договор со грција – Kurir.mk

Стојаноска: Владата потпиша договор со кој ние сме новоформирана држава без историја

Ивона Петрова — Sun, 02 Dec 2018 11:34:19 +0000

Според договорот граѓаните на Република Северна Македонија кога ќе го употребуваат терминот Македонија, а согласно овој договор немаат да имаат никаква дозвола за тоа на ниту едно место, во нитуедна прилика освен да шепотат по дома, истакна денес во Собранието на Република Македонија, пратеничката на ВМРО-ДПМНЕ Дафина Стојаноска. -Оваа Влада потпиша и се согласи ние да станеме новоформиран и новоформулиран народ без историја. Ова е она што се крие зад промените на Уставот и зад овој срамен договор. Едноставно се што е побарано од јужниот сосед е прифатено од оваа Влада. Ова е катастрофа за македонската диполматија. Оовј договор е триумфален и победнички за Грција, но е капитулантски и погубен за Македонија, истакна пратеничката на ВМРО-ДПМНЕ. Таа додаде дека проблемите нема да се решат и да завршат со овој договор, туку напротив ќе се отворат нови. -Како ќе гласи химната на Македонија, дали денес над Македонија се раѓа ново сонце или ќе завладее мрак на истата. Колеги од владеачката коалиција вразумете се додека сеуште има време за тоа, вразумете се и добро размислете што правите, не е ова за иднианта на Македонија, со вас Македонија веќе нема иднина, потенцираше таа. На крајот Стојаноска истка дека оваа Влада започнува иднина на една нова земја, а не на Македонија.

Мицкоски: Договорот со Грција е штетен, асиметричен и капитулантски

Ивона Петрова — Thu, 22 Nov 2018 21:38:12 +0000

Претседателот на ВМРО-ДПМНЕ, Христијан Мицкоски го повтори партискиот став за Договорот од Преспа во вечерашното интервју на 1ТВ. Тој потенцираше дека договорот е капитулантски, штетен и асиметричен за Македонија. Мицкоски посочи дека истиот ќе има последици во периодот што доаѓа, последици и замки на сметка на Македонија, особено во процесот на интегрирање на државата во Европската Унија. -За нас овој договор е навистина асиметричен, штетен капитулантски како што сме го нарекле многу пати во минатото. И сите оние последици кои во периодот ќе доаѓаат, а на кој што ќе биде сведок македонската јавност се дополнителни замки во процесот на македонското интегрирање во рамките на Европската Унија. Просто е невозможно тоа што е зададено како цел во рамките на тој период кој што е зададен како цел да биде реализирано, вели Мицкоски.

Мнозинството Македонци против Договорот со Грција

Ивона Петрова — Wed, 21 Nov 2018 18:56:45 +0000

Мнозинството Македонци во Република Македонија се против Договорот со Грција, односно не се согласуваат истиот да продолжи со спроведување во Собранието преку процесот на измени на Уставот на државата, покажуваат резултатите од најновата анкета која ја објави вечерва телевизија Телма. Според податоците 54,4 проценти од Македонците не поддржуваат понатамошното спроведување на Договорот кој владата на Зоран Заев го потпиша со Грција. Албанците пак, во 92,6 проценти сметаат дека спроведувањето на Договорот треба да продолжи. Резултатите од спроведената анкета посочуваат дека Македонците во најголем дел не ја поддржуваат одлуката на седумте пратеници да гласаат за уставните измени. Ваквата одлука на пратениците не ја поддржуваат 47,4 проценти од испитаните Македонците.

„Нема дилема ВМРО-ДПМНЕ останува против договорот со Грција“

Катерина Бојаџиева — Fri, 09 Nov 2018 18:43:40 +0000

Нема дилема, јас тоа го кажав и во оние тонски парчиња за националните телевизии и тоа им пренесов на соговорниците дека ВМРО-ДПМНЕ останува против, и тука нема никаква дилема, појасни претседателот на ВМРО-ДПМНЕ, Христијан Мицкоски, на прашањето кое се однесуваше за договорот од Преспа, во емисијата „Отворено“ на ТВ Алфа. Мицкоски образложи дека не би било сериозно ние да ги менуваме ставовите од денес за утре. -Постојат и такви политичари, кои што тоа го прават од денес за утре, но тие обично траат до следните избори. Но, народот односно граѓаните на Република Македонија тоа јасно ќе го препознаат на следните предвремени или редовни парламентарни избори. И сите оние политичари кои што деноноќно ги менуваат, дневно ги менуваат своите изјави ќе бидат пратени во историјата на темната страна.

