Десет дена Крушевска Република – Kurir.mk

Со спушање на бајракот и почесна стрелба затворена манифестацијата „Десет дена Крушевска Република“

Ивана Ефремовски — Thu, 11 Aug 2022 06:57:29 +0000

Со спуштање и засолнување на бајракот и почесна стрелба официјално се затвори Манифестацијата НКС „Десет дена Крушевска Република“. „Изминатите 10 дена имавме богата програма, опфативме повеќе културни области и привлековме многу туристи. Достоинствено го одбележивме Илинден и покрај тоа што Манифестацијата понуди забава, се вративме назад да ја доживееме историјата. Се заблагодарувам на сите што присуствуваа во Крушево.“, изјави градоначалникот на општина Крушево Томе Христоски. На затворањето на „Десет дена Крушевска Република“ концертот на Дац и Александар беше прекинат поради дожд кој се појави во текот на настапот.

Завршува манифестацијата „Десет дена Крушевска Република“

Ивана Ефремовски — Wed, 10 Aug 2022 09:35:22 +0000

По синоќешната монодрама „Женска утопија“ во изведба на Димитрина Мицкоска, вечер завршуваат традиционалните научно-културни средби „Десет дена Крушевска Република“. Манифестацијата која ги претставува културата, традицијата и историјата на Крушево, ја организира Општината. Почна на 1 август, на Гумење во Крушево, со настап на бендот „Љубојна“, а ќе заврши вечер, со спуштање на бајракот и настап на Дац & Александар пред споменикот Илинден. На 4 август беше организирана Влашка вечер, а на 5 август се одржа џез-концерт. Во текот на културно-научните средби „10 дена Крушевска Република“ се одржа и „Кога си во Крушево“ со бројни гости и рекреативни настани. (МИА)

Отворање на манифестацијата „Десет дена Крушевска Република“

Ивона Петрова — Mon, 01 Aug 2022 05:43:52 +0000

Манифестацијата научни културни средби „Десет дена Крушевска Република“ ќе биде отворена вечер на Гумење во Крушево во организација на општината. На манифестацијата која ги претставува културата, традицијата и историјата на Крушево, ќе се обрати премиерот Димитар Ковачевски, кој годинава ја предводи владината делегација во Крушево, по повод прославата на националниот празник Илинден. Претходно, коњаницата ќе дојде пред столбот на Крушевската Република, ќе се формира поворка, по што делегацијата за полагање цвеќе со коњаницата ќе се упати кон Гумење. Ќе биде положено цвеќе пред бистата на Веле Марков, на гробот на Питу Гули, на гробот на Тоше Проески, пред споменикот на партизанските гробишта, Криптата на илинденските востаници. Во рамки на програмата на манифестацијата, предвидена е посета на спомен-куќата на Смилевскиот Конгрес и полагање цвеќе пред споменикот на Дамјан Груев. По отворањето на манифестацијата пред споменикот „Илинден“ ќе настапат Националната филхармонија и хорот на Национална опера и балет, ансаблот „Танец“ и балерината Ивана Коцевска. На платото кај Гумење ќе биде прочитан Крушевскиот манифест и ќе се обрати претседателот на Советот на НКС „Десет дена Крушевска Република“, м-р Томе Христоски. Според програмата, на крајот од вечерта концерт ќе одржи Камерниот оркестар, а ќе настапат и неколку македонски пејачи. Централната манифестација по повод Илинден ќе се одржи утре на Мечкин Камен.