диносаурус – Kurir.mk

Стапалка од диносаурус долга еден метар пронајдена во Британија

Катерина Бојаџиева — Thu, 16 Feb 2023 10:51:10 +0000

На британскиот „Брег на диносаурусите“ е пронајден рекордно голем отпечаток од овој одамна изумрен вид. Стапалката, долга речиси еден метар, е најголема од ваков тип откриена во Јоркшир. - Најинтригантната одлика на ова откритие е долгата трага зад стапалото - она што го нарекуваме метаподиум. Тоа значи дека нашиот голем месојад веројатно се одморал клекнат тука во калта пред да стане, замине и остави вечен отпечаток зад себе. Забавно е да се замисли како овој диносаурус шета по калливата крајбрежна рамнина во едно мрзливо неделно попладне во периодот Јура, палеонтологот Дин Ломакс од Универзитетот на Манчестер. - Не можев да поверувам кога го видов, морав двапати да проверам. Претходно наидов на некои помали отпечатоци, но ништо слично, раскажува Мери Вудс, археологот што го пронајде отпечатокот. На овој брег се најдени илјадници стапалки од диносауруси, како и бројни фосили, но отпечатокот со три прсти е еден од само шесте такви забележани тука. А, првиот од нив бил откриен 1934 година. - Ова важно откритие дополнително докажува дека џиновските месојади талкале на овој дел од земјата за време на периодот Јура. Видот на стапалото, во комбинација со неговата старост, укажува дека го направил диносаурус од расата мегалосаурус или сличен нему, појасни геологот Џон Хадсон. Мегалосаурус бил еден од најголемите грабливци на своето време - имал голем череп „вооружен“ со остри заби. Во должина, можел да дотигне и до 8 - 9 метри. Наодот им овозможи на научниците да го проучат обликот на стапалките, бројот на прстите, трагите од канџи, како и остатоците од кожата од диносаурус. По работата на фосилизираниот отпечаток, властите ќе го изложат во музеј.

ВИДЕО: Шокантно откритие во САД: Сушата открила траги од диносаурус стари 113 милиони години

Ристе Здравков — Wed, 24 Aug 2022 17:48:36 +0000

Во Паркот на долината на диносаурусите во Тексас, САД, поради екстремните суши пресушила реката и пронајдени се траги од диносаурус од пред околу 113 милиони години, објавија во понеделникот од паркот преку соопштение за медиумите. – Повеќето траги кои неодамна беа откриени на различни делови од реката во паркот припаѓаат на акрокантосаурусот. Станува збор за диносаурус кој бил висок околу четири и пол метри (возрасен), а тежел близу седум тони“, рекла за „Си-ен-ен“ портпаролката на паркот Стефани Салинас Гарсија. „Во паркот во Глен Роуз, Тексас, најдовме и траги од сауропосејдон, кој би бил висок околу 18 метри и тежок околу 44 тони“, додала таа. Поради екстремните суши, голем број реки во паркот пресушија. Повеќе од 60 отсто Тексас минатата недела беше погоден од двете најинтензивни категории на суши и топлотни бранови. Во нормални временски услови, трагите од диносаурусите во коритото на реката би се наоѓале под водата и би биле покриени со седимент. – Секогаш е возбудливо да се пронајдат нови траги од диносаурус во паркот! – рекла Гарсија. Научниците велат дека траагите наскоро повторно ќе бидат покриени бидејќи се предвидува дожд. „Иако овие траги ќе бидат видливи само за кратко време, ние сме многу возбудени. Паркот на долината на диносаурусите ќе продолжи со заштитата на овие 113 милиони години стари патеки не само за сегашните, туку и за идните генерации“, рекла Гарсија. Фото: Принтскрин/Јутјуб/Dinosaur Valley/АFP via Getty Images

ВО ДВОР НА РЕСТОРАН ПРОНАЈДЕНИ СТАПАЛКИ ОД ДИНОСАУРУС: Стари се 100 милиони години, ова се деталите за шокантното откритие во Кина (ФОТО+ВИДЕО)

