дигитални учебници – Kurir.mk

Царовска: Секој родител што му наметнува печатен учебник на ученикот му прави штета!

Магдалена Андонова — Thu, 07 Oct 2021 19:18:49 +0000

МВР има укажувања, а и постапувања каде што се прекршени материјалните права на авторите и на издавачите на учебници, изјави министерката за образование и наука Мила Царовска одговарајќи на новинарско прашање дали МОН е информирано дека во некои книжарници се продаваат комплет учебници за четврто одделение за кое од оваа година треба да се употребуваат дигитални. - Бирото за развој на образованието нема издадено одобрение на никого за печатење примероци. Ако ми посочите каде се наоѓаат, тогаш јас тоа директно би го пријавила во Министерството за внатрешни работи како што направив и во претходни случаи кога имав сознанија дека такво нешто се случило и каде што имаше постапување, изјави министерката. Посочи дека учебниците се бесплатни и се достапни на e-biblioteka.gov.mk и треба да се користат во дигитална верзија затоа што, рече, тоа е од највисок интерес на учениците и процесот на нивно дигитално описменување и за следење на наставни содржини проследени со мултимедија и квизови кои ги нема во печатената верзија. - Секој родител кој се обидува на ученикот да му наметне печатен учебник прави штета, не му прави добро, затоа што користење дигитални учебници е свесно поставено така за да добиеме и подобра дигитална писменост, но и да им посочиме на учениците дека користењето електронски уреди не се само за играње, туку се и места за учење и примање знаење, истакна Царовска. Печатени верзии на учебниците МОН има набавено 20 отсто од вкупниот потребен тираж и ги има платено и пратено до училиштата за да се обезбедат учениците кои немаат електрична енергија дома да може да ги имаат кај себе, а одреден број примероци и за користење во училишните библиотеки. - За сите останати, МОН набави дигитални уреди, таблети, и околу 3.500 до денеска се дистрибуирани и на располагање на општините им се уште 6.500 од вкупно 10-те илјади набавени. Тоа значи дека секој ученик треба да има пристап до дигитален уред освен оние што немаат електрична енергија во домашни услови и за нив се обезбедени печатени, додаде министерката.

Народен правобранител: Дигиталните учебници предизвикуваат дополнителен трошок за родителите, не се сите снабдени со соодветни уреди за квалитетно образование

Тале Кристо — Thu, 16 Sep 2021 20:16:54 +0000

Народниот правобранител Насер Зибери за „Анализа“ на ТВ 24 истакна дека констатирани се низа пропусти во образованието во Македонија, од немање на вода, немање на учебници, се до проблеми со интернет, електрична енергија и дигиталните учебници кои се воведоа оваа година за четвртоодделенците. -Настанува проблем за следење на наставата на четвртоодделенците за кои се укинати учебниците во хартиена форма, туку се изведува настава со дигитални, а дигиталните учебници предизвикуваат дополнителен трошок за родителите затоа што постојните уреди немаат капацитет и меморија да ги користат тие содржини. Не сите домаќинства се снабдени со соодветни уреди за квалитетно ученикот да се вклучи во образовниот процес, рече Зибери. Тој посочи дека минатата година тие извршиле истражување во кое биле констатирани низа проблеми. -Училиштата се соочуваат со недостаток на хигиенски и дезинфекциски средства во време на пандемија, честопати родителите ги покриваат тие трошоци, иако тоа е должност на општините и училиштата. Има безброј рурални училишта кои немаат ни вода за пиење, проблем со снабдување на учебници. Ние минатата година извршивме истражување и констатиравме низа проблеми. Како што е капацитет и квалитет на интернетот, снабдување со електрична енергија, уреди за следење на настава, истакна Зибери. Во однос на изјавата на министерката Мила Царовска дека учебниците треба да печатат учебници каде ги нема доволно, тој рече дека тоа е недозволиво да се каже од член на влада, бидејќи учебниците подлежат под авторски права.

