Димчо Атанасовски – Kurir.mk

Атанасовски: Изминатава 2022 година можеме да ја квалификуваме како успешна година по бројот на капиталните проекти

Катерина Бојаџиева — Tue, 27 Dec 2022 09:05:38 +0000

Со голем број на реализирани капитални инфраструктурни проекти, иако во време на светската економска и енергетска криза, 2022 година може да се смета за успешна за Македонска Каменица. Ова е главната поента од обраќањето на Димчо Атанасовски, градоначалник на општина Македонска Каменица на средба на градоначалниците од редовите на ВМРО-ДПМНЕ коалицијата која што се одржа во Кочани. - Изминатава година можеме да ја квалификуваме како успешна по бројот на реализирани и започнати капитални проекти, каде само во изминативе 3 месеци реализиравме 4 капитални проекти во вредност од околу 1 милион евра. Тие се изградба на нов, модерен спортско-рекреативен центар во месноста Помошно, изградба на противпожарна кула за рана детекција на пожари која се реализира со помеѓугранична соработка со Општина Невестино (Р. Бугарија) во вредност од околу 180.000 евра, осветлување на влезот и излезот на Македонска Каменица, како и уредување на кејот на река Каменичка. Годинава се реконструираа и асфалтираа многу улици во повеќе населени места, како што се Церски Пат, Тодоровци, Луковица, Дракарска маала и многу други – кажа градоначалникот Атанасовски. Тој додаде дека во план се реализација на многу вакви проекти и за 2023 година. - Планираме многу проекти и за наредната 2023 година, каде како најважни можам да ги издвојам изградба на нова општинска зграда, изградба на мултимедијален центар за младите претприемачи, изградба и реконструкција на повеќе патишта во руралните средини, изградба на резервоари со вода за подобрување на водоснабдувањето во Стара Каменица и Дулица, како и подобрување на водоснабдувањето во Каменица – додаде градоначалникот Атанасовски. Регионалната средба беше организирана од страна на Комисијата за локална, Комисијата за инфраструктура, урбанизам и транспорт и Комисијата за финансии при ВМРО-ДПМНЕ.

Атанасовски: Нема да набавиме телефонски уреди, средствата ќе ги искористиме за помош на социјално ранливите семејства

Ивана Ефремовски — Mon, 26 Sep 2022 15:00:04 +0000

Во услови на економска криза, општина Македонска Каменица нема да набавува телефони за вработените. Средствата ќе бидат искористени за најмладите и за социјално ранливите семејства во Македонска Каменица. Согласно Договорот за мобилни телекомуникациски услуги, општина Македонска Каменица има можност за набавка на уреди, кои во изминатите години се распределувани за потребите на вработените од општинската администрација. Оваа година, објави градоначалникот Димчо Атанасовски, имајќи во предвид дека сме соочени со незапамтена енергетска и економска криза, донесовме уште една одлука во корист на граѓаните. Ќе набавиме три телевизори за Детската градинка Бамби и таблети за ученици од социјално ранливи семејства. Во продолжението од соопштението за јавност, градоначалникот Атанасовски за наредните две недели го најави објавувањето на Повикот за распределба на еднократна парична помош за првачиња во износ од 3.000 денари и за средношколци запишани во прва година во СОУ “Миле Јаневски Џингар” во износ од 20.000 денари. Од 15.10.2022 година ќе биде објавен и Конкурсот за стипендирање на ученици и студенти. “Продолжуваме посветено и сите општински ресурси ги ставаме во корист на каменичани” – стои на крајот од соопштението на градоначалникот Атанасовски

Атанасовски: Се асфалтира уште еден крак во Албанско маало во село Тодоровци

Ивана Ефремовски — Mon, 23 May 2022 13:26:09 +0000

Се асфалтира уште еден крак во Албанско маало во село Тодоровци, информира Димчо Атанасовски, градоначалник на општина Македонска Каменица. -Овој локален пат ќе биде завршен во наредните неколку денови, по што ќе започне асфалтирање на улица Церска во Македонска Каменица, посочи тој.

Атанасовски: Започнавме со уредување на паркинг простор за товарни возила, но и за стари и хаварисани возила

Ивана Ефремовски — Tue, 12 Apr 2022 16:03:19 +0000

Започнавме со уредување на паркинг простор за товарни возила, но и за стари и хаварисани возила, информира Димчо Атанасовски, градоначалник на општина Македонска Каменица. „Паркинг просторот ќе биде на располагање на сите сопственици на товарни возила, а дел од просторот ќе биде уреден за депонирање на хаварисаните возила. Продолжуваме посветено во создавањето квалитетни услови за живот во централното градско подрачје“, истакна тој.

Атанасовски: Започнаа градежните активности за партерно и хортикултурно уредување на паркот во Македонска Каменица

Тале Кристо — Thu, 02 Dec 2021 12:51:52 +0000

Започнаа градежните активности за партерно и хортикултурно уредување на паркот лоциран во триаголникот помеѓу улиците “Александар Македонски”, “Гоце Делчев” и “Руенска”, објави градоначалникот на општина Македонска Каменица Димчо Атанасовски. -Свој мал придонес во реализацијата на овој проект што ќе го разубави овој мал простор во централно градско подрачје дадоа и Спортско Планинарско Алпинистичкото друштво “Царев Врв -Руен” и Ловното Друштво “М.Каменица-Саса”. Тие обезбедија специјални рефлектори кои ќе му дадат посебен изглед на ова место во ноќните часови, пишува во својата објава на Фејсбук Атанасовски. Градоначалникот Димчо Атанасовски во знак на благодарност најави поинтензивна соработка со невладиниот сектор кој значително придонесува во промоција на Општината.

