Димитрис Аврамопулос – Kurir.mk

Аврамопулос: Ако порасне миграцијата, можно е враќање на визите

Ивана Ефремовски — Fri, 05 Oct 2018 15:18:09 +0000

Европскиот комесар за миграции, внатрешни работи и државјанство Димитрис Аврамопулос денеска од Тирана предупреди дека е можно враќање на визите за земјите од Западен Балкан, доколку миграцијата порасне за над 50 проценти. -Ние ја следиме ситуацијата за сите земји, а не само за Албанија. Ризикот од илегална миграција треба да се намали. Механизмот за враќање на визите не е ставен во игра, но ако има зголемување на оваа појава со повеќе од 50 отсто и мигрантите одбиваат да се вратат во земјата на потекло, тогаш постои и оваа можност, одговори Аврамопулос, кој во Тирана учествува на министерскиот состанок на Европската унија за Западен Балкан. Според Аврамопулос, враќање на визниот режим е можен и доколку постои закана по безбедноста од терористички активности. -Во моментов нема проблем, но ја следиме ситуацијата, рече Аврамопулос. На дводневниот министерски состанок на Европската унија за Западен Балкан е договорена соработка за управувањето со границите, борбата против тероризмот и организираниот криминал. (МИА)

Аврамопулос најави заеднички европски патроли долж српската граница

Ивана Ефремовски — Thu, 19 Jul 2018 06:54:44 +0000

Еврокомесарот Димитрис Аврамопулос најави дека во тек се преговори меѓу Србија и Европската унија со кои граничари од ЕУ заедно со српските колеги ќе патролираат по должината на српската граница за да спречат движење на мигранти. - Граничарите ќе патролираат и ќе користат техничка опрема. Овој договор значително ќе го засили управувањето со границите и ќе помогне во борбата против нерегуларната миграција и криумчарењето на мигранти низ регионот, вели Аврамопулос во текст за српски „Блиц“. Аврамопулос воедно изрази надеж дека наскоро целиот регион ќе има можност за безвизно патување во ЕУ, алудирајќи тука на преговорите со Косово. Тој додаде дека безвизниот режим на ЕУ за Балканот ќе биде надгледуван во иднина низ механизамот кој дозволува суспендирање на безвизниот режим доколку земјите не ги почитуваат своите обврски. (МИА)

Аврамопулос за „Коха Диторе“: Косово ги исполни критериумите за визна либерализација

Даниел Василев — Wed, 18 Jul 2018 12:59:35 +0000

Европскиот комесар за миграција, внатрешни работи и државјанство, Димитрис Аврамопулос, во авторски текст во весникот „Коха Диторе“, порача дека Косово постигнало прогрес и критериумите за визна либерализација се исполнети, јавува дописникот на МИА од Приштина. - Едно значајно поглавје во нашата заедничка историја: Косово ги исполнува условите за либерализација на визниот режим, пишува Авропулос во текстот што приштинскиот дневен весник ќе го објави во утрешниот број. Според еврокомесарот, „по многу години и месеци напорна и обемна работа, Европската Комисија (ЕК) сега веќе потврдува дека Косово ги исполни сите стандарди за визна либерализација“. - Сега, ние го охрабруваме Советот на Европа и Европскиот Парламент да продолжат напред со нашиот предлог. Јас навистина се надевам дека сме многу блиску до единствен визен режим за целиот регион, кој ќе се воспостави мошне бргу, пишува Аврамопулос. Тој, заедно со косовскиот претседател Хашим Тачи, денеска во 16:30 на прес-конференција во Брисел ќе ја објават веста за одлуката на ЕК во врска со визната либерализација за косовските граѓани. МИА