дионтеј вајлдер – Kurir.mk

„Бронзениот бомбардер“ се врати – Вајлдер го „здроби“ Хелениус во првата рунда

Ристе Здравков — Sun, 16 Oct 2022 07:02:57 +0000

Дионтеј Вајлдер уште еднаш покажа дека останува еден од најопасните боксери во тешка категорија и покрај двата последователни порази од Тајсон Фјури, откако во Бруклин го победи Роберт Хелениус во првата рунда во негов стил со брутален нокаут уште во првата рунда. Популарниот „Бронзен бомбардер“ се врати во рингот по операцијата на десната рака, неговото главно оружје во рингот, но против шведскиот боксер Хелениус едноставно беше незапирлив. „Кога го удрив, можете да забележите дека одам на уште еден удар. Не знам дали Роберт ќе биде истиот по овој меч“, изјави Вајлдер, откако Хелениус помина неколку моменти неподвижен на подот. Американскиот боксер не се откажува од можноста да обезбеди меч против носителите на титулите, Фјури (ВБЦ) и Олександер Усик (ВБА, ИБФ, ВБО и ИБО) во 2023 година, но други опции се Џо Џојс (14-0), Енди Руиз (35-2) и Џеред Андерсон (12-0).

Deontay Wilder BRUTAL ROUND1 KO😮‍💨 pic.twitter.com/eCw1jfeQtd
— . (@cozyinabag) October 16, 2022

Вајлдер: Нема изговори, победи посилниот

Дарко Андоновски — Sun, 23 Feb 2020 10:56:59 +0000

Американскиот боксер Дионтеј Вајлдер го призна поразот по мечот со Британецот Тајсон Фјури. – Сè е во ред со мене. Ова се случува. Подобриот боксер победи денес. Мојот агол фрли крпа, иако бев подготвен да ја продолжам борбата. Имаше одредени работи пред оваа борба, но што сега да се зборува за тоа. Не може да има изговори. Јас само би сакал мојот тим да дозволеше оваа борба да продолжи. Јас сум воин. Противникот покажа одличен бокс, но ќе се вратам уште посилен. И ќе го докажам тоа сè на сите, изјави Вајлдер. Американецот ноќеска во Лас Вегас загуби во седмата рунда со технички нокаут и му ја препушти на Фјури титулата во ВБЦ верзијата тешка категорија.

Фјури и Вајлдер потешки од првиот меч

Дарко Андоновски — Sat, 22 Feb 2020 09:27:59 +0000

Тајсон Фјури и Дионтеј Вајлдер поминаа на „кантар“ изминатава ноќ. Двајцата повторно ќе се соочат еден против друг в недела во Лас Вегас. Како што е познато, првата битка меѓу нив не донесе победник. Традиционално, тие беа мерени пред реваншот, а по 15 месеци, двајцата се покажаа потешки од првиот меч. Британецот ќе има предност во однос на тежина. Кантарот покажа дека тежи 123,8 килограми. Ова е 7,4 килограми повеќе од првиот датум. Во исто време, Вајлдер тежи 104,7 килограми пред утрешниот натпревар, што е за 8,3 килограми повеќе од првиот меч. Фјури ќе биде скоро 20 килограми потежок од неговиот ривал во рингот во недела. Сепак, се чини дека ова не му пречи на Вајлдер. – Тоа не е важно во натпреварите кај најтешките. Отсекогаш сум морал да се борам со поголеми од мене, а неговата тежина ќе го направи побавен, смета Вајлдер. Мојата тежина не е проблем,изјави пак Фјури. – Тоа е 123 килограми чисто британско говедо, посочи боксерот. Двајцата беа разделени при мерењето на тежината поради судирите меѓу нив за време на официјалната прес-конференција. Иако беа на неколку чекори еден од друг, тие повторно разменија остри рабови, навреди и средни прсти, дополнително загревајќи ја атмосферата пред утрешниот судир.