Родителите не прифаќаат децата да им учат од ПДФ скрипти, отпорот го конкретизираат со референдум

Магдалена Андонова — Tue, 25 May 2021 11:08:31 +0000

Родителите не прифаќаат нивните деца да учат од дигитални учебници, кои ќе бидат во ПДФ формат и со големина колку една скрипта. Отпорот против, таканаречениот нов концепт, кој од учебната 2021-2022 година, во македонското образование планира да го инсталира министерката за образование, Мила Царовска веќе се конкретизира со иницијатива за референдумско изјаснување. Од групата на граѓани здружени во преку социјалните мрежи во неформална група „Учебници и настава мора да има“, преку подрачните единици на Државна изборна комисија, покренаа иницијатива за собирање потписи за организирање референдум за реформите во образованието. Драгана Спасевска, која се води како претставник на Фејсбук групата „Учебници и настава мора да има“ која брои скоро 80 илјади членови извести дека во име на граѓанската иницијатива поднесено е барање до ДИК за распишување референдум за дигиталните учебници. Од денеска до четврток треба да соберат 100 потписи за да се прифати оваа иницијатива. Граѓаните ќе можат да го дадат својот потпис во подрачните одделенија во Центар и во Битола. Иницијативата за референдум против реформите во образование доаѓа по одбивањето на министерката Мила Царовска да се средни со нив и да ги слушне нивните забелешки и аргументи против истите, и нејзината одлучност по секоја цена да ја имплементира нова концепција која предвидува учениците од четврто до деветто одделение и средношколците, класичните печатени учебници да ги заменат со дигитални. Исто така се предвидува и спојување на неколку предмети во еден, со што би се намалила можноста за изучување и совладување на материјата по индивидуалните предмети, а исто така концепцијата предвидува сеопфатно сексуално образование. Во однос на најавите за замена на хартиените печатени учебници со дигитални во ПДФ формат во големина на една скрипта, освен родителите се спротивставија и голем број општествени дејци, државници и организации. Опозициската ВМРО-ДПМНЕ на чело со претседателот, Христијан Мицкоски остро се спротивставуваат на оваа идеја, потенцирајќи сека тие не се против дигитализација на образованието, кое е сосема спротивно од воведување само на дигитални учебници, но дека се против реформата да се одвива на тој начин, затоа што тоа предизвикува дискриминација на кај учениците бидејќи над 20 илјади ученици немаат ИТ уреди преку кој требаше годинава да следат онлајн настава. - Дигитализација не претставува PDF формат на учебник, туку дигитализација претставува мултимедијална интеракција со компјутерот. И ние го имавме тоа предвидено во програмата, но ги имавме предвидено и учебниците, оние ученици што не можат од определени причини, не само поради недостаток на хардвер или компјутер, можеби поради здравствени причини некое дете не може да седи пред компјутер и да помине осум часа и на тој начин да ја следи наставата и да се надградува. Развојот на моториката на децата е со читање на книга, со пишување. Тоа се моменти кои овие политичари, за жал водејќи се од провизии и квази реформи, ги забораваат. И она што е најсуштински проблем за нас кај овие политичари, е тоа што не прават суштинска анализа, туку носат политика, па потоа ги гледаат негативните последици од истата, пишува на Фејсбук Мицкоски. Од друга страна, вчера во својата честитката по повод Денот на сесловенските просветители Светите браќа Кирил и Методиј, македонскиот претседател Стево Пендаровски, го цитираше Свети Кирил каде што вели дека без книга сите народи се голи и подложни на асимилација и исчезнување, со што како да сака да му прати порака на извршната која планира да го реформира образованието. - Св. Кирил вели дека „без книга сите народи се голи“ и подложни на асимилација и исчезнување. Создавајќи ја првата пишана словенска азбука – глаголицата и преведувајќи го Светото писмо и другите црковни и световни текстови на старословенски јазик, светите браќа отворија нови просветни, духовни и културни видици за словенските народи во Европа. Со тоа Св. Кирил и Методиј на словенските народи им го дадоа клучот за самоидентификација и самоопределување низ вековите. Бранејќи го фундаменталното право на словенските народи на свој јазик и писменост, Св. Кирил и Методиј се изборија и за достоинството на различноста како суштинска европска вредност, стои во честитката на претседателот на Републиката, Пендаровски.