Атанасовски: Македонска Каменица ќе добие рекреативен центар со содржини за млади и возрасни лица

Ивана Ефремовски — Thu, 14 Oct 2021 15:39:35 +0000

„Нашата градска мајка во 2017-та година изјави:„Ве сакам сите“! Во изминатите четири години, наместо љубов, од градската мајка добивме еден куп неисполнети ветувања, партиски вработувања, сомнителни тендери, популистички и промашени проекти, очај и назадување. Вети многу, а реализираше малку“, истакна кандидатот за градоначалник на општина Македонска Каменица, Димчо Атанасовски на митингот.

Атанасовски додаде дека сегашната локална власт мора да си оди и никогаш повеќе да не им се дозволи да бидат носители на јавни функции.

„Ние гледаме кон иднината, кон едно посветло поглавје во историјата на Македонска Каменица. Еве само дел од проектите со кои ќе донесеме просперитет во нашата општина:

изработка на стратегија за долгорочен економски развој на општината која ќе го трасира патот за долгорочен економски развој и создавање на здрава основа за враќање на иселениците во нашата општина;
изградба на пензионерски дом и промоција на Македонска Каменица како место каде граѓаните можат да ги живеат пензионерските денови;
изградба на станбена зграда за субвенционирано социјално живеење;
парична помош за социјално ранливи лица;
отворање на посебна наменска сметка на која секој од Република Македонија или странство ќе може да донира парични средства за лекување на жител на Македонска Каменица;
субвенции за фотоволтаични електрични системи, печки на пелети и пелети за граѓани во социјален ризик;
поставување на споменик во чест на сите жртви на страната на македонските безбедносни сили од конфликтот во 2001 години, изградба на патека до споменикот и негово осветлување и партерно уредување, вети Атанасовски.

Атанасовски на граѓаните вечерва им посочи дека ќе се изгради и изградба на рекреативен центар со содржини за млади и возрасни лица. Ќе се распише и тендер за набавка на медицински услуги за специјалист интернист, очен лекар, педијатар и други доктори, кои по претходно утврден распоред во соработка со граѓаните, ќе им пружаат бесплатни здравствени услуги на нашите сограѓани во здравствената станица и/или во селските средини.

„Пред да завршам би сакал да упатам една порака до сите оние наши сограѓани кои што се под притисок од актуелната власт, а на кои им бараат списоци на сигурни гласачи, нашиот лидер и иден премиер не е канибал и не му е целта да јаде живи луѓе , а каков е лидерот такви се и неговите соработници и во тоа сите ние се уверивме, јас од овде јавно ви ветувам дека ниту еден граѓанин кој што чесно си го заработува своето парче леб нема да биде избркан од работа бидејќи јас и мојот тим имаме доволно капацитет, способност и желба да обезбедиме работа за секој од вас и Македонска Каменица ќе биде за сите луѓе , да живее ВМРО-ДПМНЕ, да живее Република Македонија , да сте ми живи и здрави“, укажа Атанасовски.

Атанасовски: СДСМ ја направи Македонска Каменица црна дамка на истокот, ВМРО-ДПМНЕ ќе ја направи просперитетна општина која ќе ги решава горливите проблеми на граѓаните

Тале Кристо — Sun, 29 Aug 2021 11:27:34 +0000

Денес во Македонска Каменица ја имаме најнеспособната, најкриминалната и најлошата власт од постоењето на општината. Тие во нашата општина донесоа партиска поделеност на граѓаните од прв, втор и трет ред; затвореност, уназадување и безидејност, истакна на денешната прес-конференција кандидатот за градоначалник на Македонска Каменица Димчо Атанасовски. Во продолжение интегрален текст и видео од прес-конференцијата на Атанасовски: Денес имаме невработеност, отсуство на странски и домашни инвестиции, младите и старите секојдневно се иселуваат, а основните егзистенцијални проблеми на каменичани, како водоснабдување и одвод на води, пристап до патна инфраструктура - останаа нерешени. Со Македонска Каменица владеат безидејни и корумпирани локални шерифи, чие неработење ја претвори Македонска Каменица од најпросперитетен град во црна дамка на Истокот. Со други зборови - сегашната власт мора итно да си оди. Денес ќе ги презентирам клучните проекти од нашата програма со која јас како градоначалник и нашите советници од ВМРО-ДПМНЕ ќе ја направиме Македонска Каменица да биде најпросперитетната општина на Истокот. - транспарентна општина со еднаков пристап на сите граѓани - изградба на пензионерски дом - смарт општина во функција на граѓаните - ефикасно јавно претпријатие во служба на граѓаните и нивните потреби - уредување на градската депонија по европски терк - субвенционирање на старите станбени згради за поставување на енергетски ефикасни фасади - поддршка на невладиниот сектор, спортски и културни друштва. Овие се само дел од проектите кои локалната власт во соработка со граѓаните ќе ги реализира во мандатот од 2021 до 2025 година. Каменичани заслужуваат многу повеќе од она што го понуди сегашната власт во Македонска Каменица, порача Атанасовски.