Дескоски: Грција ја има истата можност како и во договорот во 1995 година да ја блокира интеграцијата на Македонија

Матеја Петровски — Thu, 11 Oct 2018 08:35:15 +0000

Универзитетскиот професор, Тони Дескоски вели дека нема никаква разлика во членовите околу интеграцијата на Македонија во меѓународните институции, дека членовите се исти и во времената согласност од 1995 година и во договорот потпишан во Преспа оваа година, меѓу Македонија и Грција. Фејсбук статус на Тони Дескоски: ШТО Е РАЗЛИКАТА? WHAT'S THE DIFFERENCE? Искрено, јас не гледам никаква разлика. I honestly can't see any difference. Член 11 став 1 од Времената согласност од 1995: “. . . Првата страна се согласува да не приговара на пријавата за членство и на членствотро на Втората страна во оние Меѓународни, мултиратерални и регионални институции и органи-зации во кои Првата страна е членка. Но, Првата страна го задржува правото да приговара на секое горенаведено членство, ако и доколку привременото обраќање со кое на Втората страна треба да и се обраќаат во таквите организации и институции се разликува од она наведеното во резолуцијата 817 (1993) на Советот за безббедност на Обединетите нации.” “. . .The Party of the First Part agrees not to object to the application by or the membership of the Party of the Second Part in international, multilateral and regional organizations and institutions of which the Party of the First Part is a member; however, the Party of the First Part reserves the right to object to any membership referred to above if and to the extent of the Party of the Second Part is to be referred to in such organization or institution differently than in paragraph 2 of the United Nations Security Council resolution 817 (1993).” Член 2 став 1 од Преспанската спогодба: „1. Првата страна се согласува да не приговара на барањата за членство или членството на Втората страна, под името и термините од член 1, став 3 од оваа спогодба во меѓународните, мултилатералните и регионални организации и институции, во кои членува Првата страна.” “1. The First Party agrees not to object to the application by or the membership of the Second Party under the name and terminologies of Article 1 (3) of this Agreement in international, multilateral and regional Organizations and institutions of which the First Party is a member.”

Дескоски: Со договорот од Преспа, ние полека но сигурно го заокружуваме исполнувањето на сите грчки барања од 1992 година