Митева: Експериментите во образованието продолжуваат, дали Царовска е упорна во намерите за укинување на учебниците во основното образование?

Магдалена Андонова — Sat, 08 May 2021 10:11:07 +0000

Експериментите во образованието продолжуваат. Додека се уште имаме ученици кои немаат услови да ја следат онлајн наставата и се насочени кон скратена наставна програма на националните телевизиски канали, сведочиме нови таканаречени реформи за воведување дигитални учебници кои иницираат дополнителна дискриминација помеѓу најмладите. Мила Царовска или како што ја нарекуваат граѓаните „министерот надлежен за укинување“ мудро се повлекува од јавни расправи, но сепак е упорна во своите намери за укинување на учебниците во основното образование. Без слух за проблемите го игнорира мнозинството. Своите интереси се обидува да ги пласира како неопходна реформа во образовниот процес и покрај бројните реакции на јавноста, изјави на денешната прес конференција, Марија Митева, портпарол на ВМРО-ДПМНЕ. Таа вели дека скандалозното повлекување на Законот од собраниска процедура со цел истиот да биде донесен со европско знаменце говори за целта овој предлогот на Царовска да биде донесен по секоја цена, а притоа злоупотребувајќи ги процедурите и дебатата во законодавниот дом. - Скандалите во образованието од нејзиното преземање на функцијата министер никако да запрат. Министерке Царовска оваа Концепција за реформа во основното образование отвора повеќе прашања: дали овој проект за дигитализација на учебници во основното образование би чинел неколку милиони годишно, колкав број на надворешни соработници ќе бидат вклучени, на каков начин ќе се реализира проектот и дали користејќи ја позицијата Министер за образование ги задоволувате само сопствените мотиви, праша Митева. - Одговорете им на граѓаните како интерактивните содржини и анимациите од дигиталните учебници ќе бидат идентични во печатените учебници? Нашите сограѓани очекуваат образложение како и на кој начин ќе се реализира ова. Не може да излезете со предлог реформа од која зависи иднината на образовниот процес, а вашиот аргумент министерке да биде дека учениците не сакаат да учат и воедно да ги квалификувате како функционално неписмени. Ваша обврска е да ја развиете желбата за настава кај учениците, а не дополнително да им ја намалите. Ваша должност е да присуствувате на организираните тематски состаноци и од истите да произлезе заклучок и напредок согласно барањата на родителите. За крај, ако немате способност нешто да направите, дали може да застанете со уништување на системот на секое поле, додаде портпаролката на ВМРО-ДПМНЕ.

Царовска незаинтересирана да ги слушне аргументите на родителите, своеглаво ги турка најавените реформи во образованието

Магдалена Андонова — Thu, 06 May 2021 12:33:41 +0000

Министерката за образование, Мила Царовска нема да ги слушне критиките и аргументите на родителите кои остро се спротивставуваат на нејзините најавени реформи во образованието. Родителите на училишните деца најмногу се противат на новината која предвидува за учениците од четврто до деветто одделение и за средношколците, место класични хартиени и печатени учебници да се заменат со електронски, или како што милуваат да ги нарекуваат дигитални учебници. За денеска е предвидена средба на родителите со претставници на министерството за образование (МОН), на која родителите треба да ги презентираат нивните барања и аргументи против укинувањето на печатените учебници. Родителите преку неформална Фејсбук-група „Учебници и настава мора да има“, која за експресно време собра скоро 75 илјади членови, во изминатиот период, револтот кон промените во образованието го изразуваа преку бојкот на наставата, како таа онлајн така и наставата со физичко присуство на нивните деца. Тие бараат да се повлече предлог-законот кој предвидува дигитални учебници. Но, според родителите, на состанокот на кој се согласи МОН, нема да присуствува министерката Царовска затоа што им рекле дека била многу зафатена. Од минатата недела има апели за бојкот на наставата во основните и средните училишта во знак на револт против дигитализацијата на учебниците и учењето од далечина. Драгана Спасевска од Фејсбук-групата изјави за МИА дека се поканети денеска да имаат средба со претставници на МОН, на која поради обврски нема да присуствува министерката Мила Царовска. Спасевска тврди дека бојкотот во училиштата, кој го почнаа минатиот четврток, е помасовен и имаат се поголема поддршка за нивното барање да се стопира постапката за донесување на законот за учебници и наставни материјали во основното и средното образование. Инаку против дигиталните, како единствена опција за учење, без печатени учебници се спротивставија не само родителите на децата од пониските одделенија, туку и самите ученици од повисоките, како на пример средношколците. Од Средношколскиот сојуз велат дека тие не се против модернизација на образованието, туку тие се категорично против дигиталните учебници да бидат единствената опција по која учениците ќе треба да учат. Против најавени реформи во образованието, освен најзасегнатите родители и ученици, се и разни општествени дејци и организации. И од опозициската партија исто така се против начинот кој е предвиден да се одвива наставата. Од таму велат дека ако се остани на овој став, голема е веројатноста над 40 илјади ученици да останата надвор од образовниот процес, воглавно поради немање услови за обезбедување на ИТ опрема и интернет.

