диви свињи – Kurir.mk

Завршува можноста за санитарен лов во националниот парк Шар Планина, нема појава на африканска чума кај застреланите диви свињи

Катерина Бојаџиева — Tue, 31 Jan 2023 18:59:34 +0000

На територијата на националниот парк Шар Планина нема болест африканска чума кај дивите свињи кои биле застрелани согласно договор со ловечки друштва со цел да се намали опасноста од ширење на таа болест на заштитеното планинско подрачје. Од Јавната установа Национален парк Шар Планина потсетуваат дека ловот таму е целосно забранет, а договорот со ловечките друштва за ткн. санитарен лов се однесува само за одреден период со цел елиминирање на болеста. -Денес, на 31.01.2023, истекува важноста на Решението и договорите за соработка кои Јавната установа Национален парк Шар Планина ги склучи со ловечките друштва Кучи Баба, Шќипоња е шарит, Шар Планина и Љуботен со цел превземање мерки во однос на појавата на африканската чума кај свињите.Договорите беа склучени врз основа на Решението за одобрување на ловење на дивеч под заштита и преземени мерки од Агенцијата за храна и ветеринарство (АХВ) во однос на појавата на африканска чума кај свињите донесено од Министерството за земјоделство, шумарство и водостопанство бр.50-8629/1 од 30.08.2022 година и Решението на АХВ за контролни и заштитни мерки во однос на болеста африканска чума кај свињите бр. 10-2257/2 од 03.08.2022 година и измените и дополнувањата на ова Решение. Врз основа на ова решение на територија на НП Шар Планина биле отстрелани 13 диви свињи, а според резултатите добиени од анализите од АХВ болеста не е детектирана, информираат од НП Шар Планина. На подрачје на националниот парк освен забранет лов на диви животни, забрането е и движење на лица со пушка и други средства за лов. -Непочитувањето и прекршувањето на законите и правилата ќе биде санкционирано согласно позитивните законски пропоси, порачуваат од НП Шар Планина. Незаконит лов е казнив по член 228 од Казнениот законик на Република Северна Македонија.

ЦУК: Диви свињи се појавиле во Пржино, граѓаните да бидат внимателни при пешачење на Водно

Катерина Бојаџиева — Tue, 27 Sep 2022 13:14:32 +0000

Граѓаните треба да бидат внимателни при движење на локации во планинските пешачки зони на Водно каде може да наидат на диви свињи. При евентуална средба со дивите свињи граѓните треба да бидат смирени, да не ги напаѓаат за да не ги предизвикаат, бидејќи при нивната одбранбена реакција може да ги повредат, изјави денеска Илија Бојаровски од Центарот за управување со кризи. Ако досега имало пријава само за контакт со диви свињи во високите шумски предели, сега, појасни тој, тие се појавуваат и во Скопје, како што е случајот со населбата Пржино, а и други населби на граница со природата во скопско. – Тоа е заради тоа што голем број овошки зреат во планината и во населбата и трагајќи по храна дивечот се спушта и во населбите. Лицата кои ги шетаат своите миленици да го одбегнуваат работ на населбата Пржино, каде започнува шумата, бидејќи инстинктите на кучињата и дивите свињи не може да бидат предвидени, а тоа да не го прават во доцните вечерни часови и во раните утрински часови. Во последниот неколкугодишен период е зголемен ризикот од појава на болеста африканска чума кај дивите свињи и тоа е плус да алармираме на нивниот зголемен број на Водно, бидејќи нема специјализирана институција за справување со ваква или слична појава, рече Бојаровски. Тој посочи дека ЦУК се обратил со барање за преземање законски надлежности и решенија до ЈП Паркови и зеленило Скопје, кое управува и стопанисува со Парк шумата Водно, Инспекторатот за шумаство и ловство, стручен орган за ловство, Агенцијата за храна и ветеринарство како координатор за справување со африканската шума, за која, како што потенцира, имаат инфромација дека дава награда од 250 денари за пријавена угината дива свиња, што значи дека ако граѓаните на овој потег забележат угината дива свиња тоа треба да го пријават. – Министерствата за животна средина и просторно планирање, за земјоделство, шумарство и водостопанство, за внатрешни работи и градоначалникот на Град Скопје Данела Арсовска би можеле со свои ресурси да се вклучат во справувањето со појавата, како на пример Зоолошката градина во Скопје, повеќе здруженија за заштита на животни и сл. Исто така информиран е и градоначалникот на општина Кисела Вода, Орце Ѓорѓиевски, бидејќи Пржино е на подрачјето на таа општина. Дивата свиња се движи навечер, а преку ден одмара во густежите кои ги имаме на потегот од Водно, над Пржино, потоа Средно Водно се до Нерези. Се додека има вода и храна, дневно може да помине дури и по 70 километри и да се врати таму каде и е леглото. ЦУК преку единствениот повикувачки број за итни случаи 112 е во постојна комуникација со граѓаните и сериозно ги третира дојавите за опаснот по животот и материјалните добра, додаде Бојаровски.