Матеја Петровски — Wed, 10 Oct 2018 14:14:12 +0000

Универзитетскиот професор Тони Дескоски во статус на Фејсбук, објаснува што е целта на одредбата од чл. 1, ст. 12 од Преспанкиот договор, со која се предвидуваат измени на Преамбулата, чл. 3 и чл. 49 од Уставот на Република Македонија. Фејсбук статус на Тони Дескоски: ШТО Е ЦЕЛТА НА одредбата од чл. 1, ст. 12 од Преспанкиот договор, со која се предвидуваат ИЗМЕНИ НА Преамбулата, чл. 3 и чл. 49 од УСТАВОТ на Р. Македонија? ОДГОВОР: ДА СЕ ОПРАВДА ГРЧКОТО НЕПРИФАЌАЊЕ НА МИСЛЕЊЕТО БР. 6 НА БАДИНТЕРОВАТА КОМИСИЈА, И ДА СЕ ДОБИЕ ИМПЛИЦИТНО ПРИЗНАНИЕ ОД НАШАТА СТРАНА ДЕКА ГРЦИЈА БИЛА ВО ПРАВО КОГА НЕ ГИ ПРИФАТИЛА НАВОДИТЕ НА БАДИНТЕР ЗА НАШИОТ УСТАВ. Образложение: Во неодамнешната конверзација уважениот Амбасадор Зашов ми укажа на една работа во врска со спорот за името: дека всушност со Договорот од Преспа, ние полека но сигурно, го заокружуваме исполнувањето на сите Грчките барања од 1992 година, кои беа испорачани од Владата на Мицотакис, по добивањето на позитивното мислење од т.н. Бадинтерова комисија. И навистина, кога човек ќе го погледне чл. 1 ст. 12 од Договорот, ќе нотира дека дека покрај уставниот амандман за промена на името на државата во „Република Северна Македонија", предвидени се уште три амандмани на Преамбулата и членовите 3 и 49. За разлика од амандманот за промена на името, за останатите три амандмани не е наведено ниту која ќе биде нивната содржина, ниту пак која е целта која се сака да се постигне. Тоа е можно доколку се изврши увид во Грчките документи од 1992-93 година. Најнапред, во обраќањето на Министерот Самарас од 17 јануари 1992 година (два дена по објавувањето на Бадинтеровото мислење), во кое тој објаснува зошто за Грција не е прифатлив наодот на Бадинтеровата комисија. Меѓу другото, кај нашиот Устав, според него се проблематични Преамбулата - заради повикувањето на документите на АСНОМ, чл. 3 - затоа што предвидува дека територијата на Р. Македонија е неделива, но предвидува и можност за менување на границата, и чл. 49- заради тоа што предвидува дека „Републиката се грижи за положбата и правата на припадниците на македонскиот народ во соседните земји". За сите неверни Томовци, еве линк до текстот на обраќањето на Министерот Самарас: http://www.macedonian-heritage.gr/OfficialDoc…/Samaras2.html Впрочем, за ова пишуваше и проф Шкариќ во една неодамненшна колумна на интернет портал. Понатаму, истите забелеќки на Грција, се наведени и во Дописот на Грчкиот Министер за надворешни работи Папаконстантину до Генералниот секретар на ОН од 25 јануари 1993 година, со кој допис Грција се противи на било каков прием на Р. Македонија во ОН. (UN doc. S/25158) Овој допис е објавен како Анекс 26 кон нашиот Поднесок-Мемориал кон тужбата пред МСП во Хаг, а подолу објавувам делови од него. Со прифаќањето на обврската за измени на Преамбулата, чл. 3 и чл. 49 од Уставот во Преспанскиот договор, навидум се чини дека целта на двете страни е да се промени содржината на Преамбулата и на двете уставни одредби. Но, оние што ќе се потсетат на Историјата на спорот, веднаш забележуваат (исто како и Амбасадорот Зашов), дека всушност Грција на овој начин реализира едно свое барање, поставено по објавувањето на Бадинтеровото мислење за содржината на нашиот (изменет) устав. Ќе потсетам, дека позитивното Бадинтерово мислење е добиено дури откако ние за само 12 дена ги променивме токму чл. 3 и чл. 49 од Уставот. Всушност, ние со прифаќањето повторно да ги промениме чл. 3 и чл. 49, а над тоа и Преамбулата на Уставот, всушност во целост имплицитно (премолчно) признаваме дека Грција со право ги спорела овие уставни одредби, независно што истите се позитивно оценети од Бадинтеровата комисија. Уште повеќе, ова е имплицитно признание и дека Грција со право инсистирала на овие уставни измени, дури и откако истите не ги добила од Претседателот Глигоров во Времената спогодба од 1995 година. Сега приказната полека се заокружува.

Ласовска до Мираковска: Договорот е мртов и не може да си ги толкувате законите како вам ви одговара

Ивана Ефремовски — Wed, 10 Oct 2018 13:22:07 +0000

Најстрашно е да носиш противуставни одлуки и одлуки кои се против волјата на граѓаните на Република Македонија. Договорот од Преспа е мртов, не може ние да си ги толкуваме резултатите од референдумот како на нас што ни одговара. Има закон и Устав во оваа змеја кои што ние мора да го почитуваме, вели Благица Ласовска, пратеничка на ВМРО-ДПМНЕ на денешната комисиска расправа за уставните измени. Ласовска додаде дека на референдумот на 8-ми септември од 1991 година за името Република Македонија се изјасниле 76 проценти или 1 милион 132 илјади граѓани од вкупниот број на граѓани со право на глас, додавајќи дека од овој референдум и покрај тоа што на сила се обидувале да го протуркаат излегле само 36проценти или 605 илјади граѓани. Таа реплицираше дека проблемот не во избирачкиот список како што велат од СДСМ, додавајќи дека СДСМ два пати ги одложувале изборите со образложение дека претходно избирачкиот список не е прочистен и дека во него има 500 илјади фантоми. -Избирачкиот список вие го чистевте, ние ве чекавме. Два пати ги одложувавте изборите, сите знаеме зошто. Изборите ги одложувавте затоа што велевте дека има 500 илјади фантоми. Зошто сега повторно тој избирачки список за вас е проблематичен, праша Ласовска. На крај таа во својата реплика додаде дека резултатите од референдумот од 8 септември 1991 година се на сила и дека никој нема право да оди против волјата на граѓаните на Република Македонија.