Се зголемува отпорот против Царовска, учениците не сакаат дигитални учебници!

Тале Кристо — Thu, 29 Apr 2021 13:10:27 +0000

Засегнатите ученици, но и родители пружат се поголем отпор и се погласно се спротивставуваат на одлуките на министерката за образование, Мила Царовска за во училиште место од печатени учебници да се учи од дигитални. Група на родители именувана како „Книги и настава мора да има“ формирана на Фејсбук од пред околу една недела и која брои веќе над 70 илјади членови, најави бојкот на часовите во четврток. На овој начин тие сакаат да го искажат својот револтот против нацрт-законот за дигитализација на учебниците. Администраторот на групата, Драгана Спасевска која со група поддржувачи од пред МОН изјави дека освен бојкот, се бара прекинувањето на процедурата за донесување на законот, одобрување на протоколи за враќање на учениците во училиштата, повлекување на концептот за спојување на наставните предмети и вклучување на професионалци во подготовка на законите. -Компјутерот не може да биде алатка за учење со целосно игнорирање на книгата. Има деца со здравствени проблеми со очите, имаат попречености. Тоа е сериозен проблем, тие не може ни од книги да учат, а камо ли со компјутер. Некој нема ниту услови, рече Спасевска која ги преставување над 70 илјадитите членови на иницијативата за оставување на печатените учебници и враќање на сите ученици во училишните клупи. Освен ова, родителите исто така бараат навремено да бидат информирани за содржината на учебниците. И од Средношколскиот сојуз се против укинувањето на печатените учебници. Претседателот на Сојузот, Бленди Ходаи смета дека образовниот систем мора да ги почитува индивидуалните желби и преференции на секој ученик, зашто секој има различен начин на учење – некои преферираат од учебник, а други од дигитални уреди. Тој додава дека според нивни информации, нема ниту една земја која целосно користи дигитални учебници во наставата и дигиталните учебници не смеат да бидат единствено решение. Министерството за образование, пак, соопшти дека промената носи квалитет и напредок и оти поради тоа не треба да биде причина за бојкот на наставата.