Скопјанец удрил во диви свињи и во запрено возило, четворица повредени

Магдалена Андонова — Fri, 09 Sep 2022 10:35:11 +0000

Во полиција утрово во 3:00 часот било пријавено дека на автопатот Скопје – Штип, во близина на наплатна рампа Преод, патничко моторно возило „сеат леон“ со скопски регистарски ознаки, управувано од В.А.(19) од скопското село Батинци удрило во диви свињи, а потоа и во запрено патничко моторно возило „ауди А6“ со скопски регистарски ознаки, во кое бил возачот Б.С.(26) од скопското село Средно Коњари. Како што информира МВР, во несреќата со тешки телесни повреди се здобиле сопатниците од возилото „сеат леон“ А.М.(19) и М.И.(26) двајцата од село Батинци, а со телесни повреди се здобиле В.А. и Б.С., констатирани во Комплексот клиники „Мајка Тереза“ – Скопје. Извршен бил увид од увидна екипа од СВР Скопје.

Од септември започнува ловот на дивите свињи како една од мерките во борбата против болеста Африканска свинска чума

Ивана Ефремовски — Tue, 16 Aug 2022 14:26:48 +0000

Министерот за земјоделство шумарство и водостопанство Љупчо Николовски, денеска донесе решение за одобрување на ловење на дивеч под заштита. Со ова решение започнува итна максимална депопулација на дивите свињи според акционен план дефиниран помеѓу МЗШВ и АХВ. Ловната сезона започнува на 1. септември на сите ловиштата на територија на државата освен во ловиштата во општините Македонска Каменица, Виница, Кочани и Делчево. Одобрувањето на почеток на лов на диви свињи е една од мерките за спречување на ширењето на болеста Африканска свинска чума, која сериозно го загрозува свињарскиот сектор. Ваквата одлука беше донесена врз основа на координативните состаноци помеѓу министерството, АХВ и сите релевантни страни засегнати од опасноста од ширење на оваа болест. Согласно Законот за ловство, дивечот е во државна сопственост и како добро од општ интерес на државата ужива посебна заштита и подлежи на законски мерки во случај на појава и ширење на заразни болести. Концесионерите на дивечот во ловиштата, управувачите со државните ловишта ЈУ „Национални паркови“ и ЈП„Национални шуми“ - Скопје како привремени управувачи на ловиштата без концесионер, потребно е да го прилагодат своето работење согласно одредбата од донесеното Решение за одобрување на лов. Концесионерите на дивеч во ловиштата се должни ловот да го организираат во присуство на ловочувар, инспектор за ловство и доктор по ветеринарна медицина, а застеланиот дивеч по завршувањето на ловот да се складира на одредено место обележано од страна на Концесионерите на дивечот во ловиштата. Исто така, се задолжуваат Концесионерите и управувачите со државни ловишта во рок од 5 дена да определат ловни денови за засилен отстрел на диви свињи и да ги превземат сите мерки пред почетокот на ловот кој согласно денешното Решение ќе започне на 01. септември. МЗШВ континуирано ја следи состојбата со болеста Африканска свинска чума и во координација со АХВ и другите институции превзема навремени мерки. На иницијатива на министерот Николовски беше предложено итно формирање на Координативно тело како една од мерките за мониторинг и спречување на болеста Африканска свинска чума. Ова Координативно тело активно ќе ја следи состојбата и ќе дава идни препораки за потреба од превземање на дополнителни мерки.

Ловците гневни, Владата го продолжи ловот на диви свињи

Ивана Ефремовски — Fri, 04 Feb 2022 20:31:07 +0000

Министерот за земјоделство, шумарство и водостопанство, Љупчо Николовски денеска на социјалните мрежи информираше дека ловот само за диви свињи е продолжен до 31 март, иако ловната сезона заврши на 31 јануари.