Вељаноски: Договорот не извира од македонските интереси, а Македонија и Собранието се доведени пред свршен чин

Ивана Ефремовски — Wed, 10 Oct 2018 12:05:57 +0000

Ваквото водење на процесот од тесна група на владеачки политичари, наместо јавни дебати за ова национално прашање, резултураше со тајни преговори. Наместо консензус на политичките партии, создаде партиска поларизација. Наместо обединетост на граѓаните, доведе до дополнителна поделеност во општеството. Наместо чувство дека Договорот е дело и нашето општество и граѓанате, се создаде чувство дека се работи за туѓо наметнато решение и за спогодба која ја доведува Македонија во положба на потчинетост и зависност кон друга држава. Ова го истакна Трајко Вељаноски, пратеник на ВМРО-ДПМНЕ на денешната Комисија за уставни прашања во македонското Собрание. -Ова чувство на наметнато туѓо решение, дополнително се зацврстува кога во споредба ќе се земат изјавите на владините први луѓе од јануари оваа година, кога тврдеа дека можно е да се постигне решение со Грција без да се менува Уставот на Република Македонија. Само по 4 месеци, во мај оваа година истите луѓе уверуваа дека единствен достоинствен компромис со Грција е името Република Илинденска Македонија, и дека тоа е веќе договорено на највисоко ниво, а дека доколку не се прифати тој пакет, Министерот за надворешни работи рече дека како чин на одговорност ќе си поднесе оставка. Ова се показатели дека Договорот не извира од македонските интереси, туку дека е наметнат од другата страна, а Македонија и Собранието се доведени пред свршен чин. Освен овие суштински недостатоци во процесот, кои доведоа до штетен договор и поделено општество, тесниот владин круг на кој тајмингот на потпишувањето на договорот изгледа му беше поважен од квалитетот на договорот, направи и многу крупни незаконски и противуставни грешки, кои самиот процес го прават неуставен, а самиот договор нелегитимен, истакна Вељаноски. Прво, според член 3 од Законот за склучување и ратификација на меѓународни договори вели “Меѓународните договори во име на Република Македонија ги склучува претседателот на Републиката“. Вељаноски заклучува дека овој договор не е потпишан од Претседателот на Република Македонија, што е спротивно на законот. -Второ, самиот чин на ратификација, наместо како што налага Законот и Деловникот на Собранието, наместо да оди преку матичната комисија за надворешни работи, процесот неделовнички се водеше во комисијата за европски прашања. После оваа неуредна ратификација следуваа суштински и законски забелешки од Претеседателот на државата, но тесниот владин круг кој брзаше да има Договор по секоја цена, не обрна ни најмало внимание на тоа, напротив, следуваа изјави со потценување и деградирање на таа институција. Тоа доведе денес да имаме еден наметнат и набрзина склучен политички договор, кој ниту е потпишан од Претседателот на државата, ниту е објавен со Службен весник на Република Македонија, што самиот Договор го прави нелегален. Трето, владиниот тесен круг кој ги исклучи сите други инстуционални актери од процесот и го погази легалитетот на договорот, реши легитимитетот за истиот да го побара од граѓаните, веројатно како покритие за сите претходни незаконски чекори. И така, Премиерот тука во Собранието даде ветување дека ќе се постапи согласно Уставот и Законот за референдум и ќе се организира задолжителен референдум, како што налага член 120 од Уставот и членовите 23 и 24 од Законот за референдум. Но и тоа ветување не траеше подолго од неколку дена и владеачкото мнозинство, без да ја консултира опозицијата, без да направи јавна расправа со стручната јавност, донесе одлука за консултативен референдум, спротивно на наведените Уставни и законски норми. Четврто, тесниот владин круг, не се ни потруди да има недвосмислено и едноставно референдумско прашање, не се ни потруди референдумското прашање да го усогласи со опозиционите партии или со Претседателот, туку спротивно на членот 15 од Законот за референдум, реши да скрои што посимпатично тросмислено прашање, повторно прекршувајќи го законот и потценувајќи ја интелегенцијата на граѓаните, рече Вељаноски. Тој потенцира дека малиот владин круг на кој многу му се брза со ова прашање, продолжи со политиката “тие и само тие“. -Тие сами водеа кампања, тие сами определија буџет за кампањата, тие сами одлучија кампањата да се сведе на еднострана пропаганда, тие одлучија да го закупат целиот медиумски простор, тие сами со себе си водеа дебати, тие правеа и објавуваа оптимистички анкети, тие носеа странски гости по свој избор, и тие имаа мнозинство во Државната изборна комисија. За ваквите незаконски и монополизирани постапки власта беше критикувана, но никој не им пречеше во ништо, истакна Вељаноски.