Здравковски: Царовска да ги објасни мултимедијалните содржини на фотокопии

Магдалена Андонова — Thu, 29 Apr 2021 10:50:29 +0000

Во недостаток на аргументи и немање конкретни одговори на поставените прашања од страна на наставниците, родителите, учениците и пратениците Мила Царовска го губи тлото под нозете и во паника сѐ почесто се обидува да ја спинува темата. Арогантно и инаетливо ги навредува сите, им го проценува капацитетот и кредибилитетот на пратениците, ги омаловажува родителите, ги критикува наставниците и сето незадоволство од споменати го припишува на влијанието на ВМРО-ДПМНЕ, изјави на денешната прес конференција, Игор Здравковски, пратеник од редовите на ВМРО-ДПМНЕ. - Повторно ја потсетуваме за нашиот став изнесен многу пати. Ние ништо немаме против дигитални учебници со интерактивни и со мултимедијални содржини и со наратор по можност да биде додаден. Ние бараме печатени убаво илустрирани, модерни учебници за учениците кои ќе посакаат да ги имаат. Ние бараме да оствари тоа што во концепцијата самата го има предвидено, еднаков пристап и еднакви можности за сите во образовниот систем. Тоа со дигитални учебници за оние кои може да си ги дозволат и печатени учебници, еднакви на црно – бели фотокопии едноставно не е можно. Или накусо, Царовка да ги објасни мултимедијалните содржини на фотокoпии, всушност да го објасни принципот на „дрвено железо“. Како во така печатени учебник, кој таа го промовира, ќе се пренесат мултимедијалните содржини од дигиталниот учебник? Откако и стана јасно дека тоа не е можно сега ветува библиотечен фонд во секое училиште од таблети. Ние не и веруваме, затоа што ништо што оваа Влада што го ветила го нема остварено и длабоко сме убедени дека доколку имаше сериозна намера тоа да го стори, таа и досега ќе обезбедеше таблети за најранливите категории, истакна Здравковски. Тој посочи дека како и кога ќе ги изготват дигиталните учебници се уште нема одговор. - Конфузијата и неконзистентноста по изјавите, дополнително ја влошуваат состојбата и недовербата, а паниката е веќе видно присутна кај Царовска и доведе до злоупотреба на европското знаме и негово додавање на Предлог законот за измени и дополнување на законот за учебници. Злоупотреба на моќ, против сопствениот народ го промовира на најсилно можно ниво, додаде Здравковски.

Николоски: Дали реформите со дигитализацијата се поради лукративни цели на Царовска кои ќе чинат десетици милиони годишно?

Магдалена Андонова — Thu, 29 Apr 2021 09:52:43 +0000

Да ја прашам Мила Царовска дали реформите со дигитализација се од лукаративни цели. Не може Царовска да се разбуди едно утро и да добие повик од Хрватска и да добие една или две лукаративни понуди од таму и да рече јас ќе терам дигитализација. Јавно ја прашувам дали мотивите позади таканаречената реформа во образованието се од лукративен карактер кој што е во десетици милиони годишно и дали е поврзано тоа со Хрватска. Нека одговори за ангажманот што ќе биде потребен на бројни надворешни советници, на ангажман на невладини организации без јасна слика по кој критериум ќе се бираат, истакна потпретседателот на ВМРО-ДПМНЕ Александар Николоски во “Студио 10” на Телевизија 24. Оваа Влада е влада со најмала поддршка во Собранието во историја на македонската демократија. Силите се 51 наспрема 49 власт - опозиција. Кога е ваква ситуацијата власта има два избора. Или за крупните работи да разговара со опозицијата и да се усогласува или да води само проекти кои што нема да бидат оспорувани од опозицијата, рече Николоски. -Имавме проекти кои што сметавме дека не се добри и затоа во изминатиот период ВМРО-ДПМНЕ во изминатиот период реагираше, како што имаше иницијативи кои не беа добри на пример идејата беше со 50-тина загубени човечки животи дневно да се води попис и таа пандемија дополнително да се рашири. Па да ни се случи не дај боже индиското сценарио. Наша цел беше да се одложи пописот и пописот се одложи. Имаше проекти кои што беа битни за СДСМ и ние рековме добро во ред можеме да разговараме. Така функционира демократија каде што соодносот е 51 – 49, посочи Николоски. Но, после тоа се случи едно насилие од страна на Талат Џафери кој што не знае на кое столче седи и каква е неговата улога, рече Николоски. Работата на претседателот на Собранието е да менаџира со истото и тоа да си функционира, а не да си тера личен хир. Ние сме конструктивни онолку колку што власта ќе дозволи, а претседателот на Собранието треба да е најдолу на таа пирамида и најмалку да покажува суета и ароганција. -И второ многу побитно, некаде пред десетина дена се отвори една голема општествена тема. Образованието заедно со здравството се двете најголеми општествени теми кои засегаат најголем број на граѓани. Министерката за образование Мила Царовска најави дека ќе прави реформи во образованието со дигитализација на учебниците, промена на концептот на бирото за развој на образование, промена во високото и средното образование. За ваква реформа потребен е општествен консензус. Реформи во образование и во здравство не се прави без една силна општествена поддршка. На иницијатива на ВМРО-ДПМНЕ во Собранието дојдоа голем број на експерти, но ништо од тоа не беше прифатено од страна на власта и решија да ги пуштат законите на сила. Гледаме дека и родители и ученици се собираат се организираат и ќе видите дека на социјалните мрежи имаат групи со повеќе членови од најпопуларното лице во Македонија. Но, наместо тие да разговараат со опозицијата со синдикатите тие го повлекуваат законот и решаваат да го протнат со ЕУ знаменце, изјави Николоски.

