јаневски. Јаневски потсети дека градската власт предводена од Петре Шилегов од својата програма има остварено само 4-5%. Додека пак советникот во кабинетот на градоначалничката на Град Скопје Данела Арсовска, Мартин Стојановски на денешната трибина истакна дека за разлика од времето кога Градот беше воден од СДСМ, сега транспарентноста и достапноста за граѓаните е на многу повисоко ниво, а тоа најдобро може да се забележи преку функционалноста на проектот „24 отворен Град“ каде граѓаните имаат можност директно да ги пријават своите проблеми. - Многу ми е драго што сум тука и што имам можност пред се да им објаснам на граѓаните кое е значењето на проектот „24 отворен Град за граѓаните“. Веднаш по доаѓањето на градоначалничката Арсовска и нејзиниот тим во Градот Скопје се започна со реализација за остварување на еден од поголемите проекти кои се во корист на граѓаните и стриктно само за граѓаните кое беше и едно од најголемите ветувања на градоначалничката Арсовска во предизборниот период а тоа е проектот „24 отворен Град“. Проектот „24 отворен Град“ Се изгради една структура, еден систем во Градот Скопје кој претходно не се ни помислило да биде на таков начин функционален, а тоа е дека тимот на градоначалничката Арсовска предводен од неа дадоа насока да се реализира овој проект каде што граѓаните на мејлот [email protected] имаат можност да ги пријават сите проблеми, па дури и онлајн проблемите. Ние внатрешно имаме изградено систем во кој ние прво вработените имаме можност да видиме кој меил од кој граѓанин е пристигнат, во колку часот е пристигнат и да видиме дали е реализиран или не е реализиран, зошто не е реализиран и кога е реализиран, истакна Стојановски. Тој додаде и дека во минатото немало таков систем во кој тимот на градоначалничката има комуникација на толку високо ниво со службите на Град Скопје, а со тоа и подобра координација за решавање на проблемите на граѓаните. - Тоа во не било пракса во минатото да тимот на градоначалничката има комуникација на толкаво високо ниво со службите на Градот Скопје. Сега секоја служба си има засебен меил каде што може да биде во комуникација со луѓето кои го водат проектот „24“ и структурата која го води проектот „24“ има можност да го испрати барањето од граѓанинот до секој сектор, но и она што е добро во овој проект е тоа што се вклучени и претпријатијата, затоа што секој проект на граѓаните зависи од претпријатијата, потенцираше Стојановски.

Координирана акција на Град Скопје и општините за спречување создавање депонии на приватен имот

Катерина Бојаџиева — Thu, 03 Mar 2022 09:46:58 +0000

Инспекторатот на Град Скопје заедно со инспекторите за животна средина од скопските општини започнаа координирана акција за депонии и сметилишта на приватен имот. Акцијата опфаќа евидентирање, пронаоѓање на сопствениците на имотот, задолжување со записник и решение за чистење на имотот во даден временски рок. Доколку субјектите не постапат по решенијата, имотот ќе го исчистат јавните комунални претпријатија на трошок на сопственикот. Заедничката акција на градските и општинските инспектори за животна средина на терен се спроведува во општина Центар во населба Крњево, каде што со помош на механизација се чисти депонија составена од оштетени автомобилски гуми оставени на приватен незаграден имот, при што подигнати се околу 700 гуми, со што е спречено нивно потенцијално палење и загадување на воздухот и животната средина.

Арсовска: Над 150 диви депонии на територијата на Скопје се исчистени, продолжуваме да постапуваме по пријави и со казни за загадувачите

Ивона Петрова — Mon, 31 Jan 2022 11:52:41 +0000

Градоначалничката на Град Скопје, Данела Арсовска, на денешната прес- конференција даде отчет за реализираните проекти кои се дел од нејзината програма за првите 82 дена од градоначалнички мандат. За еден од приоритетните проекти, за кој се обврза дека ќе се насочи уште во првите денови од мандатот, чистењето на дивите депонии на територијата на град Скопје, таа потенцираше дека на истиот се работи во континуитет, а во овие 82 дена се исчистени над 150 диви депонии, од кои 120 се детектирани депонии за време на кампањата, но и диви депонии за кои пристигнале пријави од граѓани. „За овие 82 дена успеавме да исчистиме над 150 диви депонии, покрај мапираните 120 кои беа детектирани за време на кампањата. За прв пат по децении во Скопје се спроведe акција за чистење на дивите депонии каде што се согоруваше опасен отпад, што претставуваше извор на загадување на воздухот, почвите и подземните води со што директно се влијае на квалитетот на живот на граѓаните. За да им овозможиме увид на граѓаните креиравме наменски линк со мапираните диви депонии, а воедно и почнавме со постапување по пријави за нивно чистење. Оваа акција спроведена од Град Скопје на чистење на диви депонии е најмасовната акција од овој тип која била спроведена некогаш во Македонија, вели градоначалничката Арсовска. Арсовска истакна дека на дел од површините каде што постоеле диви депонии планирани се нови зелени површини, а Градот започнал и со зачестени контроли на редовен и вонреден неселективен инспекциски надзор и воспоставување на системски решенија, со што секое физичко или правно лице кое загадува и со тоа директно влијае врз загадување на воздухот, почвата и подземните води со фрлање и согорување на опасен отпад и шут, ќе биде казнето со високи глоби. - За прв пат неселективно се изрекуваат драконски казни за загрозување на животот и здравјето на граѓаните. Градот Скопје со стратегија за превенција, започнува со имплементација на системско решение кое опфаќа фото документирање на загадувачите, работа во смени на инспекторатот со цел санкционирање на сторителите, снимање со дрон со цел детекција на депонии и обиди за нивно палење, но и активен систем за пријави од граѓани со цел итна реакција за превенција на загадувачите и нивно неселективно казнување, дополни таа.

120 мапирани депонии исчистени во Скопје

Магдалена Андонова — Sat, 29 Jan 2022 08:47:07 +0000

За прв пат во децении во Скопје се спроведува акција за чистење на дивите депонии каде се согоруваше опасен отпад, што претставуваше извор на загадување на воздухот, почвите и подземните води со што директно се влијае на квалитетот на живот на граѓаните. - За речиси два месеца со заедничка активност на градот Скопје и дел од скопските општини, исчистени се над 120 мапирани депонии за време на предизборната кампања. Засилени се контролите на инспекторатот и за првпат се изречени големи казни за загадувачите на животната средина и оние кои ги загрозуваат безбедноста и здравјето на граѓаните. Чистењето продолжува и понатаму бидејќи секојдневно граѓаните пријавуваат обиди за создавање нови депонии. Инспекциските служби засилено работат на терен, со цел сите да ги почитуваат законите и нема да има никакви отстапки за загадувачите, информираат од Град Скопје. Градот Скопје со стратегија за превенција, започнува до имплементација на системско решение кое опфаќа фото документирање на загадувачите, работа во смени на Инспекторатот со цел санкционирање на сторителите, детекција на депонии и обиди за нивно палење со дрон, но и активен систем за пријави од граѓани со цел превенција на загадувачите и нивно неселективно казнување. Град Скопје упатува апел до граѓаните секоја пријава за новонастаната или веќе постоечка депонија да ја испратат на [email protected] со цел во најкус можен рок да се испратат екипи од градот за чистење на депониите.