Прес-конференцијата се претвори во хаос: Фјури и Вајлдер не избираат место за физичка пресметка (ВИДЕО)

Дарко Андоновски — Thu, 20 Feb 2020 09:29:03 +0000

Светскиот шампион во тешка категорија во ВБЦ верзијата, Дионтеј Вајлдер и неговиот противник Тајсон Фјури за малку ќе имаа физичка пресметка пред прес-конференција во Лас Вегас. Двајцата лути ривали застанаа еден кон друг и почнаа да си кажуваат нешто в лице. Ова траеше околу една минута, по што Американецот го турна Британецот, по што на ист начин возврати Фјури. Тогаш реагираа членови на боксерските тимови и лицата од обезбедувањето кои спречија тепачка. Битката помеѓу Вајлдер и Фјури ќе се одржи на 22 февруари во Лас Вегас. Триесет и четиригодишниот Вајлдер има 42 победи и 1 реми. Од друга страна, 31-годишниот Фјури има 29 победи и 1 реми. Првиот меч меѓу нив се одржа на 1 декември 2018 година и заврши нерешено.

Фјури ќе добие 26 милиони долари за реваншот со Вајлдер

Дарко Андоновски — Tue, 12 Feb 2019 20:44:27 +0000

Поранешниот светски шампион во бокс во тешка категорија, Тајсон Фјури (Велика Британија) ќе добие 26 милиони долари хонорар за реваншот против шампионот во верзија Светски боксерски совет Дионтеј Вајлдер (САД), соопштува „Дејли Мирор“. Натпреварот ќе се одржи на 18 мај во Њујорк. Тие се состанаа на 1 декември минатата година во Лос Анџелес, но победник немаше, откако и Вајлдер, и Фјури останаа без пораз на професионалниот ринг. Американецот е со биланс од 40 победи (39 со нокаут), 0 порази и 1 реми при, додека Фјури е со 27 успеси (19 со нокаут) 0 порази и 1 реми. Британецот објави дека донирал 9 милиони долари за добротворни цели добиени од првиот натпревар со Вајлдер.

Фјури: Целиот свет виде дека јас го освоив мечот

Ивона Петрова — Sun, 02 Dec 2018 09:46:24 +0000

Тајсон Фјури се врати на одличен начин меѓу големите боксери. Откако помина речиси три години надвор од рингот по победата над Владимир Кличко и многумина го отпишаа од спортот, тој се врати против едно од најголемите имиња во тешката категорија – Дионтеј Вајлдер. Иако натпреварот заврши нерешено, Британецот е убеден дека тој требал да биде прогласен за победник. Фјури беше пратен на два пати во нокдаун, а вториот пат едвај стана на нозе, но тој, а и аналитичарите во светот, се на мислење дека победата требало да биде за него. – Целиот свет знае, целиот свет виде дека морав да бидам прогласен за победник. Ова момче има страшни удари, но јас успеав да ги избегнам речиси сите. Се надевам дека ве направив сите горди од она што го видовте во оваа битка. Тој никогаш немаше да ме нокаутира, бидејќи јас играв со сето свое срце во рингот. Колку и пати да ме испратеше на подот, јас повторно ќе станев. Дојдов да победам оваа вечер, изјави Британецот по мечот. Тој додаде дека сега само едно е сигурно – дека ќе има реванш. – Двајцата со Вајлдер сме големи шампиони. Јас и ова момче тука сме двајцата најдобри боксери во тешка категорија на целата планета. Сега ќе си одам и ќе обрнам внимание на семејството бидејќи 10 недели јас бев далеку од нив, додаде Фјури по натпреварот. Уште во рингот, по прогласувањето на судската одлука, тој упати предизвик против светскиот шампион во другите три верзии, Ентони Џошуа и го повика да се бори со него, ако навистина сака да биде сметан за најдобар во светот