Дескоски: И да се промени Уставот и името на државата, Македонија може да биде блокирана од страна на Грција поради неуспешниот референдум

Матеја Петровски — Tue, 09 Oct 2018 09:56:38 +0000

Иако референдумот беше неуспешен и пропадна, противејќи се на волјата на скоро 1,2 милиони граѓани кои гласаа против или ставот против договорот го кажаа без да гласаат на референдумот, Владата реши да предложи уставните промени од овој договор да одат преку Собранието. Како и во целата кампања, така и сега власта не ни го споменува она што го носи договори, туку само предностите кои би ни ги донела интеграцијата во НАТО и ЕУ, велејќи дека Грција веќе нема да смее да не блокира со имплементација на овој договор. Во договорот јасно пишува дека за договорот да се спроведе, прво мора да помине на референдум во Македонија, што не беше така во овој случај, бидејќи референдумот беше неуспешен со излезност од само 36,89 проценти излесност. Експертската јавност вели дека и со имплементација во Собранието и промена на Уставот во Република Македонија, Грција може да ја блокира интеграцијата на Македонија во НАТО и ЕУ, токму поради референдумот. Ова го потврдува во статус на Фејсбук и сопругот на министерката за правда Рената Дескоска, универзитетскиот профеоср Тони Дескоски, кој вели дека поради неуспешниот референдум Грција секогаш ќе може правно засновано да одбие да го ратификува протоколот за пристапување на Македонија во НАТО. -Денеска гласавме. И покрај сите полемики, моето мислење е дека прашањето беше кристално јасно. Кристално јасно е и дека на референдумот немаше доволен број на граѓани кои би се изјасниле на поставеното прашање. Сега, кога имаме неуспешен референдум , чувствувам потреба да укажам на една одредба од Преспанската спогодба, која во значителна мерка може да влијае на идните постапки. Имено, во чл. 2 став 4, точка б, алинеја ii (втора,трета и четврта реченица), изречно е пропишано дека поддршката на Грција за наше зачленување во НАТО е условено од исполнувањето на два кумулативни услови: прво, од исходот на референдумот (кој мора да е конзистентен со Спогодбата) и второ, усвојувањето на Уставните амандмани (четири на број). Тоа значи дека без исполнување на било кој од двата услови, Грција нема да има обврска да не поддржи за членство во НАТО. Тоа пак значи, дека дури и да ја ратификуваат Преспанската спогодба во нивниот парламент, ние ќе бидеме во нивна милост или немилост, за тоа дали ќе не пропуштат во НАТО. Грција секогаш ќе може да се повика на неуспешниот референдум, и совршено правно засновано да одбие да го ратификува протоколот за наше пристапување во НАТО. Тогаш, ниту Меѓународниот суд на правдата нема да пресуди за нас. Оттука, пред да се пристапи кон уставни измени, укажувам на опасноста со која се соочуваме, дури и ако амандманите бидат усвоени, напиша во завршувањето на референдумскиот ден на 30 септември, професорот Дескоски. Професорот Дескоски на први октомври реагираше откако во медиумите беше кажано дека тоа што тој го пишал ден претходно го немало во договорот. -Денес слушнав едно мислење од еден од оние експерти кои не го прочитале текстот на Преспанскиот договор, и кој не верува дека таму го пишувало тоа што јас го цитирав во вчерашниот пост. Уште од студентски денови јас го следам советот на покојниот Проф Матовски дека во закон мора да се гледа (другиот дел нема да го обзнанам). И еве, за јавноста да види дали постои одредбата која ја цитирав и што таа пропишува, ја објавувам истата, напиша на Фејсбук професорот Дескоски. Инаку, иако референдумот не беше успешен со што значи дека договорот со Грција повеќе не важи, власта сепак реши истиот да го „помине“ во Собранието, откако вчера доставија предлог за негова ратификација во Собранието.