Магдалена Андонова — Tue, 19 Jul 2022 12:21:30 +0000

Стапалки од диносаурус стари 100 милиони години се откриени во југозападна Кина во дворот на ресторан во Лешан, во покраината Сечуан. Наводите говорат оти неколкуте јами од карпи се всушност отпечатоци на два сауроподи – вид диносауруси кои живееле во раниот Креда-период, вели Лида Ксинг, палеонтолог и професор на Кинескиот универзитет за геологија. Нејзиниот тим во саботата го потврди откритието, користејќи 3-Д скенер. Сауроподите, познати по долгите вратови и опашки, биле најголеми животни што некогаш оделе на Земјата. Тие можеле да пораснат до големина речиси колку трикатна куќа и биле толку тешки што „земјата се тресела под нив“ како што се движеле. – Сауроподите кои оставиле траги во Сечуан веројатно биле долги околу осум метри, изјави Ксинг. Иако многу фосили од диносауруси од Јура-периодот се откриени во Сечуан, пронајдени се многу малку фосили од Креда. Ксинг смета дека второво доба е „златното време на диносаурусите“, а „ова откритие е како парче од сложувалката што го опишува времето на Креда во Сечуан“ и сведочи за различноста на диносаурусите. (МИА)

Најдобро сочуваниот скелет на диносаурус продаден за 2,4 милиони долари

Катерина Бојаџиева — Fri, 13 May 2022 09:45:30 +0000

Скелетот на диносаурус дејнонихус наречен „Хектор“, е продаден на наддавање во аукциската куќа „Кристи“ во САД вчера за 12,4 милиони долари. Според нивната интернет-страница, коските на Хектор се подобро сочувани од која било друга единка од овој вид пронајдена досега. Според наводите, ова е единствениот скелет на „дејнонихус“, којшто отсега ќе биде во приватна сопственост. Називот на овој диносаурус му е даден поради неговите големи канџи, од страна на палеонтологот Џон Остром во 1969 година. Дејнонихусите живееле во подрачјето на Северна Америка пред околу 115 милиони години. Тие биле грабливци, а нивната способност да стојат на две нозе ги направила пофлексибилни при ловот. Се смета дека овој вид, во еволутивна смисла, е поблизок до денешните птици отколку до влекачите. Скелетот на Хектор е пронајден и ископуван од 2012 до 2014 година во американската сојузна држава Монтана. Според податоците на „Кристи“, дејнонихусот бил висок над три метри.

НАУЧНИЦИТЕ ВО ШОК: Откриен диносаурус со необични карактеристики

Магдалена Андонова — Fri, 11 Mar 2022 21:18:21 +0000

Палеонтолозите во Аргентина открија нов вид диносаурус кој има слабо развиени горни екстремитети. Овој новооткриен диносаурус, наречен Guemesia ochoai, се смета дека припаѓа на семејството месојади познати како абелисауриди, кои живееле во Европа, Африка, Јужна Америка и Индија за време на Креда, а изумреле пред околу 66 милиони години. Научниците открија нов вид откако анализираа череп стар околу 70 милиони години пронајден во северозападна Аргентина. Кај многу абелисауриди, предните екстремитети биле дегенеративни, черепот пократок и имало коскени израстоци над очите. Сепак, Guemesia ochoai имаше „неверојатно мал“ череп и веројатно најмалиот мозок од сите досега откриени абелисауриди. Иако речиси без раце, тие фаќале плен двојно поголем од него. Поради своите необични карактеристики, овие диносауруси - без зглобови и лакти, не можеле да ги свиткаат горните „израстоци“, а немале ни канџи со кои можеле да грабнат плен, пишува Science Alert. Но, не дозволувајте тоа да ве измами. Овие абелисауриди би можеле да фатат плен многу поголем од себе. Тајната лежи во нивните силни вилици и острите заби кои би можеле да ја компензираат слабоста на предните екстремитети. Бидејќи е пронајден само черепот, тешко е да се каже како изгледал овој вид во споредба со другите абелисауриди. Во соопштението на Природонаучниот музеј (NHS) на Обединетото Кралство се наведува дека бил сличен на Carnotaurus sastrei, но имал помала глава.