Вајлдер: Требаше да бидам победник, два пати го нокаутирав

Дарко Андоновски — Sun, 02 Dec 2018 09:18:39 +0000

Светскиот шампион во ВБЦ серијата, Дионтеј Вајлдер го задржа појасот по натпреварот со Тајсон Фјури, откако битката меѓу нив заврши нерешено во Лос Анџелес. Според Вајлдер, сепак фактот дека на два пати го испрати својот противник на земја во овој натпревар, би требало да биде прогласен за победник. Но на крајот и судијата немаа исто мислење, па најверојатно ќе има реванш. – Мислам дека токму заради овие два нокдауна јас сум победникот. И двајцата сме големи воини, ги вложивме срцата во овој натпревар, но поради овие два нокдауна требаше јас да сум победник. Двајцата сме најголемите на светот, спроведовме голем натпревар и јас му се заблагодарам за тоа. Почитта е меѓусебна, изјави Вајлдер. Тој го анализираше и настапот во натпреварот. – Почнав полека, слабо. Избрзував со ударите. Не стоев цврсто на рингот. Бев премногу неодлучен. Не удирав добро со десната рака и долго време не можев да се поставам. Такво нешто обично не ми се случува. Не можев да се ослободам од тензиите во почетокот. Премногу ги форсирав ударите, наместо да седам назад и да го почекам да нанесе удар. Навистина сакав да го нокаутирам, за да им даде на луѓето она за што беа дојдени во салата. Кога си под тензии, никогаш не си прецизен во ударите, изјави Вајлдер. Тој беше категоричен дека ќе има реванш и дека во него ќе победи. – За мене тоа беше еден голем натпревар и сакам да има уште еден. За мене нема никакво значење каде ќе го спроведеме. Докажавме дека сме двајцата најголеми боксери во тешка категорија. Подготвен сум да го повториме натпреварот и да им го дадеме повторно на навивачите спектаклот, што го сакаат и заслужуваат, додаде Американецот по натпреварот.

ВИДЕО: Масовна тепачка на прес-конференцијата на Вајлдер и Фјури

Катерина Бојаџиева — Thu, 29 Nov 2018 14:23:38 +0000

Се „пресметаа“ уште на прес-конференцијата за мечот што се претвори во масовна тепачка. Тајсон Фјури со своите изјави го испровоцира Дионтеј Вајлдер, почнаа да се препираат, имаше вперување прсти во око и потоа се вклучија и нивните тимови. По ескалацијата, Фјури остана без маица, а обезбедувањето го расчисти прес-центарот. Минатиот месец две нивни прес-конференции пропаднаа поради навреди и препирања. Ваквиот развој на настаните некои го коментираат како непотребен циркус, додека други сметаат дека провокациите помагаат „да му пукне филмот“ на противникот. 30-годишниот Фјури досега има 27 победи во 27 мечеви (од кои 19 со нокаут), а Вајлдер (33) го брани WBC појасот со 40 победи од 40 мечеви (39 нокаути). Ситуацијата ескалира во 45-тата минута од видеото:

Џошуа: Борба со Вајлдер ќе има оваа година

Дарко Андоновски — Tue, 08 May 2018 09:28:27 +0000

Британската боксерска суперѕвезда, Ентони Џошуа (21-0, 20 КО) е речиси сигурно дека до крајот на оваа година ќе има борба за обединување на појасите со шампионот на ВБЦ во тешка категорија, Дионтеј Вајлдер (40-0, 39 КО). Двајцата можеби најдобри боксери на денешницата ги држат сите главни титули во тешка категорија и сакаат да се сретнат, но и покрај долгите преговори, датум за борба се уште нема. Пред неколку недели Вајлдер објави видео во кое му нуди на својот противник гарантиран приход од 50 милиони долари за да се соочи со него, но промоторот на Џошуа, Еди Херн, ја утврди понудата како ништо повеќе од „маркетиншки трик“, иако тој го прифатил предлогот сериозно. Говорејќи по победата на неговиот пријател Тони Белју над Дејвид Хеј во саботата вечер, Џошуа изјави дека се чувствува многу убеден дека во даден момент оваа година, дуел со Вајлдер ќе има. - Дуел со Вајлдер ќе има 95 отсто оваа година. Силно сум заинтересиран за таква средба. Веќе не можеме да зборуваме за финансискиот дел, бидејќи сум сигурен дека ќе има профит од овој дуел. Работиме постојано за оваа борба да се одржи, изјави Џошуа, кој е шампион на ИБФ, ИБО, ВБА и ВБО верзиите. Ако сепак до договор не дојде, тогаш британскиот боксер веројатно ќе мора да направи задолжителна одбрана против освојувачот на златен олимписки медал и поранешен светски шампион во тешка категорија - Александер Поветкин.