„Оваа одлука е согласно мерките преземени од страна на Владата и Агенцијата за храна и ветеринарство, а со цел спречување и ширење на африканска чума кај свињите која е присутна во две одгледувалишта во нашата држава“, стои во објавата на Николовски.

Оваа одлука наиде на низа негативни реакции од ловците низ Македонија и според нив, овој потег го нарекоа катастрофален.

„Над 90 отсто од свињите носат малечки. Што ќе ловиме наредната сезона? Подобро е да се пушти лов таму каде што африканската чума е застапена, а не на цела територија. Покрај дивата свиња, ќе страда и друг дивеч“, реагираат тие.

Агенцијата за храна и ветеринарство ќе ги задолжи концесионерите на ловиштата да се засили отстрелот на овој дивеч.

Жителите во Кочанско се соочуваат со наезда на диви свињи

Магдалена Андонова — Fri, 14 Jan 2022 12:20:16 +0000

Поради забраната за лов во целиот источен регион, заради присуство на вирусот на африканската чума, во Кочанско се соочуваат со наезда од диви свињи. Земјоделците од повеќе села од Осоговијата и Плочковица се жалат дека трпат големи штети на есенските посеви во нивите и градините, а дивите свињи им влегуваат и во дворовите. Ловците кои имаат за задача да го пребаруваат теренот за угинати диви свињи од болеста, сведочат дека целосно се уништени неколку 100-тина декари засеани со пченка и компир во атарите на селата Видовиште и Теранци, а поради нивната агресивност опасни се и за домашните животни. Ловците не смеат да реагираат и да им помогнат на селаните. Од досегашната потрага по ловните терени не се пронајдени угинати диви свињи како последица од африканската чума. Лабораториските испитувања на месото во залиха од пред воведувањето на забраната, покажало негативни резултати на присуство на вирусот. Покрај ловот, забранета е и купопродажбата на домашни свињи, а сточниот пазар во Облешево останува затворен до важноста на мерката воведена по препорака на Агенцијата за храна и ветринарство. Во радиус од 3 км од жариштето еутанизирани се 195 свињи и закопани во посебни јами на депонијата во Делчево. Во кланица ќе завршат и околу 700 домашни свињи од зоната под надзор во радиус од 10 км.

Диви свињи шетаат на пат во Охрид (ФОТО)

Ивана Ефремовски — Wed, 22 Sep 2021 19:27:10 +0000

Диви свињи забележал возач на регионалниот пат Охрид – Св. Стефан, во близина на Хидробиолошкиот завод, објави порталот Ohridnews. -Ловџии и упатени во проблематиката, во разговор ни посочија оти не е невообичаено да се забележат диви свињи на ова место во ова време. Со доаѓањето на есента и намалување на зеленилото и храната во планината, овие животни во есен се спуштаат кон Студенчишко блато во потрага за храна, велат тие, пишува порталот. Што се однесува до популацијата на ова диво животно во регионот, долгогодишниот концесионер на ловиштето во Дебрца истакнува оти таа е намалена, за што сведочи фактот што во ловна сезона ловните друштва не успеваат да уловат ни половина од дозволената квота од околу 80 диви свињи.

Успешен лов на ловното друштво Острец, Делчево

Ивона Петрова — Sun, 06 Dec 2020 14:30:12 +0000

Ловното друштво Острец од Делчево оствари успешен лов на диви свињи. Ловот се одвивал на планината Голак, во месноста Стара река при што отстрелани биле седум диви свињи.

Владата да го спречи најавениот отсрел на диви свињи: Испратено барање од здруженија за заштита на животните