Дете пронајде редок скелет на диносаурус во Канада (ФОТО+ВИДЕО)

Магдалена Андонова — Fri, 16 Oct 2020 07:23:57 +0000

Едно 12-годишно момче од Канада, при едно свое аматерско истражување, открило редок скелет на диносаурус стар 69 милиони години. Нејтан Храшкин рече дека бил „буквално без зборови“ кога ги видел коските. – Бев толку шокиран, што не бев ни возбуден, иако знам дека требаше да бидам, изјави момчето за Би-би-си. Младиот палеонтолог го истражувал тн. Провинцијален парк на диносаурусите во областа Алберта, близу Калгари, којшто е богат со фосили, заедно со неговиот татко. Во јули тие забележале како се наѕираат стари коски од една карпа, а деновиве заврши и целосното нивно ископување на скелетот на диносаурусот. Нејтан, кој е заинтересиран за диносаурусите од шестгодишна возраст, често со својот татко, го истражува ова заштитено подрачје во Канада. Бидејќи момчето знаело дека фосилите се заштитени со закон, па веднаш го известиле надлежниот музеј. Стручњаците потоа откриле меѓу 30 и 50 коски кои му припаѓале на млад хадросаур, за кој се проценува дека бил стар околу три или четири години. – Порано, како и на повеќето деца, и мене омилен диносаурус ми беше тираносаурус-рекс. Но, сега го обожавам хадросаурусот, рече Нејтан додавајќи дека едвај чека да го види неговото откритие во музејот. Оттаму пак, велат дека фосилот, стар околу 69 милиони години, е многу редок наод. (МИА)

Пронајден диносаурус голем колку паметен телефон

Магдалена Андонова — Tue, 07 Jul 2020 10:47:12 +0000

Археолози во САД го пронајдоа најмалиот диносаурус, засега познат, кој живеел во праисторијата. Суштеството било долго околу 10 сантиметри, односно не поголемо од денешен обичен телефон. Како што соопшти американската Национална академија на науки, суштеството било претходник на диносаурусите и летечките птеросауруси. – Ова мало животинче денес би било одлично домашно милениче. Но, се работи за возрасно, пораснато суштество. На тоа укажуваат оние специфични годови кај коските, нагласи Кристијан Камерер, палеонтолог од Музејот за природни науки во Северна Каролина и одговорен за новите истражувања. Диносаурусот го доби името „Kongonaphon kely“, а живеел на Мадагаскар пред 237 милиони години. (МИА)

На Антарктикот откриена стапалка од диносаурус стара 200 милиони години

Катерина Бојаџиева — Wed, 17 Apr 2019 13:54:56 +0000

Истражувачи на Антарктикот открија стапалка од диносаурус стара 200 милиони години, голема колку дланка, соопшти Германскиот федерален институт за геолошки науки од Хановер. За каков диносаурус се работи, сè уште не се знае. Откритието датира од 2016., но е објавено дури сега во списанието „Полар Рисрч“. Коски од диносауруси претходно беа најдени на југот на Викторија Ленд, но не и на северниот дел од оваа антарктичка област, каде што е откриена стапаката. -Тоа не го очекувавме, истакна Андреас Лојфер водач на научнната експедиција. Според него, ова откритие, заедно со неодамна пронајдените остатоци од прашума, можеби значи дека пред 200 милиони години, Антарктикот не бил „леден континент“ каков што го знаеме денес.

Диносаурус пристигна во скопската зоолошка градина (ФОТО)

Ивана Ефремовски — Wed, 27 Feb 2019 11:01:27 +0000

Пристигна првиот од трите диносауруси, скулптури на уметникот Андреј Миневски, кои се изработени од рециклиран отпад, железо, информираат од скопската зоолошка градина. -Андреј се приклучи во кампањата "Креирај и донирај", а неговите уметнички дела посетителите ќе може да ги видат до јуни. Голема благодарност до господинот Миневски и до ЈП Водовод и канализација Скопје кои ги пренесуваат диносаурусите и несебично секогаш помагаат на Зоо Скопје, информираа тие.