Предлогот за уставни измени влегува во Собрание, неизвесно двотретинското мнозинство

Матеја Петровски — Tue, 09 Oct 2018 07:13:41 +0000

Владата иницираше постапка за Предлог за пристапување кон уставни измени, кои веќе се пристигнати во Собранието. И покрај започнувањето на постапката за уставни измени неизвесно е дали ќе има доволен број пратеници (80) за нивно носење или ќе се оди на предвремени парламентарни избори. За многумина во Македонија, но и за претставниците на ЕУ и НАТО предвремени парламентарни избори не се решение за излез од оваа ситуција која настана по референдумот, кога излезноста беше околу 37 отсто, а опозициските пратеници кажаа дека нема да поддржат уставни измени. Предвремени парламентарни избори за Македонија би значеле уште едно оддолжување на процесот на реформи за влез на земјата во Унијата и членство во НАТО, би имало влијание врз буџетот бидејќи ќе треба да се одвојат средства за нивно одржување, а би можела да се доведе во прашање целокупната изборна постапка имајќи предвид дека се најавува изборен циклус во кратки рокови. Првичниот рок за распишување на избори што го првично го најави премиерот Зоран Заев беше среда, 10 октомври, но како што велат од владејачките партии тоа би можело да се пролонгира до крајот на неделата. Во понеделник е закажана нова пленарна собраниска седница, која би можела да биде последна во овој состав. Од владејачките партии велат дека разговори со пратениците од опозицијата има, но никој јавно не кажува со колкумина и кои се тие. Од ВМРО-ДПМНЕ, пак, ги отфрлаат овие тврдења велејќи дека пратеничката група е единствена и дека нема да поддржи уставни измени за промена на името. Премиерот Заев во интервју за сервисот на грчки јазик на „Еуроњуз“ повтори дека на Македонија не и се потребни избори и оти избори ќе има само доколку се неопходни и дека во тек се консултации со пратениците. Истакна дека само доколку не успеат сите можни начини за постигнување на двотретинско мнозинство во Собранието, само тогаш земјата ќе оди на избори, а паралелно ги повика пратениците да го сторат она што е нивна должност кон државата. -На Македонија не и се потребни избори. Македонија сега е на правилен пат. Ќе отвориме едно поглавје во јуни. Ќе имаме наше место на масата на разговори во Брисел и во НАТО со почеток на ратификацијата на протоколот во парламентите на 29 држави членки на НАТО. Од економски аспект, Македонија се наоѓа во одлична ситуација и нема потреба да одиме на избори, освен ако не е потребно. А секако, ако распишеме избори очигледната цел ќе биде 2/3 односно 80 пратеници, вели Заев и објаснува дека, според анализите, во случај на избори. Лидерот на ВМРО-ДПМНЕ Христијан Мицкоски, пак, вчера во отворено писмо до Заев, меѓу другото кажа дека јалови се обидите за условување и уцена на пратеници за поддршка на уставните амандмани. Побара од Заев и власта уште еднаш да размислат. -Нема друга држава во светот каде премиерот отворено кажува дека нема да ја почитува волјата на мнозинството граѓани и јавно вели дека поисплатливи му се јаловите обиди за условување и уцена на пратеници. Тоа нема да помине, посочи Мицкоски. Мицкоски уште додава дека со отфрлањето на неговиот предлог од неделата, Заев и власта покажале дека се плашат од слободни, фер и демократски избори. Собранието треба да реши дали ќе ја следи волјата на народот, изјави вчера министерот за надворешни работи Никола Димитров на дебата „Билатералното на Балканот: Регионалните импликации на билатералните спорови“, организирано во рамки на Форумот за граѓанско општество Скопје 2018. -Излезноста на референдумот беше близу 37 проценти и иако имаме Изборен законик кој предвидува цензус, сепак 609 илјади граѓани кажаа „да“. Тоа е мнозинството и тие сакаат Македонија да оди напред. Следат разговори во Парламентот. Ни претстои историска одлука. Нашата реалност е дека не може да го заобиколиме спорот за името на патот кон НАТО и ЕУ. Парламентот треба да реши дали ќе ја следи волјата на народот. Ова е клучот. Ако сакаме напред, треба да го искористиме овој клуч, рече Димитров. Димитров меѓу другото истакна дека предвремени парламентарни избори се последна опција. Во меѓувреме, генералниот секретар на НАТО Јенс Столтенберг уште еднаш порача дека нема план Б за Македонија, оти земјата сега има можност која се случува еднаш во животот и дека може да стане членка на НАТО само ако го прифати договорот со Грција. -Цврсто верувам дека она што земјата треба да го направи сега е да донесе одлуки за натамошните чекори. На Владата и на Собранието е да ги донесат тие одлуки. Да решат како ќе одат напред, како да реагираат на референдумот и на сите политички импликации и последици што тој ги донесе, изјави Столтенберг кој денеска е во посета на Србија. Генералниот секретар на НАТО нагласи дека ако демократските институции во Скопје одлучат да го спроведат во целост договорот со Грција, тогаш НАТО е подготвен брзо да ја прифати Македонија како своја 30 членка. (Миа)