Изреволтирани родители повикуваат на потпис пред МОН против воведување на дигитални учебници – најавуваат и протести!

Магдалена Андонова — Wed, 28 Apr 2021 09:33:46 +0000

Воведувањето на дигитални учебници кое го најави министерката за образование и наука, Мила Царовска и понатаму предизвикува големо незадоволство кај голем број родители. Веднаш по оваа нејзина најава по социјалните мрежи се формираше група под името „Учебници и настава мора да има“ каде што голем број на родителите јасно посочуваат дека се против тоа. Од истата група може да се увиди дека најпрво беше направена онлајн петиција против воведување на дигиталните учебници, а истите членови најавуваат и отварање на пунктови ширум целата држава, а истовремено од нивна страна се подготвуваат и протести. Имено, во Фејсбук групата се појави објава во која стои дека денеска пред Министерството за образование и наука во период од 10:00 до 14:00 часот ќе се собираат потписи за поддршка на барањата на родителите и граѓаните кои се против воведувањето на дигитални учебници. Овие барања како што се вели во самата Фејсбук објава, ќе се достават до МОН, Владата и Собранието а доколку не се прифатат нивните барања, изреволтираните родители и граѓани најавуваат протести, барање за оставка на министерката и покренување на граѓанска иницијатива.

Николоски: Укинување на учебниците е лична фрустрација на Царовска и Заев

Магдалена Андонова — Tue, 27 Apr 2021 08:44:45 +0000

Александар Николоски, потпретседател на ВМРО-ДПМНЕ во гостување во емисијата Утро со Златев на Радио Лидер, коментирајќи ја изјавата на Мила Царовска дека на децата им е досадно во училиштата, рече дека не е сум изненаден од таквата изјава, како и дека ова е лечење на сопствената фрустрација на Царовска и Заев, иронично посочувајќи дека им било мака да учат, мразеле книги кога ќе видат и сега сакаат да ги укинат. - Јас не сум изненаден од таа изјава затоа што тоа е изјава од министер во влада чии што премиер кажа дека и тој бегал од часови и многу не учел па еве стигнал до премиер. Значи ако премиерот на владата кажува дека бегал од часови и дека многу не бил по учењето кое што можеме да го видиме сите, тоа не е тешко да се заклучи. Значи ако имаме премиер кој што бегал од часови и не бил по учењето нормално е да министерот за образование да вели дека на учениците им е досадно во школо затоа што веројатно и нејзе и било досадно во школо, многу многу и таа не се прославила од она што го слушам, истакна Николоски. - Ова е лечење на сопствените фрустрации, им било мака да учат, мразеле книги кога ќе видат и сега сакаат да ги укинат. Знам дека е иронично ама за вакви лудаци нема друг одговор освен иронија. Истата Мила Царовска кога беше прашана на едно интервју ама чекајте родителите немаат пари на децата да им купат таблети, таа рече па и нас ни купуваа блок за цртање, потенцираше Николоски. Николоски изјави дека доколку власта реши на сила да го турка овој закон, ВМРО-ДПМНЕ ќе го блокира и нема да има сила која што ќе го натера ВМРО-ДПМНЕ да не го блокира овој закон. - Доколку власта сепак реши да го турка овој закон, истиот ВМРО-ДПМНЕ ќе го блокира и нема ни една сила што ќе го натера ВМРО-ДПМНЕ да не го блокира овој закон. Се работи за иднината на оваа држава. Две генерации се веќе уништени затоа што втора година седат дома, а со ваква Мила Царовска и Зоран Заев ништо чудно и од септември да седат дома затоа што нема вакцини, вели Николоски.