Ивана Ефремовски — Fri, 23 Aug 2019 09:51:34 +0000

Седумнаесет здруженија за заштита на животните бараат од Владата да го отповика и спречи најавениот отстрел на диви свињи, како дел од мерките за превенција од болеста африканска чума. Тие посочуваат дека „животните не се предмети за да се уништуваат, туку свесни, интелегентни суштества“, осудувајќи го субвенционирањето на, како што велат, „масовниот колеж на домашните, питоми свињи и комплетен отстрел на дивите по планините“. Здруженијата образложуваат дека болеста африканска чума не е опасна по луѓето и бараат поддршка од членството, граѓаните, итно да се отповикаат овие мерки и да се применат мерките што ги применуваат во соседството. Здруженијата кои го упатија апелот до Владата се: Анима Мунди; Гласот на животните- Велес; Мали Херои – Битола; Animal world, Струга; Daisy family rescue; Шепасти Ентузијасти, Анималиа – Охрид; Angelcats sanctuary; ЕДЕН; Срце за животните – Тиквеш; Saving Ohrid Strays; Cat Shelter Meow Paws; Живот – Штип; Про Анима –Берово; Иницијатива „Лајка“, Охрид/Струга; Здружение за заштита на животни ARC – Animal Rescue & Care – Битола; Ние за Животните, Куманово. Како дел од мерките што Владата ги донесе против појава и ширење на болеста се отстрел на диви свињи, уништување на питомите свињи кои не се под биосигурносен надзор и засилени царински контроли на граничните премини за да се спречи неконтролирано внесување свинско месо. Свинската чума не е опасна и не ги напаѓа луѓето, но е смртносна за свињите и брзо се шири. Извор на вирусот на оваа опасна болест која ги погодува домашните и дивите свињи се заразените, болните или угинати животни, заразената храна и отпадоци од храна, опрема, возила, облека и мекиот крлеж како биолошки преносител на болестa. Африканска свинска чума, освен во Бугарија, од пред една седмица е потврдена и во Србија. Ја има и во уште дваесеттина други земји, а се шири и зема се поголеми размери. (МИА)

Ловџиите против одлуката војската да се вклучи во отстрелот на диви свињи

Предраг Кукиќ — Thu, 22 Aug 2019 12:54:02 +0000

Ловечката федерација на Македонија ги поздравува и поддржува биосигурносните мерки што ги воведе Министерството за земјоделство, шумарство и водостопанство (МЗШВ) како превентива од африканската свинска чума, но се противи на влучувањето на Армијата во отстрелот на диви свињи и на рокот од 10 дена за застрел на 50 отсто од годишниот план. Ова денеска го порача претседателот на Ловечката федерација на Македонија, Влатко Алексоски, на прес-конференцијата во МЗШВ што се одржа по средбата на ресорниот министер Трајан Димковски со претставници на Ловечката федерација и Национални шуми. Предложивме и поддржуваме биозаштитни мерки, но се противиме на можноста за вклучување на Армијата во спроведување на отстрелот на дивата свиња и поставување временски ултиматум од 10 дена за реализација на 50 отсто од планираниот годишен застрел, бидејќи реално таа бројка за 10 дена не може да се постигне- рече Алексоски. Тој посочи дека заедно со концесионерите наскоро ќе излезат со конкретни мерки до ресорното Министерство и до Владата. Како концесионери и ловци сме загрижени за нашиот дивеч и сакаме отстрелот да биде во разумни граници и да не се доведе на биолошки минимум, односно да не дојде до негово истребување – рече Алексоски. Министерот Димковски ги повтори одлуките од последната владина седница поврзани со преземањето превентивни мерки за спречување на ширењето на болеста африканска свинска чума што ја има во соседните земји. Во превентивата се фокусиравме на намалување на бројот на диви свињи во кој е вклучена Ловечката федерација на Македонија. Ќе следат и средби со здруженијата на одгледувачи на свињи. Кај нас се уште нема појава на болеста, но сме една од првите земји која презема превентивни мерки. Се решивме тоа да го направиме пред појавата на болеста, бидејќи сметаме дека на тој начин ќе се заштедат пари во буџетот. Истите мерки, но многу порадикално ќе треба да се преземат и доколку дојде до болеста, а тогаш загубите во свињарскиот сектор ќе бидат многу поголеми и бројот на дивите свињи ќе се доведе до биолошкиот минимум – рече Димковски. Во земјава има околу 120.000 свињи од кои 18.000 се сместени во близу 2.000 одгледувалишта, кои имаат од една до 10 свињи и не можат да ги обезбедат основните биосигрносни мерки за заштита од африканската свинска чума. МЗШВ предвидува околу 65 милиони денари за обесштетување од 3.000 денари на сточарите кои не можат да ги обезбедат основните биосигурносни мерки. Се нудат и по 1.000 денари за застрелана дива свиња, како и ловџијата да може да го задржи месото. Концесионерите плаќаат концесија од 20 отсто од државната цена од предвидениот отстрел. Државната цена изнесува 13.500 денари за машка дива свиња и 5.500 за женска.